¶ The xxvj Fable is of the wynd and of therthen pot
e that ouer moche enhaunceth hym
ſelf / ſooner than he wold / he
falleth doune / as hit appereth by
this fable / Of an erthen pot
maker whiche made a grete pot
of erthe / the whiche he dyd ſette in the ſonne /
by cauſe that more ſurely hit ſhold haue ben
dryed / Ageynſte the whiche came and blewe a
grete wynd / And whanne the wynd ſawe the
potte he demaunded of hym / who arte thow /
And the pot anſuerd to hym / I am a potte the
beſt made that men can fynde / & none may
lette ne empeche me / And how ſayd the
wynde / thow art yet al loſte / and haſt neyther
vertue ne none force / and by cauſe I knowe wel
thy ouer pryde / I ſhall breke the / and putte
the in to pyeces / to thende / that thow of thy
grete pryde mayſt haue knowlege / And therfore
the feble ought to meke and humble hym ſelf
and obeye to his lord / and not to enhauce[errata 1] hym
more than he ought / to thende / he falleth not
from hyhe to lowe
