¶ The thyrde fable is of the theef and of the dogge
Hanne that one gyueth ony thyng /
men ought wel to take hede / to
what ende hit is gyuen / wherof
Eſope reherceth ſuche a fable /
of a theef which came on a nygt[errata 1]
within a manns hows for to haue robbed hym /
And the good mans dogge beganne to bark at
hym / And thenne the theef caſted at hym a
pyece of brede / And the dogge ſayd to hym /
thow caſteſt not this brede for no good wylle /
but only to the ende / that I hold my pees / to
thende that thow mayſt robbe my mayſter / and
therfore hit were not good for me / that for a
morſell of brede / I ſhold leſe my lyf / wherfore
goo fro hens / or els I ſhalle anone awake my
mayſter and alle his meyne / The dogge theynne
beganne to bark / and the theef beganne to flee /
And thus by couetyſe many one hue oftyme
receyued grete yeftes / the whiche haue been
cauſe of theyr dethe and to leſe theyre heedes /
¶ Wherfore