than he ought to doo / he ought to be byleued / And as to the other parte men muſte byleue that this poure man is of good renomme and knowen for a trewe man wherfore the philoſopher ſayd to the kynge / Syre I gyue by my lenience / that thow take theſe thowſand crownes / and that an C thow take of them / the whiche honderd thow ſhall delyuere to this poure man whiche fond them / And after whan he that hath loſt them ſhall come / thow reſtore them to hym / And yf it happeth that another perſone fynde the thowſand & four C crownes / they ſhal be rendryd and taken ageyne to the ſame good man whiche is here preſent whiche ſayth that he hath loſt them / the whiche ſentence was moche agreable and pleſaunt to al the companye / And when the ryche man ſawe that he was deceyued / he demaunded myſerycorde and grace of the kynge ſayenge in this manere / Syre this poure man that hath fond my purſe / trewely he hath reſtored it to me all that I ouȝt to haue / but certaynly I wold haue deceyued hym / wherfore I praye the that thou wylt haue pyte and myſerycorde on me And thenne the kynge had myſerycorde on hym / And the poure man was wel contented and payd / and al the malyce of the ryche man was knowen and manyfeſted
