User:Beleg Tâl/Sandbox/Aelfric

Beleg Tâl/Sandbox | Aelfric

Ælfric's Lives of Saints

Chapter 00

incipit praefatio huius libri. Hunc quoque codicem transtulimus de latinitate ad usitatam Anglicam sermocinationem, studentes aliis prodesse edificando ad fidem lectione huius narrationis quibus-cumque placuerit huic operi operam dare, siue legendo, seu Audiendo; quia estimo non esse ingratum fidelibus. Nam memini me in duobus anterioribus libris posuisse passiones uel uitas sanctorum ipsorum, quos gens ista caelebre colit cum ueneratione festi diei, et placuit nobis in isto codicello ordinare passiones etiam uel uitas sanctorum illorum quos non uulgus sed coenobite officiis uenerantur. Nec tamen plura promitto me scripturum hac lingua, quia nec conuenit huic sermocinationi plura inseri; ne forte despectui habentur margarite christi. Ideoque reticemus de libro uitæ patrum, in quo multa subtilia habentur quæ non conueniunt aperiri laicis, nec nos ipsi ea quimus implere. Illa uero que scripturus sum suspicor non offendere audientes, sed magis fide torpentes recreare hortationibus, quia martyrum passiones nimium fidem erigant languentem. Unum cupio sciri hoc uolumen legentibus, quod nollem alicubi ponere duos imperatores siue cesares in hac narratione simul, sicut in latinitate legimus; sed unum imperatorem in persecutione martyrum ponimus ubique; Sicut gens nostra uni regi subditur, et usitata est de uno rege non de duobus loqui. Nec potuimus in ista translatione semper uerbum ex uerbo transferre, sed tamen sensum ex sensu, sicut inuenimus in sancta scriptura, diligenter curauimus uertere Simplici et aperta locutione quatinus proficiat Audientibus. Hoc sciendum etiam quod prolixiores passiones breuiamus uerbis, non adeo sensu, ne fastidiosis ingeratur tedium si tanta prolixitas erit in propria lingua quanta est in latina; et non semper breuitas sermonem deturpat sed multotiens honestiorem reddit. Non mihi inputetur quod diuinam scripturam nostrae lingue infero, quia arguet me praecatus multorum fidelium et maxime æþelwerdi ducis et æðelmeri nostri, qui ardentissime nostras interpretationes Amplectuntur lectitando; sed decreui modo quiescere post quartum librum A tali studio, ne superfluus iudicer.

Ælfric gret eadmodlice æðelwerd ealdorman and ic gescge þe leof . þæt ic hæbbe nu gegaderod on þyssere béc þæra halgena þrowunga þe me to onhagode on englisc to awendene . for þan þe ðu leof swiðost and æðelmær swylcera gewrita me bædon . and of handum gelæhton eowerne geleafan to getrymmenne . mid þære gerecednysse . þe ge on eowrum gereorde næfdon ǽr. Þu wast leof þæt [þæt @ Skeat] we awendon on þam twam ærrum bocum þæra halgena þrowunga and lif . þe angel-cynn mid freols-dagum wurþað. Nu ge-wearð us þæt we þas bóc be þæra halgena ðrowungum and life . gedihton þe mynster-menn mid heora þenungum betwux him wurðiað .

Ne secge we nán þincg niwes on þissere gesetnysse . forþan ðe hit stod gefyrn awriten on ledenbocum þeah þe þa læwedan men þæt nyston .

Nelle we eac mid leasungum þyllic liccetan . forþan þe geleaffulle fæderas and halige lareowas hit awriton on leden-spræce . to langum gemynde . and to trymmincge þam towerdum mannum .

Sum witega clypode þurh þon̅ halgan gast and cwæð . Mirabilis deus in sanctis suis . et cet. Wundorlic is god on his halgum . he sylf forgifð mihte and strengðe his folce . gebletsod ís hé god. We awritað fela wundra on þissere béc . forþan þe god is wundorlic on his halgum swa swa we ǽr sædon . and his halgena wundra wurðiað hine . forþan þe hé worhte þa wundra þurh hí.

An woruld-cynincg hæfð fela þegna and mislice wicneras . he ne mæg beon wurðful cynincg buton he hæbbe þa geþincðe þe him gebyriað . and swylce þening-men . þe þeawfæstnysse him gebeodon.

Swa is eac þam ælmihtigan gode þe ealle þincg gesceop . him gerisð þæt he hæbbe halige þenas þe his willan gefyllað . and þæra is fela on mannum anum þe he of middan-earde geceas . þæt nan bocere ne mæg þeah he mycel cunne . heora naman awriten . forþan þe hí nat nan man .

Hi synd ungeryme swa swa hit gerisð gode . ac we woldon gesettan be sumum þas bóc . mannum to getrymminge . and to munde us sylfum . þæt hí us þingion to þam ælmihtigan gode . swa swa we on worulde heora wundra cyðað .

Ic bidde nu on godes naman gif hwa þas bóc awritan wille . þæt he hí wél gerihte be þære bysne . and þǽr namare betwux ne sette þonne we awendon . Uale in domino . Men ða leofestan hwilon ǽr we sædon eow hú ure hælend crist on þisum dæge on soðre menniscnysse acenned wæs of þæm halgan mædene marian. Nu wylle we swa þeah for ðyses dæges mærðe eower mód mid þære gastlican lare onbryrdan eow tó blisse þurh gód. Sume gedwól-mén wæron þuruh deoful beswicane swa þæt hi cwædon þǽt crist godes sunu nære æfre mid þam halgan fæder wuniende . ác wære súm tíma . ær þan þe he acenned wære . ac þæt halige godspéll hæfð oferswiðod swylcera gedwolena andgit for-oft. Þa iudeiscan axodon crist hwæt he wære. Ða andwyrde he him þus. Ego súm principium . qui et loquor uobis. Ic eom angínn . þe eow to spræce. Nu ge habbað gehered hu se hælend be him sylfum sprǽc . þæt hé is ordfruma . and angin ealra þinga . mid his heofonlican fæder . and mid þam halgan gaste. Se fæder is ángin . and se sunu ís angin . and se halga gást ís angin . ác hí ne synd na þreo anginnu . ác hí eallre þry synden án angin . and án ælmihtig god æfre únbegunnen . and úngeændod . ac se man wét þe wyle habban ænig þincg ǽr anginne . forþan ðe seo halige þrynnes . is anginn . and án scyppend ealra gesceafta and nan þing næs ne nys wuniende þe se an wyrhta ne gesceope; Gif hwylc gedwola . oððe awoffod man . wyle furðor smeagen and þæt anginn oferstígan . mid dysilicere dyrstignesse . þonne bið he þam men gelíc þe arærþ sume heage hlæddre . and stihð be þære hlæddre stapum . oðþæt he to ðæm ænde becume . and wylle þonne git stígan ufor . astihð þonne buton stapum . oð þæt he stedeleas fylþ mid mycclum wyrsan fylle swa he furðor stáh. Ðreo þing synd on middanearde . án is hwilwend-lic . þe hæfð ægðer ge ordfrumman ge ende . þæt synd nytenu . and ealle sawul-lease þing þe on-gunnan þa þa hí god gesceop . and æft geændiað and to nahte gewurðaþ. Oðer þing ís éce . swa þæt hit hæfð ordfruman . and næfð nenne ende . þæt synd ænglas and manna saula . þe ongunnen ða þa hí god gesceop . ác hí ne ge-endiað næfre. Ðridde þing ís ece . swá þæt hit næfð naðor ne ordfruman ne ende . þæt ís se ána ælmihtiga god on þrynnesse . and ón annysse . æfre wuniende un-asmeagendlic . and un-asæcgendlíc. Se fæder ís angin . of nanum oðrum . and se sunu ís angin . æfre of þam fæder acenned . and se halga gast ís angin . æfre of þam fæder . and of þam sunu . na acenned ác forð-stæppende forðan þe se sunu is þæs fæder wísdom . of him . and mid him . and se halga gast ís heora begra wylle . and lufu . of him bam . and mid him bam. On ðisne enne god wé sceolon geleafan . and hine mid weorcum wurðian . forðan . þe ealle þa halgan béc ægðer ge on þære ealdan . ǽ . ge on þære níwan soðlice sprecað be þere halgan ðrynnysse . and soðre annysse. Þæs án scyppend wát ealle þing . and gesihð ge þæt gedón ís . ge þæt þe nú ís . ge þæt ðe to-weard ís . ne he nán þing ne for-gít . ne him nan þing ætfleon ne mæg. Ne ón-dret he him nanes þinges . forðan þe he næfð nenne riccran . ne furðon nanne him gelicne. Symble he bið gyfende . and he ne wanað swa-þǽh nan þing hís . ne him nanes þinges nis neod-þearf. Symble he bið ælmihtig god . forðan ðe he symble wyle gód . and næfre nán yfel . ác he hatað þá yfel-wyrcendan . and þá unriht-wisan. Ðá gesceafta þe þæs án scyppend gescéop synden mænig-fealde . and mislices hiwes . and úngelíce farað. Sume sindon ungesewenlice gastas . butan lichoman swá swá synd ænglas on heofonum. Sume syndan creopende on eorðan . mid eallum lichoman . swá swá wurmas doð. Sume gað on twam fotum . sume on feower fotum. Sume fleoð mid fyðerum . sume on flodum swimmað . and hí ealle swa-þeah alotene beoð to þære eorðan weard . and þider wilniað . oððe þæs þe him lyst . oððe þæs þe hí beþurfon . ác se mán ana gæð úprihte . þæt getacnað . þæt hé sceall má þæncan úpp . þonne nyðer . þelǽs þe þæt mód sy neoðer . þonne se lichoma and he sceal smeagen embe þæt æce líf . þe hé to gesceapen wæs . swiðor þonne embe þa eorðlican þing . swá swá hís wæstm him gebicnað. Ealle þás gesceafta habbað anginn . and sume eac ende swá swá we ǽr cwǽdon . ác se soða syppend næfð nán angin . forðan þe he ís him sylf angin . na gesceapen . ne geworht . Se geworhte ealle þing . and wunað . á . ón ǽcnysse. Hine ne mihte nán þing gewyrcean . for ðon þe nán þing næs ær hé . and gif hé geworht wære ne wurde hé næfre ælmihtig god. Æft gif hwylc gewytleas man . wenð þæt he hine sylfne geworhte . þonne axie wé hú hé mihte hine sylfne gewyrcean gif he ǽr nés. He wǽs æfre úngeworht . and æfre wunað un-ge-endod. His we magon wundrian . and wé ne magon . ne ne motan . ná furðor embe þis smeagen . gif we nellað us sylfe for-pæran . Seo sunne þe onliht ealne mid-eard ís godes gesceaft . and we magon understandan þæt hyre leoht ís of hyre . ná heo of þam leohte . and seo hætu gæð of þære sunnan . and of hire leohte gelíce. Swá eac þæs ælmihtigan godes sunu ís æfre of þæm fæder acenned . soð leoht . and soð wisdō . and se halga gast ís æfre of him bam . na acenned . ác forðsteppende . and sé sunu ána . under-fæng menniscnysse and on þisum dege wearð to menn geboren . to þi þæt hé wolde ús to hís ríce gefæccan. Nis nanum menn on ðisum deadlican life libbendum nanes þinges . swa mycel neod . swa him biþ þæt he cunne þonne ælmihtigan god mid geleafan . and siþþan his agene sawle: We habbað eow oft gesæd eowerne geleafan be þære halgan ðrynnysse. Nu wylle we eow sum þing be eowre sawle sæccgan . sceortlice gif wé magon. Ealle þa geleaffullan fæderas þe godes lare awriton . sædon untwylice . and geþwærlehton on þam anum . þæt god gescypð ælces mannes sawle . and seo sawl nis na of godes agenum gecynde. Gif heo wære of godes gecynde genumen . witodlice ne mihte heo singian. Þam men ís gecyndelic þæt hé lufige þæt þæt gód is. Hwæt is gód butan gode anum se þe is healic godnisse . butan þam ne mæg nan man nan þing godes habban . Ðas godnysse we sceolan simble lufian þe ús ælc gód ofcymþ . ac þissere godnysse lufu ne mæg beon butan on þære sawle . and seo án sawul ís æðelboren þe ðonne lufað þe heo fram com . þe hí þyllice gescéop þæt heo on hire andgyte habban mihte godes ánlicnesse and gelicnesse . and þæs wyrðe wære . þæt hyre gód onwunode. Uþwytan sæcgað . þæt þære sawle gecynd is ðryfeald . An dǽl is on hire gewylnigend-lic . oðer yrsigend-lic . þrydde gesceadwislic. Twægen þissera dæla habbað deor and nytenu mid ús . þæt ís gewylnunge and yrre. Se man ana hæfð gesceád . and rǽd . and andgit. Gewylnung is þam menn forgifen to gewilnienne þa ðing þe him fremiað to nit-wyrðum þingum and to þære ecan hæle . Þonne gif seo gewylnung mis-went . þonne acenð he gyfernesse . and forlygr and gitsunge. Yrre ís ðære sawle forgifen . to ðy þæt heo yrsige ongean leahtres . and ne beo na synnum under-þeodd . for þan þe crist cwæð . ælc þara þe synna wyrcð . ís þæra synna ðeow. Gif þæt yrre bið on yfel awend . þonne cymð of þam unrotnisse . and æmylnysse. Gescead is ðære sawle forgifen to gewyssienne and tó styrenne hire agen lif . and ealle hire dæda. Of þam gesceade gif hit miswænt . cymð modignysse and ydel gylp. Gescead wexð on cildrum na seo sawul . and seo sawul þihþ on mægenum . and ne bið namare þonne heo æt fruman wæs ac bið betere ne heo ne underfæhð lichomlice mycelnysse. Seo sawul hæfð swa swa we ǽr cwædon on hire gecynde . þære halgan þrynnysse anlicnysse . on þan þe heo hæfð gemynd . and andgit . and wyllan. An sawul is . and án lif . and án edwist . þe þas ðreo þing hæfð on hire . and þas ðreo þing na synd na ðreo líf ac án . ne þreo ædwiste ác án. Seo sawul . oððe þæt lif . oððe seo edwist . synd gecwædene to hyre sylfra . and þæt gemynd . oððe þæt andgit . oþþe seo wylla . beoð gecwædene to sumum þinga . ed-lesendlice . and þas ðreo þing habbað annysse him betwynan . Ic undergyte . þæt ic wylle undergytan and ge-munan . and ic wylle þæt ic under-gyte and gemune . þǽr þǽr þæt gemynd bið . þær bið þæt andgyt and se wylla . Uton nu behealden þá wundorlican swyftnysse þære sawle . heo hæfð swá mycele swyftnysse þæt heo on ánre tíde gif heo swá wyle . besceawað heofonan and ofer sǽ flyhð . land . and burga geond-færð . and ealle þas þing mid geþohte on hire sihðe gesæt . and swa hraðe swa heo gehyrð þære burge naman . þe heo ǽr cuðe . swá hraðe heo mæg þa burh on hire geþohte gescyppan hwylc heo bið . Eal swá be gehwylcum oðrum þingum þe heo ǽr cuðe . oððe ne cuðe . heo mæg on hire mode gescyppan . þonne heo gehyrð be þam spræcan . And swá styrigende ís seo sawul . þæt heo furðon ón slæpe ne gestylþ . ac ðonne hé smeað be rome byrig ne mæg heo þá hwíle smeagen be hierusalém . oððe þonne heo smeað be anum þing . ne mæg heo þa hwyle be oðrum þinge smeagen . ác biþ gebysgod mid þam anum ðinge oðþæt þæt geþoht gewyte . and oðer cume . Witodlice god ælmihtig wát ealle þing togædere . and ealle þing hæfð on his andwerdnysse . and hí æfre beoþ ón his gesihþe . and næfre him úncuþe . and þis ís þæt gecwæden is þæt god ís æghwǽr eall . forðan ðe ealle þing þe æfre wæron oððe nú synd . oþþe ða þe towearde synd . ealle hí synd on godes gesihðe . an-wearde . na ǽne . ác æfre . Seo sawul soðlice ís þæs lichoman líf . and þære sawle líf ís god . Gif seo sawul forlæt þonne lichoman þonne swælt seo lichoma . and gif god forlæt þa sawle for ormættum synnum . þonne swælt heo on þam sælran dæle swá þæt heo bið for-loren þam ecan life . and swá þeah næfre ne ge-endað on þam ecum wytum . Þes dǽð hire gelimpð . gif heo læt rixian on hire þá gewilnunge and þæt yrre . swiðor þonne þæt gescead þe hí gewysigen sceall to wel-dædum . á . Ðuruh þæt gescead ána we synd sælran þonne þa unge-sceadwysan nytenu . Mid twam wurðscipum ge-glængde se ælmihtiga scyppend þæs mannes sawle . þæt ís mid eccnysse . and eadignysse . Ac heo for-leas þa eadignysse þa ða hé agylte . and heo ne mihte þa ecnysse for-leosan forðan þe heo ne ge-endað næfre . Þære sawle wlyte ís . þæt heo hæbbe mihte . swá þæt heo leahtres forbúge . and heo bið atelic þurh leahtras gif he him under-lið . Ðære sawle mihta syndon þas feower fyrmestan . and sælestan . prudentia . þæt ís snoternysse . þurh þa heo sceal hyre scippend under-standan . and hine lufian . and tosceaden (sic) god fram yfele . Oðer mægen ís . Iustitia . þæt ís rihtwisnys . þurh þa heo sceal god wurðigan . and rihtlice libban . Þæt ðrydde mægen ís . temperantia . þæt is gemetegung . mid þære sceall seo sawul ealle þing gemætegian . þæt hit to swiþe ne sy . ne to hwonlice . forðan þe hit ís awryten . Omnia nimia nocent . þæt ís ealle ofer-done þing dæriað . Witodlice gemetegung ís eallra mægena modor . Þæt feorðe mægen ís . Fortitudo . þæt ís strængð . oððe ánrednyss . þurh þá sceal seo sawul for-bæran earfoðnysse mid ánrædum mode . for godes lufan . and næfre þam deofle ne abúgan to forwyrde . Ðas feower mægenu habbað ænne kynehelm . þæt ís seo soðe lufu . godes . and manna . forðan þe seo sawul ís gesælig . ðe þonne scyppend lufað þe hí gescéop . and hire gefæran . and him fremian [wile] swa heo fyrmest mæge . Seo sawul ís gesceadwis gast . æfre cucu and mæg under-fón ge godne wyllan . and yfelne . æfter agenum cyre . Se wél-willende scyppend læt hí habben agenes cyres geweald . þá wearð heo be agenum wyllan gewæmmed þurh þæs deofles lare . Heo wærð æft alysad þuruh godes gife . gif heo gode gehyrsumað . Heo ís unge-sæwenlic . and ún-lichōlic . butan hæfe and butan bleo . mid þam lichaman befangen . and on eallum limum wunigende . Ne heo ne mæg be hyre agenre mihte of þam lichoman gewytan . ne æft ongean cyrran . butan se wylle þe hi geworhte . and ón þonne lichaman asænde . Heo ís on bocum manegum naman gecyged . be hyre weorces þenungum . Hyre nama is anima þæt is sawul and seo naman gelympð to hire life . And spiritus gast . belimpð to hire ymb-wlátunge . Heo ís sensus . þæt ís andgit . oððe fel-nyss . þonne heo gefret . Heo ís animus . þæt ís mód . þonne heo wát . Heo ís mens . Þæt ís mód þonne heo under-stent . Heo ís memoria . þæt ís gemynd . þonne heo gemanð . Heo ís ratio . þæt ís gesceád . þonne heo tó-scæt . Heo ís uoluntas . þæt ís wylla . þonne heo hwǽt wyle . Ac swa þeah ealle þas naman syndon sawul . ælc sawul ís gást . ác swá þeah nis na ælc gast sawul . Se apostol paulus tó-twæmde þæs gastes naman . and þæs modes þus cwæðende . Psallam spiritu psallam and mente . Þæt is ón ænglisc . Ic singe mid gaste . and íc singe mid mode Se singð mid gaste . se ðe clypað þa word mid muðe . and ne under-stænt þæs andgites getacnunge . and se singð mid mode se ðe þæs andgites getacnunge under-stænt . Seo sawul is þæs lichoman hlæfdige . and heo gewissað þa fíf andgitu þæs lichaman . swá swá óf cyne-sætle . Þá andgitu sint gehatene þus . Uisus . þæt ís gesihð . auditus . hlyst . Gustus . swæc on þam muðe . Odoratus . stǽnc . on þæra nosa . tactus . hrepung . oððe grapung . on eallum limum . ác þeah gewunelicost on þam handum . Ðas fíf andgitu gewisseð seo sawul to hire wyllan . and hyre gedafnað þæt heo swá swá hlæfdige . geornlice foresceawige hwæt heo gehwylcum lime bebeode to donne . oððe hwæt heo gehwylcum lime geþafige on gewylnunge his gecyndes . þæt þǽr nan þing unþæslice ne gelympe on nanes limes þenunge . Swá swá god ælmihtig oferstihð ealle gesceafta . swá oferstihð seo sawul ealle lichamlice gesceafta mid wurðfulnysse hyre gecyndes . and nán lichamlic gesceaft ne mæg beon hyre wið-meten . We cwǽden ær þæt heo wære butan bleo . forþan ðe heo nis na lichamlic . On lichaman bið bleoh . and seo sawul bið swá ge-wlitegod . swa heo on worulde ge-earnode . Be þam cwæþ crist on his godspelle . Tunc iusti fulgebunt sicut sol in regno patris eorum . Þæt ýs on ænglisc . þonne scinað þa riht-wisan swá swá sunne on heora fæder rice . Witodlice þa árleasan beoð heora yfelum weorcum gelíce . Nis seo orþung þe wé ut blawaþ . and in ateoð oþþe ure sawul ác ís seo lyft þe ealle lichamlice þing on lybbað . butan fixum anum þe on flodum lybbað . Oft bið seo sawul ón anum þinge . oððe on anum geþohte . swá bysig þæt heo ne gymð hwá hyre gehende bið . þeah ðe heo ón-locie . ne þeah heo sume stemne gehyre . heo hit ne understent . ne þeah hí hwá hreppe heo hit ne gefret . Hwilon heo besargað hyre lichoman sarnissa . hwilon heo gladað on godum gelimpum . hwilon heo þæncð þa ðing þe heo ǽr cuðe . hwilon heo wyle wytan þa ðing þe heo ǽr ne cuðe . Sume þing heo wyle . sume ðing heo nele . and ealle lichamlicra þinga hiw heo mæg on hyre sylfre gehiwian . and swá gehiwode on hyre mode gehealden . Ðære sawle wlyte ís þæt heo wisdom lufie . ná ðone eorðlican wisdom be þam þe þús awriten ís . Sapientia hui mundi . stultitia est apud deum . Þysses middan-eardes wysdom . ís stuntnis ætforan gode . Ác þonne wisdom heo sceal leornian . þæt heo lufie gód . and hine æfre wurðige on eallum hyre weorcum . and þa þing leornige þe gode liciað . and þa þing forlæte þe him laðe syndon . Þæs wisdom ís awryten on halgum bocum . and be ðam ís þus gecwæden . Omnis sapientia a domino deo est . Ælc wisdom ís of gode . Is nú forðy ælc man eadig and gesælig . se ðe for gode wis bið . and gif heo his weorc mid wisdome gefadað . Be þæm cwæð se ædiga iób . Þæs mannes wisdom ís árfæstnys . and soð ingehyd . þæt heo yfel forbúge . Witodlice þæt ís soþ wysdóm . þæt man gewylnige þæt soðe lif on þam þe he æfre lybban mæg mid gode on wuldre gif hé hit on þyssere worulde ge-earnað . To þám us ge-læde seo leofa drihten crist . se ðe ís soð wysdom . and sawla líf . se ðe mid his ecan fæder . and mid þam halgan gaste . á on ecnysse leofað . Amen.

Chapter 02

eodem die nat̄l̄ sce̅ eugenie uirginis

Mæg ge-hyran se ðe wyle be þam halgan mædene . eugenian philyppus dæhter . hú heo ðurh mægðhád mærlice þeah . and þurh martyr-dóm þisne middan-eard ofer-swað.

Sum æþel-boren þægn wæs philippus gehaten . ðone asende se casere commodus þe on ðam dagum rixode . fram rome byrig to ðære byrig ðe ís gehaten alexandria . and he hine gesette to heah-gerefan ofer alexandrian . and ægyfto lande. and hét þæt he heolde þa romaniscan gesætnysse.

Ðæs ðægn philippus . næs na gefullod on gode . forþan þe cristendóm næs þagyt geond eall cuð . and seo reþe æhtnyss þágýt næs gestylled.

His wíf wæs gecyged claudia be þære he gestrynde twægen suna . auitum . and særgium . and ane dohtor eugenian . þe wé embe spræcaþ.

Ða befæste se fæder philippus tó lare . þæt heo ón woruld-wysdome wære getogen . æfter greciscre uðwytegunge . and lædenre getingnysse.

Eugenia þa þæt æðele mæden . wel þeah ón wisdome . and ón uðwytegunge.

Þa becom hyre on hand þæs halgan apostoles lár paules þæs mæran ealles mancynnes lareowes.

Þá wearð hyre mód mycclum on-bryrd þuruh þá halgen lare . þeah ðe heo þá gyt hæðen wære.

Heo bæd þa hyre fæder þæt heo færen moste geond his hames on alexandiscre scyre . wolde swá cepan þære cristenra lare . forðan þe heo næfde on ðære byrig nænne geleaffulne mann þe hí læren cuþe . forðan philippus aflygde þá cristenan óf alexandrian . ealle on ǽr.

Hwæt þa evgenia ardlice færde . oð þæt héo becóm þær ða cristenan sungen mid mycelre blisse þus mærsigende gód.

Omnes dí gentium demonia . domin autem cælos fecit. Ealle þære hæðenra godas syndon deofla . and dryhten soðlice heofonas geworhte.

Eugenia þa mycclum wearð ónbryrd and mid wope gesprǽc hire twægen cnihtas . þære naman wæron . protus . et iacinctus . þá wǽron gelærede on leden . and on grecisc . mid eugenian mid woruld-licra lare . and wæron eunuchi . þæt synt belisnode . and wæron heora hlæfdige holde and ge-trywe.

Ða nam eugenia hí on sundor-sprǽce . hét hí gebroðra . and bæd þæt hí hyre fæx forcurfon on wæpmonna wysan . and mid wædum gehiwodon . swylce heo cniht wære . wolde ðam cristenan genéalecan ón wærlicum híwe . þæt heo ne wurde améldod.

Hí færdon ða þry . and heora gefæran forleton . oðþæt hí becóman to ðære cristenra wununge.

Þær hí dæges and nihtes heora drihten heroden.

On ðam ylcan dæge cō sum bisceop helenus gehaten . haliges lifes . mid mycelre meniu . án-modlice singende.

Uia iustorum recta facta est . et iter sanctorum preparata est. Þæt ís þæra rihtwisra wæg . ís geriht-læced . and þæra halgena siðfæt is gegearcod.

Þes bisceop worhta fæla wundra þuruh god . and him wearð geswutelod ón swæfne be þy-sum . and eall þæs mædenes mód him wearð ameldod.

Ðá gespræc þæt mæden sumne messe-preost. Eutropius gehaten þæt he hyre ærende abude þam bisceope . þysum wordum geornlice . wé ðry gebroðra wyllað gecyrran fram þam fulan hæðen-scype . tó hælende criste . and we nellað nátes hwon . ús næfre tó-tweman.

Þá þǽs ón mergen se mæsse-preost abead þæs mædenes word . þam mæron bisceope.

Þa hét se bisceop hí gelangian . mycclum þanciende þam ælmihtigan gode . þæt hé wolde hím onwreon þæs mædenes wyllan.

Hé genám hí þá onsundron . and sæde hyre gewislice . hwæt heo man ne wǽs . and hwylcere mægþe . and þæt heo þurh mægð-hád mycclum gelicode . þam heofon-lican cyninge . þe heo gecoren hæfde . and cwæð þæt heo sceolde swiðlice æht-nyssa . for mægð-hade ðrowian . and þeah beon gescyld þurh þone soðan drihten . þe ge-scylt his gecorenan.

To hire twam cnihtum . he cwæð þæt hí heoldan æþel-borennyss ón mode . þeah þe hí mannum þeowdon . and cwæð þæt hí crist gespræce þysum godspellicum wordum.

Ne hate ic eow na þeowan . ác gé synd mine freond.

Þa be-bead se biscop þam gebógenan mǽdene . þæt heo swá þurh-wunade . on þam wærlicum híwe . oþþæt hí on fante gefullode wurdon . and mynster-licre drohtnunge . dearnunge ge-þeodde.

Eugenia þa wunode on þam mynstre mid wærlicum mode . þeah þe heo mæden wære . mid hyre twam cnihtum . úncuð gehwám .

And heold on hyre þeawum halige drohtnunge . ðurh modes liþnesse . and mycelre eadmodnesse . and þurh halige mægnu . þam hælende ge-cwæmde.

Heo þeah on lare . þæs rihtan geleafan . and ón godcundlicum gewrytum mid gódum wyllan . and wearð awend of wulfe to sceape.

Hyre ge-euenlæhton . eac hyre cnihtas . protus . et iacinctus . on synderlicre drohtnunge . and hyre digol-nysse eallum be-dyrndon.

Philippus ðá se fæder forwearð on mode . and séo modor claudia . mid murcnunge wæs for-numen . and eall seo mægð ón mode wearð astyred . and sohten þæt mæden mid mycelre sarnysse.

Hi axoden æt wyccum and æt wisum dryum . eac æt heora leasum godum . be þære godes þinene.

Him wearð þá gesǽd to soþum þinge. þæt ðá godes hí ge-gripon for hyre godnysse .

Þá gelyfde se fæder þære leasunga and hét asmiðigen . of smeatum golde hyre anlycnysse . and þá wurðode swá swá halige gydenan . ac hit wæs gold swá þeah.

Þa æft̅ þrym gearum . þæs þe heo gecyrred wæs gewát se abbod þe hyre ealdor wæs . and þá gebroðra sona ceosan ongunnen . eugenian to abbude . for hyre árfæstan life . and nyston þæt heo wǽs wimman swa þeah.

Ða wearð þæt mæden mycclum hoh-ful . hú heo æfre wæras wissian sceolde.

Ne dorste swá þeah hí ealle gedréfan . and hyra geþeaht forseon . ác fæng to ðam hade.

Hwæt ða eugenia hym eallum gebysnode mid goddre gedrohtnunge . tó godes þeowdome . and mid cárfulnysse . þonne hyred gewissode.

Hyre ge-uðe þá se ælmihtiga wealdend. þæt heo untrume menn mihte gehælan . swá hwylcne swá heo geneosode licgende on sare.

Heo aflygde eac swylce þá fulan deofla . fram ofsættum mannum . þurh soðne geleafan .

Þa wæs sum wíf wælig ón æhtum . melantia gecyged . swiðe þearle ge-dreht . mid lang-sumum feofore . and com tó ðære femnan .

Eugenia þá hí gesmyrode . mid gehalgodum ele . and eac gemearcode mid rode-tacne . and heo þæt reðe attor eall út aspáw . þe hyre dærede . and wearþ gehǽled þurh þæt halige mæden . þa bead seo wydewe þam mædene sceattas for hyre hæle . ác heo hí forsóc . and tihte ðá oþre þæt heo hí dælde . þearfum and wædlum for ðam gewissan eadleane.

Ðá gewænde seo wydewe ham to hyre agenum and com siððan gelóme . mid leasum mode to þam wlytegan mædene . wende þæt heo cniht wære . and mænig-fealde sceattas hyre unmæðlice bead . ác þa þa heo geseah . þæt seo soðfæste fæmne hyre laca ne rohte . ne hyre rununga . þá wearð heo mid yfele . eall afylled . and gebrǽd hí seoce mid bysmor-fullum geþance .

Heo bæd þá eugenian . þæt heo hí geneosode . and ongan hyre sæcgan hyre sweartan geþohtas . cwæð þæt heo wære wydewe on þam geare . and hyre wer læfde unlytle æhta on lande . and on feo . and ón fore-wyrcendum . and unc næs gemæne . man on ðysum lyfe .

Nu ís mín mod awend mycclum to ðe . þæt þu hlaford beo þæra æhta and mín .

Ic wene þæt hit ne sy únrihtwisnysse . ætforan gode þeah ðe þú wifes brúce . and blysse on lífe .

Ða andwyrde eugenia þyssere olecunge . and cwæð to þam wife . mid þisum ingehyde . þæt ða gewylnunga þissere andweardan worulde . synt swiðe swicole . þeah þe hí geswæse beon . and þæs lichoman lustas gelóme be-pæceð . and tó sarnissum gelædað þa þe hi swiðost lufiað .

Æft̅ þissere tihtinge and on oðrum larum . beclypte seo myltestre þæt clæne mæden . and wolde hí gebygan to bismorlicum hæmede .

Hwæt ða eugenia . hí gebletsode . and cwæð to ðære sceande . þæt heo soðlice wære galnysse ontendnyss . and gramena mæge . þeostra gefæra . and mid sweartnysse afylled . Deaðes dohtor and deofles fætels .

Habban þine æhta þine gelícan . wé habbað ealle ðing mid þam ælmihtigan drihtne .

Ðá wearð melantia micclum of-sceamod . wende þæt heo wolde hyre word ameldian . buton heo sylf on ǽr hit openlice cydde .

Færde þá ardlice tó alexandrian byrig . to þam heah-geræfan . þe wæs ge-haten philippus . eugenian fæder . þeah seo fule þæt nyste . and begann hí tó wrægenne . and wolde forsæcgan . cwæð þæt heo eode to hyre licgendre . on læces híwe . and hí wolde for-lycgan . gif heo þæt bysmor forberan wolde . ác ic hrymde sona mid sarlicre stæmne oþþæt an minra wimmanna me wið hine ahredde .

Ða gelyfde philipp þære facen-fvllan segene . and swiðe gehát-heort . hét hí ge-fæccan . and eac ða ge-broðra . ealle gebundene . and heold hí on bendum . and on blindum cwearterne . oðþæt he mid wytum . þæt wíf gewræce .

Þá com se dǽg þe se dema gesætte . and wæron gegeorcode (sic) þá reðan wyta . and wurdon gefætte æt-foran þam deman . þa únscildigan cristenan . on swærtum racentægum .

Ða cw̅ . philipp . mid fullum graman . to eugenian his agenre dehter .

Sege þu forscyldeguda hwí woldest ðu beswican þæt mære wíf melantian mid foligre and on læces híwe hí forlicgan woldest .

Ða cwæð eugenia . þæt heo eaþe mihte . þæs forlyres un-hlisan hí beladian . and melantian onsage mid soðe ofer-drifan . gif philipp wolde gefæstnian mid aþe . þæt seo lease wrægistre ne wurde fordæmed .

Ðá swór philippus þæt he friðian wolde . þa leasan wudewan . ðeah þe heo gelignod wurðe .

Þa bæd eugenia þæt seo wyln sceolde sæcgan þam deman hú hit gedón wære . and hu heo hyre hlæfdian wið hyre lustas ahrædde . and se gerefa hét eac þá cnihtas . melantian hyredes . cyðan be ðison gif hí þis gehyrdon .

Þa cwæð seo wyln . þæt heo wyste . gefyrn . hú eugenia ferde fracodlice on forlygre . and wolde þá æt nehstan . hyre hlæfdian gebysmrian . butan heo mid hreame . hyre hræddinge ofclypode . þis witan (sic) þás hyred-men . þe ic þider clypode .

Ða sædon þa hyred-menn þæt hit soð wære . and ealle mid aðe eugenian forlugan .

Þa wearð se geræfa . þearle gebolgen . and axude eugenian . hu heo ana mihte ealle þa gewytan awægan mid aðe . oððe þurh ænige swutelunge hí sylfe aclænsian .

Hwæt ðá eugenia seo æþele fæmne . cwæð þæt heo wolde hi sylfe be-diglian . and criste anum hyre clænnysse healdan . on mægðhade wuniende . mannum uncuð . and forðy underfænge æt fruman þa gyrlan . wær-lices hades . and wurde ge-efsod .

Æft̅ þysum wordum heo to-tær hyre gewædu . and æt-æwde hyre breost . þam breman philippe . and cwæð him tó . þu eart mín fæder . and þin gebædda claudia . gebær mé tó mannum . and ðás ðine gesætlan synd mine gebroðra . auitus . and særgius . and ic soðlice eom eugenia gehaten . þin agen dohtor . and ic for cristes lufe . forlǽt eow ealle . and middan-eardlice lustas swá swá meox forseah .

Her synd eac þá cnihtas . þe ic cydde mine digolnysse . protus . et iacinctus . þine fostercyld . mid ðam ic becóm to cristes scole . and þǽr ón drohtnode oð þisne andwærden dǽg . and ðam ic wylle æfre oð ende þeowian .

Ðá oncneow philippus swá swá fæder eugenian . and auitus . and særgius . hyra agene swyster . and hyra hyred-cnihtas . hí eadmodlice cyston .

Þis wearð sona gecyd . claudian . þære mæder . and heo mid wundrunge wearð befangen . and tó eugenian cóm mid ealre blysse .

Hi þá gefretewodon . þa fæmnan mid golde hyre un-þances . and úp gesætton to hím .

Þa clypode þæt folc . þæt crist wære soð god . and hí ealle herodon þonne hælend mid wuldre .

Eugenia hæfde ǽr geþingod . þære leasan melantian to hyre leofan fæder . þæt heo mid wytum ne awrǽce hyre welhreowan ehtnysse . ac crist sylf asende swægende fýr ufan of heofonum . þæt menn onhawoden to melantian botle . and hit mid ealle forbernde . swá þæt ðǽr næs to lafe nanðing þe hyre wæs .

Þa wurdon gefullode . philippus . and claudia . and heora twægen suna . mid soðum geleafan . and seo mæste mæniu . þæs mennisces gebeah . to cristes bigengum . and þá cristenan gegododon .

Ðá wurdon geædniwode on ðam eahteoðan geare . þá for-lætenan cyrcan . and seo geleaffulnyss weox .

Philippus þa asende tó seuéro þam casere . and sæde þæt þá cristenan swiðe fremoden . his cyneríce . and romaniscere leode . and hí wǽl wyrðe wæron . þæt hí wunodon butan æhtnysse on ðære ylcan byrig . þe hé hí ǽr of adræfde .

Þa geþafode se casere þæt ðam geræfan . and alexandria seo burh sona wearð afylled mid mycclum cristen-dome . and manegum cyrcum . and ón ge-hwylcum burgum . blissoden þá cristenan . and mid wurðfulnysse . god wurðodon .

Eac for þysum intigan . þæt ægyptisce folc . for-lætenum gedwylde . gelyfde ón drihten .

And philippus forgeaf fæla eahta þam cristenum . him to gemænan brice . and hí gemundode .

Æfter þisum gelamp . þæt ða leasan hæðenan . wrægdon philippum . to ðam fore-sæden casere sædon þæt hé forléte þa lifiendan godas . and ealle þa burh-waræ ge-bigde to criste . þá wearð se casere sona ge-yrsod . and bebead philippe . þæt he buge to his godum . oððe wære be-næmed . wurð-scipes . and æhta .

Þá dælde philipp digollice his æhta . geond ealle þa scyre cyrcum . and þearfum . and þurh mycelne geleafan . manega oðre getrymode . swá þæt ða cristenan hine gecuron tó bisceope .

Ðá æft̅ twælf monðum gemunde se casere hwæt him gesǽd wǽs . and sænde fram rome . oðerne gerefan . mid reðum bebode . swá þæt hé hét acwellan þone cristenan philippum . gif hit soð wære . swá him gesǽd wǽs .

Ða com se geréfa . and hine acwællan ne dorste . on þæs folces gewytnysse for heora freond-rædene . ác asende sume . þe sædon þæt hí wæran on criste ge-lyfede . ác hí lugon swá þeah .

Ðá eoden tó cyrcean mid swiðlicum facne . and ðone mæran biscop . on his ge-bædum ofslogan . ác hé wunade swá ðeah on þam wundum cucu . geond þreora daga fǽc . and gefrefrode þa cristenan . and swá mid martyr-dome . siþþan gewát . to ðam lifigendan drihtne þe he on life wurðode .

Eugenia hæfde . ær þán asteald mynecena mynster . mid mycelre gehealdsumnysse . and seo modor claudia . hit micclum gegodode . and hí þǽr be-byrgdon þone bisceop philippum . and hí siþþan ealle endemes færdon . seo modor . and seo dohtor to ðære mæran rome byrig . and ðá gebroðru samod . særgius . and auitus . and þa romaniscan wytan . hí wél under-fængon . and for þære ealdan cyððe þæs æðelan philippes .

Þa gesætton þá wytan sona þa cnihtas . on twam heafod-burgum . on healicum wurð-mynte . ænne on affrican . and oðerne on cartagine .

Eugenia þá wunode ón rome . and hire coman to gehwylce mǽdenu . and heo hí gebegde mid hyre gebysnunge tó criste . and hí ón mægð-hade wunodon . þurh hyre mynegunge .

Þa wǽs on rome byrig sum cyne-boren mæden . basilla gehaten . on hæðen-scype wunigende . seo wolde gehyran þá halgan lare . of eugenian muþe . ác heo ne mihte hire genealecean . forðan þe cristen-dóm wǽs . þær ónscunigend-lic .

Ða sende eugenia þa twægen halgan . protum . and iacinctum . to ðam hæðenen mædene .

Hwæt þá basilla mid blysse . hí under-fæng . and deges . and nihtes mid þam deorwurðum halgum godes lare be-eode . and hyre gebæda ne ge-swác . oððæt cornelius . þæra cristenra biscop hi dearnunga gefullode . fram eallum fulnyssum .

Þa wurdon gelome þa leofan mædenu . Eugenia . and basilla . and eac se biscop . on sunder-spræce . swiðe gebysgode . and digel-lice on nihtum . hi symble . geneosodon and hæfdon heora gerihtu . mid þam halgan biscope .

Þurh ðas twá mædena . manega oðre becoman to cristes geleafan . and tó clænre drohtnunge .

Ðurh claudian becoman eac clæne wudewan . mid godum wyllan . to godes geleafan . and fæla cnihta on crist gelyfden . þurh ðá twægen halgan . protum . et iacinctum .

Basilla hæfde enne hæðene wogere . pompeius gecýged . swiðe æðel-boren . þam ge-uðe sé casere . þæt kyneborene mæden . ác heo hæfde gecoren crist hyre tó bryd-guman . and þone hæðenan wogere forþí habban nolde .

Þá gesohte se cniht þæs kaseres fétt . and þa romaniscan wytan mid wop-licre ceorunge him mid spræcon . and ðá mædena wregdon . eugenian . and basillan . biddende his fultumes .

Hwæt þá se casere cwæð him tó andsware . þæt basilla sceolde gebúgan to ðam cnihte . oþþe hí mán to-heowe . mid heardum swurde on twá .

And eugenian hé hét his godum geoffrian . oððe hí man mid wýtum wélreowlice acwealde .

