¶ The vij fable is of the camel and of Jupiter
Uery creature ought to be content
of that / that god hath gyuen to
hym withoute to take their herytaunce
of other / As reherceth this
fable Of a camel whiche ſom
tyme complayned hym to Jupiter of that the
other beeſtes mocqued hym / by cauſe that he
was not of ſo grete beaute / as they were of /
wherfore to Jupiter Inſtantly he prayd in ſuche
maner as foloweth / Fayr ſyre and god / I requyre and
praye that thow wylt gyue to me hornes /
to thende that I maye be nomore mocqued /
Jupiter then beganne to lawhe / and in ſtede of
hornes / he took fro hym his erys / and ſayd /
thow haſt more good than hit behoueth thee to
haue / And by cauſe that thow demaundeſt that /
whiche thow oughteſt not to haue I haue take
fro the that whiche of ryght and kynd thow
ouȝteſt to haue / For none ought not to deſyre
more than he ought to haue / to the ende that
he leſe not that whiche he hath /
