be hit that the woman wold haue reſyſted / Neuertheles in thende ſhe was content / And thus the poure man reſtored the thowſand crownes to the Ryche / and demaunded of hym the honderd crownes / And the ryche full of frawde or falſhede ſayd to the poure / thow rendreſt not to me al my gold / whiche thow fondeſt / For of hit I lack four honderd pyeces of gold And whanne thow ſhalt rendre and brynge to me ageyn the ſayd four hondred pyeces of gold / thow ſhalt haue of me the C crownes too whiche I promyſed to the / And thenne the poure anſuerd to hym / I haue take and brought to the al that I haue found / wherfore they fylle in a grete dyfferent or ſtryf / in ſo moche that the cauſe came before the kyng / to be decyded and pletyd/ of the whiche the kyng made to be callyd before hym a grete philoſopher whiche was procuratour of the poures / And whanne the cauſe was wel diſputed/ the philoſopher moued with pyte/ called to hym the poure man / and to hym ſeyd in this maner / Come hyther my frend / by thy feythe haſt thow reſtored alle that good whiche thou fondeſt in the purſe / and the poure anſuerd to hym / ye ſyre by my feythe / And thenne the philoſophre ſayd before thaſſiſtantes / Syth this ryche man is trewe and feythfull / and that hit is not to byleue / that he ſhould demaunde more