He hét eac acwællan . ealle þa cristenan . gif hí noldon búgan to ðam bysmorfullum hæðen-scype .

Þá nolde basilla . brydguman geceosan . nænne butan crist þe heo gecoren hæfde . and wearð þá gemartyrod . for hyre mægðhade . æt hám on hire huse . mid heardum sweorde .

Æfter þysum wordum . þa twægen godes halgan . prot . and iacinctus . wurdon sona gelæhte . and hí sceoldon geoffrian . heora lác þam godum . oððe hí sylfe sceoldon . him beon geoffrode .

Hi wurdon þá gelædde . tó þære laðan ánlicnysse . ác heo to-feol sona tó heora fotum for-molsnod . swá raðe swá þá halgan hi to gode gebædon .

Þa cwæþ se déma . þæt hí mid dry-cræfte . þá anlicnyssa tó-wurpon . and wearð ge-bolgen .

Hét þá be-hæfdian ða halgan cyðeras . and hí swá ferdon . mid síge to criste .

Ðás martyras næron næfre on life þurh wíf besmytene . ác hí wunedon on clænnysse . oð heora lifes ænde . mid mycclum geleafan .

Æfter þysum wearð ge-leaht seo geleaffulla eugenia . and to þam hæðenan temple getogen mid ge-ðreate . þæt heo þære gydenan diane . godes wurðmynt gebude .

Ðá gebǽd eugenia . hi to ðam ælmihtigan gode . and þæt deofles tempel . grund-lunga to-feoll . and on eorðan besanc . mid eallum his anlicnyssum .

Þá hét se casere . ahón anne weorc-stán . on hyre halgan swúran . and hí bescufan on ða ea .

Eac sé stán to-bærst . and heo sæt up on þam wætere . þæt ðá cristenan tócneowan þæt crist wæs mid hyre . seðe hwilon ǽr þone halgan petrum . be ðære hand gelædde . úpp on þam heagan brymme . þæt þæt ða sælican yða hine forswelgan ne mihton .

Ðá hét se casere hí siððan bescufan ón byrnende ofen . þǽr þǽr hate baðu wæron . ac þæt fyr wearð acwænced . and þá baðu acolode . and ealle ða ontendnyssa . mid hyre to-cyme adwæscte .

Heo wearð þá gebroht . into blindum cwearterne . and geond twæntig daga . hyre næs getyðod æniges big-leofan binnan ðam þeostrum . ác se hælend cō mid heofonlicum leohte . and brohte ðam mædene . mærne big-leofon . snaw-hwitne hláf . and on-lihte ðæt cweartern .

Þa cwæð se hælend to ðam halgan mædene .

Eala ðú eugenia . ne beo þú afyrht .

Ic eom þin hælend . þe þu healice wurðost . and mid eallum mode . and mægne lufast .

On þam dæge þa scealt cuman to me . þe ic com tó mannum . and on minre gebyrd-tide . ðú bíst on heofonum gebroht .

Þá cóm se cwællere . on cristes akenned-nysse dæge . ásend fram þam casere . and he þæt mæden acwealde .

Heo wearð þa gemartyrod . and cristene menn hí bebyrgdon .

Ða weop seo modor . mid mycelre sarnysse . æt hyre byrgene . oþ þæt heo hí geseah . on gastlicre gesihðe . mid golde gefrætewode mid ðam heofonlicum werode . þus hí frefrigende .

Mín modor claudia . me hæfð gebroht min hælend crist . to his halgena blysse . and minne fæder gelogode on þære heah-fædera getele . and þu cymst tó ús . nú on sunnan-dæg .

Seo modor gewát ða of worulde to heofonum on ðam sunnan-dæge . and þa suna hí be-stodon . Sergius . and Auitus . and hí siððan þurh-wunodon . on ðam soðan geleafan . oð heora lifes ende .

Sy wuldor . and lóf . þam wel-wyllendan drihtne . on ealra worulda woruld . ealra hís wel-dæda . Amen.

Chapter 03

kl̅ inuarii. depositio sci̅ basilii episcopi.

Basilivs wes ge-haten svm halig biscop . se wæs fram cyld-hade . swiðe ge-healdsum . þeah þe he to langum fyrste . ún-ge-fullod wære .

His fæder . and his frynd hine be-fæstan tó | lare to woruld-wis-dome . ða þa he syfon wyntre wæs . forþan þe on þam tíman ne teah nan æðel-borennysse . nænne man to wurð-scype . butan he wisdom . ær ðam lange leornode æt gelæredum uðwytum .

Þa wunode se cnæplinge on cappadoniscre byrig . fíf geár on lare . and færde to grecum . tó atheniscre byrig . seo wæs þá bremost on láre . and eubolus se uð-wyta . þe þær yldost wæs on wysdome . underfæng þonne cnapan . swá swá he frymdig wæs . tó larlicre scole . and he leornode þá swá þæt ða uðwytan . his andgytes wundrodon .

On þære ylcan scole wæs seo wælreowa iulianus . cristen fram cyld-hade . se wearð casere siððan . and awearp his ge-leafan . and ge-wende to deofle .

Eac þær leornode . on þære ylcan scole . se æðela Gregorius se ðe eft wearð biscop . and fæla wundra worhta (sic) . swá swá wyrd-wryteres secgað .

Basilius ða wunode mid þam uþ-wytan on lare ealles fíftyne gǽr . and eallne þone wysdom wundorlice asmeade . þe grecisce larewas him læran cuðan .

Ac seo lár ne mihte . þe butan ge-leafan wæs . þam cneorð-læcendum cnihte cyðan be his scyppende . þonne þe he sohte . þeah þe heo him secgan ne cuðe .

Him becom þá on mód þurh mynegunge godes . þæt heo sceolde secan þa soðan lare . on cristenum bocum . be his scyppende .

Hwæt þá basilius . bliðlice ferde . to egypta lande . and þær leornode twelf monað . on halgum bocum . be þæs hælendes fære . hu he þisne middan-eard mid him sylfum alysde .

Æfter geares fyrste . ferde him eft ongean: to his ealdan lareowe . and lærde hine be criste hú mild-heort-lice he alysde mancynn | on rode . and hú hé of deaðe arás . on ðam þriddan dæge: [sic @ Skeat] and to heofonum astáh . to his halgan fæder .

Eubolus se uðwyta þá wearð swá mycclum of-lyst . basilies lare . þæt him ne hlyste nanes metes . ác hí smeadon . ðry dagas . swiðe smea-þancollice . ymbe þæt éce líf . and ætes ne gymdon .

Þá gelyfde se uðwyta . ón þonne ælmihtigan gód . and be-tæhte his æhta . ealle basilie . cwæð þæt hé æfre wolde wunian mid him .

Basilius þá herede þone hælend mid wordum . and cwæð to eubole his ealdan lareowe .

Uton nú aspendan . úre spéda on þearfum . and swá mid ge-bylde bugan tó fulluhte . alysde fram bendum . þissere leasan worulde .

Ðá dydon ða wytan . swá swá him bam ge-wearð . dældon heora æhta . ealle þearfum . and ferdon to hierusalem . fulluht secende . and manega hæðena manna . þurh hí ge-bugan . to drihtne . mid ge-leafan on-bryrde .

Hi coman ða siððan to ðære fore-sædan byrig hierusalem . þær se hælend ðrowade . and ge-sohtan þone biscop . þe ða burh bewyste . bædon fulluhtes . æt his fotum licgende .

Se biscop wæs halig wær . ge-haten maximinus . and wel-wyllend-lice hym ge-tyðode . þæs ðe hí ge-wylnodon . and sona hym mid ferde . to þære [flowendan] éá iordanis ge-haten . on þære wǽs seo hælend ge-fullod .

Hwæt ða basilius hine to eorþan astræhte . and mid wope gewylnode . sum gewis tacen æt gode . his geleafan to trymminge . and alede his rǽf . on þæra éá ofre . & eode in nacod .

Þá ge-nealæhte seo biscop . and mid bletsunge hine gefullode .

Efne þa færlice . com fyr of heofonum . and án scinen|de culfre . scǽt of þam fyre . into ðære éá . and astyrede ðæt wæter . fleah siþþan úpp . forðrihte to heofonum . and basilius eode . of þæm fant-baðe sona . and seo biscop hine be-wæfde . wundriende þæs tacnes .

He gefullode eac siððan . þonne fore-sædan eubolum . and hí begen gesmyrode mid gehalgudum ele . and eac gehuslode . mid þæs hælendes gerynum .

Hí wunodon þá begen mid þæm biscope ofer geár . and siðan gewendon tó anre wid-gyllan byrig . antiochia gecíged . seo soðlice wæs mid cristendóme . afylled . gefyrn on eald-dagum .

Þa gehadode seo biscop . basilium tó diacone . and hé æfter fyrste . ferde mid eubole . tó his agenum æþele . þe he ón ge-boren wǽs .

Ðá mid þam þe hí cóman tó cappadoniscre scyre and eodon intó þære byrig þá wearð þam biscope geswutelod . on gastlicre gesihðe . be ðam godes mannum . and þæt basilius sceolde beon biscop æfter him .

Þá awóc eusebius . þære ceastra bisceop . and asende his preostas . sona him to-geanes . hét him gelangian . þa gelyfeden men tó . and sæde his ceaster-ge-warum . hwæt hé geseah be hím .

Hi wurdon ðá under-fangene mid fulre estfulnesse . and seo halga bisceop . hí heold arwurðlice . þearle wundriende heora . wysdomes deopnysse .

Þá æfter lytlum fyrste . forð-ferde seo bisceop . and basilius sé bylewitta wearð to bisceope gehalgod . and ón his setle ahafen . swá swá hé geséah on ǽr . þurh godes awrygennysse þa þa hí wið his werd wæron .

Hwæt ðá basilius his bisceop-dom ge-heold . mid mycelre arwurð-nysse . þurh þæs ælmihtigan wissunge . and godes gelaþunge . | mid lare ge-trymde .

Hé bæd þonne ælmihtigan god . þæt hé hím ge-wissode . þæt hé mid agenre spræce . hím offrian mihte . ðá lyflican on-sægednisse . mid soð-fæstre þenunge .

Æft̅ þam gebede . he wearð swiðe on-bryrd . þurh þone halgan gast . & se hælend hím com tó on sumere nihte . mid his apostolum . and awrehte basilium . cwæð þæt he his bena ge-hyrde . þa stód se hælend sylf . æt þam halgan weofode . and mid his halgum handum . husel senode . and þam bisceope tæhte . þæs þe hé biddende wǽs .

He cwæð to basilie . beo þín muð afylled mid haligre herunga . æfter þinre béna . þæt ðu mid agenre spræce geoffrian mæge . þá liflican onsægednysse . mid soðre þenunge . þa wearð se bisceop mycclum ablicged . and genam þæt husel þe se hælend ge-bletsode . tó-bræc on þreo . and ón-byrgede anes dæles .

Þone oðerne dǽl hé dyde gehealden mid hím tó be-byrgenne . æft̅ his forð-siðe . þone ðryddan dæl he dyde on-sundor . and het hím smiðian on smætum golde . anre culfran anlicnysse . and þá úp-ahéng . bufan þam altare . and þǽr ón ge-dyde . þone ðryddan dǽl . þæs deorwurðan husles . and seo culfra siþþan . simle hí astyrede . æt basilies messan þriwa mid þam húsle .

Eubolus se uðwyta . and þá yldostan preostas . stoden æt þæra dura . stariende on þæt leoht. and be-heolden þa apostolas . þe mid þam hælende coman . mid wuldre ge-frætewode . and hí wurdon áfyrhte .

Hi ge-hyrdon þa stemne þæs halgan sanges . and basilium gesawon . binnan æt þæm weofode . and feollan tó his fotum mid fyrhte fornumene . þa ða hé út-eode . and him eall sædon . hwæt | hí þǽr gesawon.

Se bisceop þæs ðancode . mid blyðum mode . and þam folce sæde siððan lár-spell .

Witodlice basilius . ge-byld þurh his drihten be ende-byrdnyss awrát . ealle ða þenunga þæra halgan mæssan . swá swá hit healdað grecas .

He awrát eac munuc-regol . mid mycelre gehealdsumnysse . þone þe ðá easternan . and eac swylce grecas ánmodlice healdað . þeah þe he hefegra sy . þonne se ðe benedictus siþþan ús gebysnode . swylce tó anginne . agenre ge-cyrrednysse . ác he tihte us . on æfteweardan þæs ylcan regoles . to geðungenra lareowa . lifes drohtnungum . and tymde to þam regole . þe basilius gesette .

Sum Iudeisc man wolde . ge-wytan to soþan be ðære halgan mæssan . hwylce mihte heo hæfde . and be ðam halgan husle . þeah þe he hæðen wære .

Eode þá to mæssan mid oðrum mannum . and hlosnode georne be ðære liflican onsægednysse .

Þá mid ðam þe basilius . to-brǽc þæt husel . þa þuhte þam Iudeiscan . swylce he tó-dælde án cyld . eode swá þeah mid oðrum mannum earhlice tó husle . and him wearð ge-seald an snǽd flæsces . and he sǽp of ðæm calice eac swylce blód .

Heold swá þeah sumne dæl hám to berenne mid him . and æt-æwode his wife . and ge-wis-lice sæde . hwæt hé sylf ge-seah . and siððan þæs on mergen . com tó basilie biddende fulluhtes .

Hwæt þá se bisceop hine bliþelice gefullode . and ealle his hiwan on þæs hælendes naman .

He eode æfter mæssan út . of þam temple . and efne þa sona hine ge-sohte an wíf biddende his þingunge to anum ge-þungenum ealdor-men .

Basilius þá awrát þa earman wífe án ge-wryt to þæm ealdormenn on þisum andgite .

Þis earme wíf me ge-sohte . | sæde þæt ic mihte hyre to ðe ge-þingian . þonne cyð þu nu ic bidde gif ic swá wél wið þe mæg . swá þæt wif truwað .

Þa rædde se aldorman þæt ærend-gewrit . and sende him ongean sona on gewryte . cwæð þæt hé wolde þam wífe gemyltsian . for his þingunge . ac hé swá þeah ne mihte þæt gafol alecgan . þe heo ge-læstan sceolde .

Þa asende se bisceop to þam foresædon ealdormenn . eft oðer gewryt . mid þysum andgyte .

Gif þú woldest myltsian . and swá þeah ne mihtest . þær is sum beladung on þære sægne .

Gif þu þonne mihtest myltsian . and noldest . ge-bringe þe se hælend to hyre hafen-leaste . þæt þu ne mæge myltsian þeah þú wylle .

Þa æfter sumum fyrste him wearð swiðe gram se healica casera . and hét hine ge-bindan . and him to ge-bringan bysmorlice on hæfte .

Ða asende se ealdorman sona to basilie . biddende earmlice . þæt he þone geyrsodon casere þurh his ge-bedu ge-liðgode . and hit gelamp swá .

Þa ymbe syx dagas . se casere het sendan ongean þone ge-swæncten ealdormán . of þæm nearwum bendum . and him þá bliðe wæs .

Ða com se ealdorman to þam arwurðan biscope . þancode his þingunge . and þam earmum wife be twifealdum forgeald . þæs þe he hyre benam .

Þes ylca bisceop . þe we ymbe sprecað sæde be him sylfum on sumne timan . þæt hé næfre on his lífe ne come neah wífe . þurh hæmed-þíng . ác heold his clænnysse .

On sumum dege ferde . seo fore-sæda bisceop . þa rád Iulianus se arlease casere . mid mycelra fyrdinge . swiðe fús to wíge . and ge-cneow basilium . and cwæð him sóna tó .

Ic hæbbe þe ofer-þogen . on ge-þun|genre lare . and on uðwytegunge .

Him and-wyrde se bisceop .

Forgeafe god ælmihtig . þæt ðu fyligdest wysdome . and bead him mid þam worde þry berene hlafes . swylce for bletsunge . þæs þe he sylf brǽc .

Ða hét se arleasa onfón þæra hlafa . and syllan þam godes menn . gærs to-geanes . and cwæð mid hospe . horse mete ís bere . þæt hé ús forgeaf . underfó hé gærs .

Þa underfæng se halga . þa handfulle and cwæð .

We budon þé casere . þes þe wé sylfa brucað . and þú sealdest ús to-geanes . þæt þæt ðe unge-sceadwyse nytena habbað him to big-leofan . gebysmriende ús .

Þa ge-bealh hine se casere . and cwæð . mid ge-beote . þonne ic eft ge-cyrre . sigefæste fram fyrde .

Ic aweste þinne buruh . and gewyrce tó yrð-lande .

Ic wát þine dyrstignysse . and þine burh-wara . þe tó-bræcon þa anlicnysse . þi ic sylf arærde . and mé to þære gebǽd ge-bygdum cneowum .

Æfter þysum worde hé gewende to persum . and basilius cydde . his burh-warum þís . and nam him to ræde þæt hí þone reðan casere mid sceattum gegladodon . þonne he of þam siðe come .

Hwæt þa seo burh-ware bliðelice ge-gaderode un-gerim feos . æt-foran þam bisceope .

Þa bead he þam folce þreora daga fæsten . and hét hí astígan úp to anre sticolre dune . on þære wæs gefyrn . fore-mære tæmpl . sce̅ marian ge-halgod . mid healicum wurð-mynte . and hí æt þære halgan stowe þone hælend bædon . þæt he hraðe to-wurpe þæs wæl-reowan andgyt . and hí ahrædde wiþ ðone reðan casere .

Þa ge-seah se biscop . þá þá hí swiðost bædon . on sumere nihte . sca̅ marian cuman . mid heofonlicum werode to þære halgan | stowe . and cw̅ . to ðam halgum . þe hyre gehendost stodan .

Clypiað þone martyr mercurium to mé . þæt hé ardlice fare . to þam arleasan Iuliane . and hine acwelle . for þan þe he criste wið-sóc . and be minum sunu . þam soðan gode . tǽl-lice sprecþ . mid to-þundenum mode .

Þa com mercurius . to ðære mæran cwene . mid his ge-wæpnunge . and wearð sona asend . fram cristes meder . to þæs caseres slǽge .

Ða wearð basilius . þearle afyrht . and eode mid eubole eft to ðære byrig . and siþþan to ðan sce̅ . þe on ðæra cyrcean læg . mercurius . se martyr mid mycclum wurð-mynte . and sohte his wæpnu . ác hé ne ge-seah hí na hwær .

Þá axode hé þone cyrcweard . be þæs sce̅s wæpnum . and hé swór þæt hí wæron ge-wyslice . þǽr on æfen .

Þá on-cneow se bisceop . cuðlice his ge-sihðe . and eode eft to ðam munte . mid mycelre blysse .

Kydde þam folce þæt se casere wæs of-slegen . on þære ilcan nihte . swá swá him æt-ewod wǽs.

He eode eft ongean to þam arwurðan sce̅ . wolde ge-wytan . gif his wæpnu coman .

Ðá stód his franca þǽr . fula be-gleddod . mid Iulianes blode . binnan þam gesceote .

Efne þæs ymbe seofan niht . cō to þære ylcan ceastre . án þæs caseres þegna . and cydde þære burh-ware þis .

Iulian᷒ wycode wið þá éá eufraten . and him ofer-wacedon syfan-fealde weardes . þa com sum cempa . uncuð us eallum . swíþe ge-wæpnod . and hyne sona þurh-þydde . mid egeslicum onhræse . and ne æteowde siððan . þa hrymde Iulian᷒ mid hospe . and earmlice ge-wát . on ure ge-wyt-nysse .

Ðus cydde se cempa . and ge-cneowode to þam bisceope ful|luhtes biddende . and se bisceop him þæs ge-tyðode þa bead basilius þære burh-wara heora feoh . ac hí ealle cwædon mid anre stemne . gif we þam dædlicam [read dædlicum] þas cyste ge-uðan . þæt hé ne tó-wurpe ure wynsuman burh . myccle swiðor we sceolan þam soðfæstan gode . þas lac ge-offrian . þe us alysde fram deaðe .

Þu hæfst þæt feoh mid þé . ge-fada embe loca hu þu wylle

Ðá nydde se bisceop þæt hí namon þæne þryddan dæl . and þa twegen dælas . he dyde to þære cyrcean . and to þæs mynstræs neode . mid mænig-fealdum cræftum .

Twa gear ríxode þæs reða Iulianus . and nolde ge-healdan his preost-had on riht . ác truwode on þone hæðen-scype . þe hine to helle ge-brohte .

Eft on sumne tíman . wearð se arfæsta wér for ðan soðan ge-leafan . leaslice ge-wreged . to ualens þam casere . þe ða cyne-domes geweold .

Se wæs on criste gefullod . ác he ne cuþe his geleafan . ac folgode gedwylde . þurh gedwolmanna tihtinge .

Þa hét se casere þone halgan ge-feccan . tó antiochia þære ænlican byrig .

Þa mid þam þe se gedwola . embe his deað smǽda (sic) . þa wearð his agen sunu yfele geuntrumed . and orwena lifes . lǽg æt forð-siðe .

Þá eode seo cwén to ðam casere and cwæð . yfela þu gefadast for gode þinne rǽd nu swelt uncer sunu for ðan soð-fæstan men .

Þá clypode se casere . and cwæð to basilie . gif þin lar is soð . and heo gode gelicað . gebide for mine sunu . þæt his yfel beo aflíged .

Ða cwæð basilius . beald-lice to þam casere . gif þu wylt onriht gelyfan . | þonne lifað þin sunu .

He be-hét þæt hé wolde . and se halga ge-bæd . for þæt seoce cyld . and him wæs sona bet . þa cwædon þa ge-dwól-men . þe dwelodon þone casere . þæt hé ne sceolde búgan . for basilies lare . of his agenum andgyte fram heora æwfæst-nysse . and sædon þæt his sunu wære gesundful þurh hí .

Mid þam þe þa dwól-men . hine bedydrodon þus . þa forð-ferde þæt cyld . færlice on heora handum .

Eft on oðrum timan . se únge-lyfeda ualens . genam godes circean . of þam godes þeowum . and for-geaf þam gedwól-mannum . þe hine bedydrodon .

Ða ferde basilius . to ðam fore-sædan casere . and mende þæt unriht . þe ða yfelan hine ongebrohton . swá þæt se casere æt nextan . betæhte to his dome .

Hwæt þa basilius . to þære byrig ferde . nícea ge-haten . on þæra wæs gehæfd þæt fore-sæde mynster . þe ða manfullan abǽdon . æt þam unriht-wisan casere . and þa cristenan to-dræfdon . þa cwæþ basilius .

Uton be-lucan þas circan . and þæt loc ge-inseglian . and ge ealle siðþan waciað þreo niht wunigende on gebedum . and gif seo cyrce bið geopenad . þurh eowre ge-bena . habbað hí eow æfre siððan . and ne sæcgað us nenne þanc .

Gif þone se ælmihtiga god nelle hi eow geopenian . þonne wacie wé ane niht . þone ælmihtigan biddende . þæt he us geopenige þa ge-insæglodan cyrcan . and gif heo bið swa geopenad . heo bið siðþan ure . and gif heo þonné ne biþ . ne bidde we hyre næfre .

Ða ge-licode þam gedwolum . þæs bisceopes dóm . and wacodon þa þreo niht . and on þam þriddan dege stodan æt þæra cyr|can dura . singende ealle fram ærne mærien . oð ofer midne dæg .

Ac hi crist ne gehyrde . for þan þe hi ne cuþon hine .

Þa wacode basilius . on ge-bedum ane niht mid þam geleaffullan folce . and fængon on ærne mærgen ealle to clypienne . Kyrrieleyson . mid hluddre stemne . to ðam leofan hælende .

Þá com færlice mycel wynd . and wearp upp þa duru . þæt ðá scytelses to burston . and heo slóh on þone weall .

Hi eodon þa in . þone ælmihtigan herigende . and se bisceop messode . and bletsode þa ge-leaffullan . and fæla þǽra gedwól-manna . fengon to geleafan .

Ðá ne mihte se casere . wið-cweþan þam dome . ác lét þa godas [read: godes] þeowas . þæt godes templ bugian . and þæra áre brucan þe him ge-ahnod wǽs . þá fore-sædan gedwól-men . wæron gefullode on gode . ac hí ne gelyfdan onriht . on þone lifigendan crist . ac mid manegum gedwyldum dwelodan þá cristenan .

Sum arwurþe þegn hæfde ane dohter . þá he wolde gebringan . binnan sumum mynstre . and criste be-tæcan . to his clænan þeowdome . þa wearð an his cnapena . to cuð þam mædene . and þurh deofles tihtinge . hí digollice lufode . ác hé ne dorste ameldian his ungemetegodan lufe .

Eode þá to anum drymen þe deofles cræft cuðe . and behét him sceattes . gif hé mid his scyn-cræfte him þæt mæden mihte ge-macian to wífe .

Þa ge-brohte se dry-man . þone cnapan . to his deofle . and se deofol befrán . þone dweligendan cnapan . gif hé wolde ón | hine gelyfan . and his hælende wiðsacen . wið þam þe he gefremode his fulan galnysse .

Þa stod se earming . æt-foran þam arleasan deofle . þær hé healice sǽt mid his hel-cnihtum . and cwæð he wolde wið-sacan his criste . and gelyfan on hine gif he his lust gefremode .

Þa cwæð se sceocca eft .

Ge synd swiðe ungetreowa . þonne ge mín be-hofiað . þonne ic helpe eow . and gé wiþsacað me eft . and cyrrað to eowrum criste seþe is swiðe myld-heort . and myldelice eow under-fehþ . ac wryt me nú sylf wylles . þæt þú wið-saca criste . and þinum fulluhte . and ic ge-fremme ðinne lust . and þu beo on domes dæge . fordemed mid me .

Ða awrát se earming mid his agenra hande swá swa se deofol . him gedihte þone pistol . and se deofol sona sænde to ðam mædene . his fulan gastas . þe galnysse styriað . and ontendan þæt mæden . to þæs mannes lustum .

Heo wearð þa geangsumod mid þæra ormæstan ontendnysse . and feoll adúne færlice hrymende .

Eala þú min fæder . gemyltsa þinre dehter . and for-gif me þam men . þe min mód me to spenð . elles ic mót sweltan . sarlicum deaðe .

Þa weop se fæder . wolde hí ge-fræfrian . and cwæð mid mycelre sarnysse . to þære seocan dehter .

Ic wolde mid clænnysse . criste þe be-weddian to engla gefærredena . to frofre minre sawle . and þu þus wodlice wilnast ceorles .

Heo ne rohte his worda for þæra wodlican ontendnysse . and cwæð þæt heo sceolde sweltan for-raðe . gif se fæder nolde ge-fremman hyre wyllan .

Se fæder þa | æt nextan . be his freonda ræde . forgeaf þa earman dohter þam deofles cnihte . mid mycclum æhtam (sic) . and his mán nyste .

Ða nolde se deofles cniht . cuman næfre to circan . ne godes word ge-hyran . ne þa halgan messan .

Wearð þa ge-openad his earman wife . his manfullan be-hát . þam hetolan deofle . and heo mid mycelre angsumnysse . arn to basilie . and cydde him be ende-byrdnysse hyre cnihtes wiþer-sæc .

Þa hét se halga wer . hine to him gefeccan . and be-frán gif hit swá wære . swa his wif him sæde . and he sæde mid wope hú hé beswican wearð .

Þa axode se bisceop . wylt þú bugan eft to christe .

Se wyþersaca cwæð . ic wylle georne leof . ác ic ne mæg . þeah ic wylle . forþan þe ic wið-sóc criste . and on ge-wryte afæstnode þæt ic wære þæs deofles .

Se halga wer him cwæð tó .

Ne hoga þu embe þæt . ure hælend is swiþe wel-wyllende . and wyle þe eft under-fon . gif þu mid soðre dædbote gecyrst eft to him .

Hwæt þa basilius gebletsode þone cniht . and be-leac hine on-sundron . on sumere digelre stowe . and tæhta (sic) him bota . and ge-bæd for hine .

Com eft ymbe ðry dagas . axode hú hé mihte .

Ða cwæð se dæd-beta . þa deoflu cumað to me . and me swiðe ge-egsiað . and eac swylce torfiað . and habbað him on hande min agen hand-ge-wryt . cweðað þæt ic come to him and na hí to me .

Basilius him cwæð to . ne beo ðú afyrht . gelyf soðlice on god . and sénode hine eft . be-leac eft þá duru . and lede him his mete .

He com eft ymbe feawa daga . and cunnode þæs mannes .

Se cniht | cwæð to ðam halgan were . ic ge-hyra (sic) þa deoflu feorran . and hyra egslican þiwracan . ac ic hí ne ge-seo .

He beleac hine eft on þa ylcan wysan . oð þone feower-teoðogan dæg . and fandode his siððan .

Þa sæde se cnapa . þæt he swiðe wél mihte . nu to dæg ic seah . hú ðu ofer-swiðdest þone deofol .

Basilius þa on mergen . gebrohte þone cnapan Into godes húse . and hét gegaderian þæt folc . and bæd hí ealle wacian . þær on niht mid him . and ðingian þam earman men . to þam ælmihtigan gode .

Mid þam þe hí swiðost bædon . binnan þæra cyrcan . Þa cō se wæl-reowa deofol . wolde geniman þone cnapan . of basili᷒ handum . hetolice teonde . and cwæð to ðam halgan . þæt he hine be-rypte . ne sohte ic na hine . ac hé sylf com to me . her ic habbe his hand-ge-wryt . þæt ic hit ge-healde mid me to þam ge-mænelican dome . on þam mycclum dæge .

Ða cwæð se halga wer . we clypiað to ðam hælende . up-ahafenum handum oð þæt þu þæt hand-ge-wryt agife .

Ða clypodon hí ealle . kyrrieleyson . up ahafenum handum . wið heofonas weard . and efne þa æfter fyrste . feol þæt ylce gewryt . ufon of þære lyfte . to ðam geleaffullan biscope .

He þancode þa gode . mid gast-licra blysse . and axode þone cnapan gif hé on-cneowe þæt ge-wryt .

He cwæð ic on-cnawe þas cartan fulgeare . þis ic sylf awrát . þam awyrgedan deofla .

Hwæt þa basilius . hí sona totær . and gehuslode þone cnapan . and þam hælende betæhte . and lærde hine georne . hú hé lybban sceolde . | on cristes geleafan . oð his lifes ende .

Basilius se mæra . wearð mycclum on-bryrd . and mid godcundre beorhtnysse ge-blyssod . for-þearle . eode þa ardlice to anes preostes húse . and het his gebroðra beon his geferan .

Anastasius wæs gehaten se arwurþa mæsse-preost þe se bisceop to fundode swá færlice mid gange .

Mid þam wunode án mæden mærlice drohtnigende . geond feowertig geare fec fægre gehealden .

Heo wæs mannum geþuht swylce heo his gemæcca wære .

Wytodlyce se messe-preost wyste his to-cyme . þurh þone halgan gast . and wolde hine be-hydan . ac se bisceop wyste hwær he wæs ful geare . and hét hine mæssian for his mærlican drohtnunga.

Þa æt þære messan . wearð his mærð geswutelod . swá þæt se halga gast hine ealne befeng . on fyres gelycnysse . þær hí onlocoden .

Se messe-preost leofode be hláfe and be wætere . and symle he fæste buton on freols-dagum .

He hæfde ænne lic-ðrowere . be-locen on anum clyfan egeslice to-swollen . and un-sprecende fornean . and hine ðær afedde un-afunden oð þæt .

Ða eode basilius . to ðam clyfan . ac se preost nolde undón þá duru mid cǽge . ac se bisceop hi ge-openade . eaðelice mid his worde . and wacode ealle þa niht . mid þam wædlian hreoflian . biddende þone hælend . þæt he hine gehæleda (sic) . and gelædde hine on mergen forð . swiðe fægres híwes . buton ælcum womme . and wél sprecande .

Þus wearð geopenad sé árwurðe mæsse-preost . and þæt halige mæden . | þe his huses gymde . and se bisceop gewende mid his ge-broðrum hám .

Effrem wæs gehaten sum swiðe halig abbod . on wæstene wunigende . fela wundra wyrcende . and manegum oðrum ge-bysnode . þa þe bugan to lare .

Ða ge-hyrde hé be þam wundrum þe basilius worhte . and bæd gelóme æt gode . þæt he him geswutelode hwylc basilius wære on wurð-scype mid him .

Þa wearð þam abbode æt-eowed . án fyren swer . se stód úp aþenod . oð þá steapan heofonan . and him com stemn ufan þus clypiende hlude .

Eala þu effrem eall swylc ís basilius swylce þes fyrena swér . þe þu ge-syhst hér standan .

Ða gewende effrem of þam westene sona to ðam halgan bisceope þæt hé hine ge-spræce . and basiliu᷒ (sic) sende sona him to-geanes . and hine wylcumode . swá swá hé wyrðe wæs . and þa halgan him betweonan embe þæt heofonlice líf . geornlice smeadon . swyðe smeaþancollice .

Æfter þæra halgan messan . mid þam þe hí gereordodon cwæð se halga effrem . to þam arwurðan biscope .

Ic bidde þe arwurða fæder þæt þu me anes þinges tyðige . ic wát þæt þu byst tyða . swa hwæs swa þu bytst æt gode .

Bide nú æt gode . þæt ic grecisc cunne .

Þa cwæð se biscop him tó .

Þú bæde ofer mine mæðe . ac uton swa þeah biddan þas bena æt gode .

Hí feollan þa on gebedum . and basilius cwæð .

Hwi nelt þu lá effrem . nu ðu swá arwurðe eart . beon mæsse-preost and se oðer him cwæð tó . forðan þe ic eom synful .

Þa sæde se biscop . eala gif ic hæfde | þine synna ana .

Hi cneowdon þa æft . and æffrem þa spræc mid greciscum gereorde . god herigende . and se halga bisceop hine hadode to messe-preoste . and his wealh-stód to diacone . and hí wendon eft on-gean to þam wid-gyllan westene . wuldrigende gód .

Sum swiðe welig wíf wæs . swylce on wudewan hade ac heo lyfde sceand-lice . swá swá swín on meoxe . and mid healicum synnum hí sylfe fordyde .

Heo wearð swa þeah æt nehstan wundorlice onbryrd . þurh godes mynegunge . and ealle hyre manlican dæda . awrát on anre cartan . and be-worhte mid leade . gesohte þá basilium biddende and cweðende .

Eale þu godes halga be-seoh me to are .

Ealla mine synna . ic synfulle awrát . on þissere cartan . and ic com to þe leof . and ic bidde þe for godes lufan þæt þú mé unlyse þa insæglunge . ac adylega þa synna . to dryhtne me þingiende . se god þe me forgeaf þis gode geþanc . sé wyle þe ge-hyran me þingiende to him .

Þa genam basilius se biscop þa cartan . and be-seah to heofonum . and cwæð to þam hælende .

Ðin agen dæd ís drihten . þæt þú adylegie synna . þu þe middan-eardes synna myld-heort-lice æt-brytst . eaðelice þu miht þyssere anre sawle synna . adylegian . þu soðfæsta drihten .

Ealle ure synna synd mid þe awrytene . ac þín myld-heortnys ís swiðe mycel . and ún-asmægendlic .

Git þa basiliu᷒ gebæd for þæt wíf . waciende þa niht . and þæt ge-wryt ageaf þam fore-sædan wífe . and þá wæron þa synna ealle adilegode butan anre synna .

Seo wæs seo mæste . and heo wearð þa æmod . biddende | mid wope þone halgan wer . þæt he þa mycclan synne mild-heort-lice adilegode . swá swá he dide þa oðre . þurh his drihtnes unnan . þa cwæð se erce-biscop .

Ic eom eac synful . and myltse behofige . þæs heofonlican dryhtnes .

Ac far þe to westene . and þú fintst anne wer haliges lifes . se hatte effrem . agif him þas cartan . and cyþ him ymbe þe . and he mid gebedum gegladaþ god ælmihtigne . þæt wif gewende þa to ðam westene swiðe . and basilius wearð gebroht on legere to his forðsiðe . fore-wittig swa þeah .

An æþele læce wæs wunigende on þære byrig . Iosep gehaten . hæðen and Iudeisc . se cuðe to-cnawan gif he cunnode þæs mannes . be his ædrena hrepunge . hweðer he hraðe swulte . and Basilivs wiste þurh godes onwrigennysse . þæt hé sceolde þone læce to ge-leafan bringan and on fante fullian . ær his forð-siðe . þa lufode he hine forði . and gelome hine ge-spræc . tihtende to ge-leafan . þeah þe he lange wið-soce .

Ða on sumum dæge sende basilius . æfter ðam ylcan læce swylce he his lacnunga gyrnde . and het hine sceawian be his seocnysse . axude þa hu him þuhte . and se oðer him andwyrde .

Gearciað þa þing . þe eow gewunelice synd . to bebyrigunge . þes biscop gewit hraðe .

Ða cwæð se erce-biscop . to ðam æðelan læce . nastu hwæt þu sægst . þeah þu swá ne wene .

Se læce him cwæð to .

Ne lyfastu oð æfen . þa cwæð basilius . hwæt gif ic bide merigenes .

Se ebreisca cwæþ eft .

Ne bið hit swa langsum .

| Ane tíd ic wene . þæt þin sawul wunige on þe . ac gefada þine þing . for þan þe ic þe sæcge . þæt þes dæg ne ge-endað ofer ðe cucena .

Ða cw̅ basilius mid blyðum mode him to .

Hwæt destu gif ic to mergen mid-deges gebíde .

Se ebreisca cwæð . sylf ic swelte þonne .

Se halga wer sæde . þu scealt sweltan synna . and criste lybban . þurh geleafan awend .

Se læce him andwyrde . and cwæð . þæt he gelyfan wolde . and his wyllan gefreman . gif he wunode of [read oð] mid-dæg .

He be-hét þa mid aðe þæt he to þam hælende gebuge . and fulluht under-fenge . gif se halga fæder leofode .

Hwæt ða basilius bæd þone ælmihtigan god þæt he his líf gelengde þam læce to hæle .

Se biscop þa leofode swa swa he bæd æt gode . and on mergen ge-langode þone læce him to .

Se iudeisca þa com . and cwæð mid wundrunge mid ealre heortan .

Ic sæcge þæt crist is soð god . and heonan-forð wið-sace mid soðum ge-leafan þam hatigend-licum bigengum . þe ða Iudeiscan healdað .

Hat me nu fullian . and mine hiwan ealle on þæs hælendes naman . buton elcunge .

Se ærce-biscop cwæð .

Ic eow ealle fullige . mid minum agenum handum . ðine hiwan . and þe . þa grapode se læce his lima eft . and cwæð .

Ðin mægn is aterod . and þa mihte þu næfst .

Basilius him cwæð to .

We habbað þone scyppend . þe þæt gecynd gescéop . and se us ge-strangað .

He arás ða mid þam worde . and eode to cyrcean . and ætforan þam folce gefullode þone Ioseph . mid eallum his hiwum . and ge-huslode hí siððan . and lærde hí georne . be ðam ecan life .

Siþþan he messode mannum to nones . and lærde hi georne . and luf|lice hí cyste . and genam ðone dǽl þæs deorwurðan husles . þe se hælend gehalgode . þe he heold oð þæt . and æfter þære huslunge . mid herunga ge-wát . to þam lifigendan gode . þe he mid geleafan wurðode . mid þam he wunað on blysse . á butan ende. AMEN.

New part

Hwæt þa se læce þe ðær gelyfed wæs . feoll uppon his breost . mid flowendum tearum . and cwæð mid wope . wella basilius . gif ðu sylf noldest . nære þu git forð-faran . þa com mycel meniu on mergen to ðam lice . and Gregorius bisceop . þe mid basilie leornode . and oðre fela bisceopas . and gebrohten þæt lic . mid gastlicum sangum . Into godes cyrcean .

We wyllað nu ful sæcgan be ðam synfullan wife . þe basilius sende . mid þære anre synne to effremme þam abbude . þæt he ða án adylogode .

 wif becom æt nextan þurh þæt widgylle westen . to ðam halgan effrem . and he wiste hyre fǽr . ðuruh godes onwrigennysse . and hwæt heo wolde þær . and cwæð hire sona to . ic eom synful mann .

Heo awearp þa cartan ða . and cwæð to effremme .

Se ærce-biscop me sende soðlice to ðe . þæt þu ðas ane synne . þe on þyssere ymlan stent . þurh þine ge-bedu adilige . swa swa he dyde þa oðre .

Se halga effrem cwæð . nese nese dohtor . ac se ðé þa manega synne mihte adilegian . þurh his þing-rædene ða þa ðu hine bæde se mæg bet þone ic biddan for ðære anre .

Gang ongean hraðe to ðam godes menn . þæt ðu hine befó ær his forðsiðe . þa arn þæt earme wíf ofer þæt westen swiðe . oð þæt heo to þære byrig be-com . þær man bǽr basilium . and feoll ða to eorðan . flitende wið þone halgan . þæt he hi asende . fram him sylfum to westene . on swa mycelne weg . and ne wearð gefrefrod .

Heo wearp þa mid þam þæt gewryt on ða bære . and cydde þam mannum be hyre misdædum .

| Þa wolde an ðæra preosta . wytan þa synne . and sceawode þa cartan . and clypode to ðam wífe .

To hwi swincst þu la wíf . þeos carte is adilegod .

Seo syn wearð þa adilegod . þurh drihtnes mildsunge . swa swa basilius wolde . þe ða wuldrode mid gode .

Ða fægnode þæt wíf . and þæt folc wuldrode . þone lifigendan god . þe lyfað on ecnysse .

His líc wearð be-byrged on cessariam byrig cappadoniscre scyre . þær þær he sylf biscop wæs . manegum fremiende . mid mycelre lare . and he sylf wolde sweltan for rihte ær ðam þe he for-suwode þone soðan gelyfan . betwux þam gedwol-mannum þe hine drehton for-oft . for ði he wuldrað nú . á . to worulde mid gode. AMEN.

Chapter 04

idvs ianvarii. passio sci̅ ivliani et sponse eivs basilisse.

ivlianvs wæs gehaten . sum æðele godes ðegn . on egypta lande . on antiochian þære byrig .

Se wæs æðel-boren of æwfestum magum . and on cristes lare ge-læred . fram geogoþe.

Þa wolde his fæder . and his frynd ealle . þæt he wifian sceolde þa ða he eahtetyne gæra wæs . ac iulianus cwæð þæt he cunnian wolde his drihtnes wyllan hu he wolde be him .

He wearð þa ge-bysgod on his ge-bedum seofan niht . bæd þone ælmihtigan crist þæt he his clænnysse geheolde .

Ða æt-eowde se hælend hine sylfne on swefne þam æþelan cnihte on ðære eahteoðan nihte . and cwæð þæt he sceolde soðlice underfon mæden him to gemacan . þe hine ne moste ascyrian fram his clænan lufe þe he gecoren hæfde .

Se hælend him cwæð to .

Ic beo sylf mid þe . and on þe adwesce ealle ontendnysse . and þæt mæden ic ge-bige . eac to minre lufe . and on eowrum bryd-bedde . ic beo eow æt-eowed . and þurh eow me bið ge-halgod manegra oðre clennysse | and ic þe under-fo mid ðinum mædene to heofonum .

