¶ The xv fable is of the buſſhe / and of the aubyer tree
One for his beaute ought not to deſpreyſe ſome other / For ſomtyme ſuche one is fayre that ſoone wexeth lothely and fowle / and to hyghe falleth vnto lowe / as it apperyth by this fable / Of a fayr tree whiche mocqued and ſcorned a lytyl buſſhe / and ſayd / ¶ Seeſt thow not / my fayre fourme and my fayre fygure / And that of me men and byldeth[errata 1] fayre edefyces as palays and caſtellis / galeyes & other ſhippes for to ſaylle on the ſee / And as he auaunced & preyſed hym ſelf thus / came there a labourer with his axe for to hewe and ſmyte hym to the ground / And as the labourer ſmote vpon the fayre tree / the buſſhe ſayd / Certaynly my broder yf now thow were as lytel / as I am / men ſhold not hewe ne ſmyte the doune to the erthe / And therfore none oughte to reioyſſhe hym ſelf of his worſhip / For ſuche is now in grete honour and worſhip / that herafter ſhalle falle in to grete vytupere ſhame and diſhonour