6
For I defy the meikle deil, An'a' his works I wat fu' weel ; Fat sorrow then maks you sae eery? Fling by your fears and come be cheery. Landlord gin ye'll mak up that bed, I promise I'll be very glad, Within the same a' night to lye, If that the room be warm and dry. The Landlord says, Ye's get a fire, An' candle toon gin ye desire, Wi' beuks to read, and for your bed, I'll orders gie to get it made. John says, as I'm a Christian man, Who never likes to curse nor ban, Nor steal, nor lie, nor drink, nor whore, I'll never gang within its door, But sit by the fire-side a' night; An' gang awa whene'er 'tis light. Says Thrummy till him, wi' a glow'r, Ye cowardly gowk, I'll mak ye cow'r, Come up the stair alang wi' me, And I shall caution for you be. Then Johnny faintly gae consent, An' up stairs to the room they went, Where soon they gat baith fire and light: To haud them hearty a' the night; The Landlord likewise gae them meat, As meikle as they both could eat; Shew'd them their bed an' bade them gang To it, whene'er they did think lang: And wishing them a guid repose, Straight syne to his ain bed he goes.