Ða awóc Iulianus gewyssod þurh his drihten . cwæð to his freondum . þæt he on-fon wolde . mæden him to gemacan . and hi mycclum þæs fægnodon .

Þa fundon his magas sum æðel-boren mæden basilissa gehaten . and him þa begeaten .

Þa wurdon gegearcode þa gyftu æfter gewunan . and hí butu coman on anum bedde to-somne.

Hwæt ða iulianus hine georne ge-bæd . to ðam hælende criste . þæt he hine geheolde . wið ealla ontendnysse . and yfele costnunga .

Ða wearð þæt bryd-bed mid bræðe afylled . swylce þær lægon . lilie and rose .

Ða cwæð basilissa to þam clænan brydguman .

Hit is winter-tid nu and ic wundrie þearle hwanon þes wyrt-bræð þus wynsumlice steme . and me nu ne lyst . nanes synscipes . ac þæs hælendes geþeodnysse mid ge-healdenre clennisse .

Iulianus andwyrde þam æðelan mædene . þes wynsuman bræð þe ðu wundrast þearle . næfð nan angin . ne eac nænne ænde .

Þes bræð is of criste seðe is clænnysse lufigend . gif wit þurh-wuniað on ansundum mægð-hade . and hine clænlice lufiað . þonne cume wit to his rice . and wit ne beoð to-twæmede . ác á to worulde blyssiað .

Basilissa cwæð . þæt heo on clænum mægð-hade þurh-wunian wolde . for ðam wynsuman behate . and habban þæt ece lif . and ðone hælend to bryd-guman .

Þa clypode iulianus on cneow-gebedum ðus .

Confirma hoc deus . quod operatus es in nobis . et reliqua.

Gefæstna þis hælend . þæt þæt ðu on ús gewyrcst . and basilissa sona swa ge-lice dyde .

Þa astyrede þæt bryd-bed . and beorht leoht þær scéan . | and crist wearð gesewen mid scinendum werode . and his modur maria mid hyre mædenlicum heape .

Crist clypode þa to ðam clænan cnihte . and cwæð þæt he hæfde oferswiðod woruldlice gælsan . and þone gramlican feond .

Of marian werode wæs þus geclypod .

Eadig eart þu basilissa . forþan þe þu gebygdest þin mod to halwendum mynegungum . and middan-eardlice swæsnysse mid ealle forsihst . and þe sylfe gearcost to wuldre .

Þa cō to ðam bedde boc fram þam hælende . and twegen his halgan mid twam cynehelmum . arærdan hi þa úpp . and heton hí rædan .

Ða rædde iulianus þas word on þære béc .

Se þe for minre lufe middan-eard forsihð . he bið soðlice geteald to þam unbesmitenum halgum . þe næran on heora life besmitene mid wifum .

Basilissa bið geteald to þæra mædena getæle þe marian folgiað þæs hælendes meder .

Æfter þissere rædinge . and oðrum tihtingum . ge-wendon þa halgan to þam hælende úpp .

Hwæt þa iulianus ungewæmmede heold his bryde . and hi wæron geðeodde mid soðre clænnysse gastlice þeonde on godes gewytnysse .

Heora fæderas wæron gefyrn cristene .

Hit gelamp þa raðe . þæt hi of life gewytan . and læfdon heora æhta þam æðelum mannum .

Iulianus þa dælde . be his drihtnes wyssunga heora land are . þe him læfed wæs . and arærde him mynster and his mædene oðer .

He wearð þa fæder ofer fæla muneca . and basilissa modor ofer manega mynecena . and hí þa gastlican werod under gode gewyssodon . on dæg-hwamlicre lare to heora dryhtnes wyllan . oþ þæt se reðe æhtnysse on egypta lande becom . fram þam | wel-hreowan casere þe wæs geciged dioclytianus .

Þa gebædon . þa halgan hí to þam hælende . and he him asende þisne frofer þus cwæðende .

Eala þu basilissa þine gebedu synd gefyllede þæt ealle þine mædenu of middan-earde gewitað ær ðan þe seo arlease ehtnys . ofer eow be-cume . þæt ge ne beon ge-wem-mede . þurh ða wodan ehteras .

Hit wearð þa gefylled . swa swa him fore-sæde god . þæt ealle ða femnan þe folgodon basilissan gewytan of worulde to þam wuldor-fullan hælende . and basilissa siððan soðlice gelaðod . gewat on mægðhade of middan-earde to criste . and iulian᷒ mid blisse hí bebyrgde mid his munecum .

And he abád on life mid his leofan gebroðrum tihtende hí geornlice . to ðam to-werdan gecampe .

Ða com martianus se man-fulla cwællere . Into antiochian þære egyptiscan byrig . mid ormettre ehtnysse . fram þam arleasan casere .

He sette ða gebann þæt nan mann bicgan ne moste . oððe ænig þing syllan buton he onsæged-nysse . geoffrode þam leasum deofol-gyldum . and his drihten wið-soce .

Him wearð þa ge-sæd . be ðam soðan geleafan . þe Iulianus heold mid his halgum gebroðrum . and sende to ðam heape het hi gebugan to his deofolgyldum . þe læs þe hí for-demede wurdon .

Ac Iulianus ne rohte þæs reðan þywrace . ne nan his geferena forht næs on mode . ac wæron lust-bære for þone leofan drihten wita to þrowienne . and eac wælhreowne deað .

Þa ge-cyrde se ærendraca . and þis sæde þam deman .

Martianus þa het þone halgan Iulianum him to ge-langian to langsumum wytum . and het siððan for-bernan ealle his gebroðra . samod binnan | þam ylcan huse . þe hi heora beda be-eoden .

Þa wearð se halga heap þam hælende ge-offrod . and þurh þæt hate fýr to heofonan rice becóm .

On ðere stowe beoð gehælede . gehwilce untrume . þurh þæra martyra ge-earnunga . þe on þære stowe ðrowodon .

Hwæt ða martianus se manfulla cwellere . hæfde langsum gewinn . wið þone æðelan Iulianum . and cwæð þæt he geare wiste his æðelborennysse . and ic þe for-ði tihte . þæt ðu þam godum ge-offrige . æfter þinre gebyrde . þæt hi þe blyðe beon .

Iulianus him sæde . þu eart soðlice ablend mid þinre yfelnysse . and for-þi me þus olæcst .

Ge habbað manega godas . and manega gydena . we soðlice wurðian ænne soðne god .

Eower godas synd agotene . oððe agrafene . hu magon hi beon ge-gladode . þurh ænige bigencgas . oþþe þam gemyltsian . þe hí mid ge-dwylde wurðiað .

Þeos race is swiðe lang-sum fullice to gereccenne . ac we hit sæcgað eow on þa scortostan wisan .

Hwæt þa martianus . het his manfullan cwelleras . þone halgan beatan mid heardum saglum .

Þa bærst sum sagol into anes beateres eagan . swa þæt his eage wand út mid þam slæge.

Se man wæs þam deman þearle nyd-behefe . and cuð þam casere . and him eallum ge-cweme .

Ða cwæð martian᷒ mid mycclum graman . swa micel is þin dry-cræft . þæt ðu þas dyntas naht ne gefretst . and þærto eacan ablendst . þone þe þe beaton (sic) sceolde .

Iulianus þa cwæð . to þam wel-hreowan þus .

Clypiað to eowrum godum . and to eallum gydenum . þæt hí nu gehælan . þises hæðenan eage . and gif hí ne magon . ic hine gehæle þurh crist .

Þa eoden þa hæðen-gyldan . | into heora temple . clypigende hlude . to ðam leasan gode .

Ða andwerdan þa deofla . of þam dædan anlicnyssum .

Gewitað fram us . we synd wraðe ge-swæncte and mid fyre for-numene . for Iulianes intingan . æfre fram ðam dæge þe ge hine ærest dræhton .

Hú mage wé blinde þone blindan ge-hælan .

Þa cwæð Iulianus þe þæt eal wyste . to martiane . mid micelre blisse.

Gang into þinum godum þe hí clypiað to him .

Þa eode se ehtere into ðam temple . and ge-seah þa anlicnyssa ealle to-cwysede gyldena and sylfrena . and sume of smyltinga . Sume of cristallan to-brytte mid ealle .

Þa sæde martianus þæt ða soðfæstan godes [sic @ Skeat] mid geþylde for-bæron . þone bysmorfullan teonan . þæt hí swa Iulianum to him ge-bigan mihton .

He bæd swa þeah Iulianum . þæt he his ge-beot gelæste . and þæs cnihtes eage þurh his crist ge-hælde .

Þa mærcode Iulianus þæs mannes eage . mid cristes rode-tacne . and se cniht wearð ge-hæled . swylce his eage nære næfre ær gederod .

Ða clypode se cniht . and cwæð to martiane .

Se god is to gelyfanne . þe ða cristenan ongelyfað . and þine godas synd soðlice deoflu .

Martianus þa hét hine be-heafdian . forðan þe he gelyfde . on þone lyfigendan god . þe his eage onlihte . and eac his heortan .

He het eac geswencean mid swarum witum . þone halgan Iulianum . and het hine lædan geond ealle þa burh gebundene mid racen-teagum .

Martianus hæfde his sunu ær befæst . to woruld-licre lare . and to uðwitegunge . on þære ylcan byrig . þe se gebundene eode .

His nama wæs celsus . and se ge-seah þone halgan . and hu godes | ænglas him mid flugon . awearp þa his lár-bóc . and mid geleafan arn to þam halgan were . and his fét gesohte . cwæð þæt he wiðsoce þam sceand-licum godum . and crist andette mid ealre heortan .

Ne mihte hine nan man of þam geleafan gebringan . ne fram Iuliane . þurh ænig þing ateon .

Þa wærð martianus and eac seo modor dreorige on mode . and heora men ealle . and martianus befrán þone mæran Iulianum . hwi woldest þu amyrran min ancennedan sunu . þurh þinne dry-cræft . and to þinum criste geweman .

Beheald ure sarnysse . and urne sunu forlǽt . and ic ðe geþingie to urum kasere .

Celsus se sunu sæde þam swicolan fæder þus .

Ic wiðsace þe fæder for þinum gedwylde . and ic gelyfa on crist þe me gecoren hæfð . witna gif þu wylle . mid wæl-hreowum tintregum þinne agenre (sic) sunu . for þinra goda bigencge .

Gif þu nelle me of-slean . asend me to þam casere . þæt ic þær deað þrowige for minum drihtne criste .

Þa halgan wurdon gebrohte on blindum cwearterne syððan be martianes hǽse þær manna lic lagon . þe wæran ær acwealde on ðam cwearterne gefyrn . þa weollon eall maðon . and egeslice stuncon .

Þa fore-sceawode godes gifu . þæt þær scean mycel leoht . and se stenc wearð awend . to wynsumum bræðe . and eall se unwynsumnyss him wearð to blysse .

Þa cwædon þa cempan þe se cwellere gesette . þam halgum to weard-mannum . þæra wæron twentig .

Unrihtlic us bið . þæt we æft gecyrron . fram þysum beorhtan leohte . to blindum þystrum . fram life to deaðe . fram soðe to leasunga .

Hi feollon þa ealle to Iulianes fotum . mid ge-leafan herigende þæs hælendes naman .

Iulianus þa bæd mid | onbryrdnysse his drihten . þæt he fore-sceawode hu hi ge-fullode wurdon . þær wæron binnan þære byrig . seofan gebroðra cristena . þæs caseres cynnes . and heora fæder wæs cristen . þam alyfde se casere heora cristen-dom to healdenne . butan ælcere eht-nysse . for ðam arwurðan cynne .

Hi hæfdon ænne mæsse-preost swiðe mæres lifes . antonius gehaten . þe him mæssan gesang .

Þas geneosode se hælend . and hét hí gan to þam cwearterne . mid heora mæsse-preoste . þæt þa men wurdon gefullode .

Hi eoden þa on niht . and godes ængel hí lædde . and þæt cweartern geopenade . mid his handa hrepunge .

Þa sædon þa gebroðra . þæt se hælend hi asende . mid heora mæsse-preostæ . þa men to fullienne .

Iulianus þa sona þæs þancode gode . and wearð þa ge-fullod se fore-sæda cnapa . and his fæder cempan . on cristes naman endemes .

Þis wæarð þa ge-cyd . þam cwellere martiane . þæt þa seofan gebroðra . butan ælcere ehtnysse . woldan for cristes naman on þam cwearterne þrowian .

Þa het se cwellere hí . of þam cwearterne gelædan . and axode hwi hi woldan butan ehtnysse þrowian .

Þa cwæð se yldesta broðor . to þam arleasan deman .

Andsæte bið þæt treow . þe æfre grewð . on leafum . and næfre nænne wæstm . his scyppende . ne bringð . swa synd we cristene . gif ure cristen-dóm . ne bið acunnod .

Þa het se cwellere hi to þam cwearterne gelædan . and sende his gewrit to þam wælhreowan casere .

Gehelp urum godum . and hát to þe gefeccan . þisne dry . Iulianum . þe ure góda anlicnysse . mid ealle to-brytte . and minne sunu gebygde . fram me to his criste . and þa seofan cnihtas . þe be þinre leafa lyfedan buton ehtnysse on þyssere byrig for hyra mycclum | gebyrde . þa asende se casere þisne cwide ongean . gif Iulianus þurh-wunað mid his geferum on þysum . nim fela tunnan and do hí þær on innan . on-æl hi siððan ealle oðrum mannum to bysne .

And gif he þurh his dry-cræft þæt fyr adwescan mæg . gewitna hi ealle loca hu þu wylle .

Þa het martianus þa godes menn gefeccan . and axode Iulianum hweðer hí aht smeadon . ymbe hyre agene þearfe . on þære hwile oðþæt .

Iulian᷒ sæde . ure geþanc is . swa swa hit wæs . gif þu ænig wíte beþohtest . we synd gearwe to þam .

Þa mid þyssere spræce . bæron menn on ðære strǽt anes hæðenes mannes líc . and se heard-heorta dema . het beran þone deadan . to his dom-setle . cwæð þa to Iuliane .

Eower crist arærde . þa deadan to lífe . lǽt nu geswutelian . gif he soð god sy . and ge þisne aræran .

Þa and-wyrde iulianus . þam arleasan deman .

Hwæt fremað þam blindan seo beorhta sun-beam .

Is swa þeah tima þæt godes miht beo geswutelod .

Iulianus ða hóf to heofonum his eagan . biddende his drihten . þæt he þone deadan arærde .

Þa æfter anre tida . arás se deade . and clypode ofer eall .

Eala hu andfæncge gebed . and hu clæne mægð-hád . is on þisum mæran iuliane .

Eala hwider ic wæs gelæd . and hwanon ic eom nu gebroht .

Þa het martianus mid his hosp-wordum . þæt he ful sæde his sið him eallum .

Þa cwæþ se geeadcucoda . me coman to sil-hearwan . atelices hiwes swa heage swa entes . mid byrnendum eagum . and egeslicum toðum .

Heora earmes wæron swylce ormæte beames . heora clawa scearpe . and hi sylfa un-mild-heorta .

Þas þyllice me tugon to þære sweartan helle .

Ða mid þam þe iulianus his drihten gebæd . þæt he me eft arærde . þa unrotsodon helware | and of godes trym-setle . wearð þus geclypod .

Beo se man ongean gelæd . for minum leofan iuliane . nelle ic hine ge-unrotian on ænigum þincge .

Þa coman twegen englas . and me of ðam deoflum genamon . and me gebrohtan to life . þæt ic nu on god gelyfe . æft̅ minum deaðe . þone þe ic ær wiðsóc .

Þa wearð martianus mycclum gedrefed . and het hi ealle gebringan binnan þam cwearterne eft . and het gearcian ða tunnan to heora bærnette . swa swa se kasere hét . þurh his ærend-gewrit .

Þa wearð se edcucode man be-twux þysum gefvllod . binnan þam cwearterne . and gebád mid þam cristenum . oð þæt martianus hí to þam martyrdome gefette .

Hi wurdon þa gebrohte gebundene on racen-teagum ealle to þam tunnum and to þære ontendnysse .

Þa cwæð martianus mid mycelre angsumnysse to þam halgum werum . and to his agenum suna .

Eala hwilc anwilnys and ge-ortruwad wylla . þurh ða þeos fægre geogað . nu forwurðan sceall .

Eala þu iuliane . þe awendest minne sunu . swa þæt hé mín ne ræcð ne eac þære meder .

Þa com seo modor mid mycelre sarnysse . and ealle hyre hyred-men to þære heofunga . and manega oðre menn to þære mycclan wæfer-syne

Þa cwæð þæs deman sunu . to his dreorigan fæder .

Ne þurfe ge us bemǽnan . ne urne siþ bewepan . bewepaþ eow sylfe . we siðiaþ to heofonum . we farað ðurh þæt fyr unforhte þurh god . and we ansunde becumað . eft to eowrum gesihþum .

Þonne þu me eft gesihst gesundne of þam fyre .

Geþafa þæt min modor me gespræcan . and sume þreo niht on minum ræde beon . ic wene þæt þu ne forleosa naðor ne hí ne me .

Þa wearð seo modor on mode geblissod . and se fæder cwæð . | þæt he þæs cnapan willan wolde gefremman . gif he of þam fyre come .

Þa hét se dema his gingran þis dón . and eode mid his wife . aweg to his huse . for þan þe hé ne mihte geseon hu his sunu forburne .

Þa hét se under-gerefa hí ealle ge-bringan into ðam tunnum . and ontendan hí mid acuman . and mid wuda belecgan . swa þæt se líg astah má þone ðryttig fæðma . on þæs folces gesihþe . oðþæt þæt ád wæs for-burnen . and ealle þa tunnan .

Ða stodan þa halgan . hale of þam fyre glitiniende swa swa gold . þus herigende god .

Transiuim᷒ p̅ ignē et aquam . et eduxisti nos in refrigerium .

We ferdon þurh fyr and wæter . and þu us læddest on celincge .

Þis ge-axode se dema . and þyder efste mid his wife . and æfter langsumre spræce . let þa modor to þam suna . on synderlicre clysincge . þæt heo þone sunu gebigde .

Þa gebædon þa halgan . binnan þam cwearterne . for þæt hæðene wif . þæt se hælend hire gemiltsode .

Ða wearð þær eorð-styrung . and eall seo stow byfode . and þær scean mycel leoht . and mære bræð þær stanc . swa þæt þæt wíf wundrode . þæs wynsuman bræþes . and cwǽð þæt heo næfre ǽr naht swilces ne gestunce .

Þa gelyfde heo sona on þone lifigendan god . and wearð gefullod æt þam fore-sædan preoste . and fullice ge-cyrred . to ðam soðan geleafan .

Þa ge-axode se dema þis þus gedon . and het hi ealle gelædan . to his laðan andweardnysse . and cwæð to his suna celse mid graman .

Bæde þu forþi þinre modor spræce . þæt þu hí gebigdest to þinum bigenge fram me .

Se cnapa þancode gode . þe hí swa gebigde to his soðan geleafan . þæt heo ne losode mid him .

Þa hét martianus þæt man hi gelæhte . ac hí | wurdon ablende þe þæt bebod begunnon .

Æfter þisum hét se heard-heorta dema . beheafdian þa cempan . þe on crist gelyfdan . and þa seofon gebroðra . he hét ealle forbernan . and heold gyt þa feower mid þam fore-sædan wífe . wolde hi gelædan to his leofestan godum þe him to lafe wæron . þa ða oðre losodon . þæt hi huru þam godum heora lác geoffrodon .

He het þa gedæftan . þæt deofles templ . and þa halgan coman þider on bendum . and ealle þa hæðen-gildan . þe þæs huses gimdon . coman to þam temple . togeanes þam cristenum .

Þa bed Iulian᷒ gebigedum cneowum . mid his ge-ferum . þone heofonlican god .

 he his mihte geswutelode . mannum to geleafan . and þæt templ to-wurpe . mid his awyrigedum godum .

Æfter þære bene to-bærst seo eorðe . and þæt templ asanc . mid eallum his sacerdum . and fela þære hæðenra forferdon samod .

Þa cwæð Iulianus . to þam cwellere þus .

Hwær is nu seo fægernys . þines gefrætowodan temples . hwær synd þa anlicnyssa . þe þu onwuldrodest .

Swa swa hí besuncon on ðone sweartan grund . swa sceole ge hæðene on helle grund besincan . þær bið æfre éce fýr . and undeadlic wyrm . þe eowre lichaman cywð . and ge þeah ne sweltað . ac bið æfre se lichama ge-edniwod to ðam witum .

Þær ge biddað mildsunga . ac eow biþ forwyrned .

Git þa martian᷒ for his manful-nysse . nolde on god gelyfan . ac wearð mid graman afylled . and cwæð þæt hé wolde wrecan his godas .

Het þa bewindan heora handa . and fét . mid gesmyredum flexe . and fýr under-betan .

Þa barn þæt fyr . and þa bendas samod . and þære halgena lichaman . belifon . unge-derode .

Þa wolde se man-fulla hi mislice getintregian . ac god hi ahredde . fram þam reðum witum . | and sume eac ablende . of þam bysmor-fullum þenum .

Þa geseah se arleasa aidlian his smeagunge . and wolde þagyt cunnian anes cynnes wite . þurh reþe deor . þa þa his reðnyss ne mihte . þurh manna dæda . gedón swa he wolde .

He hét þa gelædan leon . and beran manega and mycele . to þam halgum martyrum . ac þa reðan deor . ne dorston hi reppan . ác bigdon heora heafda to ðære halgena fotum . and heora liða liccodon . mid liðra tungan .

Þa hét martianus his manfullan cwelleras . þa halgan beheafdian . and hí þæs fægnodon . þanciende gode . ealra his godnyssa .

Iulianus þá and se geonga cniht martianes sunu . and his modor samod. antonius se preost . and se ge-edcucode man . wurdon to-somne . of-slagene for criste . and ferdon mid wuldre . to þam welwillendan hælende and to heora geferum þe him fore-stopon . þæt is basilissa . mid hyre beorhtum mædenum . and se halga heap . þe on ðam huse for-barn . and þa twentig weard-menn . þe se wælhreowa be-heafdode . and þa seofan gebroðra . þe he for-bernan hét . and hi ealle nu mid gode on ecnysse blyssiað .

Hit gelamp þa sona . swa hí ofslagene wæron . þæt mycel líget cóm . ofer þa manfullan hæðenan . and swiðlic eorð-styrung . and egeslic þunor . swa þæt þæra manfulra mycel dæl . for-wearð . and nan stow ne æt-stód . mid þam stænenum godum . ne nan hæðen-gyld se hagol ne belæfde .

Þa fleah martian᷒ for nean adyd . and he wearð fornumen . æfter feawum dagum . swa þæt wurmas crupon cuce of his lice . and se arleasa ge-wát mid wite to helle .

Þæra halgan líc . þurh geleaf-fulle menn . wurdon gebyrigde sona mid blisse . binnan godes cyrcan .

Sy him á wuldor on ecere worulde . we cweþað. Amen.

Chapter 05

xiii. kl̅ februarii . passio sci̅ sebastiani martyris.

Sebastianus hatte sum halig godes ðegn . se wæs lange on lare on mediolana byrig . and wearð on criste gefullod . mid fullum geleafan .

He wæs swiðe snotor wer . and soðfæst on spræce . rihtwis on dome . and on ræde fore-gleaw getreowe on neode . and strang fore-þingere on godnysse scinende . and on eallum þeawum arwurðful .

Dæghwamlice hé gefylde his drihtnes þenunge geornlice. ac he bediglode swa þeah . his dæda þam casere dioclitianæ se wæs deofles big-gencga .

He lufode swa þeah ðone halgan wær . nyste þæt he gelyfde . on þone lifigendan god .

He ge-sette hine to ealdre . ofer an werod . and hét hine symble beon ætforan his gesihðe . and ealle þa hyred-menn hine hæfdon for fæder . and mid lufe wurðodon . forðon þe god hine lufode .

He folgode þam kasere uncuð him swa þeah . na swylce he ne dorste for his drihtne ðrowian . ac he wolde gehyrtan . ða þe se hæðena casere . dæghwamlice acwealde . for cristes geleafan .

Þa geseah sebastianus hú sume þa cristenan . woldon awácian . for ðam ormætum witum . and gehyrte heora mod . to þæs hælendes geleafan . and þa gode gebrohte . þe se deofol æt-bredan wolde .

Þa wæron twegen gebroðra æþelborene for worulde . marcus . and marcellianus . mycclum geswencte . on bendum and on swingelum . for ðam soþan geleafan .

Hi sceoldon þa under-hnigan . nacodum swurde . ac heora frynd abædon fyrst . æt þam gerefan ðrittigra nihta . þæt hi hi gebigdon to ðam hæðen-gylde . þe hí sylfe wurðodon .

Þa be-tæhte chromatius . se heah-gerefa þa cnihtas . sumum þegne to ge-healdenne . se hatte nicostratus .

Tranquillinus hatte þyssera halgena fæ|der . and heora modor wæs martia gecyged . hæðena þa gyt . and hi þyder comon mid mycelre sarnyssa . þær heora suna wæron gehæfte . and mid mycclum heofungum heora geleafan woldon awendan . and þa wita gestillan .

Þær comon eac heora magas . and mid manegum tihtingum þæra cnihta mod fram cristes geleafan . woldon awecgan . swylce hí wislice dydon . heora wíf eac bæron . heora bearn him on handum . and axodon mid wope . hwi hi swá wælhreowlice dydon . þæt hi freonda ne rohton . ne fæder oððe meder . and heora wíf awurpon . and wiðsocon heora bearn . and heora swuran gearcodon sylfwylles to slege .

Hwæt ða lá ongunnon þa godes cempan hnexian and heora mod awendon to hyre maga sarnysse .

Ða geseah sona sebastianus þæt . hu þa godes cēpan . ongunnon hnexian . for þam mycclan gewynne . and wearð him þa tomiddes . and cwæð to þam cnihtum . mid cenum geleafan .

Eala ge godes cempan . ge be-comon to sige . and nu ge awurpað eowerne cyne-helm . for þam earmlican swæsnyssum . þissera heofiendra

Ne awurpe ge ic bidde eowerne beorhtan sige . for wifa swæsnyssum . oððe for cyldra tearum .

Arærað eower sige-becn . fram eorð-licum ge-wilnungum . and onginnað eower gefeoht . ongean ða unge-sewenlican fynd .

Þas þe hér nú wepað . woldon mid eow blissian . gif hi geare wiston . þæt þæt ge nu witon . hi wenað to soþum . þæt þis lif ana sy . and ne cunnon þæt oðer . þe æfre endeleas bið .

Þis lif is swa swicol þæt hit sȳble bepæcð . þa ðe hit swiþost lufiaþ . and geleafan him to habbað .

Ðises lifes gewilnung . ge-læt þa unstæððian to manegum leahtrum . and to mislicum freced|nyssum

He cwæð þa to þam magum . ðe þa martyras mis-tihton .

Gif nu þas gebroðra . be eowrum benum gebugað . fram heora hælende to eowrum hæðenscype . ðonne beoð hí mid eow on sceortere blysse . and beon siððan ascyrede . swa þæt ge hí næfre ne geseoð [gcseoð @ Skeat] . buton on reðum witum . on þam widgyllan fyre . þær dracon and næddran . mid deofollicum toðum . þæra hæðenra breost . bitelice ceowað .

Þær is wóp . and wanung . and þæs ne wurð nan ende .

Geþafiað ic bidde þisum gebroþrum nú . þæt hí þas witu for-bugan . and beo ge embe þæt ylce . lætað hí nu faran . to ðam forestihtan kynehelme . and ne beo ge ofdrædde . ne beoð hí fram eow ascyrede . ac hí farað to heofonum . to hælende criste . and rodorlice wununga witodlice under-foð . on þam ge sylfa moton mid him æfre wunian . ælces yfeles orsorge on ecere blysse .

Æfter þissere lare . and oðrum langsumum spræcum . com leoht of heofonum . to ðam halgan wære . and mid þam leohte æt-eowde . an engel wið hine .

Þa wurdon hí ealle . þurh þæt wundor ablicgede . and þæs þægnes ge-bedda . ðe þa ge-broþra heold . wæs for six gearum . for swiðlicre untrumnysse . hire spræce be-næmed . and heo hnáh adune to sebastianes fotum mid fullum geleafan .

Þa cwæð sebastianus . gif ic soð godes þeow eom . and gif þæt is soð þæt ic eow sæde . ge-openie þonne se ælmihtiga hælend þises wifes muð . þæt heo mæge spræcan seðe Zacharian muð his mæran witegan . mid witegunge geopenade þa ða he awrat Iohannes .

Þa spræc þæt dumbe wíf . hire nama wæs Zoe . and cwæð þæt heo gesawe . þone scinendan æncgel . cumende of heofenum . to þam halgan wære . and heold ane bóc . æt-foran his eagum . and be þære béc . sæde sebastian᷒ þa lare .

Þa cwæð Zoe to sebastiane | eft .

Eadige synd þa þe þinum wordum gelyfað . and þa beoð awyrigde þe þises twyniað . swa swa dægred to-dræfð þa dimlican þystra . and manna eagan onlyht þe blinde wæron on niht .

Swa adræfde þin lár þa geleaf-leaste fram me . and minne muð geopenode . and min mod onlihte .

Hwæt ða nicostratus wearð swiðe afyrht . þa ða he þæt wundor ge-seah . on his wife gedon . and feol adune sona . to sebastianes fotum . biddende forgifennysse . þæt he þa broðra heold . and únbánd heora handa . and bæd þæt hí awæg eoden . ac hi þurh-wunodon swa þeah on þam gewinne oð deað . þa ongunnon heora magas mycclum be-hreowsian . þæt hi æfre þa martyras mis-læran woldon . and ge-lyfdon þa ealle . endemes on crist .

Þa hét sebastianus þone hæðenan þegn . þæt he þa hæftlingas . þe hé heold on þam cwearterne gebrohte to his spræce . wolde hi ge-bigan to criste .

Ferde þa siððan . and ge-fette ænne mæsse-preost . policarpus gehaten . halig wær and snotor . þæt he þa nige-hwyrfedan mid fulluhte aþwoge .

Þa wearð gefullod se fore-sæda nicostratus . mid his wife . Zoe . and þrym and ðrittigum mannum þe him ǽr folgodon . and mid him gefullode wæron .

Æfter þisum wearð gefullod þæra martyra fæder tranquillinus mid blysse . and his gebedda martia . mid heora hiwum . and heora suna wifum .

Æfter þysum þa hæft-lingas þe sebastianus hét lædan of þam hæftum ealles sixtyne .

Ðæra martyra fæder marcellianes . and marces . wæs endlyfan gear ær his fulluhte ge-untrumed þurh þa mycclan fót-adle . and nahte his fæðes geweald ne furðon ne mihte his mete him aræcan . for þam ægeslican wearrum . þe on his limum weoxon . ac sona swa hé andette | mid ealre heortan þa halgan þrynnysse on þam fulluht-baðe . þa wearð he ge-hæled . fram eallum his sarnyssum . and herede þone hælend . þe him his hæle forgeaf .

Þær wæron eac untrume . oðre twægen cnapan . oðer wæs wæter-seoc . oðer eall on wundum . ac hi wurdon gehælede . fram heora untrum-nysse mid þam þe se mæsse-preost . hí mid þam fulluhte aþwóh .

Hi wurdon þa ealle . þurh þa wundra onbryrde . and on godes herungum hí sylfe gebysgodon . and gearcodon heora mod . to ðam martyr-dome . cáflice to campienne . for cristes geleafan .

Hwæt þa chromatius se mihtiga gerefa . þe romana byrig . under þam casere geweold . het tranquillinum . þæt he him to come wolde witan æt him . hwæt his suna hræddon . binnan þam ðrittigum nihtum . þe he him lét fyrste . hwæðer hí gebugan woldon . to ðam bysmor-fullum godum . oððe þurh-wunian on ðam witum . for criste .

He com ða gehaten to þam heah-gerefan . and eac ne be-diglode . þæt he on drihten gelyfde .

Þa cwæð se heah-gerefa . þe þa git hæðen wæs . and eall swa yfele ge-tucod . swa tranquillin᷒ wæs ær .

Me þincþ þæt þu bæde þinum bearnum fyrstes . to þí þæt þu gelyfdest . heora leasum gedwyldum .

Þa cwæð tranquillinus . to chromatiæ þus .

Þa godas þe ge wurðiað . wæron arlease menn . yfele geborene . and bysmor-fulle on life . mid facne afyllede . and forð-ferdon earmlice .

Cwyst þu lá þæt nære nan lyfigende god . ær þan ðe saturnus his suna abite . and heora flæsc æte on þam Ig-lande créta .

Eft his sunu Iouis . þe gé wurðiað for god . se wolde acwellan his unclænan fæder . þe abát his gebroðra þa | hi geborene wæron . se iouis wæs afylled . mid fulre galnysse . and nam his agene swystor . to his fulum synscype . swa swa ge rædað on eowrum gerecednyssum .

La hú ne dwælast ðu . þe on þysum gedwylde gelyfst . and þas arleasan menn arwurðast for godas . þu for-lætst þone ælmihtigan god . þe eardað on heofonum . and cwæðst to þam stane . ðu eart min god .

Þa ge-wende tranquillinus . awæg æfter þysum . ac se heah-ge-refa . hét hine gefeccan dearnunga on niht . and him digellice bead anne gyldene wecg . wið þam þe he him tæhte þone mæran læce-cræft . þe hine swa mihte-lice gehealde .

Þa cwæð tranquillinus . þæt mann cristes gife . ne moste syllan wið sceattum . oþþe swa ge-bicgan . ac gelyf on þone hælend and þu bist swa hál swa ic .

Chromatius þa bæd þæt he him gebrohte ðone mann . þe hine gefullode . and fram þære coðe gehælde .

Tranquillinus ða eode to ðam arwurðan preoste . sæde hú hí spræcon . and hine sona gelædde . to þam heah-ge-refan . and he cwæð him tó .

Þeah þe þæs kaseres ehtnys þa cristenan gedrecce . þeah for minre hæle . ic sylle eow healfne dæl ealra minre æhta . gif gé mine atelican lima . þurh ænig þing gehælen magon . fram þysum heardum wearrum .

Þa hlóh policarpus . and cwæð to þam untruman . crist mæg þine nytennysse . þurh his miltsunge onlihtan . and eaðelice æt-eowian . þæt he is þin ed-staþeligend .

Se ðe sceattas under-fehð . and sylð godes gife . se for-deð his sawle . and se seoca ne bið gehæled . ác gelyf on þone hælend . and læt þe fullian . and þu bist swa gesund . swa þæs tranquillinus . þa bead policarpus him þreora daga fæsten . and þis sona sæde | sebastiane . hi ða begen bædon binnon þam fyrste god . þæt he his geleafan geswutelode þam seocan to hæle .

Coman him siððan to and hine swæs-lice gretton .

Þa cwæð sebastianus betwux oðrum spræcon . ne scealt þu for þinre hælðe anre . to ðam hælende gebugan . ne for ðinum lichaman anum þe lætan fullian . ac swiðor for hihte þære ecan hælðe . and for þam ece life . ðu scealt gelyfan on god .

Do þín mod hluttor þæt þu leornian mæge þurh soð-fæst ge-scead hwa þin scyppend sy . ne miht þu elles habban þa hæle þe þu secst .

Chromatius þa cwæð . sume cristene synd . to þam bilewite menn . þæt ðu ne miht afindan of anum þusende anne þe mæge þe eawfæst-lice spræce sprecan oððe leornian . hu mihton þas becuman to cristes geleafan? [sic @ Skeat]

Sebastianus cwæð . crist geceas . fram frymðe hyrdas . and yrðlingas . and an-fealde fisceras . and hí siððan gelærde and to lareowum gesette .

Þu wurðast manega godas . and manega gydenan . butan þu hí awurpe . ealle fram þinre heortan . and þone soðan god . þe ðé gesceop . oncnæwst . ne miht ðu hæle habban . ne þæt heofonlice líf . ac læt ús nu secan þine sceandlican godas . and to-brecon þa stænenan . and for-bernan þa treowenan . amyltan þa sylfrenan . and eac swilce ða gyldenan . dælan siððan wædligum . þa amoltenan wæcgas .

Chromatius cwæð ne cume ge to þam teonan . ac ic bebeode minum þeowum . þæt hi hi ealle to-bryton .

Sebastianus cwæð . hí ne cunnon ðone geleafan . ne eac hí gebletsian . and bið se deofol geare . hu he him derige . for sumum dyrnum gylte . and cwæðaþ þa hæðenan . þæt hi wurdon gehynde forþan þe hí þa anlicnyssa | æfre to-brecan dorston .

Þa þe habbað geleafan . and leornodon to campienne . ongean þone swicolan feond . unforhte þurh god . and habbað cristes byrnan . hi magon to-brecan ða godas .

Chromatius ða cwæð . to þam cenum godes þegnum . gewurðe godes willa and eower eac æt þysum .

Hi þa sona begen be-gyrndon (sic) hí caflice . and to gode gebædon . and to-bræcon ða anlicnyssa má þone twa hund . micclum gode þanciende .

Chromatius hæfde behydd . on his digolnysse . án wurð-lic weorc . on machanisc . geweorc . of glæse . and of golde . and of glitiniendum cristallan .

Se cræft sceolde wissian . gewisslice be steorrum . hwæt ge-hwilcum menn gelumpe on his lifes endebyrdnysse . ac hit wæs swa gehiwod . æfter hæðenum gedwylde .

Þa com sebastianus . and se sacerd policarpus . æft to chromatie . and ge-metton hine untrumne . and cwædon þæt he sum þing hæfde untobrocen . þe his hæle hremde þurh reðe wiglunga .

He cwæð þa ic hæbbe on minum hord-cleofan . an wundorlic weorc me to ge-wissunge . æfter steorrena gesetnyssum . swa swa hi standað on heofonum . on þam cræfte aspende tranquillinus min fæder . of readum golde anum . má þonne twa hund punda .

Þa cwæð sebastianus . se ge-sæliga martyr .

Gif þu þisne cræft healst . þu bist þe sylf un-hál .

Chromatius cwæð . hwæt derað þis ænigum . ne we hit ne wurðiað . mid ge-wunelicum offrungum . ac hit gewissað us . þurh wisne lareow-dom . to gearlicum tidum . and tunglena ymbrynum .

Policarpus sæde þis we for-seoð . on þam is soðfest-nysse gelicnys . ac hit is leas swa þeah .

Sebastianus cwæþ . þis is swutol ge-dwyld . and leas ydelnyss . swa swa we leornodon æt criste .

| Manega menn adrincað . on anum dæge togædere . þe on mislicum tidum to middan-earde comon .

Oft on anum gefeohte feallað for wel manige . þe under anum tungle . næron ær akennede .

Eft on anre tide twa mæden-cild cumað . and bið þæt án syde-full . and þæt oðer sceandlic .

Nis þæt clæne herigendlic . ne þæt gale tallic . gif him steorran forgefon . þæt hi swa lyfedon .

Forði synd laga gesætte . þæt menn rihtlice libban . and þæt þa riht-wisan beon ge-herode . and þa unriht-wisan ge-hynde .

Þa wundrode chromatius . heora wisera worda . and cwæð . se is soð god . þe swa gesceadwise biggengan hæfð .

He ge-þafode ða þæt hi þæt weorc to-wurpon . ac his sunu tiburtius sona mid gebeote cwæþ þæt he nolde nates hwon geþafian. þæt man swa deorwurðne cræft æfre to-cwysan sceolde . butan man þa halgan wurpe . on twægen hate ofnas . gif his fæder nære gehæled . æfter þære bræce .

Þa for-bead se fæder þone frecen-fullan cwyde . ac þa halgan tihton þæt man þa ofnas ontende . and ge-bædon hi to gode . and to-bræcon þæt weorc .

Hwæt þa færlice com fæger godes engel and cwæð to chromatiæ . crist me asende to þe . on þone þe ðu gelyfst . þæt þine lima beon ge-hælede .

Æfter þysum worde . he wearð eall gehæled . and arn to þam engle . wolde his fet gecyssan .

Se engel him cwæð to .

Ne cys þu mine fet . ne þu me ne hrepa . forðan þe þu ne eart gyt gefullod .

Þa þa se sunu þæt ge-seah . þa ge-sohte he þæs preostes fét . and se fæder feoll to sebastianus fotum . bægen clypigende . crist is soð god . and ælmihtig godes sunu . þe git þegnas gode bodiað .

Þa wearð gefullod fæder . and sunu . mid heora inn-hyrede . and heora æhta mannum ægðres hades menn . ma þonne an ðusend . þa cwæð chromatius . se cristena þegn . þæt he eallum gemiltsode . þe him æfre abulgon . and þam eallum forgeafe þe him aht sceoldon . and gif he hwæne berypte . þæt he him þæt forgulde .

He freode ealle his menn . and him feoh dælde . and cwæð ðæt hé wið soce þam geswæsum lustum . þissere worulde . þe is gewitendlic .

His sunu tiburtius . se snotera cniht cwæð .

Ic awende minne willan . fram eallum woruld-þingum . to gastlicum weorcum . nu ic godes mann eom . an of þam ge-tele . þe þæt éce líf under-foð .

On þam dagum wæs sum wis papa on rome . gaius gehaten . haliges lifes mann . wið þone rædde chromatius and be his ræde under-feng ealle þa cristenan into his cafertune . and him big-lyfan fore-sceawode . for þære swiðlican eht-nysse . þe ða niwan asprang . æfter carines slege.

Þam casere næs þa gyt cuð . þæt chromatius cristen wæs . and he be-geat ða leafe þæt he of þam lande moste .

Þa bebead se papa þam preoste policarpe . þæt he ge-wende of rome mid þam rum-gyfolan þegne . and clypode to ðam cristenum . þe mid chromatiæ wæron .

Ure hælend lyfde þæt mann his life gebeorge . fara nú se þe wille . forð mid chromatiæ . and wunige se þe wille . mid me on þyssere byrig .

Þa bæd tiburtius . þæt he beon moste . mid þam papan . cwæð þæt him wynsum wære þæt he wurde ofslagan . gif he mihte þusend siðon . for ðam soðan geleafan . and þæt ece líf ge-earnian þe nænne ende næfð .

Þa be-láf sebastianus on þære byrig mid þam papan . and se geonga tiburtius . and þa twægen gebroðra . marcus . and marcellianus . mid heora fæder tranquilli|ne . Nicostratus mid his breðer . and his gebeddan Zoe . Uictorinus mid his breðer . and his broðor suna .

Þas belifon on rome . on þære reðan eht-nysse . and þa oþre ealle endemes ferdon awæg . mid chromatiæ . swa swa him crist gewissode .

Þa gehadode se papa tranquillinum to preoste . his twægen suna to diaconum . and þa oðre to subdiaconum sebastianum he ge-sette . him eallum to mund-boran .

