The fables of Aesop by William Caxton (Jacobs)/Annotated/Vol. II/Liber Primus/Fable 19
¶ The xix fable is of the mylan whiche was seke and of his moder
E that euer doth euylle ought not
to suppose ne haue no trust that
his prayer at his nede shalle be
herd / Of the whiche thynge Esope
sheweth to us suche a fable / Of
a mylan whiche was seke / so moche that he had
no truste to recouer his helthe / And as he sawe
hym so vexed with feblenes / he prayd his moder
that she shold praye vnto the goddes for hym /
And his moder ansuerd to hym / My sone thow
hast so gretely offendyd and blasphemyd the
goddes that now they wol auenge them on the /
For thow preyest not them by pyte ne by loue /
but for dolour and drede / For he whiche ledeth
euylle lyf / and that in his euylle delynge is obstynate
/ ought not to haue hope to be delyuered
of his euyll / For whan one is fall into extremyte
of his sekenes / thenne is the tyme come that he
must be payed of his Werkes and dedes / For he
that offendeth other in his prosperyte / whan he
falleth in to aduersyte / he fyndeth no frendes.