The English and Scottish Popular Ballads/Part 6/Chapter 163

From Wikisource
Jump to navigation Jump to search


AS I cam in by Dunidier,
An doun by netherha,
There was fifty thousand Hielanmen
A-marching to Harlaw.
Wi a dree dree dradie drumtie dree.
As I cam on, an farther on,
An doun an by Balquhain,
Oh there I met Sir James the Rose,
Wi him Sir John the Gryme.
'O cam ye frae the Hielans, man?
An cam ye a' the wey?
Saw ye Macdonell an his men,
As they cam frae the Skee?'
'Yes, me cam frae ta Hielans, man,
An me cam a' ta wey,
An she saw Macdonell and his men,
As they cam frae ta Skee.'
'Oh was ye near Macdonell's men?
Did ye their numbers see?
Come, tell to me, John Hielanman,
What micht their numbers be?'
'Yes, me was near, an near eneuch,
An me their numbers saw;
There was fifty thousan Hielanmen
A-marchin to Harlaw.'
'Gin that be true,' says James the Rose,
'We'll no come meikle speed;
We'll cry upo our merry men,
And lichtly mount our steed.'
'Oh no, oh no,' says John the Gryme,
'That thing maun never be;
The gallant Grymes were never bate,
We'll try phat we can dee.'
As I cam on, an farther on,
An doun an by Harlaw,
They fell fu close on ilka side;
Sic fun ye never saw.
They fell fu close on ilka side,
Sic fun ye never saw;
For Hielan swords gied clash for clash,
At the battle o Harlaw.
The Hielanmen, wi their lang swords,
They laid on us fu sair,
An they drave back our merry men
Three acres breadth and mair.
Brave Forb s to his brither did say,
Noo brither, dinna ye see?
They beat us back on ilka side,
An we'se be forced to flee.
'Oh no, oh no, my brither dear,
That thing maun never be;
Tak ye your good sword in your hand,
An come your wa's wi me.'
'Oh no, oh no, my brither dear,
The clans they are ower strang,
An they drive back our merry men,
Wi swords baith sharp an lang.'
Brave Forb s drew his men aside,
Said, Tak your rest a while,
Until I to Drumminnor send,
To fess my coat o mail.
The servan he did ride,
An his horse it did na fail,
For in twa hours an a quarter
He brocht the coat o mail.
Then back to back the brithers twa
Gaed in amo the thrang,
An they hewed doun the Hielanmen,
Wi swords baith sharp and lang.
Macdonell, he was young an stout,
Had on his coat o mail,
An he has gane oot throw them a',
To try his han himsell.
The first ae straik that Forb s strack,
He garrt Macdonell reel,
An the neist ae straik that Forb s strack,
The great Macdonell fell.
An siccan a lierachie
I'm sure ye never saw
As wis amo the Hielanmen,
When they saw Macdonell fa.
An whan they saw that he was deid,
They turnd an ran awa,
An they buried him in Leggett's Den,
A large mile frae Harlaw.
They rade, they ran, an some did gang,
They were o sma record;
But Forb s an his merry men,
They slew them a' the road.
On Monanday, at mornin,
The battle it began,
On Saturday, at gloamin,
Ye'd scarce kent wha had wan.
An sic a weary buryin
I'm sure ye never saw
As wis the Sunday after that,
On the muirs aneath Harlaw.
Gin ony body speer at you
For them ye took awa,
Ye may tell their wives and bairnies
They're sleepin at Harlaw.


AS I cam thro the Garrioch land,
And in by Over Ha,
There was sixty thousan Highland men
Marching to Harlaw.
The Highland men, with their broad sword,
Pushd on wi might and power,
Till they bore back the red-coat lads
Three furlongs long, and more.
Lord Forb s calld his men aside,
Says, Take your breath awhile,
Until I send my servant now
To bring my coat o mail.