Hi wurdon ða gebysgode on heora ge-bedum ealle . dæges and nihtes . heora drihten herigende . biddende mid wope . þæt hi wurðe wæron . for criste to þrowigenne . and be-cuman to his halgum .

Hi ge-hældon untrume mid halgum gebedum . and blinde on-lihton . þurh heora geleafan . and of wodum mannum . þa awyrigedon deoflu afligdon .

Tiburtius gemette ænne mann afeallene. þæt he his heafod to-bræc . and eac his bán to-cwysde .

Þa sang he him ofer . pater noster . and credan . and se mann sona ge-sund-ful arás . and beah to fulluhte mid his fæder and meder .

Æfter þysum wearð ge-læht seo eadige Zoe . and for criste acweald . and becom to his halgum .

Þa oðre wurdon eac ealle ge-martyrode . tranquillinus wearð of-torfod mid stanum .

Nicostratus se æðela wearð æft gelæht . mid feower his ge-ferum . and toforan þam deman gebroht . fabianus gehaten . þe feng to þære scire æfter chromatiæ . se wæs ðam cristenan onwerd .

He axode þone casere hu hé embe hí sceolde . ða hét sé arleasa hí ealle fíf pinian .

Fabianus þa se feondlica dema þa ða he ne mihte þa menn gebigan fram criste . þurh þa reðan wíta . þa hét hé hi wurpan ut on sǽ .

Æfter þysum wearð ge-læht se geleaffulla tiburtius . þa hét fabian᷒ þæt hé þam fulan Ioue . recels ge-offrode . oððe eode him sylf ofer byrnende gleda mid his barum fotum

| Hwæt ða tiburtius . bealdlice eode . ofer ða byrnendan gleda . unfor-bærnedum fotum . and cwæð þæt him þuhte . swylce he eode ofer blostman .

Fabianus þa þæs feondes þén . hét beheafdian þone hálgan tiburtium . and siððan acwealde þone halgan castolum . þe hæfde ge-innod ealle þas halgan .

He gehæfte eft siððan tranquillines suna . marcellianus and marc᷒ . on anum micclum stocce . and mid isenum pilum . heora ilas gefæstnode . and cwæð þæt hí sceoldon swa standan . on þam pilum . oðþæt hi geoffrodon heora lác þam godum .

Hi sungon þa sona þisne sealm him betwynan .

Ecce quam bonum et quam iocundum habitare fratres in unum . et cetera .

Eala hu mycel god ís . and hwylc wynsumnys ðær ðær gebroðru beoð on annysse .

Þa cwæð se gerefa þe him swa reðe wæs .

Eala ge ungesæligan . and soðlice earmingas . alecgað eowre ge-wit-leaste . and alysað eow fram witum .

Þa gebroðra cwædon . þæt hi on cristes lufe þa wæron gefæstnode . mid fulre blysse. and on swilcum estum ǽr næron on life . wiscton þæt hi moston swa wunian oð ende .

Hi stodon þa stille on þam stocce gefæstnode ofer dæg . and ofer niht . heora drihten herigende .

Þa het fabianus mid fullum graman þæt hi man begen ofstunge þær ðær hí on ge-bedum stodon . and hi swa mid wuldre gewendon to criste .

Hwæt þa fabianus . mid facne gewregde þone æðelan Sebastianum . to ðam arleasan casere dioclitiane . þe on ðam dagum wæs . þa het se kasere hine gefæccan hraðe . and cwæð him sona tó . mid swicolum geþance .

Ic hæfde þe mid þam fyrmestan . þe minum hyrede folgodon . and þu lutodest oð þis on þam laðum cristen-dome . þam godum to teonan . and me to un-þearfe .

Sebastianus cwæð [space]

Crist ic wurðode symle . and for ðe þingode . and for þinum folce .

| Ic me gebidde to ðam gode . þe bið eardigende on heofonum . mid healicum mægen-þrymme .

Wod bið se ðe bit æt blindum stanum . Ænigne fultum . on his frecednyssum .

Þa wearð dioclitianus deoflice gram and hét hine lædan on heardum bendum . út to anum felda and hine þær gefæstnian and hentan his mid flanum . oð þæt he his feorh ageafe .

Þa læddan þa cempan þone cristes þegn . and setton hine to myrcelse . swa swa se manfulla hét . and heora flán him on afæstnodon . foran . and hindan . swa þicce on ælce healfe hwylce iles byrsta . and for-leton hine swá licgan for deadne . þa com sum wudewe . þe wæs anes martyres láf . on þære ylcan nihte . þær he læg forwundod . wolde his lic bebyrigan . and gemette hine libbendne . heo lædde hine þa to hire huse cucenne . and binnan feawum dagum . hine fullice ge-hælde.

Þa coman þa cristenan . and ðone cempan tihton þæt he faran sceolde feor fram ðære byrig .

Ac sebastian᷒ ge-bæd hine to gode . astáh þa úp to þære stægre . þe stod wið þæs caseres botl . and þa ða se casere com clypode him þus to .

Eowre hæðen-gyldan þe healdað eowre templa . cwyðaþ fela leasunga eow be þam cristenan . secgað þæt hi syndon swutol-lice wiðer-winnan . eowrum cyne-dome . and eac eowrum folce . ac eower kynedóm godað þurh heora godan ge-earnunga . forþan þe hi gebiddað . for romaniscre leode . and for eowrum anwealde . unablinnendlice .

Þa beseah dioclitian᷒ se deofollica cwellere to ðam halgan were . þe ðær swa heage stód . and cwæð orgællice . ne eart þu lá sebastian᷒ . þone ðe ic gefyrn hét mid flanum acwellan .

Sebastian᷒ cwæð . crist me arærde æft . to þí þæt ic cyðe eow . ætforan eallum folce . eower unriht-wisan ehtnysse ofer ða cristenan .

Þa hét se casere þone godes cempan | mid saglum ofbeatan . binnan his agenre byrig .

Þa dydon þa cwelleras swa swa se casere hét . and on niht behyddon his halgan lichaman on anum adel-seaðe . secgende him betwynan . þæt huru ða cristenan ne becuman to his líce . and him to martyre macion siððan .

Þa æteowde sebastianus on swæfne anre wudewan . lucina geciged . swiðe æwfæst man . and sæde hwær his lichama læg . on þam adelan . hét hí faran to . and hine ferian þanon . to catacumbas . þær cristes apostolas . petrvs and pavlvs ærest bebyrgede wæron . and lecgan his lic . æt heora fot-læstum .

Lucina þa ferde to ðam fore-seadan seaðe . on middere nihte mid hire mannum . and his lic funde . and ferede mid wurð-mynte to þære ylcan stowe . þe he sylf bebead . and mid geornfulnysse hine þær bebyrigde . þam ælmihtigan to wuldre . se þe ge-wylt ealle þing . rixiende á on ecnysse . eces wuldres cyning .

Chapter 06

xuiii. kl̅ febr̅ nat̅l̅ sci̅ mauri abbatis

Maurus wæs gehaten sum swyþe halig abbod . se wæs to lare befæst sona fram iugoðe . þam halgan benedicte . þeah þe he æþel-boren wære .

He þeah wel on lare . and wæs swiðe gehyrsum . þam halgan benedicte . on eallum his hæsum . and on eallum godnyssum gode ælmihtigon þeowde . and eac his gebroðrum gode bysne sealde . mid haligre drohtnunge . and he for-þy dyre wæs . his lareowe benedicte þe he geblissode mid weorcum .

Hwilon ær we sædon on sumere oðre stowe hu se ylca maurus . þurh godes mihte eode uppon yrnendum wætere . on anum widgyllan pole . þa þa benedictus hine hét gehelpan þæs cnapan . þe on þære stream be-feol . þa ða he wæter fette .

On sumne sæl eode se halga maurus . ham to mynstre weard mid his gebroðrum . and benedictus wæs þa mid anum æwfæstum were . forþan þe his wif wæs mid wodnysse gedreht . and maurus ða gemette ær he to mynstre come . ænne dumbne cnapan . and se wæs creopere eac . ac se fæder . and seo modor . hine feredon þider .

Hi feollon ða butu . mid flowendum tearum to maures fotum . and befengon his cneowa . halsigende þurh godes naman . þæt he gehælde heora cild .

Þa nolde maurus ðam mannum þæs tiðian . cwæð þæt seo dæd nære him gedafenlic . oðþæt þa gebroðra bædon hine georne . þæt hé þam healtan cnapan . his hæle abæde .

Hwæt þa maurus sona . beseah to heofonum and cw̅ .

Þu ure hælend crist . þe behete þinum discipulum .

Soð ic eow sæcge . swa hwæt swa ge biddað . eow bið ge-tyðod untwylice ðæs . gif ge gelyfað . þæt ge þa lác under-fón . æt-eowa nu on us ælmihtig drihten . þæt wé þine þeowan synd . þeah ðe wé synfulla synd . and we þone ylcan geleafan mid lufe healdað .

Æfter þisum wordum he cwæð to ðam wanhalan .

On þære halgan ðrynnysse naman . beo þú hál cnapa . and stand on þinum fotum ætforan us gesund . mid mines lareowes ge-earnungum . eac swylce gefultumod

Þa aras se cnapa . and up rihte eode . and mid bliðre stemne . bletsode his drihten . þe hine gehælde . þurh ðone halgan wer .

Eft ða þa se halga benedictus . ham to mynstre com . and þæt wif wearð gewittig . þe hé fram wodnysse ahredde . þa wurðode hé maurum . for þam mærlicum tacne . þe he on ðære hwile gefremede . þe hé on fyrlenum wæs .

Maurus wæs eac oftost mid þam eadigan benedicte . and his wundra wiste . and mid him worhte wundra . sume þæra we secgað hér . sume we forsuwiað . and he wæs fyrmest muneca . to ðam mæran benedicte . and þæs mynstres geweold swá swá him gewissode benedictus .

On ðam timan asende sum ge-sælig biscop . of francena ríce . to ðam halgan fæder mænigfealde lác . and hine micclum bæd . þæt he him sendan sceolde . gif him swa ge-þuht wære . sume eawfæste munecas . þe him mynster-líf astealdon . for ðan þe he wolde aræran on his biscop-rice . munuclicne regol . be benedictes ræde .

Hwæt ða benedict . be his gebroðra ræde . swá swa him god geswutolode . asende þa maurum . þeah ðe he uneaðe mihte for heora micclum lufe . hine him fram lætan to ðam fyrlenan lande .

He funde him éác geferan feower oðre munecas . and sume læwede menn to ðam lande mid him . and nam þone halgan regol . þe he mid his handum awrát . and betæhte maure mid him to hæbbenne . and heora hlafes gewiht . and heora wines gemett . and asende hí mid bletsunga to ðam fore-sædan bisceope .

Eft on ærne mergen . sende se arwurða benedictus . twægen his muneca to maure mid lacum . þæt is mid halig-dome . of þæs hælendes rode . and of marian reafe . and of michaheles pelle . and of stephanes lichaman . and of martines reliquium . and an ærend-gewrit mid þysum wordum forð .

Onfoh min leofesta . þas ende-nehstan lác . þines lareowes . to langum gemynde . and eow to gescyldnysse wið deofles syrwunga .

Ic sæcge ðe to soðan . þæt þu scealt gewitan . on ðam sixteoðan geare þæs ðe þu munuc wurde of þisseræ worulde . to wuldre mid gode swá swá crist gyrstan-dæg me cydde . be þe . siððan þu fram us siðodest . on fare .

Ic secge þe eac nú . þæt eower sið ne bið na swá . swá swa we wendon . ac wyrð elles gefadod . and on oðre stowe . ac se ælmihtiga god eow næfre ne for-læt . od þæt [ealle] ge gelogode beon .

Farað nu ge-sunde . and gesælige becumað .

Maurus ða ferde mid mycelre blisse . and his geferan samod . to francena rice . ac twegen his geferan . feollon be wege . án of anum stypele . oþer on anne stán . swa þæt hi wurdon to-cwysede . and cwylmiende lagon . ac maurus hí gehealde . on þæs hælendes naman .

Eac hi ge-metton on sumum mynstre be wege ænne blindne man . se bæd his hæle georne . æt ðam halgan maure . and he hine gehælde þurh god . and hét þæt he wunode butan worunge on godes þeow-dome . þær on mynstre . á . and he swa dyde . eac siððan of þam dæge .

Eft he gehælde on oðre stowe anre wydewan sunu . þe unwene ðá læg . and gefrefrode þa modor . and men þæs wundrodon . and se cnapa arn sona to maure hrymende . and cweðende . þu ahreddest mine sawle fram fyrenum witum . and he wearð munuc siððan .

Maurus geseah eac swa swa . him god geswutelode on þam ylcan færelde . benedictes forð-sið . and hú hé to heofonum ferde . þeah þe he on fyrlene wære .

Hi ferdon þa forð to ðam fore-sædan bisceope . þe hi ge-langian hét . ac he ne leofode na þa . ac wæs for feawum dagum forðfaren of life . and oðer biscop geset on his bisceop-stole .

Hi wurdon þa unrote . and eoden swa þeah to ðam niwan bisceope . bædon his rædes . cunnodon hwæðer he wolde þæs oðres willan gefremman . and him munuc-líf aræran . swa swa se oðer gemynte .

He cwæð þæt he ne mihte embe munuc-líf þa smeagen . be oðres bisceopes dihte . ac wolde beon embe his þincg . be his agenum dihte . and ge-dreoh-læcan his hamas .

Hi feordon þa þanon fram þære scire bisceope . and god him foresceawode on sumere oðre scire on francena rice fulgode wununge .

Sum forð-þegn wæs ða welig . on þam lande . florus gehaten . and se hæfde gemynt mynster to arærenne . and mid munecum gesettan . gif he ænige geaxode . þe æwfæste wæron . forðan þe benedictus hlisa . on þæt land becuman wæs . and him wearð eac gecydd be maures to-cyme .

Se þegn wæs wunigende butan wifes neawiste . forðan þe his gebedda gefaren wæs on lífe . and læfde him ænne sunu . þe siððan wæs munuc and abbod æfter maure . mærlice drohtnigende . swá swá þeos bóc segð swutelice hér bæftan .

Hwæt þa florus ferde fægen him to-geanes . and mid micelre arwurðnysse . þa æðelan godes menn . under-feng to him . and fore-sceawode him wununge . herigende his drihten . and ðone halgum (sic) benedictum .

Se florus wæs ða fyrmest þæra francena þegna . and ðam cyninge leofest . þe on þæra leode rixode . forðan þe he wæs æwfest æfre fram his geogoðe . and eall þæs cyninges rǽd eode be his dihte .

Florus ða cydde þam cyninge his willan . and be his leafan arærde on his agenum lande mynster . and munuc-líf . Swá swá maurus him dihte . and mid micelre are . þæt mynster gegodode . and priuilegium sette on swutelre ge-witnysse . and maure betæhte þæt mynster mid ealle to fullum freo-dome . for his sawle ðearfe .

He offrode éácc þa on ðam ylcan dege his ancennedan sunu . þam ælmihtigan gode to munuclicere drohtnunge under maures gymene . and cwæð þæt he sylf wolde . gif hit god swa fore-sceawode eall woruld-ðing forlætan . and wunian on ðam mynstre . on godes ðeow-dome . and he hit eac swa gelæste .

He gegaderode þa swiðe gode wyrhtan gehwanon . and arærde þæt mynster eall be maures ræde . wið þa mycclan éá . þe menn hatað liger .

Hwæt ða on sumum dæge . sæton him æt-gædere . florus . and maurus . to middan þam wyrhtum . and maurus rædde . and rehte hit flore . þa feol sum preost færlice of þam weorce . swá þæt hé samcucu læg . sweltendum gelíc . and fleow eall blode . ac maurus hine hét beran to martines cyrcan . and maurus inn eode . and bæd ðone ælmihtigan for his arfæstnysse . þæt hé þam preoste gemiltsode . and hine mihtelice gehælde .

He arás þa eftsona . and eode to ðam preoste . and his wunda bletsode and cwæð him baldlice tó .

On ðæs scyppendes naman . þe ge-sceop mann of eorðan . arís þu gesund . and ardlice gang to ðinum weall-geweorce and hit wél ge-enda .

Hé arás þa gesund . swylce of slæpe awreht and began to wundrigenne hú hé wurde ðider gebroht .

Þa cwæð se halga wer . ne wurde ðu hider geferod on þinum agenum fotum . ac ðe feredon oþre . ac gang nu ardlice eft to þinum weorce . þelæs þe hit beo gelet to lange þurh ðe .

Ða eode se preost . eft to his weorce . and florus hine astrehte to maures fotum . and cwæð .

Þu eart soðlice maure . þæs mæran benedictes folgere on wundrum . be ðam we for wel oft gehyrdon þyllice gereccan . and he þearle siððan maurum wurðode . and on wundrunge hæfde .

Æfter þysum ongunnon . of ðam gegader-wyrhtum . tælan ðone halgan . þe gehælde þone preost . cwædon þæt he mid galdrum . na mid godes cræftum þyllice geworhte . and wolde beon furðor . on oðrum earde . þonn̄ [þonne @ Skeat] he on his agenum wære . swyðor for gitsunge . ðonne for æwfæstnysse .

Ac ða þa hí swiþost tældon . þone soðfæstan maurum . þa wurdon afyllede . mid ðam fulan gaste . þry þæra wyrhtena . and hí weddon þearle . swa þæt hyra án . ge-endode sona . and þa oðre twegen to-tæron hí sylfe . mid heora agenum toðum . and eges-lice grymetedon .

Maurus þa sona mycclum wearð astyred . and wepende eode into þæra cyrcan . and mid mycelre onbryrd-nysse bæd þone ælmihtigan . ðæt he þam deadan . and þam deofol-seocum gemiltsian sceolde . and heora sawle gehelpan .

He eode þa eft ut to þam earmum wodum . and on drihtnes naman . þa deoflu afligde . of ðam wodum wyrhtum . and hí wurdon gehælede .

He hét eac beran into his gebæd-huse . þæs forð-farenan líc . þe se feond acwealde . and wacode ealle þa niht ofer ðæs wodan líc . and hét þæs on mergen . mæssian for his sawle . and arærde þone deadan þurh drihtnes mihte . and hét hine warnian . gif he wolde libban . þæt he nære on ðam mynstre . næfre eft gesewen . of ðam and-weardan dæge þe he of deaðe arás .

Þa wearð ge-endod eall þæs mynstres weorc binnam eahte gearum . and eac gehalgod . mid healicum wurðmynte .

Hwæt ða florus gemunde hwæt he gemynte æt fruman . and hwæt hé gode behét . þa ða he began þæt mynster . and bæd him þa leafe . æt his kyne-hlaforde . þæt hé moste gecyrran . fram þam swicolum welum . and wunian on ðam mynstre þe hé ge-worht hæfde . and be maures dihte adreogan his líf . and on godes þeow-dome gastlice libban . and swá ge-earnian . ða écan myrhþe .

Se cyning ða geþafode . þam þegne his willan . þeah þe he uneaðe mihte . on his mode findan . þæt he swa leofne freond fram him lætan sceolde . and cwæð þæt he sylf wolde geseon ða stowe . and þær andwerd beon þonne he his beard alede .

Æfter ðysum ferde florus to ðam mynstre . and his kyne-hlaford com swa swa hí cwædon . and bæd þæt he moste beon heora broðor for gode . and forgeaf sumne ham to þære halgan stowe . and mildelice sprǽc . to eallum ðam munecum . swiðost swa þeah synderlice to maure . and behét þæt hé wolde him hold beon eallum . and bær him sylf his lác . and lede uppon þæt weofod .

Florus hét ða forð-bæran his fægeran maðmas on golde and on seolfre . and hí gode geoffrode . and his menn gefreode . ætforan ðam weofode . and awearp his wæpna . and wearð þa bescoren . ætforan þam cyninge . to cristes þeow-dome . and se cyning blyssode . and blyðe wearð on mode . for ðæs þegnes gecyrrednysse . and soðum geleafan .

Eft æfter gereorde . hét se æðela cyning þæt florus hine gespræce . ær þan þe hé þanon ferde . and hé com þá sona mid sumum oðrum munecum on munuc-wisan gescryd . þa weop se cyning . and þancode gode his godan wyllan . and tihte hine georne þæt hé geornful wære . on þam gastlican life and on godes þeow-dome . swa swa hé on woruld-þingum wíslice ǽr leofode . and se cyning syððan siðode þanon .

Eft þæs on mærgen rád maurus to þam lande . þe se cyning him geaf . and his cepte sum beddryda . sé læg seofon gear to-slopenum limum . and wæs þyder geboren to biddenne his hæle .

Þa bletsode maurus . þone beddrydan mann . and hé sona gesund sylf úpp arás . swa ðæt hit næs ge-sene hweðer he seoc wære .

Þa bugon gehwylce æðelborenne menn . to maures mynstre . to munuc-licere drohtnunge .

Sume eac befæstan heora suna him . to godes þeow-dome . oðþæt þær gadorod wæs hund-teontig muneca . and feowertig ealles .

Þa ge-cwæð se abbod . and ealle þa gebroðra . þæt þer ne mihte na má muneca wunian . þe læs þe ðam gebroðrum bigleofan ateorode . ac wære þæt getél . wunigende æfre . ne lǽs ne má . on þam munuc-lífe .

Hit gelamp ða siððan . þæt se gesæliga florus gewát of worulde . wuldor-ful to criste . on ðam þrytteoðan geare . æfter þam þe he munuc wæs .

Sum erce-diacon com eac hwilum to maure . þa næfdon hí nán wín buton on ánum gewealdenan butruce . and maurus þa bletsode bliðelice þæt wín . cwæð þæt god mihte gemycclian þone wǽtan . se ðe iú on westene wæter út-teah . of heardum stan-clude . and of heofonum asende . his folce big-leofan . feowertig geara .

Hi druncon ða þæt wín . wel hund-seofontig manna . and æfre wæs se buteruc brerd-ful wines .

Maurus gemette ænne man eft . se wæs yfele ge-tawod . and hine æt se cancor . and his weleres wæron awlætte mid ealle . and eac his nosu . for-numen mid attre . þa bletsode maurus þone mann feorran . and he sona wearð wundorlice gehæled .

Siððan nolde maurus of ðam mynstre faran . for nanre neode . butan he nyde sceolde . forðan þe he wiste hwæt him gewitegod wæs . ðurh sce̅ benedicte . ða þa hé siðode him frám . þæt he sceolde gewítan of worulde to gode on ðam feower-teoðan geare . þæs þe hé ferde fram him . and wunode þá on sundrum . and sette þam gebroðrum . oþerne abbod . be heora ealra ræde . ðæs ylcan flores sunu . þe wé ǽr fore-sædan .

He wearð þa ge-bysgod on his ge-bedum þearle on martines cyrcan mid his twam munecum . to ðriddan healfan geare mid ealre geornfulnysse . and mid gastlicre gewilnunge . godes miltsunge bæd .

Þa on sumere nihte . ge-seah he þone deofol . þá þa hé wolde gán Into godes cyrcan .

Se feond hæfde him mid fela oðre sceoccan . and for-wyrnde him Inganges . and mid graman him cwæþ to .

Þu come hider maure to uncuðum earde . and wendest þæt ðu mihtest ús aweg drifan . of urum wunungum . ác ðu scealt witan nú . þæt ic mid mislicum deaðe þine munecas acwelle . swá þæt earfoð-lice heora ænig belifð . of swa micclum werode . þe hér wunað mid þe .

Þa cwæð se halga wer . to ðam hetolan sceoccan .

Ðreage ðe se hælend . þe hæfð ealles geweald . þu leas-breda feond . and facnes ord-fruma .

Hwæt ða se sceocca sona fordwán of his gesihðe . mid swiðlicum reame . swa þæt ða munecas micclum afyrhte wurdon awrehte . ðurh his wodlican stemne . and eodon to uhtsange . ǽr timan swa þeah .

Maurus ða eode Into martines cyrcan . and mid micelre sarnysse . þone soðfæstan god bæd . þæt he him geswutelode . be ðæs sceoccan gylpe . and him gewislicor onwrige . þæs awyrgedan saga .

Maurus ða geseah ænne scinende engel . wið hine standende . and þas word him secgende .

Þu godes dyrling . hwi eart ðu swa dreorig . witodlice se deofol wát towerde ðing hwilon . na symle . þurh sume gebicnunge . be þam þe hé oft geseah . þeah þe he sylf leas sy . and þæt þæt he þe sæde . is soð be dæle . swa þæt se mæste dǽl ðinre muneca sceal . of lífe gewítan . binnan lytlan fyrste . and hi ealle becumað to ðam ecan life . and þu sylf siððan . gesælig him fyligst . to godes rice . þurh gode geearnunga .

Æfter ðisum wordum . gewát se engel him fram . and maurus þæs on mergen þa munecas gespræc . and ealle his gesihðe him openlice sæde . and manode hi georne þæt hi gearwe wæron . and mid soðre behreowsunga heora sawle aþwogon . fram eallum synnum . þæt hí siðian mihton . to godes beorhtnysse . mid broðorlicre lufe .

Æfter þisum wordum . wurdon þa munecas mycclum abryrde . and heora gebeda sungon . and hi sylfe gearcodon to þam soðan life . and hi sylfe betæhton . ðam soðfæstan scyppende .

Him com ða se cwealm swa swa se engel gecwæð . swá þæt an hund muneca . and syxtyne munecas . binnan fif monðum . of ðam mynstre gewiton . and maurus se abbod . ge-endode siððan . swá se engel sæde him sylfum . on ǽr .

Þær belifon swa þeah lifes on ðam mynstre . feower and twentig muneca . æfter maures forð-siðe . and he wæs bebyrged . binnan martines cyrcan .

Þær beoð wundra geworhte ðurh þone halgan wer . ðam ælmihtigan to lofe . Seðe lyfað á on ecnysse .

Þæs halgan maures líf wæs þus gelogod . ða þa hé twelf wintra wæs . he wæs betæht benedicte . and he wunode mid him twentig wintra siððan . and on his agenum mynstre em feowertig geara . þæt synd eall to-gedere twá and hund-seofontig geare .

Twegen þæra muneca ðe mid him þyder comon forð-ferdon þær on þam fore-sædan cwealme . and twegen cyrdon ongean swá swá he sylf bebead . eft to munte casin . ðanon þe hí ǽr coman . and hyre oðer awrát þas gewyrdelican race . on ledenum gereorde ac we it reccað on englisc .

Sy wuldor and lof . ðam wél-willendan gode . seðe wurðað his halgan mid wuldre on écnysse . Amen

Chapter 07

xii[i]. kl̅ febr̅. nat̅l̅ sce̅ agnetis uirginis.

Ambrosivs bisceop . binnan mediolana afunde on ealdum bocum . be ðære eadigan agne . hú heo on rome byrig reðe ehtnysse acóm . and on mægðhade martyr-dóm ðrowode .

Ða awrát ambrosius . be þam mædene ðus .

On þære tide wæs sum æðel-boren mæden . agnes gehaten . on ðone hælend gelyfed . binnan rome byrig . bilewit . and snotor . cild-lic on gearum . and eald-lic on mode .

Seo wan þurh ge-leafan . wið þa feond-lican ealdras . and on ðam þritteoðan geara þone deað forleas . and þæt ece líf gemette . forðan þe heo lufode crist .

Heo wæs wlitig on ansyne . and wlitigre on geleafan .

Þa ða heo gewende of scole . ða awogode hi sum cniht simpronies sunu . þe wæs ge-set ofer ða burh . to heah-gerefan . and wæs hæðen-gilda .

Þa budon ða magas þam mædene sona deorwurðe gyrlan . and deorwurðran behéton . ác seo eadige agnes . þæt eal forseah . and þæra maðma ne rohte . þe má þe reocendes meoxes .

Ða brohte se cniht to ðam clænan mædene . deorwurða gimmas . and woruldlice glencga . and behét hire welan gif heo wolde hine . þa andwyrde agnes . anrædlice þam cnihte .

Gewít ðu fram me synne ontendnys leahtras foda . and deaðes bigleafa gewít fram me . Ic hæbbe oðerne lufiend . þinne ungelican . on æðelborennysse seðe me bead bæteran frætegunga . and his geleafan hring me let to wedde . and me gefrætewode . mid ún-asmeagendlicra wurðfulnysse .

He befeng minne swiðran . and eac minne swuran . mid deorwurðum stanum . and mid sciendum gimmum .

He gesette his tacn . on minum nebbe . þæt ic nænne oðerne ofer hine ne lufige .

He geglængde me mid orle . of golde awefen . and mid ormettum mynum me gefretewode .

He æt-eowde me eac . his ænlican hordas . ða he me gehét . gif ic him gelæste .

Ne mæg ic him to teonan oðerne geceosan . and hine forlætan . þe me mid lufe beweddode .

His ansyn is wlitigre . and his lufu wynsumre . his bryd-bedd me is gearo . nu iú mid dreamum .

His mædenu me singað . mid geswegum stemnum .

Of his muðe ic under-feng meoluc . and hunig . nú iú ic eom beclypt . mid his clænum earmum . his fægera lichama is minum geferlæht . and his blod ge-glende mine eah-hringas .

His modor is mæden . and his mihtiga fæder wifes ne breac . and him á bugað englas .

His wlites wuldriað . þa wynsumum [wynsumu/n/ @ Skeat] (sic) tunglan . sunne . and mona . þe middan-eard onlihtað .

Þurh his spæc geedcuciað eac ða deadan . and þurh his hrepunge beoð gestrangode þa unstrangan seocan .

His speda ne ateoriað . ne his welan ne waniað .

Þam anum ic healde minne truwan æfre . þam ic me befæste mid ealre estfulnysse .

Þonne ic hine lufige . ic beo eallunga clæne . þonne Ic hine hreppe . ic beo unwemme . ðonne Ic hine under-fó . ic beo mæden forð . and þær bærn ne ateoriað . on ðam bryd-lace .

Þær is eacnung buton sare . and singallic wæstmbærnyss .

Se cniht wearð ge-ancsumod . and wið-innan ablend æft̄ þæs mædenes spræce . þe hine spearn mid wordum .

He wearð þa gesicelod . and siccetunga teah . of niwel-licum breoste . on bedde licgende .

Þa cunnodan læcas hwi he licgende wære . and cyddan þam fæder . þæs cnihtes mod-leaste .

Þa sende se fæder sona to ðam mædene . þæt ylce ærende . þe his sunu ær abead . ac agnes wiðsoc . sæde þæt heo nolde þæs ærran bryd-guman æþelan truwan . æfre gewemman þurh ænig wedd .

Þa þuhte ðam heah-gerefan huxlic on mode . þæt heo oþerne tealde to-foran his gebyrdum . befran swa þeah þearle mid mycelre ðrutunge . hwæt se bryd-guma wære . þe agnes onwuldrode .

Him wearð þa gesæd . þæt heo fram cild-hade sona cristen wære . and swa mid dry-cræfte afylled . þæt heo crist tealde hire to bryd-guman .

Hwæt ða simpronius mid swiðlicum gehlyde . hét hí gefeccan hám to his dóm-setle . and ærest onsundron mid geswæsum wordum . olehte þam mædene . and æfter ðam geegsode .

Ac þæt godes mæden ne mihte beon bepæht þurh ænige lyffetunge fram hire leofan drihtne . ne heo næs afyrht . for his þeow-racan .

Þa ge-seah sympronius hyre soþan anrædnysse . and cydde hire freondum . þæt heo for-scylgod (sic) wære for hire cristen-dome . þe se casere onscunode

Eft þæs on mergen het se manfulla dema þa eadigan agnen him to gefeccan . and sæde hire gelome hu his sunu hí lufode . ac him speow hwonlice . þeah þe hé swiðe spræce .

He ge-sæt þa his dom-setl . dreorig on mode . and behét ðam mædene menig-fealde wita buton heo wiðsoce þone soðan hælend .

He cwæð æft siððan to ðam snoteran mædene .

Hlyst minum ræde . gif ðu lufast megð-had . þæt ðu gebuge mid biggengum . hraðe . to þære gydenan uesta . þe galnysse onscunað .

Agnes ða andwyrde . þam arleasan and cwæð .

Ic for-seah þinne sunu ðe soþlice is man . and ic nates hwon ne mæg on his neb-wlite beseon for mines cristes lufe hu mæg ic him to teonan . to þam deadum anlicnyssum . me ge-eadmedan .

Þa cwæð se heah-gerefa . to ðam halgan mædene .

Ic forbær þe oð þis . forðan þe ðu gyt cild eart .

Þu tælst ure godas . swa þeah ne græma þu hí .

Agnes him andwyrde . Se ælmihtiga herað swiðor manna mód . þonn̄* heora mycclan ylde . and se geleafa ne bið on gearum . ac bið on glæwum andgitum .

Læt þine godas geyrsian . gif hi aht magon .

Læt hi sylfe beodan þæt we us to him gebiddan . gif þu þis dón ne miht . drece us loca hu þu wylle .

Þa cwæð simpronius . se sceandlica dema .

Geceos þe nú agnes an þæra twegra . oððe þu mid mædenum þæra mæran uestan . þinne lac geoffrige . oððe þu laðum myltestrum scealt beon geferlæht . and fullice gebysmrod . and ða cristenan ne magon þe þonne ahreddan .

Hwæt þa agnes andwyrde . mid mycelre anrædnysse . gif ðu cuðest minne god . ne cwæde þu ðas word .

Orsorhlice ic forseo þine þeow-racan . forþan þe ic geare cann mines drihtnes mihte .

Ic truwige on him forþan ðe he Is me trumweall . and unateorigend-lic bewerigend . þæt ic ðinum awyrgedum godum ne ðurfe ge-offrian . ne þurh ælfremede horwan . æfre beon gefyled . mid þam fulum myltestrum .

Ic hæbbe godes encgel haligne mid me .

Þine godas syndon agotene of áre . of þam ðe man wyrcð wynsume fate . oððe hí synd stænene . mid þam þe man stræta wyrcð .

Nis na godes wunung on ðam grægum stanum . ne on ærenum wecgum . ac he wunað on heofonum .

Þe soðlice genimð and þine gelican . seo grimlice hell . mid þam grædigum fyre . on þam ge beoð toblawene . and forbyrnan ne magon . ac beoð æfre ge-edniwode . ðære ecan ontendnysse .

Þa hét se woda dema hyre wæda of adón . and hí swa nacode gelædan . to þam forligres huse . and hét clypian geond þa strǽt . and cyðan be þysum .

Hwæt ða godes miht mycclum wearð geswutelod . swá þæt þæs mædenes fex . befeng hi eall abutan . sona swa þa cwelleras hire claðas of abrudon . and þæt fex hi behelede on ælce healfe gelice .

Hi tugon ða þæt mæden to þæra myltestrena huse . ac heo gemette þær sona scinende godes encgel . swa þæt nan man ne mihte for ðam mycclum leohte hire on beseon . oððe hí hreppan . for þan þe ðet hus eall sceán . swá swá sunne on dæg . and swa hí hí gearnlicor sceawodon . swá scimodon heora eagon swiðor .

Agnes hí þa astrehte þone ælmihtigan biddende . and god hyre þa asende scinende tunecan

Heo þancode ða criste . and ðone clað hire onadyde . and wæs swiðe gemæte hire micelnysse . beorhte scinende . swa þæt men geseon mihton . þæt god hire sende þone scinende clað .

Þa wearð þæra myltestrena hús mannum to gebæd-huse . and ælc seðe Inneode . arwurðode god . for þam heofonlican leohte . þe on ðam huse scean .

Þa com þæs gerefan suna (sic) to þære scinendan stowe . mid his sceandlicum gegadum . wolde þa godes þinene gebysmrian . and sende him sona æt-foran . sume Into hire . ac hí wundrodon swiðe . þæs wynsuman leohtes . and ablicgede cyrdon . to heora bysmorfullum hlaforde .

Þa ðreade he hí þearle . forðan þe hí þæs scinendan leohtes swa swiðe wundrodon . and hí gewemman ne dorston .

Arn þa him sylf inn . mid sceand-licum willan . ac he feol astreht ætforan þam mædene adyd . þurh ðone deofol þe hé dwollice gehyrsumede .

He læg þær swa dæd lange on þære flora . ða wendon his gegadan þæt he wære gebysgod embe his fracedan dæda . þa fandode heora án . and ge-mette hine deadne . and dreorig sona clypode .

Eala ge romanisce arfæste symle . gehelpað us hraðe . þeos reðe myltestre mid hire drycræfte adydde urne hlaford .

Þa arn seo burh-waru . ablycged þider sona . and se fæder eac cóm . clypigende mid gehlyde .

Þu wæl-hreowasta wimman . woldest ðu geswutelian þinne feondlican dry-cræft . swa þæt ðu minne sunu adyddest .

Agnes him cwæð tó . hwi synd þa oðre cuce . þe hider inn-eodon . buton forðon þe hí arwurðodon þone ælmihtigan god . þe me myld-heort-lice gescrydde . and asende me his encgel . þe minne lichaman geheold . seþe wæs fram cyld-cradole criste gehalgod .

Þin sceamleasa sunu . mid sceamleasum anginne . arn into me . ac se encgel hine afylde . and ðam deofle betæhte . þe hine adydde þær-rihte .

Þa cwæð se heah-gerefa . to ðam halgan mædene . þin saga bið ge-swutelod . gif þu þone sylfan encgel bitst . þæt hé minne ancennedan sunu . nu ansundne arære .

Agnes seo eadige him andwyrde þus .

Ne synd gé na wyrðe . þæt wundor to geseonne . ác swa þeah is tima . þæt drihtnes miht beo geswutelod .

Gað eow nu þeah ealle út . þæt ic mé ana gebidde .

Hi eodon þa ealle ut . and heo hi ana gebæd biddende hire drihten þæt he þone deadan arærde .

Þa æteowde þær cristes encgel . and þone cniht arærde . and he arn þær-rihte ut . þa he geedcucod wæs . clypigende ofer eall . and cwæðende þus .

An god is on heofonum . and eac on eorðan . seðe is þæra cristenra god . and eower godas ne synd nahtes .

Hi ne magon him sylfum fremian . ne oðrum fultumian .

Þa wurdon þa hæðengyldan . hetelice gedrefede . and clypodon mid gehlyde . be ðam geleaffullan mædene .

Animað animað hraðe . þa reðan wiccan . seo þe ðus awent þurh wicce-cræft manna mod .

Þa ne dorste se heah-gerefa . naht ongean þa hæðen-gyldan . ac for-lét his gingran togeanes þære ceaste . and ferde him-sylf aweg . sorhful on mode . forðan þe hé ne mihte þæt mæden ahreddan . wið þa hæðen-gyldan . æfter his suna æriste .

Hwæt þa aspasius se under-gerefa . ne mihte wið-cwæðan þam cwealm-bærum folce . ac hét þa ontendan for þam micclum teonan . swyðe micel fyr . and hí to-middes besceofan .

Hit wearð þa swá gedón . swa se wælhreowa hét . ac se lig hine todælde . on twegen dælas sona . and for-swælde þa ðe þa ceaste macedon . and agnes seo eadige . stód on æle middan gesund . astræhtum handum þus hí gebiddende .

Eala ðú ælmihtiga god . ana to ge-biddene . ondrædend-lic scyppend . soþlic to wurðigenne . mines drihtnes fæder . ðe ic bletsige . forðan þe Ic æt-wand þurh þinne wynsuman sunu . þæra arleasra þeowracan . and eac þæs deofles fylðe .

Efne ic eom begoten mid godcundlicum deawe . þæs lig is to-dæled and þa geleaf-leasan forswælede .

Ic bletsige ðe fæder bodigendlic god . þæt ic þurh fyr unforht to ðe faran mót . þæt þæt ic gelyfde þæt ic geseo . ðæt þæt ic gehihte . þæt ic hæbbe nú .

Þe Ic andette mid muðe . and mid minre heortan . and mid eallum innoðe . ic þe gewilnige . ænne soðne god . þe mid þinum suna rixast . and mid þam halgan gaste . and ælmihtig god æfre .

Þæt fyr wearð þa acwenced . þæt þær an col ne gleow . and þæt folc tealde þæt to dry-cræfte grymetende mid gehlyde . grame to feore .

Ða ne mihte Aspasius þa micclan ceaste acuman . ac hét hí acwellan . mid cwealm-bærum swurde . and crist hí ða underfeng . for his naman gemartyrode .

Se fæder . and seo modor . mid mycelre blysse . gelæhton hyre líc . and gelæddon to heora agenum . and hi ðær bebyrigdon . buton sarnysse . and þær gelome wacodon . wurðigende þa stowe .

Þa on sumere nihte gesawon hí cuman mycel mædenlic werod . and agnes tomiddes .

Hi wæron ealle ge-glengede mid gyldenum gyrlum . and mid ormætum leohte arwurðlice ferdon .

Þa cwæð seo halige agnes to hire magum ðus .

Warniað þæt ge ne wepon me swa swa deade . ác blyssiað mid me . Ic eom þysum mædenum geferlæht . and ic mid him under-feng . swiðe fægere wununga . and ðam ic eom on heofonum geþeodd . þe ic her on eorðan lufode .

Æfter þysum wordum heo gewende forð mid þam mædenum .

Þa wearð þeos gesihþ . swiðe gewidmærsod .

Hit gelamp ða siððan æfter lytlum fyrste . on þæs caseres dagum . þe constaninus hatte . þæt sume menn sædon þa gesihþe his dehter constantia gehaten . seo wæs hæðen þagit . heo wæs swa þeah snotor . and swyðe unhál . and on eallum limum egeslice wunda hæfde .

Þa ðohte heo . þæt heo wolde wacian ane niht æt agnes byrgene . biddan hire hæle .

Heo com þa þider þeah þe heo hæðen wære . and mid geleaf-fullum mode . to ðam mædene clypode . þe ða byrgene ahte . þæt heo hyre hæle forgeafe .

Heo wearð þa on slæpe . and on swefne geseah þa eadigan agnen . þas word hire secgende .

Ongin anrædlice ðu æðele constantia . and gelyf ðæt se hælend þe ge-hælen mæge . ðurh þone þu scealt underfón . ðinra wunda hæle .

Þa awóc constantia . and wæs swá ge-hæled . þæt on hire lice næs gesyne . aht þæra sarra wunda .

Heo ferde ða hál hám to hire fæder . and hine geblyssode . and hire gebroðra . and ealle ða hired-menn . for hire hæle blyssodon . and se hæðen-scipe wanode . and godes geleafa weox .

Heo wearð þa gefullod . swá swá hire fæder wæs . and hadunga under-feng . mid fægere drohtnunga . and manega oðre mædenu . þurh hire mærlican ge-bysnunga . forsawon woruld-lustas . and wurdon criste gehalgode .

Ða bæd constantia . constantinum hire fæder . þæt he þære eadigan agne . ane cyrcan arærde . and hire sylfre ane ðrúh . þær hét gesettan .

Þes hlisa asprang þa on eallum ðam leod-scipe . and coman fela untrume to þære halgan byrigene . and wurdon gehælede . þurh ða halgan agnen .

