9
Crummie is mine since she was a calf, and now she has a stirk will tak the bill ere Belton yet; I hae twa stane of gude lint, and three pockfu's of tow, a gude ca'f bed, twa bowsters and three cods, with twa pair of blankets, and a covering, forby twa pair to spin, but my mither wadna gie me creesh to them, and ye ken the butter is now dear.
Jock. Then fareweel the nicht, Maggy; the best of friends maun part.
Mag. I wish you weel Johnny, but say nae mair till we be married, and then, lad.
Hame gaed Maggy and telled her Mither.
Mag. O mither! I hea something to tell ye, but ye mauna tell my father?
Mith. Dear Maggy, and what is that?
Mag. Deed, mither, I'm gaun to be married an the muck were out.
Mith. Dear Maggy, and wha'st thou gaun to get, 'tis no auld bubly Tammie?
Mag. Na, na, he's a braw young man, and I'll tell you, 'tis Johnny Bell; and his mither sent him to the market just to court me ance errand.
Mith. Deed Maggy, ye'll no be ill yoked wi' him, he's a gay well gaun fellow, right spruce, maist like an ill-faured gentleman. Hey gudeman, do you hear that our Maggy is gaun to be married an the muck were ance out.
