¶ The xx fable maketh mencion of the ſwalowe / and other byrdes
E that byleueth not good counceyll /
may not fayll to be euylle counceylled
/ wherof Eſope reherceth
to vs ſuche a fable / Of a plowgh
man / whiche ſowed lynſeed / and
the ſwalowe ſeyng that of the ſame lynſeed men
myght make nettes and gynnes / wente and ſayd
to al other byrdes / Come with me ye al & lete
vs plucke vp al this / For yf we leue hit growe /
the labourer ſhal mowe make therof gunnes[errata 1] and
nettes for to take vs al / Alle the byrdes deſprayſed
his counceyl / ¶ And thenne as the ſwalowe
ſawe this / he wente and herberowed her in the
plowgh mans hows / ¶ And whanne the flaxe
was growen and pulled vp / the labourer made
grynnes and nettes to take byrdes / wherwith he
took euery day many other byrdes / and brought
them to his hows / to the whiche byrdes the
ſwalowe thenne ſayd / I told yow wel / what
that ſhold happe therof / wherfore men ought
not to deſprayſe good councylle / For he that is
euyl aduyſed and not wel counceyled ſhalle haue
moche payne
¶ Here fynysshed the fyrst booke of Esope /