Þa romaniscan mædenu manega eac ðurh-wunodon on clænum mægðhade . for cristes lufe . æfter agnes gebysnunga þe þær bebyrged ís .

alia sententia quam scripsit terrentianvs. On ðam dagum wæs svm heretoga gehaten gallicanus . sigefæst on gefeohtum . and ful leof þam casere . for his micclan sige . þeah þe he nære gefullod .

Se awogode constantian þæs caseres dohtor on þære tide . þe ða scyðiscan swiðe wunnon wið hine . wearð þa se casere for þære wogunge astyrod . wiste þæt seo dohtor . þe drihten hæfde gecoren . hraðor wolde sweltan þonne ceorlian .

Þa geseah seo dohtor . hire fæder gedrefednysse . and cwæð him ðus to . mid clænum inge-hyde .

Ic wát þæt god nele me næfre forlætan .

Awurp þine ymbhydig-nysse . and behát me þam heretogan . þæt he me underfó . æfter ðam ge-feohte . siððan he ða scyððiscan mid sige ofer-winð .

For þysum behate . ic wille habban his dohtra . attican and arþemian . to minre geþeodnysse . oð þæt uncre gifta . gegearcode beon .

Hæbbe he mid him forð to þære fyrdincge . Iohannem . and paulum . mine ða ge-treowostan . þæt hi mine þeawas magon him secgan . and ic ðurh his dohtra his þeawas oncnawe .

Hit wearð swa gedón . þæt heo ða dohtra under-feng . and se heretoga ferde mid þære fyrdincge . þa gebæd constantia hí to gode sona mid mycelre onbryrdnysse þæt he hire bena gehyrde .

Eala ðu ælmihtiga god . þe for agnes ðingunga . þines mæran martyres . minne hreoflan gehældest . and me sylfre geswutelodest . þinne soðan lufe . and þu behete us . on þinum halgan godspelle .

Soð ic eow secge . eow sylð min fæder . swa hwæs swa ge hine biddaþ . her on minum naman .

Ic bidde ðe min drihten þæt ðu þas mædenu . þe gestryne . and heora fæder gallicanum . þe me wile þe beniman . geðeod to clænnysse þines geleafan .

Geopena heora heortan earan to þære halwendan lare . þæt hí þe anne lufian . and eorðlice ðing ne gewilnion . and mid beornendre lufe . to þinum brydbedde becumen .

Æfter þysum gebede gebugon ða mædenu to ðam halgan fulluhte ær se fæder come . and wurdon gehadode to þæs hælendes clænnysse .

Þa com gallican eac to gode gebogen . and hine gebæd sona mid soðum geleafan . æt þæs halgan petres stowe þe stent binnan rome .

Hine wylcumede se casere . and cwæð him to mid blysse .

Þa ða þu to þam gefeohte ferdest . þu offrodost þam fulum deoflum . and nu ðu sigefæst come . þu ge-bæde þe to criste . and to his apostolum . cyð me hu hit sy .

Þa aléat gallicanus . to ðam geleaf-fullan casere . and sæde be endebyrdnysse hu he beah to gode .

Þa scyððiscan þeoda ofslogan ure fela . and ic wearð belocen on anre lytlan byrig . mid hwonlicum fultume . and we feohtan ne dorston . ongean ðone ormæstan here . he (sic) hæfde þa burh beseten .

Þa offrode Ic gelome mine lác þam godum . oþþæt mine geferan me and hí betæhton . ðam onwinnendum feondum . and ic ða fleames cepte .

Þa cwædon ða cristenan . Iohannes . and paulus .

Behát þam heofonlicum gode . þæt ðu to him gebuge . gif he þe nu gehelpð . and þu hæfst sige .

Ic ða sona behét . swá swá þa halgan me tihton . and me com þær-rihte to . godes encgel mid rode . het me niman min swurd . and siðian mid him .

Ic him fyligde ða . and fela englas coman on manna gelicnyssum . mærlice gewæpnode . gehyrton me mid wordum . and heton me gán forð . oðþæt we becoman þær se cyning wæs .

He feoll ða afyrht . to minum fotum astreht .

Þa gebundon ða godes cempan . bardan þone cynincg . and his twægen suna . and betæhton hí me .

Ne sloh ic nænne . ne of-slean ne hét .

Nu is þin land gehealden and þa leoda þe onbugað .

Ealle ða heafod-menn þe to me gebugan . mid heora cempum . ic gebigde to criste .

Ða oðre ic forseah þe swa dón noldon .

Ic sylf eom swa cristen . þæt ic gecwæð on behate . þæt ic heonan-forð nelle habban wifes gemanan . find me nu æfter-gencgan . þæt ic gode mæge þeowian . on soðre æwfæstnysse swá ic þam ælmihtigan behét .

Þa beclypte se casere ðone godes cempan . and sæde hu his dohtra drihtne þeowdon . and his twa geswustra eac siððan gelyfdon .

Þa eodon hí to healle . and seo halige helena cō mid ðam fore-sædum mædenum . micclum blyssigende . hi þurh-wunodon on mægð-hade . mǽrlice drohtniende . oð þæt hi gewiton of worulde to criste .

Gallicanus þa freode fif þusend manna . and mid æhtum ge-welgode and wædlum todælde his manig-fealdan welan . and gewende him þanon . to sumum halgan were . se hatte hilarian . mid sumum his mannum . þe hine ne mihton forlætan .

Feower land he forgeaf forð In mid him æþeodigum to andfencge . and to ælmes-dædum .

Þa asprang his word wide geond land . hu se mære man manna fét aðwoh . and wæter bær to handum . and mid wistum þenode .

He wearð ða swa halig . þæt he gehælde untrume . and swa hraðe swá he beseah . on ða wit-seocan menn . swa wurdon hí aclænsode . fram þam unclænan gastum .

Eft ða þa iulianus se arleasa wiðersæce . wearð to casere gecoren . þeah þe he wære to preoste bescoren .

Þa sette hé geban . swa swa he wæs bealwes full . þæt ða cristenan nahton nan þincg on worulde . adræfde þa gallicanum þone godes man aweg . and he ferde to alexandrian þære ægiptiscan byrig . wende siððan to westene . and wæs ðær ancra . oð þæt sum hæðen-gylda . hine ðær ofsloh . forþan þe he nolde þam fulum godum geoffrian . and he swa mid sige . siþode to criste .

Eft iulianus se ylca wiðersaca wolde gebigan . þa halgan gebroðra . Iohannem . and paulum . to his hæðen(-)gilde . ac þaða hé ne mihte þa mæran godes ðegnas to his hirede aspanan . ne to his hæðenscipe . geweman . þa sende he him to sumne hæðenne wer . terrentianus gehaten . se hæfde mid him ane gyldene anlicnysse . and cwæð to ðam godes mannum .

Ure hlaford Iulianus . het eow ge-biddan to þyssere anlicnysse . oððe ic inc begen ofslea .

Þa cwædon þa halgan . ne cunne we nanne god . buton fæder and sunu . and þone halgan gast . þyssere halgan ðrynnysse hæfð þin hlaford wiðsacen . and wile oðre geweman mid him to forwyrde .

Hwæt ða terrentianus . het þa twægen gebroðra digellice beheafdian . and on heora huse bebyrigan .

Þa wearð iulianus . for his wælhreownysse sona þæs ofslægæn . þurh scam* marian hæse . and cristen-dom wæs þeonde . and þa halgan wurdon gecydde . swa þæt wode menn . wurdon gehælede . on ðam ylcan huse . þe þa halgan onlagon . and terrentianes sunu . mid sweartum deofle afylled . arn to heora byrgenum . egeslice wedende . and se fæder sona gesohte þa byrigena . anddette his synne þæt he ofsloh ða halgan . and wearð gefullod . and his suna wittig . þam hælende to lofe . þe leofað á on ecnysse . Amen.

Chapter 08

non̅ febr̅. nat̅l̅ sce̅ agathe uirgin̅.

Agathes wæs geícged sum ge-sælig mæden on æræ scyre sicilia . snotor and gelyfed . on ðam timan þe quintianus se cwealm-bære ehtere . þære scyre geweold wælhreowlice under þam casere .

Se wæs grædig gitsere . and his galnysse underþeod . deofles þeowet-lincg . and drihten onscunode .

Þa com him to earan be Agathes drohtnunge . and smeade hu he mihte þæt mæden him begitan . hét hí þa gefeccan . and betæhte hí anum fulum wife . afrodosia gecíged . sceand-lic on þeawum .

Seo hæfde nigon dohtra . nahtlice and fracode . þæt heo geond þrittig nihte hire þeawas leornode . and hire mod awende þurh þæra myltestrena forspennincgæ .

Hwæt ða affrodosia se fracedosta wimman . mid hire nigon dohtrum gedrehte agathen . hwilon olecende . hwilon egsigende . wende þæt heo mihte hire mod awendan .

Þa cwæð agathes . to þam yfelan teame .

Eower word syndon winde gelice . ac hí ne magon afyllan min fæstræde geþanc . þe is gegrund-staþelod . ðis heo cwæð mid wope . and gewilnode to ðrowigenne for cristes naman . þa cwealm-bæran wita . swá swá se þurstiga . on ðære sunnan hǽtan gewilnað wylsprincges . oððe wæteres celincge .

Þa geseah affrodosia . þæt heo þære femnan mod gebigan ne mihte . mid hyre bismorfullum tihtincgum . and ferde to quintiane and cw̅ him þus to .

Stanas magon hnexian . and þæt starce ísen on lædes gelicnysse . ærðan þe se geleafa mæge of agathes breoste . beon æfre adwæsced .

Ic and mine dohtra . dæges . and nihtes . naht elles ne drugon . buton hi æfre tihton . to þinre geþafunga . þeah ðe us hwonlice speowe .

Ic hire bead gymmas . and gyrlan of golde . and oðre mærða . and mære gebytlu . hamas . and hyred . and heo þæt eall forseah on meoxes gelicnysse . þe lið under fotum .

Þa yrsode quintianus . and hét hí ardlice feccan . befrán hí ða æt fruman . be hyre gebyrdum .

Agathes þa cwæð . ic eom æðelborenre mægðe . swá swá eall min mægð me is to witan .

Ða cwæð se dema . Hwi dest þu ðe sylfe . ðurh wace þeawas . swilce þu wyln sy .

Agathes andwyrde . Ic eom godes þinen . and mycel æðelborennys . bið þæt man be cristes ðeow .

Quintianus cwæð to þam cristes mædene .

Hwæt lá næbbe wé nane æþelborennysse forðan þe we forseoð þines cristes ðeow-dóm .

Agathes andwyrde þam arleasan and cwæð .

Eower æðelborennys becymð to swa bysmorfullum hæftnede . þæt ge beoð þeowan synne and stanum .

Quintianus cwæð . þa cwealm-bæran wita magon eaðelice gewrecan . swa hwæt swa ðu mid wedendum muðe tælst . sege swa þeah . ær ðu becume to þam fore-sædum witum . hwi ðu ure góda (sic) biggencgas forseo .

Agathes andwyrde . þam árleasan ðus .

Ne cwæð þu na góda . ac gram-licra deofla . þæra anlicnysse ge awendað on are . and on stanum . and ealle ða græftas ofer-gyldað . mid cræfte .

Quintian þa cwæð . þæt heo gecure oðer ðæra . swa heo mid fordemdum dyslice for-ferde . swa heo þam godum geoffrode . swa swa æðelboren and wis .

Agathes him andwyrde anrædlice and cwæð .

Beo þin wif swylc swa uenus . þin fule gyden wæs . and beo ðu swylc swa Iouis . þin sceand-lica god wæs . þæt git magon beon getealde . eac betwux þam godum .

Þa hét quintianus . hí mid handum slean gelome on þæt hleor . þæt heo hlydan ne sceolde .

Ða cwæð agathes eft ða ylcan word .

Quintianus cwæð . þu cyst þæt ðu gecure þa tintregu to ðrowigenne . nu þu minne teonan ge-edlecst .

Þæt mæden him andwyrde . micclum ic wundrie þe snoterne mannan . to swa micclum dysige gebigedne . þæt ðu swylce for godas hæfst . þe ðe sceamað to ge-euenlæcenne .

Gif hí soða godes (sic) synd . godes ic þe gewisce . gif þu hí onscunast wit cweðaþ þonne án .

Hat hí swa yfele . and swa unclæne . þæt gif ðu hwylcne wyrige . þæt ðu gewisce him þæs . þæt his líf beo gelíc þinum laðum godum .

Quintianus hire cwæð to . Hwi clypast ðu swa fela ideles . geoffra ðam godum . þæt ic ðe gram-lice ne fordó .

Ða andwyrde agathes . unforht þam deman .

Gif ðu mid wild-deorum me nu bætan wylt . hi beoð sona hand-tame . þurh þæs hælendes naman .

Gif þu me fyr gearcost . me cymð fær-lice of heofonum . halwendlic deaw . þurh drihtnes ænglas . [. @ Skeat]

Gif ðu me swingla behætst . ic hæbbe þone halgan gast . þurh ðone ic forseo ealle þine swingla . þa cwehte se dema his deoflice heafod . and hét hí gebringan on anum blindum cwearterne . and hét þæt heo sceolde hi sylfe beþencan . hu heo mihte æt-windan þam wælhreowum tintregum .

Ða cwæð agathes . Þu earminge beðenc þe hu ðu mæge æt-windan ðam ecum witum .

Eode þa bliðelice to ðam blindum cwearterne . swylce heo wære gelaðod . to lustfullum beor-scype . and betæhte hire gewin þam wel-wyllendan drihtne .

Hwæt ða on mergen se manfulla dema het Agathen gelædan to his laðan andwerdnysse . and befrán hwæt heo smeade be hyre gesundfulnysse .

Agathes him cw̅ to . Crist me is for hæle .

Se dema axode . hu lange wylt ðu ungesælige ateon þas ydelnysse . mid cristes andetnysse . wið-sac ðinne crist . and clypa to þam godum . þe læs ðe þu ðin líf forlæte on iugoðe .

Agathes andwyrde anfealdlice and cwæð .

Wið-sac ðu þine godas . þe synd stænene . and treowene . and gebide þe to þinum scyppende . þe soðlice aleofað gif ðu hine forsihst . þu scealt on ecum witum ðrowian .

Þa wearð se arleasa gehathyrt . and hét hí on hencgene a-streccan . and ðrawan swa swa wiððan wælhreowlice and cwæð . forlæt þine anwylnysse . þæt ðinum life beo geborgen .

Agathes andwyrde on ðære hencgene þus .

Swa ic lust-fullige on þisum laðum witum . swa swa se ðe gesihð . þone þe he gewilnode . oððe se þe fint fela gold-hordas .

Ne mæg min sawl beon gebroht mid blysse to heofonum . butan min lichama beo on þinum bendum genyrwod . and fram ðinum cwellerum on þinum copsum agrapod .

Þa gebealh hine se wælhreowa and het hí gewriðan on ðam breoste mid þære hencgene and het siððan ofaceorfan .

Agathes him cwæð to . Eala ðu arleasosta ne sceamode þé to ceorfanne þæt þæt ðu sylf suce . ac ic habbe mine breost on minre sawle . ansunde . mid þam ðe Ic min andgit eallunga afede .

Quintianus ða hét hí to cwearterne gelædan . and hét hire ofteon . ætes . and wætes . and cwæð þæt nan læce hí lácnian ne moste .

Efne ða on middre nihte com sum harwencge mann Into þam cwearterne . and his cnapa him ætforan . hæfde leohtfæt on handa . wolde þa halgan gelacnian .

Seo eadige agathes cwæð to ðam læce .

Ne gymde Ic nanes læce-cræftas næfre on minum life . ic hæbbe minne hælend þe gehælð mid his worde . he mæg gif he wyle . mihtelice me gehælan .

Þa cw̅ se harwencga . he me sende to ðe .

Ic eom his apostol . and ðu efne nu bist hál on his naman . and he sona ferde .

Þa cneowode Agathes . and ðancode criste þæt he hí gemunde . and his mæran apostol to hire asende . mid swylcum frofre .

Æfter ðam gebede . beseah to hyre breoste . and wæs þæt corfene breost . þurh crist ge-edstaðelod . and ealle hire wunda wurdon gehælede .

Þær scean ða mycel leoht . on þam sweartum cwearterne . swa þæt ða weardas flugon . mid fyrhte fornumene .

Þa tihton þa hæftlingas . þæt halige mæden . þæt heo awæg eode . and ða wita for-fluge .

Þa cwæð agathes þæt æðele mæden .

Nelle ic amyrran mine kynehelm . ne ða weardas geswencan . ac ic þurh-wunige hér .

Þa on ðam fiftan dæge het se dema hí gefeccan . and cw̅ þæt heo sceolde þam godum geoffrian . oððe mid teartum witum getintregod beon .

Þa cwæð Agathes . þu earma andgit-leasa . hwa wyle clypian to stane . and na to þam soðan gode . ðe me fram eallum þam witum . þe ðu wælhreowlice . on minum lice gefæstnodest . for his naman gehælde . and min breost ge-edstaðelode . þe ðú arleasa forcurfe .

Þa befrán se hæðen-gylda . hwa hi gehælde .

Agathes cwæð . Crist godes sunu .

Quintianus cw̅ . to ðam clænum mædene . git þu namast crist? Heo cwæð him to andsware .

Crist ic andette . mid welerum . and æfre mid heortan to him clypige .

Ða cw̅ . se deofles þén . nu ic sceal geseon . gif crist ðe gehælð . het ða streowian geond þa flór . fela byrnenda gleda . and to-brysede tigelan . and hí swá nacode het wylian on þam fyre .

Þa wearð mycel eorð-styrung . on ðære ylcan stowe . and feol se stænene wáh . uppan þæs stuntan ræd-boran . þæt he ællto-cwysde . and sum oþer cniht samod . swyðe rihtlice swá . forðan þe hí ræd-boran wæran þæs arleasan deman . to his yfelum dædum .

Eac swylce seo burh eall byuigende stód for ðære eorð-styrunge . and arn seo burhwaru endemes to þam arleasan . axiende mid gehlyde . hwi hé þæt godes mæden . swa gramlice tintregode .

Þa fleah quintianus . afyrht for ðam gehlyde . and eac seo eorð-styrung hine ge-egsode þearle . hét swa þeah hí gebringan binnan ðam cwearterne .

Hwæt ða Agathes inwerdlice clypode . mid astrehtum handum to þam hælende þus .

Eala ðu min drihten . þe me to menn gesceope . and æfre fram cyldhade me gescyldest ofþis (sic) . þu þe woruldlice lufe awendest fram me . þu ðe dydest þæt ic ofer-com þæs cwelleres tintregu . scearp isen . and fyr . and þa slitendan clawa . þu ðe me on þam witum geþyld forgeafe . ðe ic bidde drihten . þæt ðu minne gast nu to þe genime . forðan þe nú ís tima . þæt ic þas woruld forlæte . and to þinre liðan milþeortnysse becuman mote . min leofa drihten .

Æfter þysum gebede binnan þam cwearterne heo ageaf hire gast . and to gode siðode .

Þa com seo burh-waru . and bebyrigde hire líc mid mycelre arwurð-nysse . on eall niwere þryh .

Þær com ða godes encgel gangende swa swa mann . þam fyligdan æt fotum fela wlitige cnapan . and sette enne marmstán æt þæs mædenes heafde binnan þære þryh . þysum wordum awritene .

Mentem sct̄* spontaneam honorē deo . et patrie liberationem . [. @ Skeat]

þæt [Þæt @ Skeat] is on englisc . halig mod . sylfwille wurðmynt . þam wél-wyllendan gode . and eardes alysednyss .

Þa awende se encgel aweg mid þam cnapum . and nes se mann on þære scire þe hi gesawe ærþán .

Hwæt ða quintianus cristes wiðer-winna . ferde on scipe . ofer semithetum embe agathen æhta . and eac wolde gehæftan ealle hire mægðe . ac hé ne moste for criste .

Hine gelæhte an hors . þa ða he læg on ðam scipe . hetelice mid toðum and hefde him úpp .

Þa spearn oðer hors to . and asprencde hine ofer bord . and næs his fule líc afundan æfre siððan . þa ne dorste nan man dreccan hire megðe . ac arwurðodon hí ealle . ge-egsode þurh god .

On þære ylcan scire sicilian landes . ís án byrnende munt . þone menn hatað ethna . onæled mid sulphore . þæt is swæfel on englisc .

Se munt byrnð æfre . swá swá má oþre doð . þa ge-timode hit ymbe twelf-monað æfter agathes þrowunge . and ethna up ableow swyðe egeslice ontendnysse . and arn be þam munte on flodes gelicnysse . and formulton þa stanas . and seo eorðe forbarn . oð þæt hit to þære byrig becom . þa urnon þa hæðenan . to þære halgan byrgene . and ahofen þone ofer-brædels of þære halgan byrgene to-geanes þam fyre . þe hí afærde forðearle .

Þa wearð þæt fyr gestilled . and æt-stod sona for agathen ge-earnungum . þære æðelan femnan . six dagas hit barn . and æt-stód on þam dæge . þe seo eadige Agathes . to ðam éce life gewát . þæt swa wurde geswutelod þæt seo ceaster wearð ahréd fram þæs fyres frecednysse . þurh agathen . foreþingunge . þam hælende to lofe . þe his halgan swa wurðaþ . þæs him sy á wuldor on ecere worulde . amen.

Chapter 09

de scam lucia uirgo. (sic).

Ða asprang agathen hlisa ofer land . and sǽ . swá þæt fram siracusa sohte mycel meniu ofer fiftig mila þæs mædenes byrgene . on catanensciscre byrig mid mycelre onbryrd-nysse .

Þa com sum wydewe [wuduwe → wyduwe] seo wæs gecíged euthicia . betwux oðrum mannum . to þære mæran byrigene . and hire dohtor samod . seo ge-sælige lucía .

Seo wydewe wæs unhál . swa þæt hire arn blód geond feower geare fæc . and fæla læca cunnode . ac hi ealle ne mihton hyre anre ge-helpan .

Hit gelamp ða æt þære mæssan . þæt man rædde þæt god(-)spell . hu þæt [þæt @ Skeat] wif wearð gehæled . þe wæs on blodes ryne . þaða heo hrepode þæs hælendes reaf . þa cw̅ . lucia . mid geleafan to hire meder .

Gif þu gelyfst modor . þysum mæran god-spelle . gelyf þæt agathes geearnode æt criste . þaða heo for his naman ðrowode . þæt heo hine symle hæbbe on andwerdnysse on ecere blysse . gehrepa hire byrigene . and þu bist sona hál .

Þa æfter þære mæssan seo modor and seo dohtor astrehton hí on gebedum æt þære byrgene .

Mid þam þe hí lagon and gelencgdon ða gebedu . þa wearð lucía on slæpe . and geseah agathen | betwux engla werodum . ænlice gefretewode . and clypode hyre þus to . clypigende ufenne .

Min swustor lucia . soð godes mæden hwi bitst þu æt me þæs þe ðu miht sylf getiðian þinre meder geheolp þin halga geleafa . and efne heo is gehæled . halwendlice ðurh crist . and swa swa þeos burh is gemærsod þurh me . fram criste . swa bið siracusa burh . þurh þe gewlitegod . forðan þe þu gearcodest criste . on þinum clænan mægð-hade . wynsume wununge . and ða awóc lucía .

Heo aras ða bifigende . for ðære beorhtan gesihðe . and sæde to hire meder . þu eart mihtiglice gehæled . nu bidde ic þe . þurh þa ylcan . þe þe mid ge-bedum gehælde . þæt þu nanne bryd-guman næfre me ne namige . ne of minum lichaman deadlicne wæstm ne sece . ac þa ðing þe þu woldest to gewemmednysse me syllan . forgif me ða [to] clænnysse . to criste farendre .

Þa cwæð seo modor . mine þincg þu wast . and ic heold nú nigon gear . wið ealle hynða þines fæder ge-streon . and furðor hí geeacnode . beluc ærest mine eagan . and þa æhta ateoh loca hu þe licige . min leofa dohtor .

Þa cwæð lucía . hlyst mines rædes ne miht ðu naht lædan of þysum life mid þe . and þæt þu on deaðe sylst for drihtnes naman . þu hit sylst for þan þe þu hit ne miht mid þe aweg lædan . ac syle nu on gesundfulnysse þam soðan hælende . swa hwæt swa þu gemyntest on forð-siþe to donne .

Þus tihte lucía gelome þa modor . od þæt heo beceapode þa scinendan gymmas . and eac hire land-are . wið lincgendum [corr. to licgendum @ Skeat] feo . and dælde siððan þearfum . and ælþeodigum mannum . wydewum . and wreccum . and wisum godes þeowum .

Þis com þa to earan . þam æðelborenan cnihte . þe awogode lucian . se wæ geciged pascasius . arleas hæðen-gilda . and tihte þæt halige mæden to | þæra deofla offrungum . ac þæt drihtnes mæden cwæð .

Hluttor offrung þæt is . and licwurðe gode . þæt mann wydewan geneosige . and wreccan gefrefrige . and steopbearnum gehelpe . on heora gedrefednyssum .

Ne dreah ic nu þrym gearum . nane oþre dæda . butan þam lyfigendan drihtne . þas lác geoffrode . nu ic wylle me sylfe him soðlice geoffrian . forðan ic leng næbbe . hwæt ic on his lacum aspende .

Þa yrsode pascasius . and hí spræcon fela . oð þæt he hire swingele behét . gif heo suwian nolde .

Lucia him cw̅ to . þæs lifigendan godes word ne magon geswican . ne for-suwode beon .

He axode ða mid olle .

Eart þu la god? [sic @ Skeat]

Lucia him andwyrde .

Ic eom þæs ælmihtigan þinen . forþi ic cwæð godes word . forþan þe he on his godspelle cwæð .

Ne synd ge þe þær sprecað . ac sprycþ se halga gast on eow .

Eft þa pascasius orgellice befrán . wunað se halga gast on þe eornostlice .

Lucia andwyrde þam arleasan and cwæð .

Se apostol behét þam ðe healdað clænnysse . þæt hi synd godes templ . and þæs halgan gastes wunung .

Þa cwæð se arleasa .

Ic hate þe ardlice lædan . to þæra myltestrena huse . þæt ðu þinne mægð-had forleose . þæt se . halga gast þe fram fleo . ðonne þu fullice byst gescynd .

Lucia andwyrde þus . ne bið ænig gewemmed . lichama to plihte . gif hit ne licað þam mode .

Þeah þu mine hand ahebbe . to ðinum hæþengilde . and swa þurh me geoffrige mines unwilles . ic beo þeah unscyldig . ætforan ðam soðan gode . seþe demð be þam willan . and wát ealle þincg . gif þu me unwilles gewemman nu dest . me bið twifeald clænnysse . geteald to wuldre .

Ne miht þu gebigan minne willan to þe . swa hwæt swa þu minum lichaman dest . ne mæg þæt belimpan to me.

Þa wolde se wælhreowa his word gefyllan . þæt heo wurde gelæd | to þære laðan fulnysse . and begunnon hí teon to þære galnysse huse . ac godes miht wearð geswutelod . sona on þam mædene . swa þæt se halga gast hi heold . and mid hefe gefæstnode . þæt þa manfullan ne mihton þæt mæden astyrian . þa cnitton hí rapas mid reðum an-ginne hire to handum and fotum . and fela samod tugon . ac heo næs astyrod . ac stod swá swá munt . þa wearð ge-ancsumod se arleasa pascasius . and het him gelangian þa leasan drymen to . þæt hi þæt godes mæden mid heora galdrum oferswyðdon . ac ðaþa him naht ne speow . þa het he spannan oxan tó . ac hí ne mihton awecgan þæt mæden þagit swá .

Se cwellere þa cw̅ to þam clænan mædene . hwæt is se Intinga . þæt an þusend manna þe ne magon astyrian swa unstrang swa ðu eart .

Lucia him cw̅ to . þeah þu clypige tyn þusend manna . hi sceolan ealle gehyran þone halgan gast þus cweðende .

Cadent a latere tuo mille et decem milia a dextris tuis tibi autem non adpropinquabit malum . þusend feallað fram þinre sidan . and tyn þusend fram þinre swyðran . þe sylf soðlice ne ge-nealecæð nan yfel .

Þa wearð se arleasa geancsumod eft swiðor on mode . and het mycel ád ontendan on ymb-hwyr[f]te þæs mædenes . and mid pice hi besp[r]encgan . and mid spyrcendum [~swyrcendum @ Skeat] ele .

Heo stod þa unforht on þam fyre and cwæð .

Ic abæd æt criste þæt ðis cwealmbæra fyr me ne gewylde . þæt þu wurðe gescynd . and hit þam geleaffullum afyrsige þære ðrowunge forhtunge . and þam unge-leaffullum þa yfelan blysse of-teo .

Þa wearð se wælhreowa wodlice geancsumod . þæt his magas ne mihton his mod-leaste acuman .

Ac heton acwellan þæt clæne mæden mid swurde . heo wearð þa gewundod . þæt hire wand se innoð út . ac heo ne ge|wát swa þeah . ac þurh-wunode on gebedum . swa lange swa heo wolde . and to þære leode cwæð .

Ic secge eow to soþan . þæt sib ís forgifen . godes gelaðunge . and se gramlica casere dioclytianus . is gedón of his rice and maximianus se man-fulla is dead .

Swa swa seo catanenscisce burh binnan hire weallum hæfð minre swyster agathen . miccle fore-þingunga . swa ic eom forgifen . fram þam ælmihtigan gode nu þyssere byrig . siracusanan . eow to geþingienne . gif ge foð to geleafan .

Mid þam þe heo þis spræc . wearþ se man-fulla pascasius mid racenteagum gebunden . and beforan ðam mædene gelæd . he wæs ær ge-wreged for his wælhreowum dædum . to romaniscre leode . þe ða ealle land geweolden .

He wearð þa gebroht on bendum to rome . and þa witan heton hine beheafdian . þaþa he ne mihte his mán-dæda betellan .

Seo eadiga (sic) lucia on þære ylcan stowe wunode . þe heo ofslagen wæs . oðþæt sacerdas coman . and hí gehusloden . mid haligre (sic) gerynu . and heo gewát to criste . mid þam þe hí cwædon amen.

Þa arærde þa leoda . þær heo læg cyrcan . and on hire naman gehalgodon . þam hælende to wurðmynte seðe æfre rixað on ecnysse god. AMEN.

Chapter 10

uiii. kl̅ martias. cathedra sci̅ petri.

We cweaþ on gerím-cræfte cathedra sci̅ petri . seofon nihton er þam monðe þe we martius hatað .

Nu synd sume men þe nyton hwæt se nama ge-tacnað.

Cathedra is ge-reht bisceop-stól on englisc . and se halga petrus wæs ahafen on þam dæge on his bisceop-stól . on þære byrig antiochian . þone stól he ge-sæt . seofon gear fullice . and siððan gewende be godes wissunge to þære mæran rome byrig . and þær binnan wunode fif and twentig geara . and fela wundra æteowde þære romaniscan leode . oðþæt he hí to gelea|fan ge-bigde he ferde fram antiochian . for þan þe he wæs apostol and sceolde gehwǽr gecuman . and cristen-dóm aræran . þa gesæt hé on rome oðer bísceop-setl . oð þæt se ar-leasa nero . hine ahencg on rode .

Nu wylle we eow secgan . sume petres wundra . him to wurðmynte . and eow to trymmincge . ac ure mæð nys . þæt we ealle his mærða secgan .

We sædon hwilon ǽr . hu his sceadu gehealde . ealle þa untruman þe heo oferglad . swa hwær swa he eode . and hí ealle astodon ansunde . ætforan him . þe on ðam fænne ær lagon .

Nu wylle we eac eow secgan . hu he sume dæg eode to þam godes temple . mid þam godspellere Iohanne . þa læg þær sum creopere lama fram cild-hade . se wæs dæg-hwam-lice geboren to þam beorhtan gete . þæt he ælmessan under-fencge æt þam infarendum . ða beseah he to petre sumere ælmessan wilnigende .

Petrus soþlice cwæð .

Næbbe ic seolfor ne gold . ic þe dó þæt ic hæbbe . arís on drihtnes naman . hál on þinum fotum . and gefeng his swiðran arærde hine upp . and he leop sona cunnigende his feðes . hwæðer hé cuðe gán .

Eode þa mid blisse . binnan þam temple mid þam halgum apostolum . þone hælend herigende . þa oncneowan hine ealle . þe hine cuðon ǽr . and micclum wundrodon . þæs wædlan hæle .

Eft æt sumon sæle þa petrus siþode . neosigenne þa geleaffullan . þa becom hé to liddan . wolde ða gebroðra gespræcan . þe on þære byrig eardodon . þa gemette hé anne bædrydan . binnon þam weallum . eneas gehaten . for eahte gearum lama .

Þa cw̅ se eadiga petrus . to þam earman bæddrydan . gehæle ðe drihten crist . arís and do þe gearowne . þa arás se bæddryda un-bunden fram petre . se þe hæfð þa mihte . þæt he mæg un-binden . þa fæstan cnottan . fyrnlicra synna . Þam ðe mid dædbote hine biddað georne . þæt he him geþingie | to þam hælende criste .

Þa gelyfde seo burh-waru . þurh þæs bæddrydan hæle . on þone soðan god . and gecyrde to fulluhte . and þa saroniscan swa gelice dydon .

Ioppe hatte sum burh . gehende þære liddan . on þære wæs an wydewe . wel gelyfed thabitas geciged . and swyþe ælmes-georn . and mid godum weorcum geglencged forþearle . seo wearð geuntrumad on þam ylcan timan . gewát þa of life . and læg on uppflora .

Þa ge-axodon þa geleaf-fullan . þe þæt lic besætan . þæt petrus wæs on liddan . þam lande swa gehende . asendan þa twegen weras wið his . and bædon þæt hé butan yldincge hí ge-neosode .

Þa arás se apostol and ardlice þider com . eode to þære uppflora . and efne him embe stodon . wepende wydewan . and wan-hafele þearfan . æteowigende him þa reaf . and þa gerenodan . tunecan . þe thabitas him worhte . ær þan þe heo gewite .

Þa hét se halga petrus . þæt hi him þæt hus gerymdon . and gebigde his cneowa biddende hire lifes .

Wende þa to þam lice . and hlude clypode . thabita arís . and heo þær-rihte ge-edcucode . beseah to petre . and geset hire upp .

Þa gelæhte petrus hire liþian hand . arærde hi upp hale of þam bedde .

Þa asprang þis wundor . wide geond þæt land . and fela gelyfdon on þone lifigendan god .

Þa wunode petrus æfter þære wydewan æryste . manega dagas on ioppe . mid sumum gelyfedan menn symon gehaten . his hus stod wið þa sǽ .

Þa wolde se apostol hine onsundron gebiddan . and astáh to þære upp-flora . embe midne dæg utan . wæs eac ofhingrod . and wolde þær anbidian . þa wearð him æteowed . wundorlic gesihð . he geseah heofonas opene . and him com to an fæt . fyðer-scyte . and brad . and binnan þam wæron ealle cuce nytenu creopende . and gangande . him com stemn to . þus clypiende þriwa . arís nu petrus . | and þas reðan deor ofsleh . maca þe to mete . þæt þu mege þe gereordian .

Þa cw̅ se halga wer . ne gewurðe hit leof drihten . forþan ðe ic ne onbyrgde . swa hwæt swa unclæne bið .

Þa com him eft stemn þo þus clypigende of heofonum . þæt þæt god geclænsode . ne cwæð þu þæt hit fúl sy .

Þriwa him wæs þus geclypod tó . and þær-rihte wearð þæt fæt upp to heofonum abroden . eft mid þam nytenum .

We wyllað eow secgan . sceortlice þas getacnunge . þæt fyþer-scyte fæt . mid þam fulum nytenum . hæfde getacnunge . ealles hæðenes folces . þe on fyðer-scytum middan-earde fullice leofdon . ac crist hí geclænsode . þurh his tocyme on worulde . and forþi cwæþ se stemn clypigende to petre . þæt he hine gereordode . mid þam reþenum nytenum . forþan þe hi wæron geclænsode . þurh cristes þrowunge . and he sceolde hi awendan of þam wyrm-hiwe . þurh soðe lare . to gesceadwisnysse . and to manna gelicnysse . of þam laðum hiwe .

Þriwa clypode seo stemn . fram þære halgan ðrynnysse . seo þe is án ælmihtig god . æfre unto-dæled-lic .

Mid þam ðe petrus smeade . hwæt his gesihð gemænde . þa clypodon þær ðry weras . cnucigende æt þam geate . and axodon æt þam hiwum . hwæðer se halga petrus þær wununge hæfde . woldon hine gespræcan .

Efne þa se halga gast . him þæt sæde . and cwæð .

Þry weras þe secað . of cessarean byrig . arís and far mid him . forþan þe ic hí asende .

Petrus þa eode ard-lice to ðam mannum . befrán for hwylcum intigan . hi hine axodon . hi sædon þæt cornelius hi asende to him .

He is hundredes ealdor . and hæfð godes ege . swyðe riht-wys wer . þæt wát eall þeos scýr . him com to godes æncgel . and cwæð þæt he sceolde . þe him to langian . and þine lare gehyran .

Þa on ærne mergen eode se | eadiga petrus . mid þam ærendracum . and eac his gebroðra samod to cessarean byrig .

Cornelius gelaðode his leofestan freond . wolde þæt hí ge-hyrdon . þa halgan lare æt petre . and eode him to-geanes . and hine eadmodlice gebigde . adune to his fotum . ac his onfencg petrus.

Eode þa inn mid cornelie . and cw̅ to him eallum .

Ge witon þæt us Iudeiscum ne gedafenað to genealecenne eow hæðenum mannum . ac me geswutelode god . þæt us nys to cweðenne . þæt ge unclæne syndon .

Ic com eac forþy buton ælcere twynunge . ic axe þone intigan . hwi þu me gelangodest .

Cornelius cwæð þa . me com to godes encgel nu ǽr on dæg embe non-tíd . þaþa ic me ana gebæd . stód on hwitum gyrlum and cw̅ þus to me . þin gebæd is gehyred . fram þam healican gode . and þine ælmyssan synd on his gesihþe getealde . asend nu to Ioppen to symone petre . and gelange hine to þe . þæt [þæt @ Skeat] he þe lifes word secge .

Nu sende ic to þe and we synd gearwe . ealle þa þincg to gehyrenne . þe se hælend þe bebead .

Cristen-dóm næs þagit cuð on þære byrig . ne þes cornelius næs on criste gefullod . ac he gelyfde swa þeah on þone lifigendan god . and mid ælmessum geearnode þæs ængles wyssunge . and astealde þam hæþenum healice gebysnunge . ða þa he to fulluhte heora fyrmest beah .

Þa cw̅ . se eadiga petrus .

Ic on-cneow to soþan . þæt [þæt @ Skeat] gode is andfencge on ælcere mægðe seðe hine ondræt . and deð rihtwisnysse .

Ongan þa to secgenne þone soþan geleafan þam hæðenan þegne be ðæs hælendes fære . hu he worhte wundra on þyssere worulda fela . and siððan deað þrowode sylf-willes for ús . and on þam þryddan dæge arás of ðam deaðe gesund .

Þa betwux þysum wordum . wearþ mycel godes wundor swa þæt se halga | gast com ofer þa hæðenan . and hi ealle spræcon þe ða lare gehyrdon . mislicum gereordum mærsigende god . þa wundrodon þa iudeiscan þe þær wæran mid petre geleaffulle on criste . þæt se halga gast com ofer ða hæðenan . and se halga petrus cwæð . hwa mæg wæteres forwyrnan þysum werum to fulluhte . nu hí þone halgan gast habbað under-fangen swa swa we sylfe . and he sona hét hi ealle fullian . on þæs ælmihtigan naman . þa bædon hí petrum þæt he andbidode þær ane feawa daga æfter heora fulluhte .

Eft þaða petrus com to þam cristenum heape binnan hierusalem . þa befrunon þa gebroðra þe of Iudeiscum cynne . on crist gelyfdon .

Hwi eodest þu to þam hæðenum . and on heora huse ge-æte .

Þa iudeiscan wendon þæt hi ana wæron gode gecorene . and forþy swa cwædon .

On ealdum dagum under moyses . ǽ . noldon þa iudeiscan genealecan þam hæþenum ne mid him gereordian . and swyþe rihtlice þá . forþan þe hi gelyfdon on þane lifigendan god . and þa hæðenan gelyfdon on þa leasan godas . þaðe næron godas ac gramlice deofle .

Nu woldon ða Iudeiscan heora gewunan healdan æfter heora fulluhte . and forseon ða hæþenan .

Þa began se halga petrus . him eallum secgan . hwæt him god geswutelode ærðan þe he þider siþode . and hu se halga gast com ofer þa hæþenan and cw̅ [cwæð @ Skeat] .

Gif god him forgeaf þæs halgan gastes gife . swa swa us on frymþe on fyrenum gereordum . Hwæt eom ic manna þæt ic mihte god forbeodan? [sic @ Skeat]

Þa suwodon þa Iudeiscan syððan hí þis gehyrdon . and wuldrodon god . þæt he wolde forgifan þam hæþenan dæd-bote to þam heofonlican life .

Marcellus wæs gehaten . sum mære godes þegn . se folgode symone þam sceand-lican dry . oðþæt se eadiga petrus . þone arleasan ofer-dráf .

Þa for-lét marcellus þone manfullan dry . and folgode petre and to fulluhte beah .

Nu awrat þæs marcellus . hu sce̅ petres dohtor petronella gewat of worulde to criste .

Petrus hæfde wif ærðan þe he wære gecyrred to cristes hirede . ac he wiþ-cwæð siððan woruldlicum gewilnungum . and wifes neawiste . forþan þe crist astealde clænnysse on worulde . and ealle his folgeras ferdon on clænnysse . swa swa petres cwæð . cuþlice him to .

Ecce nos reliquimus om̄ia et secuti sumus te . quid ergo erit nobis? [sic @ Skeat]

Efne we forleton ealle þincg on worulde and þe nu folgiaþ . hwæt fore-sceawost þu us .

On anginne middan-eardes . cwæð se ælmihtiga god . beoð gemenig-fylde . and ge-fyllað þas eorðan . and crist wolde on his to-cyme clænnysse aræran . and his halgan hired . heold on clænnysse .

Menn hæfdon on frymðe heora magan to wife . and swa wel mosten for ðære wif-leaste . and gif nu hwa swa deð næfð he godes bletsunge .

Under moyses ǽ . moste se bisceop habban an ge-æwnod wíf . for þære gewissan æfter-gencgnysse . þæt is þæt se sunu sceolde symle fón to þam hade . æfter his fæder geendunge and nan oðer ne moste .

Hit mihte þa wel swá . for þan þe hi ne mæssodon næfre . ac hi offrodon nytenu on heora lacum gode . ne husel næs gehalgod ærþam ðe se hælend com . and þa niwan gecyðnysse mid cristen-dome arærde . and geceas þa clænan to his clænum þeow-dome . na to nytena offrunge ác to his agenum lichaman . and bisceopas ne beoð nu be gebyrdum gecorene . ac seo halige gelaðung lufað þa clænan . and crist wile habban þa þe him clænlice þeniað . æt þam liflicum lacum his lichaman and blodes .

We sceoldan secgan be þære snoteran petronellan . þæs eadigan petres dehter . ac us be-arn þis on mod .

Se fore-sæda marcellus sæda (sic) þæt heo læge on paralisin swa swa petrus sylf wolde .

Þa axode titus þone eadigan apostol . hwi he geþafode þæt heo swa lage on þam leger-bedde . þonne he oðre alefede ealle gehælde . and heo ana læg swa .

Ða cw̅ se halga fæder . þæt hire fremode þæt . ac þelæs þe hwa wene þæt ure word ne mæge hire hæle forgifan . ic hate hi nu arisan and us eallum þenian . and heo þær-rihte arás þenode hire fæder . and his geferum hál .

Æfter þære þenunge het se halga petrus . hi to bedde gán and beon eft seoc .

Heo þeah ða on godes ege and god hí eft gehælde . swa þæt heo sylf mihte manega oðre gehælen . þurh halige gebedu on ðæs hælendes naman .

Hire wæs sum oþer mæden geferlæht felicula gehaten ful-fremed on godes ege . and on ealre godnysse . ac petronella wæs swyðe wlitig on hiwe .

Þa com sum heretoga . se wæs gehaten flaccus . mid mycelre fare to þære mæran petronellan . wolde hi niman to wife for hire wlitigan hiwe .

Þa cw̅ þæt halige mæden to þam hæþenan menn . hwi come þu mid wæpnum and mid wælreowum cempum to anum mædene unmihtigum to wige . ac gif ðu me habban wylt hat cuman to me æðelborenne wíf . and wlitige mædenu nu æfter ðrym dagum . and ic efne mid him to þinum huse cume . and he hire gelyfde .

Hwæt þa petronella mid fæstenum hi gebæd to ðam heofonlican cynincge . þe heo gecoren hæfde on eallum þam fyrste . and felicula samod . oðþæt nicomedis se mæsse-preost cóm on þam ðriddan dæge . and dyde him mæssan . and seo halige petronella þa husel under-fencg . gewende to hire bedde and gewát sona .

Þa comon þa wíf swa heo hæfde gecwæden . and be-hwurfon hire líc oþþæt heo bebyrged wæs . swylce hi forðan comon þæt hi þa fæmnan bestodon .

Þa awende se flaccus to feliculan his mod . and cwæþ hire þus to mid þrutigendum mode .

Geceos þe nu ardlice an þyssere twægra . oþþe ðu beo min wíf . oððe gebuh to urum godum and him lác geoffra . ac heo him andwyrde þus .

Ne beo | ic næfre þin wif . forðan þe ic sylfwylles eom criste gehalgod . ne ic þam hæþenum godum lac ne geoffrige . forðan þe ic on crist gelyfe .

Þa hét se arleasa flaccus . þa fæmnan gebringan on þyster-fullum cwearterne . and cw̅ . þæt man ne sceolde ænigne bigleofan hire dón binnon seofon nihton .

Heo wunode þa swá seofon niht meteleas . and syððan wearð getintregod for þan soðan geleafan and for hyre mægð-hade oðþæt heo wearð gemartyrod . and hire gast ferde freoh to heofonum .

Þa com nicomedis se fore-sæda masse-preost . and bebyrgde hire líc to lofe þam ælmihtigan .

Þa gelæhte flaccus þone geleaf-fullan preost . and forðan þe he nolde þam fulum godum geoffrian . het hine beswingan oðþæt he sawlode .

He gewat þa to heofonan to hælende criste . þam is wuldor and wurð-mynt . on ealra worulda woruld . AMEN.

Chapter 11

vii. idus martias. nat̅l̅ sanctorum quadraginta militum.

We wyllað eow gereccan þæra feowertigra cempena ðrowunge . þæt eower geleafa þe trumre sy . þonne ge gehyrað hu þegenlice hí þrowodon for criste .

On þæs caseres dagum þe wæs gehaten licinius wearð astyred mycel ehtnys ofer þa cristenan . swa þæt ælc cristen mann sceolde be his agenum feore þam hælende wið-sacan and to hæðenscype gebugan . and þam deofolgyldum drihtnes wurþmynt gebeodan .

Þa wæs geset sum wælhreowa dema agricolaus gecíged . on anre byrig sebastia gehaten . on þam lande armenia .

Se fore-sæde dema wæs swiðe arleas . cristenra manna ehtere and arod to deofles willan .

Þa het se cwellere þæs caseres cempan ealle geoffrian . heora lác þam godum .

Þa wæron on þam camp-dome cappadonisce cempan . feowertig cristen[ra]* unforhte on mode . æw-fæstlice libbende æfter godes lare .

Þas gelæhte se | dema and gelædde hí to þam deofolgyldum . and cwæð mid olecunge . þæt hí æþele cempan wæron . and on ælcum feohte fæst-ræde him betwynan . and symle sige-fæste on swiþlicum gewinne . æt-eowiað nu forði eowre anrædnysse . and eow sylfe under-þeodað þæra cyninga gesetnyssum . and geoffriað þam godum ærþam þe gebeon getintregode .

Þa cwædon þa cristenan . to ðam cwellere þus .

Oft we oferswiðdon swa swa þu sylf wistest ure wiðer-winnan on gehwylcum gewinne . þa þa we fuhton for ðam deadlicum kynincge . ac us gedafenað swyðor mid geswince to campigenne . for þam undead-licum cynincge and þe ofer-swiðan .

Þa cw̅ se dema þæt hí oþer þæra dydon . swa hí þam godum geoffrodon and arwurðnysse hæfdon . swa hi ða offrunge for-sawon and gescynde wurdon . smeageð nu ic bidde hwæt eow betst fremige .

Ða halgan andwyrdon þam hæðenan cwellere .

Drihten foresceawað . hwæt us fremige . þa hét se cwellere hí on cwearterne gebringan . hwæt þa halgan þa heora cneowa bigdon binnon þam cwearterne þus biddende crist .

Alys us nu drihten fram deoflicum costnungum . and fram eallum æswicungum unrihtwisra wyrhtena .

Hi sungon on æfenunga eft oðerne sealm . and on heora gebedum wunodon þurh-wacole oð midde niht .

Þa æt-eowde se hælend hine sylfne his halgum . and hi þus getrymde to þam to-weardan ge-winne .

God is eower anginn . and eower inngehýd ac se bið gehealden seþe oð ende þurh-wunað .

Ealle hi gehyrdon þæs hælendes word and wurdon afyrhte . and forði þurh-wunodon buton slæpe oð dæg . heora drihten mærsigende .

Hwæt þa agricolaus on ærne mergen gegaderode his geborenan magas to his manfullan geþeahte . and het him to lædan þa halgan godes cempan .

Hi þa ealle feowertig æt-foran him stodon þa began se de|ma eft hi herigan . cwæð þæt heora gelican næron on þæs caseres lande ne swa ge-herede . ne him swa leofe . gif hi noldon awendan þa lufe to hatunge .

Þa cwædon þa halgan . þæt hi hine hatodon for his geleaf-leaste . and lufodon heora drihten .

Þa grimetede se wælhreowa swa swa grædig leo . and het hí gebringan gebundene on cwearterne . forðan þe he anbidode þæs ealdormannes to-cymes .

Þa com se ealdorman ðæs embe seofon niht . and het sona gelangian þa geleaffullan halgan .

Þa cw̅ heora an . his nama wæs quirion .

Eala ge gebroðra uton beon gehyrte . swa oft swa we clypodon to criste on gefeohte we wurdon sige-fæste sona þurh his fultum . and we eac ofer-swiðdon þone onsigendan here .

Hwilon we wæron on micclum gewinne . and eall ure folc mid fleame æt-wand buton we feowertig þe on ðam feohte stodon . biddende georne ures drihtnes fultum . and sume we afligdon sume feollan ætforan us . and ure an næs gæderod (sic) fram ealre þæra meniu .

Nu is ure wiðer-winna þes wæl-hreowa heretoga . oðer is se dema . and se deofol þridda . þas ðry syrwiað hu hi ús beswicon . ac uton nu clypian crist us to gefylstan . and þa egeslican tintregu . ne þa teartan witu . ne ænige bendas us ne beoð to bealwe .

Æfre we wæron gefultumode on ælcum gefeohte swa oft swa we sungon þisne ænne sealm .

Deus In nomine tuo saluum me fac et in uirtute tua libera me . Et cetera . [þæt is on englisc;] [added in a later hand]

Þu ælmihtiga god gehæl me on þinum naman . and on þinre mihte me alys [eal]wealdend [added in a later hand] .

Hi wurdon þa gelædde mid þysum lofsange to þam reðum. and comon gehwylce to þære wæfer-syne . þa beheold se heretoga þa halgan and cwæþ .

Ge sceolan habban æt me . wyrðmyntas and sceattas . gif ge urum godum offrian wyllað .

Gif ge þonne beoð þwyre to þisum ge beoð geunwurðode . and eac | gewitnode .

Þa cwædon þa halgan þæt hi ðone hælend wurðodon . and nænne oðerne swa healicne ne tealdon .

Þa hét se ealdorman mid ormætum graman . heora neb beatan mid blacum flintum . ac þa stanas wendon wið þæra ehtera swa þæt ða cwelleras hi sylfe cnucodon .

Þa gelæhte se ealdorman . ænne ormetne flint wearp to þam halgum . ac he wand þwyres to þam heah-gerefan . and his heafod to-bræc .

Þa wurdon þa halgan swyþe gehyrte . and sungan sona þisne sang mid geleafan .

Qui tribulant me Inimici mei Ipsi infirmati sunt et ceciderunt .

Mine fynd þe me gedrefdon syndon geuntrumode . and adún feollon .

Þa swór se dema þæt hi þurh dry-cræfte . þa stanas awendon to heora witnerum .

Þa het se ealdor-man hi ardlice lædan æft Into cwearterne . and mid carfullum mode smeade wið his rædboran hwæt him to ræde þuhte . hu he mihte his hosp on þam halgum gewrecan .

Hi wurdon þa gebrohte binnan þam cwearterne . and sungon þysne sealm mid swyþlicre blysse .

Ad te leuaui oculos meos qui habitas in celis . et cetera . [þæt is on englisc] [added in a later hand]

To þe ic ahæbbe mine eagan drihten . þu þe eardast on heofonum . and hi ealne ðone sealm sungon .

Hwæt þa on middere nihte com se ælmihtiga drihten of ðære healican heofonan . and his halgan geneosode . and þysum wordum gespræc* þe her synd awrytene .

Se þe soðlice gelyfð on þone lyfigendan fæder . and on his ancennedan sunu . and on þone halgan gast . þeah þe he dead beo . he bið swa þeah cucu .

Beoð gehyrte . and eow ne ondrædað þæra hæðenra wita þe synd hwilwend-lice .

Beoð geþyldige on þissere hwile . þæt ge beon gewuldor-beagode on þære ecan worulde .

Þa wunodon þa halgan þurh-wacole oð mergen . on heofonlicre blysse þurh þæs hælendes cyme . þa het se ealdor-man hi on mergen gefeccan . and hi ealle cwædon swylce mid anum | muðe .

Doð nu be us þæt þæt drihten wile .

Þa com eac se deofol . and hæfde ænne dracan on handa . and swurd on oðre . þus secgende þam deman .

Þu eart min agen ongin nu swiþe wel .

Swylce hé cwæde ofer-swið þas cristenan þurh tearte wita . þæt hí to me gebugan .

Þa gewearð þam ehterum on heora yfelum geþeahte . þæt hí þa godes halgan on heardum bendum geleddon . to anum bradum mere mid bysmorfullum edwite .

On þam timan wæs swiþe hefig-time wynter . and se fore-sæda mere wæs mid forste ofer-þeaht . and se winterlica wind wan mid þam forste .

Þa scufon þa hæþenan þa halgan Into þam mere . to middes þam ise ealle unscrydde . and heom [←him] weardas setton þurh-wacole menn . þæt heora nan ne mihte mid fleame æt-berstan .

Þær wæs eac geset swiþe gehende þam mere . wearm wæter on cyfe . gif þæra cyþera hwylc wolde forlætan his geleafan . and his lic baðian on þam wearman wætere . for ðæs wyntres teartnysse .

Hit begann þa on æfnunge egeslice freosan . þæt þæt ís befencg þa foresædan martyras . swá þæt heora flæsc for ðam forste tobærst .

Þa eargode heora án for þam ormætum cyle . awearp his geleafan and wolde hine baðian on þam wlacum wætere and wende fram his geferum . ac he gewát sona swa hé þæt wæter hrepode . and wearð seo wearmnys him awend to deaðe . forþan þe his geleafa ne geleaste oð ende . swa swa drihten sæde him sylf on þam cwearterne .

Þa gesawon þa oðre hu þam anum getimode . and sungon þysne sang . swylce of anum muðe .

Ne yrsa ðu drihten us on ðysum deopum flodum . ne þin hat-heortnys on þyssere ea ne sy .

Se þe hine ascyrede for þyssere scearpnysse fram us . his lima synd toslopene and hé sona losode .

We nellað drihten næfre fram þe twæman . oð þæt ðu us gelyf-fæste þe to lofe drihten . we ge|cygað þinne naman . þonne [←þone; wrongly] þe soðlice heriað ealle gesceafta . and ealle niwelnyssa [←niwelnysse] . fyr . and hagol . snaw . and ceald is . windas . and stormas . þe þin word gefyllað .

Þu gæst ofer sǽ swa swa ofer grenre eorðan . and þu æþelice gestilst hyre strangan yða .

Þu gehyrdest drihten þone heah-fæder Iacob . þaþa he for-fleah þa frecenfullan þeowracan . þe his agen broþor esau gecwæð .

Þu wære mid iosepe In aegypto-lande . and hine of þeowdome ahofe to hlaforde .

Þu gelæddest moysen of ðam ylcan lande eft mid israhele folce þurh fela tacna . and him weg gerymdest on þære readan sǽ .

Þu gehyrdest eac siððan þine halgan apostolas . gehyr us nu drihten on þysum deopum flode . and ne lǽt us besencan on ðissere cealdan hreohnysse . ne ús ne forswelge þes swearta grund .

We synd earmingas gehelp us nu drihten .

We synd gesette on sælicum grunde . and ure blód fleoð to urum fotum adune . geliðe-waca nú þisne unliðan cyle .

 menn magon oncnawan þæt we to þe clypodon . and we beon gehealdene forðan þe we hopiað to ðe .

Hwæt ða færlice wearð mycel wundor ðurh god . þær com heofonlic leoht to þam halgum martyrum . swa hát swa sunne scinende on sumere . and þæt ís formealt on eallum þam mere and þæt wæter wearð awend to wynsumum baðe

Ealle þa weard-menn wæron ǽr geswefode . buton heora anum þe þyses ealles hlyste hu hi hí gebædon . and hú se án forferde .

Þa beheold se ylca hwanon þæt leoht scean . ða geseah he bringan mid þam beorhtan leohte ufan of heofonum an leas feowertig kyne-helma . þam halgum martyru . þe on ðam mere stodon .

Þa under-geat he sona þæt se án næs geteald to þam cyne-helmum cristes þegna . forþan þe he nolde þa earfoðnyssa forberan .

Ða awrehte se án þa oðre weardas . and unscrydde hine sylfne and scæt into ðam mere clypigende . and cweðende . ic eom eac | cristen

He eode to ðam halgum . and clypode to ðam hælende .

Ic gelyfe on þe drihten swa swa þas gelyfað . læt me beon geteald to heora getele . and do me þæs wyrðne þæt ic wælhreowe tintrega for þe þrowige . and on ðe beo afandod .

Þa geseah se deofol þæt þa drihtnes halgan wæron gefrefrode on heora frecednysse . and on geleafan þurh-wunodon swa swa he ǽr ne gelyfde . þæt hi æfre þone cyle swa gesæliglice acoman .

Þa bræd se sceocca hine sylfne to menn . gewrað his sceancan and wánode him sylfum .

Wa ís me earmum þæt ic eom ofer-swyþed . fram þysum halgum werum . and ic eom gebysmorod .

Hæfde ic ælteowe þenas . nære ic þus eaðelice oferswiðed .

Nu ic wylle awendan þæs wælhreowan heortan . to þan geþance þæt he þyssa halgena líc ealle forberne and on ðære ea awurpe . þæt furðon heora bán ne beon æfre afundene .

Þa sungon ða halgan on þam softum baðe . þu eart ana god ælmihtig scyppend . þu ðe wundra wyrcst . and ure wiðer-winnan ofer-swiðst .

Þu gescyndest þone sceoccan þe embe us syrwde .

Hwæt þa on ærne mergen comon þa arleasan cwelleras . and axodon þa weard-menn hu-meta se an wære to þam halgum geðeod . oððe hwæt he gesawe .

Þa cwædon þa weardas to ðam wælhreowum demum .

We feollan on slæpe swarlice ealle swylce we on deaðe lagon . ac he læg þurh-wacol . geseah ða wundra and wræhte us siððan .

Þa gesawe he [MS. we] þæt leoht and he gelyfde sona . unscrydde hine eallne and eode into heom [←him] . and cwæð mid hluddre stemne . þæt he gelyfde on crist .

Þa hét se arleasa dema hi ealle gelædan of ðam bradum mere . and tobrecan heora sceancan . þa ongunnon ða hæðenan hi handlinga ateon . and to-bræcon heora sceancan . swá swá heom [←him] beboden wæs .

Þa sungon hi þisne sealm on þære bræce .

Anima nostra sicut passer erepta est de laqueo uenantium . | Et cetera . [þæt is on englisc;] [added in a later hand]

Ure sawl is ahred of grine swa swa spearwa [spearwe → spearwa] . þæt grin is tobryt . and we synd alysede .

Ure ealra fultum is on ðæs drihtnes naman . seðe geworhte heofonas and eorðan .

Þa cwædon hí amen . and heora gastas ageafon . and ferdon swá gemartyrode to þam ælmihtigan drihtne þe him ǽr gefultumode on ðam frecednyssum . and hi æfre getrymde oþþæt hi him tocomon .

Ða gedyde se dema swa swa se deofol gebeotode . het hi ealle forbærnan on swiðe bradum fyre . ac þa bán belifon æfter þam bærnette . þa awurpon þa hæðenan into ðam widgillum streame .

Þis wearð geswutelod sona æfter þrym dagum sumum halgan bisceope on þære ylcan byrig .

Him comon to on swæfne þa soðan godes halgan . and sædon hwær heora bán þa gebrohte wæron .

Hwæt þa se bisceop of his bedde arás . and ferde mid his preostum to ðam flode nihtes .

Þa scinon ða bán swa beorhte swa steorran on þam wætere . and hi ðæs wundrodon .

Ealle hi becoman to anre dypan . and næs forloren naht on þam flode . and þæt leoht geswutelode swa hwǽr swa hi lagon .

Þa gebrohte se bisceop ealle þa halgan bán on gelimplicum scrynum . and gelogode hi up on geleaf-fulre cyrcan to lofe þam ælmihtigan . ðam sy wuldor . and wurðmynt on ealra worulda woruld. Amen.

Hwæt losað æfre þam ælmihtigan gode .

Gif hwylc ungesælig mann his scyppende bið ungehyrsum . and nele þurh-wunian on wél-dædum oð ende . ac forlæt his gelæfan and þone leofan drihten . þonne bið oðer gecoren to þam kyne-helme þe se oðer nolde geearnian þurh geswinc . swá swá ge gehyrdon on þissere rædinge . þæt an þæra weard-manna wearð þam halgum geðeod . and gelæhte þone kyne-helm þe se oðer forleas

Iudas eac se arleasa þe belæwde þone hælend . aheng hine sylfne sona on grine . and mathias se eadmoda wæs gemærsod siþþan . and to apostole ge|coren æfter cristes æriste . and hæfð þone wurðmynt þe se wærlhreowa forleas . þurh his agenne swicdóm þaða he sealde his scyppend .

Nyte we hweþer se weardmann wære æfre gefullod . ac we witon swa þeah hwæt wise lareowas sædan . þæt ælc ðæra þe bið acweald for cristes geleafan bið soðlice gefullod þonne he swylt for gode . and on his blode aðwogen fram synna horwum . and [leofað] [←lyfað] mid þam drihtne þe he his líf fore sealde .

Nis gode nan neod þæt we god wyrcan . ne he nan þing ne hæt for his agenre neode . ac hit fremað us sylfum swa hwæt swa he us bebyd . and we beoð gesælige gif we urum scyppende gehersumiað . and gif we hine ænne ofer ealle þincg lufiað . seðe hine forlæt he losað witodlice .

Þeahhwæþere gelicað þam leofan drihtne . þæt we his willan mid weorcum gefremman . and þurh þæt ge-earnian þæt éce líf mid him .

Se apostol paulus sette on his pistole þæt we soðlice synd ures scyppendes gefylstan . swá þæt ure drihten deð þurh his gecorenan fela þincg on worulde . and fylst him æfre swa þeah forðan þe menn ne magon on mode asmeagan ænige godnysse buton hit of gode cume . ne naht to góde gedón . butan godes fylste .

He is swa mihtig wyrhta . þæt he mæg awendan yfel to gode þurh his godnysse .

Micel yfelnyss wæs on iudeiscum mannum . þaþa hi syrwdon mid sweartum geþance hu hi crist acwealdon . and þæt com us to hæle . and to ecere alysednysse and heom [←him] to forwyrde .

Hi synd þurh-scyldige for heora syrwunge . and heom [←him] bið gedemed be ðam þe hi dydon . þeah þe ure drihten þa dæda him geþafode .

Yfele wæron þa ehteras and þa arleasan cwelleras þe ða martyras ofslogon . ac swa þeah hit becom ðam halgum to wuldre and to ecum wyrðmynte . and þa ehteras habbað ece genyðerunge .

Næron swa manega martyras nære seo mycele ehtnyss ðe se deofol astyrode ongean drihtnes halgan þurh his arleasan | þenas . þe ðone hæðen-scipe lufedon .

God geþafað swaþeah for his godnysse þæt his sunne scynð ofer ða synfullan hæþenan. and asend his ren-scuras ofer ða rihtwisan menn and ofer ða manfullan . for his mycclan cyste . and afet us ealle ge yfele ge gode .

God gesceop ða hæþenan þeah þe hí hine ne cunnon . ac hi ne beoð swa-þeah butan witum eft . forþan þe hí eaðelice mihton þone ælmihtigan under-gitan ðurh ða gesceafta . þe hi ge-seoð on worulde .

Heofen and eorðe . and oþre gesceafta . sunne . and mona . mærsiað heora scyppend . and men magon tocnawan [←tocnawen] . þæt se is mære god ana ælmihtig þe hi ealle gesceop .

Nu beoð þa hæðenan buton beladunge rihtlice fordemede mid deofle on helle . forðan þe hi ne oncneowan crist mid geleafan . þe him lif sealde and and-lyfene fore-sceawode .

An gecyndelic . ǽ . is eallum mancynne gesett . þæt nan man ne gedó dare oðrum menn . swa swa se hælend cwæð on his halgan godspelle .

 þæt ðu þe sylfum nelt on þinum life becuman . ne do ðu þæt oðrum menn . þis cwæð drihten sylf .

Ac þa hæðenan hynað and hergiað þa cristenan and mid wælhreowum dædum urne drihten gremiað . ac hí habbað þæs edlean on þam ecum witum .

God forgifð us mannum menigfealde wæstmas . þæra we sculon brucan swa us gebeorhlic sy . þæt se lichama hæbbe hlywðe and fodan . þæt we ne beon beswicene þurh ða swæsan lustas . þe of ofer-flowednysse eallum þam becumað . þe buton wær-scipe heora woruld adreogað .

Uton we awendan ure willan to gode . and on eallum þingum urne scyppend wurðian . seþe æfre rixað on ecnysse. AMEN.

Chapter 12

in caput ieiunii.

Þis spel gebyrað seofon niht ær lenctene.

On ðysse wucan on wodnes-dæg swa swa ge sylfe witon . is caput ieiunii . þæt is on englisc . heafod lanctenes fæstenes .

We etað on þam sunnan-dagum on undern and on æfen . | forðan þe se sunnan-dæg is swa halig þæt se man bið wyrðe ðe on þam dæge fæstan wile. þæt he beo amansumod gif he hit for his anwylnysse deð .

Ne eac man ne mót . cneowian on sunnan-dagum .

We sculon swa þeah ægðer ge on sunnon-dagum ge on oðrum dagum druncennysse and oferfylle forbugan . be ðam þe us bec tæcað . and huru swyðost on lencten .

Nu ne beoð na feowertig daga on urum lenctenlicum fæstene gefyllede . buton we fæsten þær-foran to þas feower dagas . wodnes dæg . and þunres dæg . and frige dæg . and sæternes dæg . swa swa hit gefyrn geset wæs þeah ðe we hit eow nu secgan .

On þone wodnes dæg wide geond eorðan . sacerdas bletsiað swa swa hit geset ís . clæne axan on cyrcan . and þa siððan lecgað uppa (sic) manna hæfda . þæt hi habban on gemynde þæt hi of eorðan comon . and eft to duste gewendað . swa swa se ælmihtiga god to adame cwæð . siððan he agylt hæfde ongean godes bebod .

On geswincum þu leofast and on swate þu etst þinne hláf on eorðan . oðþæt þu eft gewende to þære ylcan eorðan þe þu of come . forðan þe þu eart dust . and to duste gewendst .

Nis þis na gesæd be manna sawlum . ac be manna lichaman þe for-molsniað to duste . and eft sceolan on domes dæg ðurh ures drihtnes mihte ealle of eorðan arísan þe æfre cuce wæron . swa swa ealle treowa cuciað æfre on lenctenes timan . þe ær þurh wyntres cyle wurdon adydde .

We rædað on bocum ægðer ge on ðære ealdan ǽ . ge on þære níwan . þæt þa menn þe heora synna be-hreowsodon . þæt hí mid axum hi sylfe bestreowodon . and mid hæran hi gescryddon to lice . nu do wé þis lytle on ures lenctenes anginne . þæt we streowiað axan uppan ure heafda to geswutelunge þæt we sculon ure synna behreowsian . on ure lencten-licum fæstene .

Sum unge-rad mann wæs mid ælfstane bisceope on wiltun-scire on hirede . se man | nolde gan to ðam axum on þone wodnes dæg . swa swa oðre men dydon þe þa mæssan ge-sohton .

Þa bædon his geferan þæt he eode to þam mæsse-preoste . and under-fæncge þa gerynu þe hi under-fengon .

He cwæð ic nelle .

Hi bædon þa-git . he cwæð þæt he nolde . and wealode mid wordum . and sæde þæt he wolde his wifes brucan on þam unalyfedum timan .

Hi leton þa swa . and hit gelamp þæt se gedwola rád on ðære wucan ymbe sum ærende . þa gestodon hine hundas hetelice swyðe . and he hine werode oþþæt his sceaft ætstod ætforan him . and þæt hors hine bær forð . swa þæt þæt spere him eode þurh ut . and he feoll cwelende .

He wearð ða bebyrged . and him læg on-uppan fela byrðena eorðan binnon seofon nihton . þæs ðe hé forsóc þa feawa axan .

On þære ylcan wucan com sum truð to þæs bisceopes hirede . se ne gymde nanes lenctenes fæstenes . ac eode him to kicenan . þa hwíle ðe se bisceop mæssode and began to etenne . he feoll þa æt ðære forman snæde under-becc geswogen . and spaw blod . ac him gebyrede swa ðeah þæt feorh earfoðlice .

Us sæde eac oft aþelwold se halga bisceop þe nu wyrcð wundra ðurh god . þæt he cuðe anne mann mid ælfege bisceope . se wolde drincan on lenctene þonne hine lyste .

Þa sume dæg bæd he þone bisceop ælfeh . blætsian his ful . he nolde . and se dysiga dranc butan bletsunge and eode him út .

Man slætte þa ænne fearr feringa þær-ute . and se fear arn him togeanes . and hine ðyde þæt he his feorh forlét . and gebohte swa ðone untiman drenc .

Ælc þæra manna þe yt oððe drincð on untiman on þam halgan lenctene . oððe on rihtfæsten-dagum . wite hé to soðan þæt his sawl sceal sarlice hit gebicgan . ðeah þe se lichama her lybbe gesund .

We sceolan gewilnian symle þæs ecean lifes . forþan þe on þam life syndon gode dagas . na swa þeah manega dagas ac | an . se ne geendað næfre .

Þeah þe hwa wille hér on lífe habban góde dagas . he ne mæg hi hér findan þeah þe hé sy welig forðan þe he bið oþþe untrum . oððe hohfull . oþþe his frynd him æt-feallað . oðð his feoh him æt-byrst. oððe sum oðer ungelimp on þysum life him becymð . and þær-to-ecean he him ondræt his deaðes symble .

Ne bið nan þyssera yfela on þam ecan life . ac bið se án góda dæg mid gode sylfum . butan sorge and sare . and ealra geswencednyssa . and un-ge-endod blis betwux eallum halgum .

Wel mæg ge-hwá witan þæt gif ahwær is myrcð and wuldor . þæt þær is unasecgendlic wuldor þær se wunað þe ealle ðincg gesceop . and god sylf hæfð gehaten eallum þam ðe hine lufiað . þæt hi moten wunian on ðam ylcan wuldre mid him sylfum a butan ende .

Wite nu þæt god ne lihð næfre . and warna þæt þu him ne leoge . gif þu him lihst ne bepæcst þu na hine . ac þe sylfne swyþe wraðe .

Mænig welig man is on ðyssere worulde þe wolde mycelne scet . and ungerím feos syllan wið þam gif he hit gebicgan mihte . þæt he hér for worulde lybban moste butan eallum geswyncum æfre unge-endod . and him ealle þincg gelumpon swa swa him sylfum gelicode . and he wære orsorh æfre ælces yfeles .

Ðeah þe hit swa beon mihte þæt he þas blisse begitan mihte þe ic nu fore-sæde . nære hit swa ðeah þe geliccre þære ecean myrhðe . þonne bið þam menn þe sit on cwearterne . wið þam menn þe færð frig geond land .

Nu se rica mann ne mæg her habban þe má þe ure ænig þa orsorgan and þa unateorigendlican blysse . hwi nele he þonne oððe we gebycgan on þysum earmum life þa ecean myrhðe mid godum geearnungum and ælmys-dædum .

Git we magan secgan sume bysne be þysum .

Gif man læt nu ænne þeof to slege . hu wenst ðu . nolde he syllan ealle his æhta þeah þe | he welig wære . wið þan þe he libban moste gif man him þæs geðafian wolde .

He ne mihte swa-þeah æfre libban . þeah ðe he hine þa ut alysde . ac he hæfde fyrst ane feawa geara .

Bið nu micel rǽd . þam þe his sylfes recð . þæt he him gebycge þæt ece líf þe we embe spræcað .

Nu þencst ðu and cwiðst . hu mæg ic þæt ece líf gebycgan? [sic @ Skeat]

Ic ðe secge . sele þe sylfne gode . swa þæt þu lufige þa ðingc þe god lufað . and þa ðincg onscunie þe god onscunað .

God ascunað leasunga . and lufað soðfæstnysse .

Ne beo þu na leas-breda oþþe swicol . ac beo soðfæst and symle getrywe . forðan þe se trywleasa ne bið nanum hlaforde to hæbbenne . ne eac ðæs untreowan god ne recð .

Hit bið swiðe langsum þæt we ealle godes beboda her nu eow gereccan . ac doð an ðincg . cepe gehwá þæt he his lif on unnyt ne aspende . ac leornige godes beboda æt wisum lareowum and þa healde swa he selost mæge .

Gif he hwæt to-brece ongean godes willan bete þæt georne . þonne bið he godes mann and god him sylð tomedes þæt ece lif . þe we ær embe spræcon.

{{block left| <poem> {\tab}Nu bið ælc mann gefullod on naman þære halgan þrynnysse . and he ne mot na beon eft gefullod . þæt ne sy foresewen þære halgan ðrynnysse to-clypung . ac seo soðe behreowsung and dædbot mid geswicennyssum yfeles us aþwyhð eft fram his synnum . þe we æfter urum fulluhte gefremedon . Se mild-heorta god cwæð be eallum synfullum mannum twa word swiðe fremfulle . Declina a malo et fac bonum . þæt is buh fram yfele . and dó gód . Nis genoh þæt þú fram yfele buge . butan þu symle be þinre mæðe gód gefremme . Dædbot mid geswicennysse yfeles . and ælmys-dæda . and halige gebedu . and geleafa . and hiht on gode . and seo soðe lufu godes and manna . gehælað and gelacniað ure synna . gif we þa læce-domas geornlice begað . God cwæð þæt he nolde þæs synfullan | deað . ac he wile swyðor þæt he gecyrre fram his synnum and libbe . Eft cwæð se ælmihtiga god . Gif se arleasa and se synfulla wyrcð dæd-*bote ealra his synna . and hylt mine beboda . and rihtwysnysse begæð . he lifað and ne swylt na yfelum deaðe . and ic ne gemune nanre his synna þe he gefremode . Nis nan leahter swa healic þæt man ne mæg gebetan . gif he yfeles geswycð . and mid soðre behreowsunge his gyltas . be lareowa* . tæcinge behreowsað . Se man þe wile his synna bewepan . and wið god gebetan þonne mot he geornlice warnian . þæt he æft þam yfelum dædum ne ge-edlæce . Se man þe æfter his dæd-bote his manfullan dæda ge-edniwað . se gegremað god . swa þæt he bið þam hunde gelic þe spywð and eft ytt þæt þæt he ær aspaw . Ne nan man ne sceal elcian þæt he his synna gebete . forðan þe god behet ælcum behreowsigendum his synna forgifnysse . ac he ne behet nanum elciendum ge-wis lif oþ mergen . Ne sceamige nanum menn þæt he anum lareowe his gyltas cyðe* . forðan þe se þe nele his synna on ðissere worulde andettan mid soðre behreowsunge . him sceal sceamian ætforan gode ælmihtigum . and ætforan his engla werodum . and ætforan eallum mannum . and ætforan eallum deoflum æt ðam micclan dome . þær we ealle gegaderode beoð . Þær beoð cuðe ure ealra dæda eallum þam werodum . and seðe ne mæg for sceame his gyltas anum menn ge-andettan . him sceal þonne sceamian . ætforan heofon-warum . and eorð-warum . and hel-warum . and seo sceamu him bið endeleas . Witodlice ne begit nan mann hys synna forgifnysse æt gode . buton he hi sumum godes menn geandette . and be his dome gebete . Eft ne mot nan mann ne ne sceal secgan on hine sylfne þæs ðe he wyrcende næs . swa swa we on bocum rædað be sumum treow-fæstum wife . þe wolde hire lif forlætan ærþan þe heo luge . Hieronimus | se halga lareow awrat on sumere stowe be ðam wife þus .

{{block left| <poem> He cwæð þæt sum wer wære þe his wif forsæde . swa þæt heo sceolde hi sceandlice forlicgan . and hi wurdon þa gebrohte buta to ðam deman . þæt unscyldige wif . and se foresæda cniht .

Hi wurdon þa beswungene . and swyðlice getintregode . swa swa þa wæs gewunelic to witnigenne forligr .

Hi man clifrode þa mid isenum clawum . þæt hi sceoldan secgan hweðer hit soð wære .

Ða wolde se cniht his wite ge-endian mid sceortum deaðe . and forsæde hí buta .

Þa cwæð þæt anræde wíf . betwux þam anðræcum witum .

Eala ðu drihten crist . þe ealle digle þincg wast . ðu þe eart modes smeagend and manna heortan . þu wast þæt ic ne wið-sace þæt ic sylf ne forfare . ac ic nelle secgan unsoð on me sylfe þæt ic wið þe ne syngie . gif ic me sylfe forleoge .

Heo cwæð þa to ðam cnihte . eala þu forcuðost manna . hwi woldest þu forsecgan unc unscildige swa? [sic @ Skeat]

Ic wylle eac sweltan na scyldig swaþeah . and ic ferige mid me forð unsceðþignysse . forðan þe nates-hwon ne swylt se þe bið ofslagan to life .

Þa wundrode se dema þæs wifes anrædnysse . þæt heo nolde andettan on swa earfoþum witum . þæt se cniht sæde sona for yrhðe . and demde þæt hi man sceolde ofslean buta .

Þa arn þæt folc to ardlice for wafunge . and se cwellere sloh sona þone cniht þe hine sylfne for-leah . þæt he læg heofod-leas mid anum swencge . and hine siððan bewende to þam anrædan wife . wolde hi ofslean .

Heo let to slege and he slóh þa tó mid eallum mægene . ac þæt swurd ne mihte buton þa hyde ceorfan . þeah þe he hetelice sloge .

He wearð þa ofsceamod and sloh eft swiðe . þa æt-stód þæt swurd and þone swuran ne hrepode . ac þam cwellere æt-feoll færlice his gold . þaþa he swa hetelice his handa cwehte .

 wif him cwæð to .

Cniht nim þin gold . þe læs þe hit þe losige þæt ðu lange beswunce .

Swa orsorh wæs þæt wíf under þam wæl|-hreowan cwellere . þæt heo locode his goldes þe hi belifian \superscript{vel heafdian} wolde .

Þa sloh se cwellere git mid þam swurde hire tó . ac seo halige þrynnys þæt swurd gelette . þæt hit wundian ne moste þæs wifes swuran .

Þa wolde he þurh-þýn hi þwyres mid þam swurde . ac se ord bigde upp to þam hiltum . and ne dorste hi hreppan forðan þe heo næs dyrne forligr .

Þa cwæð eall seo meniu þe ðær mid stód ofwundrod . þæt se cwellere ne sceolde swencan hi na leng . and drifan hine aweg mid wæpne mid ealle .

God wolde þa git his wundra geswutelian þurh þæt anræde wíf . and him gewearð þa eallum þæt man funde niwe swurd and niwne slagan þærto . forðan þe crist wolde hi ge-edcucian of deaðe .

Heo wearð þa ofslagan . ac hire swura næs þurh-slagen .

Heo wæs swa-þeah dead and sona bebyrged . ac god hi eft arærde eaðelice of deaðe on þære ylcan nihte . and heo ansund lyfode on worulde siððan lange to wuldre þam ælmihtigan . se þe hyre unscæððignysse swa geswutelode mid wundrum .

Heo nolde seccgan unsoð and hi sylfe fordeman . forðan þe se leasa muð ofslihð þæs mannes sawle .

Nu ge habbað gehyred þæt ge forhelan ne sceolan eowre agenne synne ne eac secgan na mare þonne ge wyrcende wæron . þe ma þe þis wif dyde . forðan þe ælc hiwung . is ant-sæte gode .

Se cniht leah on hine sylfne and ofslagen wearð sona . swa eac dauid cynincg hét acwellan þone mann þe him sæde þæt he ofsloge saul þone cynincg . and wolde mid þære leasunge licettan wið dauid .

Dauid clypode þaða se cniht dead wæs .

Nu ðu cwæde þæt þu acwealdest þone cynincg saul . beo þin blod ofer þe and bufan þinum heafde .

Se man þe wile his synna andettan and gebetan . he sceal dón þonne forgifnysse eallum þam mannum þe him ær abulgon . swa swa hit stent on þam pater-nostre . and swa swa crist cwæð on | his godspelle .

He cwæð .

Buton ge forgifan þam mannum þe wið eow agyltað mid inwerdre heortan . nele se heofonlica fæder eow forgifan eowre gyltas .

Ælc cristen man sceal cunnan his pater-noster . and his credan .

Mid þam pater-nostre he sceal hine gebiddan . and mid þam credan he sceal his geleafan getrymman .

Se lareow sceal secgan þam læwedum mannum þæt andgyt to þam pater-nostre and to ðam credan . þæt hi witon hwæs hi biddað æt gode . and hu hi sceolon on god gelyfan .

We sceolan beon þeonde symble on godnysse . and elce dæg geeacnian us þa ecean speda þa hwile þe we moton . forðan þe we ne magon æfter ure geendunge aht dón to góde . ac þær we habbað edlean þæs ðe we ge-earnodon hér .

Ne sceal nan mann wenan ne on his mode þencan þæt he hæbbe gefremod fela to góde . and ne þurfe na mare þyllices begán . forðan þe he forlyst þæt lytle þæt he ær dyde . gif he wenð þæt he ne ðurfe þanon forð wyrcan nan þincg to góde . swylce he to gód sy .

Fela halige menn fram frymðe middan-eardes . wæron beforan us wundorlice geþogene . þam we nu ende-menn geefenlæcan ne magon . ne ða þing gefyllan þe hi gefremodon on life . forði we sceolan habban huru eadmodnysse .

Eft is us to smeagenne hu se ælmihtiga crist his eadmodnysse cydde . þaða he to cwale sealde hine sylfne for us . and swa ure synna æt-bræd . hu mæg nu manna eadmodnys beon mycel geþuht . togeanes his eadmodnysse þe ælmihtig god is .

We sædon nu þis spel . forðan þe her bið læs manna on wodnes dæg . ðonne nu to dæg beoð . and eow gebyrað þæt ge beon gescrifene . on ðissere wucan . oððe huru on ðære oðre .

Sy him á wuldor ðe leofað . and rixað on ecnysse . ece drihten . AMen; [sic @ Skeat]

Chapter 13

de oratione moysi . in medio quadragesime.

Æfter am e moyses se mæra heretoga of ae|gyfta lande mid his leode ferde . and ofer ða readan sǽ siðodon mid fotum . and becomon to ðam westene . þa wan him on swiðe amalech se cynincg mid his leode feohtend .

Þa cwæð moyses to þam cenan iosue .

Geceos ðe nu wæras . and gewend tomergen togeanes amaleh . and win him on swyðe . ic sylf wille standan on ðisum steapum munte . hæbbende me on handa þa halgan godes gyrde .

Iosue þa ferde and feaht wið amalech . and moyses þa astáh to þam sticolan munte . mid aarone . and húr . þone ælmihtigan to biddenne .

Þa ahefde moyses his handa on gebedum . and Iosue hæfde sige . and sloh þa hæðenan .

Eft ðonne moyses ne mihte lencg habban his handa astrehte . þonne hæfde amalech sige þa hwile . and sloh þæt godes folc .

Swa oft swa moyses ahefde his handa on gebedum swa hæfde Iosue heofonlicne fultum . and sona swa his earmas for unmihte aslacodon . sona sloh amalech . and sige hæfde on him .

Moyses handa wæron mycclum gehefegode . aarón þa alede ænne ormetne stán under moysen . and he sæt þær onuppan . and aaron ahæfde his hand upp on gebedum . and hur heold þa oðre oþþæt hit æfnode .

Iosue þa hæfde heofonlicne fultum . and afligde amalech and his folc mid wæpnum .

Be þisum we magon tocnawen þæt we cristene sceolan on ælcere earfoðnisse æfre to gode clypian . and his fultumes biddan mid fullum geleafan . gif he ðonne nele his fultum us dón ne ure bene gehyran . þonne bið hit swutol  we mid yfelum dædum hine ær gegremedon . ac we ne sceolon swaðeah geswican þære bene . oðþæt se mild-heorta god us mildelice ahredde .

Moyses hæfde sige and mycelne fultum . þa hwile þe he heold his handa on ge-bedum . and his willa ne ateorode ac se werige lichama .

Nu habbe we gewinn wið þone hete|lan deofol . and he winð on ús forðan þe he wælhreow is . hu bið þonne gif we nellað to þam hælende clypian . þonne moyses werignyss ne mihte beon beladod .

Witodlice bið ofer-swiðed þurh þone swicolan deofol . seðe nele clypian crist him to fultume .

Ælc rihtwis man hæfde swa swa we rædað on bocum fultum and hreddinge . seðe mid fullum geleafan on his earfoðnyssum to ðam ælmihtigan clypode .

Nis nan þincg swa lað þam geleafleasum deofle . swa þæt hine man gebidde bealdlice to gode . forðan þe [se] swicola wát þæt his wæpne sceolan þurh halige gebedu toberstan swiðost . and he bið ofer-swiðod simble þurh gebedu .

Forþi he cunnað georne þonne we clypiað to gode hu he mæge tobræcan þa ge-bedu mid costnungum . and ure mod awendan of þam weorce þurh þæt . oððe he mid geameleaste huru us gebysgað . oþþe mid smeagungum . smealice us hremð .

Þonne we us gebiddað mid byle-witum mode þonne sprece we soðlice to gode sylfum swa .

And þonne we béc rædað oððe rædan gehyrað . þonne sprecð god to us þurh þa gastlican rædincge .

Se man mot hine gebiddan swa swa he mæg and cann . forðan þe se ælmihtiga god cann ælc gereord tocnawan . and on ælcere stowe man mot mærsian his drihten . and hine gebiddan beo þærþær he beo.

Man sceal swaþeah secan cyrcan gelome . and man ne mot spellian ne spræce drifan binnan godes cyrcan . forðan þe heo gebed-hús is . gode gehalgod to þam gastlicum spræcum .

Ne man ne sceal drincan oððe dwollice etan binnan godes huse . þe is gehalgod to þam . þæt man godes lichaman mid geleafan þær þicge .

Nu doð menn swa-þeah dyslice foroft . þæt hi willað wacian and wodlice drincan binnan godes huse and bysmorlice plegan . and mid gegaf-spræcum godes | hus gefylan . ac ðam wære betere þæt hí on heora bedde lagon ðonne hí gegremedon god on þam gastlican huse .

Seþe wylle wacian and wurðian godes halgan . wacie mid stilnysse and ne wyrcan nan gehlyd . ac singe his gebedu swa he selost cunne . and seðe wile drincan . and dwæslice hlydan . drince him æt ham . na on drihtnes huse . þæt hé god ne unwurðige to wite him sylfum .

Us is neod þæt we clypian to criste gelome buton hyge-leaste and hiwunge swa ðeah .

Swa swa se lichoma leofað be hlafe and drence . swa sceal seo sawl libban be lare and gebedum .

Fela dyslice dæda deriað mancynne . oððe for anwylnysse oððe for ungerade .

Swa swa sume menn doð þe dyslice fæstað ofer heora mihte . on gemænelicum lenctene . swa swa we sylfe gesawon . oðþæt hi seoce wurdon .

Sume fæston eac swa . þæt hi forsawon to etanne buton on ðone oðerne dæg . and æton þonne grædiglice . ac us secgað béc þæt sume fæston swa þæt hí geswencton hi sylfe forðearle . and nane mede næfdon þæs mycclan geswinces . ac ðæs þe fyrr wæron godes miltsunge .

Nu ge-setton ða halgan fæderas þæt we fæston mid gerade . and ælce dæg eton mid ge-dafenlicnysse . swa þæt ure lichama . alefed ne wurðe ne eft ofer fæt to idelum lustum .

Þes eard nis eac ealles swa mægen-fæst . her on uteweardan þære eorðan bradnysse . swa swa heo is to-middes on mægen-fæstum eardum . þær man mæg fæstan freolicor ðonne hér .

Ne nu nis mancynn swa mihtig . swa menn wæron æt fruman.

Nis nan fæsten swa god ne gode swa ge-cweme . swa swa þæt fæsten ís þæt man fulnysse onscunige . and leahtras forbuge . and forlæte sace . and mid godum biggencgum . gode ge-cweme . and mid gesceade libbe swa swa we sædon ǽr .

Ne sceal se wise mann beon butan godum weorcum . ne se ealde ne beo buton æfæstnysse . ne se iunga ne beo butan gehyrsumnysse . ne se | welega ne beo butan ælmes-dædum . ne wifman ne beon butan sidefulnysse . ne se hlaford ne beo leas on wordum . ne nan cristen man ne sceal sceandlice flitan .

Eft bið swiðe þwyrlic . þæt ðearfa beo modig . and forcuðlic hit bið þæt cyning beo unrihtwis . eac bið swyþe derigendlic þæt bisceop beo gymeleas . and un-fremful . bið þæt folc beo butan steora . oððe butan . ǽ . him eallum to hearme .

Þissere worulde hæl is . þæt heo witan hæbbe . and swa má witena beoð on bradnysse middan-eardes . swa hit bet færð æfter ðæs folces þearfa .

Ne bið se na wita . þe unwislice leofað . ac bið open sott þeah þe him swa ne ðince .

Gif ða gehadodan menn healdað godes ðeowdom on gesettan timan . and syferlice libbað and gif ða læwedan menn libbað æfter rihte . þonne wite we to gewissan . þæt god wile fore-sceawian ure gesundfulnysse . and sibbe mid us . and ðærto-ecan us syllan ða ecan myrhðe mid him .

Gif ðonne þa heafod-menn . and ða gehadodan lareowas þyses ne gymað . ac þencað embe woruld-þincg . and godes beboda ne his biggencga ne gymað . þonne wile god geswutelian his forsewennysse on him . oððe mid hungre oþþe mid cwealme . þæt hí tocnawan magon þæt se ælmihtiga wealdend wyrcð his forsewennysse swá . and hi ðær-to-ecan sceolan on þam oþrum life þrowian lange oðþe æfre for heora lifes gymeleaste .

Wel we magon geðencan hu wel hit ferde mid ús . þaða þis igland wæs wunigende on sibbe . and munuc-lif wæron mid wurð-scipe gehealdene . and ða woruld-menn wæron wære wið heora fynd . swa þæt ure word sprang wide geond þas eorðan .

Hu wæs hit ða siððan ða þa man towearp munuc-lif . and godes biggengas to bysmore hæfde . buton þæt us com to cwealm and hunger . and siððan hæðen here us hæfde to bysmre .

Be þysum cwæð se ælmihtiga god . to moyse on þam wæstene .

Gif ge on minum bebodum farað . and mine beho|da healdað .

Þonne sende ic eow rén-scuras on rihtne timan symble . and seo eorðe spryt hyre wæstmas eow . and ic forgife sibbe and gesehtnysse eow . þæt ge butan ogan eowres eardes brucan . and ic eac afyrsige ða yfelan deor eow fram .

Gif ge þonne me forseoð and mine gesetnyssa awurpað . ic eac swyðe hrædlice on eow hit gewrece . ic dó þæt seo heofen bið swa heard eow swa isen . and seo eorðe þær-to-geanes swylce heo æren sy .

Þonne swince ge on idel . gif ge sawað eower land ðonne seo eorðe ne spryt eow nænne wæstm .

And gif ge þonne git nellað eow wendan to me . ic sende eow swurd to and eow sleað eowre fynd . and hi þonne awestað wælhreowlice eower land . and eowre burga beoð to-brocene and aweste .

Ic sende eac yrhðe Into eowrum heortum . þæt eower nan ne dear eowrum feondum wið-standan .

Þus spræc god gefyrn be þam folce israhel . hit is swa ðeah swa gedón swyðe neah mid us . nu on niwum dagum and undigollice .

We sceolan god wurðian mid soðre anrædnysse forðan þe he is ælmihtig god . and he us to menn gesceop . nu dó wé swyðe wolice gif we ne wurðiað hine us sylfum to þearfe . and urum sawlum to blisse .

God gewræc fram frymðe mid witum his forsewennysse . ærest on ðam ænglum þe unrædlice modegodon . and siððan on adame þa þa he gesyngod hæfde.

Eft on noes dagum ðaða menn dysgodon to swyðe . and mid forligre gegremedon god ælmihtigne þearle . swa þæt he sende flód . and besencte hi ealle butan noe anum mid his agenum hiwum . forðan þe he ana wæs of him eallum riht-wis .

Eft ða þa god wolde wrecan mid fyre þa fulan forligeras þæs fracodostan mennisces sodomitiscra ðeoda . þa sæde he hit abrahame .

Habraham þa bæd þone ælmihtigan ðus .

Þu drihten þe demst eallum deadlicum flæsce . ne scealt ðu þone riht-wisan ofslean mid þam arleasan .

Gif ðær beoð | fiftig wera wunigende on þam earde . rihtwise ætforan ðe . ara him eallum .

Ða cwæð god him to eft.

Ic arige him eallum gif ic ðær finde fiftig riht-wisra .

Þa began abraham eft biddan god georne . þæt he hi ne fordyde . gif ðær feowertig wæron rihtwisra wera . wunigende on ðære leode .

God him ðæs tiþode . and he began git biddan oðþæt he becom to tyn mannum . and him tiðode god ða . þæt he nolde hí fordón . gif he funde ðær tyn riht-wisra manna . and he wende ða him fram .

God sende ða sona to ðam sceand-licum mannum twegen englas on æfen . and hi abrahames broðor sunu loth . mid his hiwum . alæddon of ðære byrig . and ðær næs na má þe manful nære gemet .

God sende ða fyr on merigen and fulne swefel him to . and for-bærnde hi ealle and heora burga towende . and ealne þone eard mid egeslicum fyre . and ðær is nu ful wæter ðær ða fulan wunodon . and loth se riht-wisa wearð ahred ðurh god .

Be ðysum man mæg tocnawan þæt micclum fremiað þam læwedum mannum . þa gelæredan godes ðeowas. þæt hí mid heora ðeow-dome him ðingian to gode . nu god wolde arian eallum ðam synfullum . gif he þær gemette tyn riht-wise menn .

Eal-swa dathán and abiron ðe dyslice spræcon . and mycelne teonan moyse gedydon ongean godes willan . ðaða hí on þam westene wæron . and forsawon his wisunge and swyðe hine tældon .

God him wearð þa yrre . and seo eorþe to-bærst þærðær hi wicodon . mid wifum and mid cyldum on heora ge-teldum . and hi ealle ða suncon swa cuce into ðære eorðan . of-hrorene mid moldan . and þæt oðer folc fleah afyrht for heora hreame .

Manega of ðam folce myslice oft ceorodon . and fandoden godes and gremedon mid spræcon . ac god hit gewræc sona þæt hi swultan gehú . forðan ðe seo ceorung is swyðe lað gode . and huru þæt mann gremige hine mid wor|dum .

And gode is swyðe lað on geleaffullum folce . þæt hi beon ungeðwære and þwyre him betwynan . and crist cwæð on his godspelle þæt nan cynerice ne stent nane hwile ansund . gif hí gesome ne beoð . for-ðam ðe god lufað soðfæst-nysse . and sibbe on mancynne .

Eft dauid se cyning ðeah þe he gecweme were gode . agylte swyðe þearle . and god him sende ða tó . gád þone witegan . ðas word him secgende .

Geceos ðe nu an wíte swa swa ðu wyrðe eart . oþþe ðreo\superscript{ra} gear hunger . oððe þry monðas gewinn . þæt ðu swa lange fleo þine fynd gif ðu mage . oððe ðry dagas man-cwealm .

Þa cwæð dauid him tó .

Un-eaðe me is ðis . ac me is swa ðeah leofre þæt ic on godes handa befealle þonne ic on mannes handa befealle . forðan þe his mildheort-nyssa syndon mænig-fealde .

God sende ða sona sumne encgel him to . and se encgel ofslóh hund-seofontig ðusenda on dauides anwealde ealle wæpmenn .

Þa com se encgel þær se cynincg sylf wæs . and wolde ða slean þa ceaster-gewaran . ac gode ofhreow ða and hraðe cwæð to ðam engle . genóh genóh hit is nú . heald þine handa .

Þa geseah dauid sylf hu se encgel slóh þæt folc . and clypode to gode . and cwæð mid angsumnysse .

Ic eom þe ðær syngode . and ic sylf unrihtlice dyde togeanes ðe . hwæt dydon þas scép . ic bidde þæt þu awende wið min þine hand . and wið minne hired þine hat-heortnysse .

Þa com gád se witega gangende . and cwæð him to .

Far nú and arǽr hraðe an weofod gode . and geoffra ðine lác þæt ðes egsa geswice .

Þa dyde dauid swá . and drihten him gemiltsode and se encgel ne moste þa menn ofslean leng .

God nolde ofslean þone scyldigan dauid þeahðe he syngode . forðan þe he swyðe oft dyde . ge ǽr ge siððan swyðe ænlice ðing . gode to ge-cwemednysse . and god him forði arode . and ða þe ðær ofslagene wæron heora sawla wæron gehealdene .

Eft wæs sum leodscipe þe se lifigenda god wolde gewitnian | for heora gewitleasum dædum . þæt wæron ða niniuitiscan þe wodlice færdon .

Ða sende god him to sumne witegan ionas gehaten . and het hi geswican oððe hi ealle sceoldon endemes forwurðan .

Se cynincg ða gecyrde sona mid his leode . and hi ealle fæston ðry dagas on án . and drihten him gemiltsode .

Ne mæg nan mann awritan ne mid wordum areccan hu oft se ælmihtiga god egeslice gewræc his foresewennysse on scyldigum mannum . oððe hu oft he gemyltsode man-cynne gehú . þa ðe mid andetnysse heora yfeles geswicon .

We ne sceolan ceorigan ne sorhlice bemænan þeah ðe us ungelimp on æhtum getime . forðan þe seo ceorung is swyðe mycel pleoh . þæt man wið god ceorige swa swa us sæde paulus .

Fela ungelimpa beoð on ende ðissere worulde . ac ge-hwá mot forberan emlice his dǽl . swa þæt he ðurh ceorunge ne syngie wið god . and for ðære woruld lufe him wite ge-earnige .

Þes tima is ende-next and ende þyssere worulde . and menn beoð geworhte wolice him betwynan . swa þæt se fæder winð wið his agenne sunu . and broðor wið oþerne to bealwe him sylfum . and mid ðam geeacniað yfelnysse him sylfum . ge on ðissere worulde ge on ðære toweardan .

Þonne ðincð þam arleasum swylce hi æfre motan libban . and ne cunnon ðone cwyde þe god cwæð be swylcum .

Uiri sanguinum et dolosi Non dimidiabunt dies suos . þæt is on englisc;

Ða blodigan weras and ða þe willað facn . ne sceolan hi libban heora dagas healfe .

Ða synd blodige weras ðe wyrcað manslihtas . and ðaðe manna sawla beswicað to forwyrde .

Ða sceolan geendian swyðe yfelum deaðe . gif hi ær ge-endunge heora yfel ne gebetað .

And ðeah þe hi sume lybbon leng ðonne hi sceoldon . for godes geðylde þæt him ne fremað naht . ac hi ge-eacniað heora wita . gif hi ær ende ne cyrrað .

Godes wisdom clypað . and cwyð to eallum mannum . mid fæderlicre lufe | þus fægere tihtende .

Min bearn ne forgit ðu mine beboda and æ . ac healde ðin heorta (sic) \superscript{hi} geornlice . hi gelengað þin lif . and þu leofast on sibbe . and mildheortnyss and soðfæstnys . þe soðlice ne forlætað .

Hafa þe truwa on god of ealre ðinre heortan . and ne truwa ðu na swyðe on þinre snoternysse .

Þenc æfre embe god on eallum ðinum wegum . and he sylf gewissað wel þine fare .

Eadig bið se man seðe gemet wisdom . forðan þe se wisdom is selra þone scinende gold . and he ana is deorwurðra þonne ða dyran maðmas .

 is se wisdom þæt man wislice libbe . and his dæda gefadige to his drihtnes willan . þæt he edlean underfo . on ðam ecan life mid ðam ælmihtigan gode . þe on ecnysse rixað. AMEN.

Chapter 14

uiiii. kl̅ mai. nat̄l̄ sci̅ georgí martyris.

Gedwol-men awriton ge-dwyld on heora bocvm . be ðam halgan were ðe is gehaten georius .

Nu wille we eow secgan þæt soð is be ðam . þæt heora gedwyld ne derige digellice ænigum .

Se halga georius wæs on hæþenum dagum rice ealdor-man . under ðam reþan casere þe wæs datianus geciged . on ðære scire cappadocia .

Þa het datianus ða hæðenan ge-gaderian to his deofol-gildum his drihtne on teonan . and mid manegum ðeowracum þæt mancynn geegsode . þæt hi heora lac ge-offrodon þam leasum godum mid him .

Þa geseah se halga wer þæra hæðenra gedwyld hu hi ðam deoflum onsægdon and heora drihten forsawon . ða aspende he his feoh unforh (sic) on ælmyssum hafen-leasum mannum þam hælende to lofe . and wearð þurh crist gebyld . and cwæð to ðam casere .

Omnes dii gentium demonia . dominus autē caelos fecit .

Ealle þæra hæðenra godas synd gramlice deofla . and ure drihten soðlice geworhte heofonas .

Þine godas casere syndon gyldene . and sylfrene . stænene . and treowene . getreow-leasera manna hand-ge-weorc . and gé him weardas settað þe hí bewaciað wið þeofas .

Hwæt þa datianus deofollice geyrsode ongean ðone halgan wer . and het hine secgan of hwilcere byrig he wære . oððe hwæt his nama wære .

Þa andwyrde georius ðam arleasan and cwæð .

Ic eom soðlice cristen and ic criste þeowige .

Georius ic eom gehaten . and ic hæbbe ealdor-dom on minum earde . ðe is gehaten cappadocia . and me bet licað to forlætenne nu þisne hwilwendlican wurðmynt . and þæs wuldor-fullan godes cyne-dome gehyrsumian on haligre drohtnunge .

Þa cwæð datianus . þu dwelast geori . genealæc nu ærest and geoffra þine lac þam unofer-swiðendum (sic) apolline . seðe soþlice mæg þinre nytennysse gemiltsian . and to his manrædene gebigan .

Georius þa befran þone feondlican casere . hwæðer is to lufigenne . oððe hwam lac to offrigenne . ðam hælende criste ealra woruldra alysend? oþþe apolline ealra deofla ealdre .

Hwæt ða datianus mid deofollicum graman het ðone halgan wer on hencgene ahæbban . and mid isenum clawum clifrian his lima . and ontendan blysan æt bam his sidum . het hine þa siððan of ðære ceastre alædan and mid swinglum þreagen and mid sealte gnidan . ac se halga wer wunode unge-derod .

Þa het se casere hine on cwearterne don . and het geaxian ofer eall sumne æltæwne dry .

Þa ge-axode þæt athanasius se dry . and com to ðam casere . and hine caflice befrán . hwi hete ðu me feccan þus færlice to þe?

Datianus andwyrde athanasie ðus .

Miht þu adwæscan þæra cristenra drycræft .

Þa andwyrde se dry . datiane ðus .

Hat cuman to me þone cristenan mann . and beo ic scyldig gif ic his scyncræft ne mæg mid ealle adwæscan mid minum drycræfte .

Þa fægnode datianus þæt he funde swylcne dry . and het of cwearterne lædan ðone godes cempan . and cwæð to ðam halgan mid hetelicum mode .

For ðe geori ic begeat þisne dry . oferswyð his drycræft oððe he þe oferswyðe . oððe he fordó þe oððe þu fordo hine .

Georius ða beheold þone hæðenan dry . and cwæð þæt he ge-sawe cristes gife on him .

Athanasius ða ardlice genam ænne mycelne bollan . mid bealuwe afylled and deoflum betæhte ðone drenc ealne . and sealde him drincan ac hit him ne derode .

Þa cwæð eft se dry . Git ic dó an þincg . and gif him þæt ne derað . Ic buge to criste .

He genam ða ane cuppan mid cwealm-berum drence . and clypode swyðe to sweartum deoflum . and to ðam fyrmestum deoflum . and to ðam ful strangum . and on heora naman begol þone gramlican drenc . sealde ða drincan þam drihtnes halgan . ac him naht ne derode se deofollica wæta .

Ða geseah se dry þæt he him derian ne mihte . and feol to his fotum fulluhtes biddende . and se halga georius hine sona gefullode .

Hwæt ða datianus deoflice wearð gram . and het geniman þone dry þe þær gelyfde on god . and lædan of ðære byrig and beheafdian sona .

Eft on þam oþrum dæge het se arleasa casere gebindan georium on anum bradum hweowle . and twa scearpe swurd settan him to-geanes . and swa up ateon and under-bæc sceofan .

Þa gebæd georius hine bealdlice to gode .

Deus in adiutorium meum intende domine ad adiuuandum me festina .

God beseoh ðu on minum fultume . drihten efst þu nu me to fultumigenne . and he wearð þa gebroht mid þysum gebæde on þam hweowle .

Þa tyrndon þa hæðenan hetelice þæt hweowl . ac hit sona tobærst and beah to eorðan . and se halga wer wunode ungederod .

Datianus þa dreorig wearð on mode . and swor ðurh ða sunnan . and ðurh ealle his godas þæt he mid mislicum witum hine wolde fordón .

Ða cwæð se eadiga georius him to .

Þine ðeow-racan synd hwilwendlice . ac ic ne forhtige for ðinum gebeote . þu hæfst minne lichaman on ðinum anwealde . ac ðu næfst swa þeah mine sawle . ac god .

Þa het se casere his cwelleras feccan ænne ærene hwer . and hine ealne afyllan mid weallendum leade . and lecgan georium innon ðone hwær . þaða he hattost wæs .

Þa ahof se halga to heofonum his eagan . his drihten biddende and bealdlice cweðende .

Ic gange into þe on mines drihtnes naman . and ic hopige on drihten þæt he me ungederodne of ðisum weallendum hwere wylle nu ahreddan . þam is lof . and wuldor . geond ealle woruld .

And he bletsode þæt lead and læg him onuppan . and þæt lead wearð acolod þurh godes mihte . and georius sæt gesund on ðam hwere .

Ða cwæð se casere to þam cristes þegene .

Nast þu la geori þæt ure godas swincað mid þe . and git hi synd geþyldige þæt hi þe miltsion .

Nu lære ic ðe swa swa leofne sunu . þæt ðu þæra cristenra lare forlæte mid ealle . and to minum ræde hraðe gebuge . swa þæt ðu offrige þam arwurðan appolline . and þu mycelne wurðmynt miht swa begitan .

Þa se halga martyr mid ðam halgan gaste afylled . smearcode mid muðe and to ðam manfullan cwæð .

Us gedafenað to offrigenne þam undeadlicum gode .

Æfter ðisum bebead se ablenda datianus . þæt mann his deadan godas deorwurðlice frætewode . and þæt deofles templ mid deorwurðan seolfre . and het þider lædan þone geleaffullan martyr . wende þæt he wolde wurðian his godas . and his lac geoffrian ðam lif-leasum godum .

Hwæt ða georius to eorðan abeah þus biddende his drihten gebigendum cneowum .

Gehyr nu god ælmihtig þines ðeowan bene . and þas earman anlicnyssa mid ealle fordo . swa swa wex formylt for hatan fyre . þæt menn ðe oncnawan and on ðe gelyfan . þæt þu eart ana god ælmihtig scyppend .

Æfter ðisum gebede bærst ut of heofonum swyðe færlic fyr . and forbernde þæt templ . and ealle ða godas grundlunga suncon into þære eorðan . and ne æteowdon siððan .

Eac swylce þa sacerdas suncon forð mid . and sume ða hæðenan þe þær gehende [geheude @ Skeat] stodon . and georius axode þone arleasan casere .

On hwilcum godum tihst þu us to gelyfenne?

Hu magon hi ahreddan ðe fram frecednyssum . þonne hi ne mihton hi sylfe ahreddan .

Hwæt ða datianus gedihte þisne cwyde . and het ðus acwellan þone godes cempan .

Nimað þisne scyldigan þe mid scincræfte towende ure arwurðan godas mid ealle to duste . and dragað hine niwelne his neb to eorðan geond ealle ðas stræt and stænene wegas . and ofsleað hine syþþan mid swurdes ecge .

Þa tugon þa hæðenan þone halgan wer swa datianus him gediht hæfde . oðþæt hi comon to ðære cwealm-stowe . and se martyr bæd þæt he hine gebiddan moste . to ðam ælmihtigan gode and his gast betæcan .

He þancode ða gode eallra his godnyssa . þæt he hine gescylde wið þone swicolan deofol . and him sige forgeaf þurh soðne geleafan .

He gebæd eac swylce for eall cristen folc . and þæt god forgeafe þære eorðan renas . for þan ðe se hæða þa hynde ða eorðan .

Æfter ðisum gebæde he bletsode hine sylfne . and bæd his slagan þæt he hine sloge .

Mid þam ðe he acweald wæs . ða comon þyder sona his agene land-leode geleofede on god . and gelæhton his lic and læddan to þære byrig þe he on ðrowode . and hine ðær bebyrigdon mid mycelre arwurðnysse . þam ælmihtigan to lofe .

Þa asende [sona] drihten ren-scuras . and þa eorðan gewæterode þe ær wæs for-burnen . swa swa georius bæd ærðan þe he abuge to slege .

Hwæt ða datianus wearð færlice ofslagen mid heofonlicum fyre . and his geferan samod þa ða he hamwerd wæs mid his heah þegenum . and he becom to helle ærðan þe to his huse . and se halga georius siðode to criste . mid ðam he á wunað on wuldre . Amen.

Chapter 15

uii. kl̅ maí . passio sci̅ marci euangeliste.

Marcvs se godspellere be godes dihte ge-fór to aegipta lande and ðær lærde þæt folc . and to fulluhte gebigde fram þam fulan hæþenscype .

He ferde þa geond eall ðæt aegiptisce land sawende godes sǽd . and ða seocan gehælde .

Hreoflige he geclænsode fram ðære unclænan coðe . wode he gehælde . and on witte gebrohte . and adræfde þa deofla þe derodon mannum .

Þa gelyfdon ða hæðenan on ðone soðan hælend and wurdon gefullode . and towurpon heora deofol-gild .

He wearð þa æt nextan geneosod þurh god . and se halga gast het hine faran to alexandrian byrig . and bodian geleafan .

Seo burh is mærost mid egyptiscum man-cynne .

Hwæt þa se god-spellere gegrette his gebroðra . and sæde þæt he hælend hine hete faran to alexandrian byrig . and bodian geleafan .

Hi þa sona eoden to scipe mid him . and bædon god georne þæt he his weg gewissode .

He ferde ða on scipe . oð þæt he gesundful becom to alexandrian byrig . and bobode ðær geleafan . and fela wundra worhte and ðær wunode lange .

Sum sutere siwode þæs halgan weres sceos . and ðurh-þide his hand hetelice swyþe . ac se halga wer hine gehælde sona . and to fulluhte gebigde and fela oðre mid him .

Anianus wæs gehaten se ylca sutere . and he geþeah swa for gode . þæt se godspellere hine gesette þam folce to bisceope þære burh-scire .

He ge-hadode eac þa ðry messe-preostas . and seofon diaconas . and endleofan clericas .

Þa syrwdon ða hæðenan and hine beswican woldon . forþan þe he awende heora gewunelican ðeawas . and heora goda offrunga mid ealle adwæscte .

Þa ferde se godspellere fram ðære byrig . to ðam geleaffullum ðe he ær lærde . and ðær þurhwunode wel twa gear mid him . and getrymede ða gebroðra ðe he ǽr to gode gebigde . and þær bisceopas gehadode . and halige preostas . and ferde eft ongean to alexandrian byrig . and gemette þær fela gemenig-fealde on geleafan . and on godes gife ðeonde and he ðæs þancode gode .

Hi hæfdon eac aræred on hrædincge ane cyrcan . and weox se geleafa . and godes wuldor scean .

Þa worhte marcus myccle wundra . he gehælde untrume on ðæs hælendes naman . blinde and deafe . and bodode geleafan . and ða hæðenan cepton hu hi hine acwealdon .

Þa com seo halige easter-tid . and þa hæðenan cepton hwær se godspellere mæssode . and mærsode his drihten þe on ðam ylcan dæge of deaðe arás . and urnon endemes to and hine gelæhton .

Becnytton ða his swuran sona mid rape . and tugon geond ða stræt . swa þæt þa stanas wæron mid his blode begotene . and mid his flæsce begleddode . and se halga marcus micclum þancode . þam hælende criste þæt he for hine þrowode .

Þa siððan on æfentiman hi setton hine on cweartern . oð þæt hi beðohton hu hí hine acwealdon .

Efne þa on middere nihte wearð mycel eorð-styrung . and godes encgel fleah færlice to þam cwearterne . and awræhte þone godspellere . and ðas word him sæde .

Þu godes þeowa . þin nama is awriten on ðære liflican béc and ðin gemynd ne ateorað . and ðu eart gefera ðære upplican mihte . þær ðu á lyfast . and þin gast bið on heofonum . and þin rest ne losað næfre on worulde .

Þa astrehte se halga his handa and cw̅ .

Ic ðancie ðe drihten þæt ðu me ne forlete . ac gemundest min mid þinum halgum .

Ic bidde þe nu hælend crist . onfoh mine sawle on sibbe . and ne geðafa þu þæt ic beo fram ðe ascired .

Mid þam ðe he þis cwæð . þa com crist sylf him to . on þære ylcan gelicnysse þe he leofode on worulde . and hine mid sibbe gegrette . and sæde him þas word .

Pax tibi marce noster euangelista

Sy þe syb marce ure godspellere .

And marcus him cwæð to . Min drihten hælend . and se hælend siðode sona to heofonum .

Hwæt þa on ærne merigen comon ða arleasan hæðenan . and becnytton his swuran eft sona mid rape . and drogon hine eft swa swa hi ǽr dydon . huxlice sprecende be ðam halgan were . and se eadige [sic] marcus mycclum þæs ðancode þam hælende criste . and cwæð þis gebæd .

In manus tuas domine commendo spiritum meum .

On þine handa drihten . ic betæce minne gast . and he gewat mid þam worde of worulde to gode . mid ðam he á blyssað butan earfoðnyssum .

Þa woldon þa hæðenan his lic forbernan and worhten mycel ád . ac hit wearð adwæsced . swa þæt god asende swyðe mycel rén . ofer ealne þone dæg mid eges-licum ðunore . swa þæt manega hus hetelice feollon . and eac manega menn mid ðam þunore swulton . and þa oðre flugon mid fyrhte fornumene .

Comon þa syððan sona þa cristenan . eawfæste weras and hi aweg feredon þæs godspelleres líc . and ledon on anre þryh . and mid arwurðnysse bebyrigdon . mid gebedum þancigende . þæt hi swilcne halgan mid him habban moston . him to mund-boran . to þam ælmihtigan gode .

Þam sy wuldor and lof á to worulde amen.

item alia.

We habbaþ nu gesæd sceort-lice on ðysum gewryte hu se halga marcus wæs gemartyrod .

Nu wylle we eow secgan hu se halga hieronimus be ðam feower godspellerum . ðe gode gecorene synd . awrat on ðære fore-sprræce þaða he awende cristes bóc of ebreiscum gereode . and sume of greciscum . to læden-spræce on þære ðe we leorniað .

He cwæð þæt lucas sæde swa swa hit ful soð is . þæt manega menn ongunnon godspel to writenne butan þam halgan gaste and þæs hælendes wissunge . and be heora gewille sædon swa swa him geþuhte . and þam gelamp seo awyrigung þe se witega cwæð .

Wa þam þe witegað be heora agenre heortan . and farað æfter heora gaste . and cwæðaþ þæt hit god sæde þæt þæt hi secgað and god hi ne sende .

Be swilcum cwæð se hælend eac on sumere stowe .

Warniað eow georne wið lease witegan . þa ðe cumað to eow on sceape gelicnysse . and hi synd wiþ-innan reafigende wulfas .

Ac seo geleaffulle gelaðung þe is gelogod on criste . and on him gefæstnod swa swa on fæstum stane . ne under-fehð þa gesetnyssa þe swilce gedwolan ðurh hi sylfe gesetton . buton soðfæstnysse .

Se forma god-spellere [is] þe gode gecoren wæs . matheus gehaten þone se hælend geceas of woruldlicum tollere to gastlicum godspellere . and he wæs an ðæra twelfa godes ðegna . þe awrat on ebreisc ærest þa godspel . þe on ðæra (sic) forman béc . beoð geendebyrde .

He awrat hi on ebreisc þam ebreiscum mannum . ðe on iudea lande gelyfdon on criste . and wolde mid ðam gewrite þe hi wæron on afedde . heora geleafan getrymman . forðan þe he lufode hi and he sceolde ða faran to fyrlenum lande . to hæþenum leodum hi to lærenne . þa wolde he on ær . his agenre leode þæt godspell awritan . ærðam þe he gewende him fram .

Se oðer godspellere is marcus . þe wæs mid þam apostole petre getogen on lare . and to geleafan gebiged .

Petrus wæs his god-fæder and hine gode gestrynde . and he swa lange folgode his fulluht-fædere petre . oð þæt he gesette mid soðum geleafan . þa oðre cristes bóc on italia lande .

Ne ge-seah he crist on life . ac he leornode swaðeah of petres bodunge hu he ða bóc gesette . and petrus hi sceawode and sealde to rædenne .

Se ðridda godspellere is lucas . se wæs læce on worulde . and wunode mid ðam apostolum . and mid paule syððan . þeowigende þam ælmihtigan butan ælcum leahtre . on clænum life æfre buton wife . mid godes gaste afylled . and he ða godspel awrat . and wislice geende-byrde . and actus apostolorum eac he gesette .

He awrat his godspell on achaian lande . and gewat to gode mid ðam halgan gaste afylled . ða þa he wæs on ylde feower and hund-eahtatig geara .

Se feorða godspellere is iohannes cristes moddrian sunu . se wæs criste swa leof þæt he hlynode uppan his breoste . on ðam þe wæs behyd [eall] se heofonlica wisdom . swylce he of ðam drunce þa deopan lare . þe he siððan awrát on wundorlicor gesetnyssa . swa þæt he ofer-stah ealle gesceafta . and þa word geopenade þe englas ne dorston .

He wæs ærest gecoren eallra þæra god-spellera . ac he is forði se feorða forþan þe he sette þa feorðan bóc. æfterðam þe ða oðre ge-endebyrde wæron . and wide geond þa woruld awritene wæron .

On asia he wæs þa he awrat þa boc . and he leofode lange on life æfter criste . oð þæt þa oðre apostolas geendoden heora lif . and sige-fæste ferdon to ðan soþan life .

Ðas feower godspelleras syndon gode gecorene . and hi ealne middan-eard mid heora lare on-lihton . swa swa þa feower éán . ðe yrnað of neorxne-wange . ealne þisne embhwyrft endemes wæteriað . and ðas feower godspelleras god geswutelode gefyrn . on ðære ealdan ǽ . ezechihele þam witegan .

He geseah on his gesihðe . swylce feower nytenu .

An þæra feower nytena wæs gesewen . swilce mannes ansyn . þæt oðer wæs lic anre leon hiwe . and þæt þridde stód anum styrce gelíc . and þæt feorðe wæs fagum earne gelíc .

Þes mannes gelicnyss belimpð to matheę . forðan þe he ongan his godspell be cristes menniscnysse .

Se leo belimpð . swa swa þa geleaffullan secgaþ . to marces gelicnysse . forðan þe he hlud swege clypode . swa swa leo grimmeteð gredig on westene .

Uox clamantis In deserto . parate uiam domini rectas facite semitas eius . Clypiende stemn on westene . gearciað godes weg . doð rihte his paðas .

Þæs celfes gelicnyss belimpð to lucan . forðan þe he ongan his godspell . swá swá god him gedihte . fram ðam sacerde þe zacharias hatte . forðan þe man offrode on ða ealdan wísan cealf for ðæne sacerd . and ofsloh æt ðam weofode .

Þæs earnes gelicnys belimpð to iohanne . forðan þe se earn flyhð ealra fugela ufemest . and mæg swyðost starian on þære sunnan leoman .

Swa dyde Iohannes se driht-wurða writere . he fleah feor upp . swylce mid earnes fyðerum . and beheold gleawlice hu he be gode mihte mærlicost writan .

Se fore-sæda witega sæde on his gesihðe . þæt þæra feower nytena fét wæron rihte . and hi eodon æfre æfter ðam gaste . and hæfdon eagan him on ælce healfe .

Þus is on ðære ealdan ǽ . awriten be ðam godspellerum . and eft on ðære niwan gecyðnysse æfter cristes menniscnysse . apocalypsis seo bóc be ðis ylcum segð þæt iohannes gesawe þa fore-sædan nytenu . on þam ylcan hiwe þe we ær sædon . and hi sungon þisne sang . mid singalum dreame .

Sanctus . Sanctus . Sanctus . dominus deus omnipotens . qui erat . et qui est . et qui uenturus est . Halig . halig . halig . drihten god ælmihtig . seðe wæs . and seðe nu is . and seðe towerd is .

Se halga sang geswutelað þa halgan þrynnysse . on anre godcundnysse æfre wunigende . seo ðe æfre wæs . and eac nu wunað . and æfre is towerd butan ateorunge .

Nu we habbað gesæd on ðisre sceortnysse . hu god geswutelode þa soðfæstan godspelleras . on þære ealdan . ǽ . and eac on þære niwan . and þas feower ana syndon to under-fonne . on geleaffulre gelaðunge . and forlætan þa oðre þe lease gesetnysse gesetton . ðurh hi sylfe . na þurh þone halgan gast . ne ðurh ðæs hælendes gecorennysse

We geendiað þus ðas gesetnysse hér .

Chapter 16

sermo de memoria sanctorum.

Spel loca hwænne mann wille.

Ego sum alfa et ώ . initium et finis dicit dominus deus . qui est et qui erat et qui uenturus est omnipotens .

Ðæt is on englisc . Ic eom angin . and ende . cwæþ drihten god . seðe is . and seðe wæs . and seðe towerd is ælmihtig ^god

An ælmihtig god is on þrym hadum æfre wunigende . seþe ealle þincg gesceop . nu habbe we anginn þurh hine . forðan þe he us gesceop . þaða we næron and us eft alysde þa þa we for-wyrhte wæron .

Nu sceole we hogian mid mycelne gymene . þæt ure lif beo swa gelógod . þæt ure ende geendige on gód (sic) . þanon þe ús þæt angin com .

We magon niman gode bysne . ærest be ðam halgum heah-fæderum . hu hi on heora life gode gecwemdon . and eac æt þam halgum þe þam hælende folgodon .

Ærest abel adames sunu wæs gode swa gecweme þurh unsceðþignysse and rihtwisnysse . þæt crist sylf hine het abel | iustus . þæt is se rihtwisa abel .

Eft enoch se seofoða mann fram adame . wæs swa estful on his mode . and gode swa ^gelicwurðe . þæt god hine genam swa andsundne on sawle and on lichaman butan deaðe up to heofonum . þaða he on ylde wæs þreo hund geara and fif and sixtig geara . and he þurh-wunað swa andsund butan deaðe and butan geswince oð antecristes tocyme .

Noe eac for his rihtwisnysse ofer-com þæt miccle flod þe ealne middan-eard ofer-eode . swa ^þæt ðurh hine wearð eft eall mancynn geedstaþelod .

Abraham for his micclan geleafan to gode . and for his gehyrsumnysse under-feng swilce bletsunge æt gode . þæt eall mancynn ða þe gelyfað on god is gebletsod on his cynne . and his sunu Isáác æfter him leofode mid bletsunge . and god hine lufode .

Eft Iacob isaaces sunu . for his geswincum soðlice wearð gebletsod ærest æt his fæder . and siððan æt godes engle . and god him gesette þa oðerne naman israhel . þæt is uir uidens deum; ^{Ðæt is ongliscre spræce}; se wer þe god gesihð . and mid ðam naman wæron þa getacnode . þe nu on cristen-dome ðuruh geleafan god geseoð .

Iob se eadiga and se anrǽda godes ðegn . wæs swa ful-fremed on eallum godnyssum . þæt god sylf cwæð be him . þæt his gelica nære ða on ðam life ofer eorðan .

Þa bæd se deofol æt gode þæt he moste his fandian . hwæðer he ðurh-wunian wolde on his godnysse and bile-witnysse oð his lifes ende . oððe he wolde fram gode abugan þurh ða ormætan ehtnysse . þe se niðfulla deofol him on asende .

Hwæt ða se deofol anes deges ealle his æhta acwealde . and his seofon suna and ðreo dohtra . and hine sylfne eac siððan . mid eges-licre untrumnysse geswencte . ac se anræda Iób nolde næfre abugan fram godes lufe . ne for ehtnysse . ne for untrumnysse . ne for his bærna lyre . ne nan dyslic word ongean god ne cwæð . ac mid micclum geþylde he ðancode æfre gode . and mid inn[e]werdre heortan his drihten æfre herode .

God hine ða gehælde fram ðam egeslican broce . and his æhta | him forgeald ealle be twi-fealdum . and he leofode ða gesælig forðan þe he ofer-swiðde þone deofol .

Dauid for his man-þwyrnysse and mild-heortnysse . wearð gode gecweme and to cynincge gecoren . swa þæt god sylf cwæð þus be him .

Ic afunde me dauid iessan sunu . æfter minre heortan seðe minne willan mid weorcum gefremð .

Eft helias se æðela witega forðan þe he wan wið unriht-wisnysse . wearð on heofenlicum cræte to heofonum ahafen . and ðær swa swa enoch on orsorhnysse wunað . forðan þe nán gastlic lác nis gode swa gecweme swa him bið þæt man winne wið unruht-wis-nysse symle for manna rihtinge . mid man-þwærnysse swa ðeah . and mid gemetfæstnysse . and mild-heortnysse . þæt man unriht alecge . and godes riht arære . swa swa helias se witega . wan wið unriht^wisnysse . oðþæt god hine ferode on fyrenum cræte to heofonum . fram eallum ehtnyssum þyssere yðegan worulde .

Eac swilce þa ðry cnihtas on chaldea lande . sidráác . misáác . and abdenagó . þe for ðan soðan geleafan on þam byrnendan ofne gebundene wurdon to cwale aworpene . ac him sona cydde god hwylcne geleafan hi hæfdon . þa ða se líg ne moste furðon heora fex forswælan on þam ade . ac hi ealle ut eodon ansunde to ðam cynincge .

Eal swa eft danihel se deorwurða witega . for his anfealdnysse and anrædum geleafan wearð tua aworpen . þurh ða wodan chaldeiscan into ^ðara leona seaðum . ac hi leofodon be hungre seofon niht metelease . and ne mihton him derian .

Manega oðre heah-fæderas and halige witegan . wæron wuldor-fulle weras . and wundra gefremedon on þære ealdan . ǽ . and hi ealle cyddon mid wordum . oððe mid weorcum . þæt se wuldor-fulla hælend . wolde us alysan fram helle wite ðurh hine sylfne .

Eft us secgað béc . hu ða synfullan forferdon and ða arleasan æfre for heora yfelnysse | losodon . forðan þe god is swa rihtwis . þæt þa rihtwisan men ne beoð bereafode heora rihtwisnysse mede .

Ne eft ða arleasan þe hine mid yfelnysse gremiað . ne magon næfre ætwindan ðam ecum witum ahwar .

Eft on þæs hælendes tocyme wearð se halga iohannes ætforan him asend swa swa heofonlic bydel . þæt he cristes wegas geriht-læhte mid wordum . and to rihtum weorcum gewende þa leode .

Witegung . and seo ealde . ǽ . wunodon oðþæt . and iohannes astealde þa stiðan drohtnunge on þære niwan gecyðnysse swa swa crist him gewissode . and he wæs ægðer ge ǽlic . ge godspellic . swa swa gemæru betwux moysen and us . swa anræde godes man . þæt god sylf cwæð be him . þæt nan mærra man næs on middanearde acenned of were and of wife . þus hine worðode god; [sic @ Skeat] hwæt ða ure hælend þæs heofonlican godes sunu cydde his mycclan lufe þe he to us mannum hæfde . swa þæt he wearð acenned of anum clænan mædene butan weres gemanan . and mann wearð gesewen on sawle . and on lichaman . soð god . and soð man . to ðy . þæt he us alysde þa ðe gelyfað on hine fram ðam ecan deaðe . mid his unscyldigan deaðe .

Be þam we magon to-cnawan cristes eadmodnysse . þæt se healica god hine sylfne swa ge-eadmette . þæt he ðam deaðe under-hnah and þone deofol oferswyðde mid þære menniscnysse and mancynn swa alysde .

He is ofer ealle þincg ælmihtig scyppend . and he wolde swaðeah wite ðrowian for ús . nu is his eadmodnys us unwiðmetenlic . forðan þe we synd synfulle and sceolan beon eadmode . wille we . nelle we . and he wolde sylf-willes us syllan ða bysne . swa swa he sylf cwæð .

Discite a me quia mitis sum et humilis corde . et inueniandis requiem animabus uestris . ^{þæt is on englisc;}

Leorniað æt me þæt ic manþwære eom . and eadmod on heortan . and ge gemetað reste eowrum sawlum .

Þis sæde drihten;

Ne het he us na leornian heofonas to wyrcenne . ac het us beon eadmode þæt we to heo|fonum becomon . forðan þe þa modigan ne magon ^{cuman næfre} to heofonum .

Crist clypode on his bodunge . and cwæð to eallum mannum .

Penitentiam agite adpropinquabit enim regnum caelorum . ^{þæt is on englisc;}

Wyrcað dædbote eowra mis-dæda . forðan þe heofonan rice efne genealæchð .

Crist ferde ða abutan geond þa Iudeiscan byrig bodigende godspel . and ða blindan onlihte and ealle untrumnysse ^onlihte and adla gehælde .

His hlisa asprang þa to syrian lande . and man ferode untrume ^menn feorran and nean . myslice geuntrumode . and monað-seoce . and wode . and eac swilce beddrydan . and brohton to ðam hælende . and he hi ealle gehælde forðan þe he hælend is .

Þas ylcan mihte he forgeaf his mæran apostolum . þæt hi mihton gehælan on ðæs hælendes naman ealle untrumnyssa . and eac ða deadan aræran . and aclænsian ða hreoflian swa swa crist sylf dyde .

Twelf apostolas wæron þe wunedon mid him . and twa and hund seofontig he geceas him to bydelum . þa ferdon twam . and twam . ætforan him gehwyder .

Þas feower and hundeahtatig þe folgodon ðam hælende . synd ða grund-weallas on godes gelaðunge and þa fyrmestan bydelas . and hi ure béc setton . swa swa hi geleornedon æt heora lareowe criste . and heora lár becom to ðam ytemestum landum .

Hit gelamp þa sume dæg . ða ða se hælend siðode . þæt sum man him cwæð to .

Ic wille siþian mid ðe . and ðe folgian swa hwider swa ðu færst .

Ða cwæð se hælend him to .

Foxas habbað holu . and fugelas habbað nest . and ic næbbe wununge hwider ic min heafod ahyldan mæge .

Crist sceawode his heortan and geseah his prættas . forðan þe he mid soðfæstnysse ne sohte þone hælend . ac foxunga wæron wunigende on him . and up-ahefednys swilce healice fugelas . ða ne mihte swilc man siðian mid criste .

Crist eft þa siððan . cwæð to sumum oðrum .

Fylig me on minre fare . and he afyrht andwyrde .

Læt me ærest drihten ardlice faran . and minne fæder bebyrigan .

Þa cwæð crist to þam menn | eft .

Geþafa þæt þa deadan heora deadan bebyrion . gang ðu sylf soðlice . and godes rice boda .

Þa synd soðlice deade þe heora scyppende ne ðeowiað . and ða þe godes beboda mid biggengum ne healdað . þas magon bebyrigan þyllice oðre . and mid lyffetungum to leahtrum gehnexian .

Þa cwæð sum þridda man to criste eft ðus . ic wylle fylian þe leof . ac læt me ærest faran . and cyðan minum hiwum hu ic hæbbe gemynt .

Him andwyrde þus se hælend .

Gif se yrðlincg behylt under-bæc gelome . ne bið he gelimplic tilia .

 is on ðisum andgite .

Swa swa se yrðlincg amyrð his furuh gif he locað to lange under-bæc . swa eac seðe wile gewendan to gode . and bihð eft to woruld-þingum ne bið he gode and-fencge .

Mænigfealde wæron þæs hælendes wundra . and his halige lár swa we leorniað on bocum . and ealle his folgeras forleton ealle þincg . ægðer ge wíf . ge æhta . and wunodon on clænnysse . for his fægeran behate . and for heofonan rice .

Eft æfter his æriste and up-stige to heofonum . þaþa se geleafa aras and man alede deofolgyld . þa wurdon ða halgan martiras swa micclum onbryrde . þæt hi sweltan woldon ærðan þe hi wiðsocon gode . and heora lif aleton ærðan þe heora geleafan . and wurdon ofslagene for ðam soðan geleafan . fela þusenda martira on myslicum witum . and hi habbað þa ecan myrhðe for heora martyrdome .

Se arleasa deofol þe is æfre embe yfel . astyrode þa ehtnysse ðurh arlease cwelleras . and wolde mid slege oferswiðan þa cristenan . and godes geleafan alecgan gif he mihte . ac swa man má ofslóh . swa þær má gelyfdon ðurh þa micclan wundra þe ða martyras gefremedon .

Eft ðaða god sealde sibbe his gelaðunge . þa wolde se deofol mid gedwylde amyrran þone soðan geleafan . and seow ða gedwyld on dyrstigum mannum . an ðæra wæs arrius þe þæt yfel ongann . ac him eode se innoð út æt his forð-gange .

Manega wæron eac þe myslice dwelodon . oð þæt þa halgan fæderas heora yfel adwæscton . and þone soþan geleafan gesetton ðurh god . swa swa se hælend hine | tæhte his halgum apostolum; [sic @ Skeat]

Þa wæron halige bisceopas gehealtsume on þeawum . and wise mæsse-preostas þe wunodon on clænnysse . and manega munecas on mycelre drohtnunge . and clæne mædenu þe criste þeowodon on gastlicre drohtnunge for heora drihtnes lufan . and ða synd nu ealle on þam ecan wuldre for heora clænnysse mid criste wunigende .

Nu on urum dagum on ende þyssere worulde . swicað se deofol digollice embe us . hu he þurh leahtras forlære ða cristenan . and to mislicum synnum heora mod awende . ac ða beoð gesælige þe his swic-domas to-cnawað . and his lot-wrencas mid geleafan ofer-swyðað .

He wet nu swiðe and wynð on ða cristenan . forðan þe he wat geare þæt þysre worulde geendung is swyðe gehende . and he on-et forði .

We sceolan eac onettan and urum sawlum gehelpan . þurh góde biggengas gode to gecwemednysse . forðan þe we ne motan lange on ðysum life beon .

And þæt is godes mildheortnyss . þeah ðe hit digle sy .

On anginne ðissere worulde þaþa heo wynsum wæs . and menn moston lybban be heora lustum ða . þa wæs langsum lif . swa þæt hi leofodon sume nigon hund geara . on ðæra heah-fædera timan . sume eahta hund geara . and sume eac leng .

Nu is ure líf ungelíc heora . forðan þe we ne moton lybban be urum lustum nu . ac we sceolan gehyrsumnian ures hælendes bebodum . and mid earfoðnyssum þæt ece líf geearnian . and seo earfoðnys ongan on ðære godspell-bodunge .

Nu hæfð god eac gescyrt swyþe ure dagas swylce hé swa cwæde .

Ne sceole ge swincan to lange . ac beoð eow anræde to þam ecan life . þærðær ge butan geswince gesælige lybbað .

Nu synd ðreo heah-mægnu . ðe menn sceolan habban .

Fides . Spes . Caritas . þæt is geleafa . and hiht . and seo soðe lufu . þæt is se geleafa . þæt he gelyfe mid mode . on ða halgan ðrynnysse . and soðe annysse; and þæt is se hiht þæt he hopige to gode . ægðer ge on gelimpe ge on unge-limpe . and næfre ne ortuwige be | godes arfæstnysse; þæt is seo soðe lufv . þæt man his scyppend lufige mid únametenre lufe . and ða menn þe wel willað . swa swa hine sylfne on soðfæstnysse æfre .

For godes lufon we sceolon eac lufian ure fynd . swa þæt we ðone man lufian . and his mis-dæda onscunian .

Us is to under-standenne ðas endebyrdnyssa .

Crist cwæð on his godspelle . þæt we god lufian sceolan mid ealre ure heortan ofer ealle ðincg . and siððan ure nextan swa swa us sylfe . and eac ure fynd he het us lufian . ac he ne ihte ðærto mid ealre heortan . ne swa swa us sylfe . forðan þe him soðlice geniht-sumað þæt we hi lufian . and læððe to nabban . þeah ðe we mid ealre heortan ne swá swá us sylfe hi lufian .

Nu syndon eahta heafod-leahtras . þe us onwinnað swiðe .

An is gecwæden gula . þæt is gyfernyss on englisc . seo deð þæt þæt man yt ær timan . and drincð . oððe he eft to micel nimð on æte oððe on wæte . seo fordeð ægðer ge sawle ge lichaman . forðan þe heo macað þam menn mycele untrumnysse . and to deaðe gebrincgð for ^ðam ormætan [the n is added] drænce . heo fordeð eac ða sawle . forðan he sceall syngian oft [the t is added] ðone he sylf nat hu he færð for his feond-licum drencum .

Se oðer leahtor is forligr and unge-metegod galnyss .

Se is gehaten fornicatio . and he befylð þone mann . and macað of cristes limum myltestrena limv . and of godes temple gramena wununge .

Se þridda ^leahter is auaritia . þæt is seo yfele gitsung . and seo is wyrtruma ælcere wohnysse .

Heo macað reaflac . and unrihte domas . stala and leasunga . and forsworennyssa . heo is helle gelíc . forðan þe hi habbað butu unafylledlice grædignysse þæt hi fulle ne beoð næfre .

Se feorða leahtor is ira . þæt is on englisc weamodnyss . seo ^deð þæt se man nah his modes geweald . and macað manslihtas . and mycele yfelu .

Se fifta is tristitia . þæt is ðissere worulde unrotnyss ^{þæt is} þonne se man geunrotsoð (sic) ealles to swyðe for his æhta lyre þe he lufode to swyðe . and cid þonne wið god . and his synna geeac|nað .

Twa unrot-nyssa synd . an is þeos yfele . and oðer is halwende þæt ^{is þæt se} man for his synnum geunrotsige.

Se sixta leahter is accidia gehaten . þæt is asolcennyss oþþe slæwð on englisc . ðonne ðam menn ne lyst on his life nan god dón . and bið him ðonne mycel yfel þæt he ne mæge nan god don . and bið æfre ungearu to ælcere duguðe .

Se seofoða leahter is iactantia gecweden . þæt is ydel gylp on ængliscre spræce ^{þæt is} ðonne se man bið lof-georn and mid licetunge færð . and deð for gylpe gif he hwæt dælan wile . and bið þonne se hlisa his edlean ðære dæde and his wite andbidað on ðære toweardan worulde .

Seo eahteoðe leahter is superbia gehaten . þæt is on ænglisc modignyss gecweden . seo is ord and ende ælcere synne . seo geworhte englas to atelicum deoflum . and ðone man macað eac gif he modigað to swyðe þæs deofles geferan ðe feol ær ðurh hí .

Nu syndon eahta heafod-mægnu . ða magan ofer-swiðan þas fore-sædan deoflu þurh drihtnes fultum .

An is temperantia . þæt is gemetegung on englisc . ^{þæt is} þæt man beo gemetegod and to mycel ne ðicge . on ǽte . and on wǽte . ne ær timan ne gereordige .

Nytenu ætað swa ǽr swa hí hit habbað . ac se gesceadwisa man sceal cepan his mæles . and ðonne ^swa mid ^gesceade his gesetnysse healdan . þonne mæg hé oferswiðan swa ða gyfernysse .

Seo oðer miht is castitas . þæt is clænnyss on ænglisc . ^{þæt is} þæt se læweda hine healde butan forligre on rihtum synscipe mid gesceadwisnysse . and se gehadoda godes ðeowa healde his clænnysse . þone ^bið ofer-swyðed swa eac seo galnyss .

Seo ðrydde miht is largitas . þæt is cystignyss . on englisc . ^{þæt is} þæt man wislice ^{his æhta} aspende . na for woruld-gylpe þa ðincg þe him god lænde . on ðysum life to brucenne .

God nele þæt we beon grædige gytseras . ne eac for woruld-gylpe for-wurpan ure æhta . ac dælan hi mid gesceade swa swa hit drihtne licie . and gif we ælmyssan doð don hi butan gylpe . þonne mage we fordón swa ða deofollican gitsunga .

Seo feorðe miht | is patientia . þæt is geðyld and þolmod^nys gecwæden . ^{þæt is} þæt se mann beo geðyldig and ðol(o)mod for gode . and læte æfre his gewitt gewyldre þonne his yrre . forðan þe se hælend cwæð þus on his godspelle .

In patientia uestra possidebitis animas uestras .

 is on engliscre spræce .

On eowrum geðylde ge habbað eowre sawla soðlice gehealdene .

Se heofonlica wis-dom cwæð . þæt þæt yrre hæfð wununge on ðæs dysegan bosme ^{þæt is} ðonne he bið to hræd-mod . and se ealwealdenda dema demð æfre mid smyltnysse . and we sceolan mid geðylde oferswyðan þæt yrre .

Seo fifte miht is spiritalis (sic) laetitia . þæt is seo gastlice blys . ^{þæt is} þæt man on god blyssige betwux unrotnyssum þysre reðan worulde . swa þæt we on ungelimpum ormode ne beon . ne eft on gesælðum to swyðe ne blyssian . and gif we forleosað þas lænan woruld-ðingc . þonne sceole we witan þæt ure wunung nis na hér ac is on heofonum gif we hopiað to gode .

Þyder we sceolan efstan of ðyssere earfoðnysse mid gastlicre blisse . þonne bið seo unrotnyss mid ealle ofer-swyðed mid urum geðylde .

Seo syxte miht is instantia boni operis . þæt is anrædnyss gódes weorces . gif we beoð anræde on urum godum weorcum . ðonne mage we ofer-swyðan þa asolcennysse swá . forðan þe hit bið langsum bysmor . gif ure líf bið unnyt hér .

Seo seofoðe miht is seo soðe lufu to gode . þæt we on gódum weorcum godes lufe cepon .

Na ideles gylpes . þe him is andsæte .

Ac uton dón ælmyssan swa swa he us tæhte . gode to lofe na us to hlisan . þæt god sy geherod on urum godum weorcum . and se idela gylp us beo æfre unwurð .

Seo eahteoðe miht is . seo soðe eadmodnyss . ge to gode ge to mannum . mid modes hluttornysse . forðan seðe wis byð . ne wurð he næfre modig .

On hwan mæg se mann modigan þeah he wille . ne mæg he on geðincðum forðan þe fela synd geþungenran . ne mæg he on his æhtum . forðan þe he his ende-dæg nát . ne on nanum þingum he ne mæg modigan . gif | he wis bið

Nu ge habbað gehyred . hu þas halgan mægnu oferswyðaþ ða leahtras . þe deofol besæwð on us . and gif we nellað hi ofer-swiðan . hi besencað us on helle .

We magon þurh godes fylst ða feondlican leahtras mid gecampe ofer-winnan . gif we cenlice feohtað . and habban us on ende þone ecan wurð-mynt . á mid gode sylfum gif we swincað nu hér; [sic @ Skeat]

Ðam to wuldre ðe on ecnysse rixað ece drihten; [sic @ Skeat] þam sy wuldor and lof . ðe á leofað . mid fæder . and mid suna . and mid ðam halgan g[aste] on ecnysse. Amen. [doxology added in a later hand]

Chapter 17

sermo in laetania maiore [de auguriis]. Se apostol paulus ealra ðeoda lareow manode ða cristenan þe he sylf ær to geleafan gebigde on anum pistole . þæt is ærend-gewrit . ðus cweðende. Fratres . Spiritu ambulate . et desideria carnis Non perficietis . et cetera. Mine gebroðra farað on gaste . þæt is on gastlicre drohtnunga . and ne gefremme ge eowres flæsces lustas.  flæsc soðlice gewinð ongean ðone gast . and se gast ongean þæt flæsc . Þas ðincg soðlice . þæt is se lichama . and seo sawl . winnað him be-tweonan. Ac seo sawl is ðæs flæsces hlæfdige . and hire gedafnað . þæt heo simle gewylde ða wylne . þæt is þæt flæsc . to hyre hæsum. Þwyrlice færð æt ðam huse þær seo wyln bið þære hlæfdian wissigend . and seo hlæfdige bið þære wylne underðeodd . swa bið eac þæs mannes líf on hinder gefadod . gif þæt flæsc þe is brosnigendlic and deadlic . sceal gewyldan þone gast ðe is ece . and unateorigendlic . to his fracodum lustum ðe hí buta fordoð . and to ecum tintregum gebringað . Se apostol cwæð . Gif ge beoð þurh ðone gast gelædde . ðonne ne synd gé ná under ǽ . He cwæð on oðre stowe . Nis nan ǽ rihtwisum menn gesett . ac unrihtwisum . and na under-þeoddum . Arleasum . and forscyldegodum . forðan þe seo ǽ . þæt is se rihtwise steor ne ge-gret þone rihtwisan mid nanum yfele . ac heo gewitnað þa unriht-wisan be heora gewyrhtum . Se rihtwisa soðlice ne þearf him ondrædan þa stiðan steora þe godes . ǽ . tæcð . gif he him sylfum styrð fram eallum stunt-nyssum . Paulus cwæð . swutele synd þæs flæsces | weorc . þæt is forligr . and unclænnyss . estfulnyss . oððe galnyss . hæðen-gild . oððe unlybban . feondræden . and geflit . anda . and yrre . sacu . and twirædnyss . dwollic lár . and nið . mansliht . and druncennyss . oferfyll . and oðre ðyllice . þe ic fore eow secge swa swa ic fore [sæde] . forðan þa ðe ðyllice weorc wyrcað . ne begitað hi godes rice . Gehwa mot yfeles geswican . and gebetan . ac gif he ðurh-wunað on yfelnysse . and forsihð his scyppendes beboda . and deofla gecwemð . þonne sceal he unðances on ecnysse ðrowian . on ðam unadwæscend-licum fyre . betwux ðam wyrrestan wurm-cynne . þe næfre ne bið adyd . ac ceowað symle . þæra arleasra lichama . on ðam hellican lige . Eft cwæð se apostol on oðrum pistole . Fratres . Nolite errare . Neque fornicarii . Neque idolis seruientes . Neque adulteri . Neque molles . Neque fures . Neque auari . Neque ebriosi . Neque maledici . Neque rapaces . regnum dei Non possidebunt . Mine gebroðra nelle ge dwelian . naðor ne unriht-hæmeras . ne ða ðe hæðen-gildum þeowiað . ne ða þe oðre manna wif habbað . ne ða hnescan \superscript{vel wácmod} . þæt synd þa ðe nane stiðnysse nabbað ongean leahtras . Ne ðeofas . ne gytseras . ne drinceras . þæt synd þa ðe druncennysse lufiað . ne wyrgendras . þæra muð bið symle mid geættrode wyrigunge afylled . ne reaferas . nabbað hi næfre godes rice . He cwæð þa git eft forð to þam folce ðus . Þis ge wæron . ac ge synd nu afeormode . ac ge synd gehalgode . ac ge synd geriht-wisode on drihtnes naman ures hælendes cristes . and on gaste ures godes . Deofol-gild bið þæt man his drihten forlæte . and his cristendóm . and to deofollicum hæðenscype gebuge . bysmrigende his scyppend .

{{block left| <poem> Oðer deofolgild is derigendlic þære sawle . ðonne se man forsihð his scyppendes beboda . and þa sceandlican leahtras begæð . þe se sceocca hine lærð .

Þæs gastes wæstmas . synd þa godan ðeawas . | þæt se man lufige þone lifigendan god . and hæbbe ða soðan lufe symle on his mode . and ða gastlican blysse . and beo gesibsum . geðyldig . and ðolmod . and on ðeawum hæbbe godnysse . and glæd mod . and manðwærnysse . geleafan . and gemetfæstnysse . and modes clænnysse . and forhæfednysse butan higeleaste .

Nis nan . ǽ . wiðerræde þus geworhtum mannum . ac ða þe cristes synd cwylmiað heora flæsc .

Swa þæt hi nellað onbugan ðam bysmorfullum leahtrum . ne ðam yfelum gewilnungum . ac winnað him to-geanes . oð þæt hi sigefæste siðiað to criste . and to ðam ecan wuldre . for ðam sceortan gewinne . and hi blyssiað on ecnysse bliðe mid criste .

[Sermo sancto augustini de auguriis.]

Augustinus se snotera bisceop sæde eac on sumere béc .

Mine gebroðra þa leofestan . gelome ic eow warnode . and mid fæderlicre carfulnysse . ic eow cuðlice manode . þæt ge andsætan wiglunge þe unwise men healdað . mid ealle forlætan swa swa geleaffulle men . forðan butan ic eow warnige . and þone wol eow forbeode . ic sceal agyldan gescead þam soðfæstan deman minre gymeleaste . and mid eow beon fordemed .

Nu alyse ic me sylfne wið god . and mid lufe eow for-beode . þæt eower nan ne axie þurh ænigne wicce-cræft . be ænigum ðinge . oððe be ænigre untrumnysse . ne galdras ne sece . to gremigenne his scyppend . forðan se ðe þys deð . se forlysð his cristen-dom. and bið þam hæðenum gelíc . þe hleotað be him sylfum mid ðæs deofles cræfte þe hi fordeð on ecnysse . and butan he ælmyssan . and mycele dædbote his scyppende geoffrige . æfre he bið forloren .

Hleotan man mot mid geleafan swa þeah on woruld-ðingum butan wicce-cræfte . þæt him deme seota . gif hi hwæt dælan willað . þis nis nan wiglung . ac bið wissung foroft .

Eall swa gelice se ðe gelyfð wiglungum oððe be fugelum . oððe be fnorum . oððe be horsum . oððe be hundum . ne bið hé ná cristen . ac bið for-cuð wiðer-saca .

Ne sceal nan man cepan be dagum on hwilcum dæge he fare . oððe on hwylcum he | gecyrre . forðan þe god gesceop ealle ða seofan dagas . þe yrnað on þære wucan oð þysre worulde geendunge .

Ac seðe hwider faran wille . singe his paternoster . and credan . gif he cunne . and clypige to his dryhten . and bletsige hine sylfne . and siðige orsorh þurh godes gescyldnysse . butan ðæra sceoccena wiglunga .

Us sceamað to secgenne ealle ða sceandlican wiglunga . þe ge dwæs-menn drifað . ðurh deofles lare . oððe on wifunge . oððe on wadunge . oððe on brywlace . oððe gif man hwæs bitt þonne hi hwæt onginnað . oþþe him hwæt bið acenned .

Ac wite ge to soðan . þæt se sceocca eow lærð þyllice scincræftas . þæt he eowre sawla hæbbe ðonne ge gelyfað his leas-brædnysse .

Nu cwyð sum wiglere þæt wiccan oft secgað swa swa hit agæð mid soðum ðincge .

Nu secge we to soðan þæt se ungesewenlica deofol þe flyhð geond þas woruld . and fela ðincg gesihð geswutelað þæra wiccan hwæt heo secge mannum . þæt þa beon fordone þe ðæne dry-cræft secað .

Fela sædon þa dry-men . þurh deofles cræft . Iamnes and mambres . swa swa moyses awrát . and hi pharáo forlærdon mid heora lotwrencum . oððæt he adranc on ðære deopan sǽ .

Eall swa eac symon se swicola dry . swa lange he wan wið petre . oð þæt he wearð afylled . ða þa he wolde fleon to heofonum . þæt he on feower tobærst and swa ferde wælhreow mid wite to helle .

Fela oðre forferdon þe folgodon dry-cræfte . swa swa we on bocum rædað . ac heora racu is langsum .

Ne sceal se cristena befrinan þa fulan wiccan be his gesundfulnysse . þeahðe heo secgan cunne sum ðincg þurh deofol . forðan þe hit bið derigendlic . and eall hit bið ættrig þæt him of cymð . and ealle his folgeras forfarað on ende .

Sume men synd swa ablende . þæt hi bringað heora lác to eorðfæstum stane . and eac to treowum . and to wylspringum . swa swa wiccan tæcað . and nellað under-standan . hu stuntlice hi doð . oððe hu se deada stán . oððe þæt dumbe treow him mæge gehelpan . oððe hæle forgifan . | þone hi sylfe ne astyriað . of ðære stowe næfre .

Se cristene man sceall clypian to his drihtne mid mode . and mid muðe . and his munda abiddan . þæt he hine scylde wið deofles syrwunga . and besettan his hiht on ðone soðan god . se ðe ana gewylt ealra gesceafta . þæt he fore-sceawige be his gesundfulnysse . loca hu he wille . swa swa ealwealdend god .

We sceolan on ælcne timan . and on ælcere styrunge gebletsian us sylfe mid soðum geleafan . and mid rode-tacne þa reðan aflian . for ðan þe se reða deofol wearð þurh ða rode ofer-swiðed . and heo is ure sige-beacn ongean þone sceoccan á .

Eac sume gewitlease wíf farað to wega gelætum . and teoð heora cild þurh ða eorðan . and swa deofle betæcað hi sylfe . and heora bearn .

Sume hi acwellað heora cild ærðam þe hi acennede beon . oððe æfter acennednysse . þæt hi cuðe ne beon . ne heora manfulla forligr ameldod ne wurðe . ac heora yfel is egeslic . and endeleaslic morð .

Þær losað þæt cild laðlice hæðen . and seo arleasa modor . butan heo hit æfre gebete .

Sume hi wyrcað heora wogerum drencas . oððe sumne wawan . þæt hi hi to wife habbon .

Ac þyllice sceandas sceolan siðian to helle . þær hi æfre cwylmiað on þam cwealmbærum fyre and on egeslicum witum . for heora gewitleaste .

Ac cristene men sceolan campian wið deofla mid strangum geleafan . swa swa gelærede cempan . and forhogian þa hætsan . and ðyllice hæðen-gyld . and þæs deofles dydrunga . and heora drihten arwurðian . þonne gesihþ se deofol þæt ge hine forseoð . and him bið þonne wá on his awyrigedum mode . þæt ge swa anræde beoð . and nimð andan to eow . and wile eow geswencan mid sumere untrum-nysse . oððe sum eowre orf ardlice acwellan . forðan þe he mot ælces mannes afandian . on manega wisan . hwæðer his mod wille abugan þurh ða ehtnysse fram ðam ælmihtigan gode .

Ac wite ge to wissan þæt se wælhreowa deofol ne mæg mannum derian mid nan|re untrumnysse ne heora orf adydan butan drihtnes geþafunge .

God is eall godnyss . and he æfre wel wile . ac manna yfelnysse mod beon gestyrod . þonne geðafað god þam sceoccan for oft . þæt he men geswence for heora mis-dædum .

Us is to secenne gif we geswencte beoð . þa bote æt gode . na æt ðam gramlican wiccum . and mid ealra heortan urne hælend gladian . forðan þe his mihte ne mæg nan ðincg wiðstandan .

He cwæð on his godspelle . þæt buton godes dihte . furðon an fugel ne befylð on deaðe .

Wen is þæt he wille bewitan á his menn . ge on life . ge on deaðe . þonne se lytla fugel ne befylþ on grin butan godes willan .

Ure drihten adræfde deoflu mid his hæse of anum wodum menn .

Þa wæs ðær gehende . an heord swina . and \superscript{hi} sona bædon þæt hi moston faran into ðam swynum . and drihten geðafode þa ðam deoflum þæt .

Hi ða into þam swynum . and hi ealle aweddan . and urnon to ðære sǽ . and sona adruncon .

Ne mæg se deofol mannum derian butan godes ðafunge . ne heora ðincg amyrran . þonne hé ne moste faran furðon on þa swín . butan him geðafode þæs se hælend .

Gif us deofol drecð . oþþe ure þincg adyd þæt getimað þonne swa for twam intingum . oþþe god swa þreað ure ðwyrlican dæda . oððe he ure afandað on ðære frecednysse . and se sceocca sceall aswæman æt us . gif we anræde beoð on urum geleafan . and crist hine adræfð þæt he us derian ne mæg gif we ða ehtnysse eadmodlice forberað . and butan ceorunge symle gode þancige .

Us becymð swa þeah eall þæt to gode . gif we beoð geðyldige . and þanciað urum drihtne . and on ðære fandunge his fultumes biddað . seþe eaðelice mæg us æfre ahreddan fram eallum fræcednyssum feondlicra costnunga .

Læcedom is alyfed fram lichamena tyddernysse . and halige gebedu mid godes bletsunge . and ealla oðre tilunga syndon andsæte gode . swa swa paulus awrat þysum | wordum cweðende .

Ne mage ge samod drincan . ures drihtnes calic . and ðæs deofles cuppan . to deaðe eowre sawle . and ure drihten cwæð . þæt man gecwæman ne mæg twam hlafordum æt-somne . þæt he ne forseo þone oðerne . ne we ne magon gecwæman . criste and deofle .

Nu secgað sume menn þæt him sceole gelimpan swa swa him gesceapan wæs . and geset æt fruman . and ne magon forbugan þæt hí mis-faran ne sceolan .

Nu secge we to soðan gif hit swa beon sceall [þæt hit is unnyt bebod] ðe god bebead þurh dauid .

Declina á malo and fac bonum

Buh fram yfle . and do god.

And eft se apostol cwæð . swa man swyðor swincð for gode . swa he selran mede hæfð .

Gif ælces mannes lif æfre sceola swa gán . þæt he ne mæge forbugan bysmorlice dæda . þonne bið unrihtlic þæt ða unrihtwisan onfón ænigne witnunge for heora wohnysse .

Eac ða arfæstan beoð wolice gearwurðode . gif þæt soð beon mæg þæt him swa gesceapen wæs . and on unnyt we swincað on urum þeowdome . oððe on ælmyssum . oþþe on oðrum dædum . gif we his na maran edlean æt urum drihtne nabbað . þonne ða receleasan menn . þe butan ge-rade lybbað . and on eallum þingum wadað on heora agenum willan . and on heora lustum heora líf aspendað .

God ælmihtig gesceop manega gesceafta . and heora nanum ne forgeaf agenre [read agenne] freo-dóm . oþþe gesceadwisnysse . butan ðam scinendum englum . and menniscum gesceafta . þe he mid his handum gesceop

Þas twa gesceafta habbað gesceadwisnysse . and ælc man hæfð agenne freo-dóm . þæt he wát hwæt hé wile . and wát hwæt he nele . ac god us ne nyt swa þeah þæt we god don sceolon . ne eac us ne forwyrnð yfel to wyrcenne . forðan þe he us forgeaf agenne cyre .

He sealde swiðe fæste gife . and swyþe fæste . ǽ . mid þære gife ælcum menn oð his ende . earmum . and eadigum. þæt is seo gifu þæt se man mot dón þæt he wile . and þæt is seo . æ . þæt god forgylt ælcum menn be his gewyrhtum . ægðer ge on þysre worulde . ge | on þære toweardan . swa gód . swa yfel . swa hwæðer swa he begæð .

Gif hwa nu wundrige hwi god wolde forgifan þam yfelum mannum agenne freo-dóm . þone he wát on ǽr þæt hi yfel don willað .

Nu cweðe we þæt hit ne gerist nanum ricum cynincge þæt hi ealle beon þeowe menn ðe him þenian sceolon . and on his anwealde ne beo furðon an frig man .

Swa eac ne gedafnode þam ælmihtigan drihtne þæt on eallum his rice nære ænig gesceaft þe nære on ðeowte þearle genyrwed .

Nu behofað ure freo-dom æfre godes fultumes . forþan ðe we ne doð nan god butan godes fultume .

Se ús gewissige . á on ðysre worulde . and to þam ecan life gelæde þurh hine sylfne . swa swa hé þam eallum behét þe hine lufiað .

Sy him wuldor and lof á to worulde. Amen.

Chapter 18

sermo excerptvs de libro regum.

Saul hatte se forma cyning þe ofer godes folc rixode .

Se wæs to cynincge ahafen swyðor for folces gecorennysse þonne ðurh godes rǽd.

Fela oðre cynincgas rixodon ǽr geond ealne middan-eard ofer hæðenum leodum . ac ofer israhela folc þe on god belyfde næs nan eorðlic cynincg ærðan þe saul swa swa hi sylfe gecuron ofer hi cynerice under-fencg .

Se beah hrædlice fram þæs ælmihtigan godes willan and nolde be his wissunge and be his witegan lare faran . and se yfela gast hine drehte mid deofollicum sticelsum . and on ungewitte his mod awende .

Þa forseah se ælmihtiga god þone saul æt nextan . and hine of his rice awearp be his agenum gewyrhtum . and ^geceas ^him to cynincge þone cenan dauid .

Seðe butan wæpnum gewylde ða leon . and þæs beran ceaflas to-bræc mid his handum . and ahredde þæt gelæhte scép of his scearpum toðum .

He ofwearp eac syððan þone swyþlican ent goliam þone gramlican þe godes naman hyrwde . and mid gebeote clypode bysmor godes folce . gearu to anwige mid ormettre wæpnunge .

Hwæt | þa dauid eode togeanes þam ente . and ofwearp mid his liþeran þone geleafleasan ent . bufon ðam eagan þæt he beah to eorðan .

Gelæhte þa of ðam ente his agen swurd . and his ormæte heafod mid þam of asloh . and hæfde ða gewunnen sige his leode .

Be þysum dauide cwæð se ælmihtiga wealdend . þæt he hine gecure þus cweðende .

Ic afunde me dauid æfter minre heortan . þæt he ealne minne willan mid weorcum gefremme .

Þes dauid wes witega and wuldorful cyningc . and gode gelicode oð his lifes ende . and mid ealre heortan him gehyrsumode á .

He wæs forði mære on micclum geðincþum . forðan þe he cepte symle hu he cwemde gode .

Æfter him rixodon on israhela manega cyningas mislice geworhte .

Sume hi gelyfdon on þone lyfigendan god . sume on hæðengildum him sylfum to forwyrde . and þa ðe god wurðodon wurdon gemærsode . and sige-fæste wæron Symle on gefeohte . þa ðe fram gode bugon to bysmor-fullum hæðenscype þa wurdon gescynde . and á unsigefæste .

An þæra wæs achab se arleasa cyning . þe forseah his scyppend and ge-ceas him báál þæra hæðenra god . þe næfde nane godnysse ac wæs gramlic deofol mid ge-dwylde afunden; þyses cyninges cwen wæs forcuþost wifa . Gezabel gehaten hetelice gemodod .

Seo tihte hyre wer to ælcere wælhreownysse . and hi tyrgdon god mid gramlicum weorcum .

On þam dagum wæs helias halig godes witega . se abæd æt gode þæt he ðam yfelan cynincge rén-scuras oftuge . for his reðnysse .

Eode þa forð feorðe healfgear butan rén-scurum and reocendum deawe . and se witega helias gewende of ðam lande . and god hine afedde þurh fugela ðenunga . oðþæt he hine asende to sumere wydewan on sidoniscum earde . and hire sæde se witega .

Ðus cwæð israhela god . þæt ðe ele ne ateorað . ne melu on þinum mittan . oðþæt mannum becymð rén ofer eorðan eow to wæstme .

Þa afedde seo wudewe þone godes witegan mid ðam lytlan melewe . and þam | gehwædan ele . and funde ða fatu æfre fulle eft . oðþæt god eft forgeaf eorðlice wæstmas .

Betwux ðysum gelamp þæt of life gewát þære wudewan sunu . and se witega hine arærde eft of deaðe þurh his drihtnes mihte .

Eft ða se ælmihtiga het þone witegan faran to his earde and to ðam arleasan cynincge . cwæð þæt he wolde sendan syððan renscuras .

Helias ða ferde . and efne hine gemette abdias se æðela . and se arwurðfulla godes ðegn . se fægnode his tocymes and cwæð him þus to .

Swyðe we axodon embe ðe gehwǽr . and se cyning sende swyðe fela ærendracan to gehwylcum eardum embe þe axiende .

Næs ðe leof gecyd þæt ic cuce behydde hund-teontig witegan and hi mid wistum afedde ðaða gezabel acwealde ealle godes witegan þe heo ofaxian mihte on ealre ðysre leode .

Helias ða becom to ðam cyninge achab . and he befrán sona þone soðfæstan witegan .

Eart ðu lá helias ðe israhel gedrefst? [sic @ Skeat]

Þa andwyrde se witega þam wælhreowan and cwæð .

Ne gedræfde ic ^na israhel . ac gedrefdest ðu sylf . and þines fæder hiwræden . gé þe forleten god and fyligdon báál mid fulum biggencgum .

Hat nu gelangian to me ealle þa leasan witegan ðe þeowiað báál . and etað mid gezabél .

Þa sende ce [sic @ Skeat; should be se] and cydde his leode . and het israhela folc and ða facenfullan witegan ealle endemes cuman to helian spræce .

Þa cwæð helias to eallre þære meniu .

Hu lange wille ge healtian on twa healfe ðus .

Gif ure drihten is god fyliað þonne him .

Gif báál is god fyliað his biggengum .

Þa suwode þæt folc . and helias feng eft on .

Ic beláf ana ealra godes witegena . and baal hæfð feower hund and fiftig witegan .

Nimon hi anne oxan . and geoffrian heora gode . and ic oðerne oxan geoffrige minum gode . and beon hi begen beworpene mid wuda wiðneoðan .

Uton biddan syððan onsundron æt gode . ic æt minum gode þæt he mine lac forbærne mid upplicum fyre . and ge | eac swa dón . beo þonne ^se soð god þe asent þæt fyr ufan .

Þa cwæð eall þæt folc þæt he ænlice spræce .

Ða namon þa deofolgildan þone dunnan oxan . bewurpon mid wudu . on heora wisan to offrunga. and clypodon to báál þæt he heora bene gehyrde .

Stodon ða fram ærne-mergen earmlice hrymende . oð ofer midne deg ge-drehte forðearle . ne him answaru ne com ne seo offrung næs forbærned . þa cwæð helias to ðam leasum witegum .

Clypiað ^git hluddor uncuð þeah þe he slæpe þæt he huru awacnige . and eow wið spræce .

Hi clypodon þa swyðor . and hi sylfe gedrehton [←gewundodon] ac se leasa báál ne mihte hi geblyssian .

Þa genam helias þone oþerne oxan . beworhte mid wuda on ða ealdan wisan

Het ða gewæterian ealne þone wudu . and clypode anmodlice to þam ælmihtigan gode .

Þu ælmihtiga god þe abraham on belyfde and his sunu Isáác . and eac swilce Iacób . geswutela on þysum dæge þæt ðu eart soð god . and þis folc oncnawe cuðlice mid geleafan þæt þu eart drihten god þe heora heortan gebigst .

Æfter ðisre clypunge com fyr of heofonum . and forbærnde þone oxan and ealne ðone wudu . and ða twelf stanas ðe stodon under ðam oxan .

Þa feol eall þæt folc forht on gebedum . and clypode mid geleafan to ðam lyfigendan gode .

Drihten sylf is god . drihten sylf is god .

Him cwæð þa to helias .

Gelæccað þa witegan þe báále ðeowdon þæt heora nán ne ætberste; hi wurdon ða gelæhte and gelædde to helian . and he hi acwealde þæt þær nan ne beláf cucu .

He astáh ða ardlice up to anre dune . and gebigedum cneowum bæd ðone ælmihtigan god þæt he renas forgeafe eorð-bugiendum . and het his cnapan ða hwile hawian to ðære sǽ . gif ænig mist arise of ðam mycclum brȳme . þa gecyrde se cnapa seofon siðum him to . and on ðam seofoðan cyrre sæde ðam witegan . þæt an gehwæde wolcn of ðære widgillan sǽ efne þa upp astige mid þære unscæðþigan | lyfte .

Efne ða arás se wínd . and ða wolcnu sweartodon . and com ormæte scúr of ðære lyfte .

Þa gewende se cyning aweg mid þam rene . and cydde his wífe ðæs witegan dæda . and hu he ofsloh ða hæðengildan .

Þa asende gezabel ongean to helian . and swor þurh hire godas mid syrwigendum mode . þæt helias sceolde ðæs on mergen sweltan . and beon anum gelíc hire leasra witegena.

Þa for-fleah helias þæt fracode wif út to anum westene and wearð ðær on slæpe . ac hine awrehte sona anscinende godes encgel . het hine arísan and hine gereordian .

He geseah þær licgan ænne snaw-hwitne focan . and an lytel fæt ful wæteres þaþa he awacnode .

He æt ða and dranc . and eft wearð on slæpe . ac se encgel hine awrehte oþre siðe . and cwæð .

Aris hraðe . and et . þu hæfst swyþe langne weg .

He æt eft . and dranc . and eode be ðam mete feowertig daga onán . butan ælcum gereorde .

Sum þegen hatte naboð . se hæfde ænne win-eard wið ðæs cynincges botl . þa cwæð se cynincg him to .

Syle me ðinne wineard me to wyrtune . and ic þe oðerne finde on fyrlene for-hwega . oððe mid feo ofgange forðan þe he is me gehende .

Þa cwæð naboð him to . þæt he ne mihte alætan his yldrena yrfweardnysse swa eaðelice him to handa .

Þa gebealh hine se cynincg and ^to his bedde eode . wende hine to wage wodlice gebolgen .

Him eode þa to gezabel and cwæ [sic @ Skeat; ð not printed] .

Hwi eart ðu geunrotsod . and þe gereordian nelt? [sic @ Skeat]

Þa sæde se arleasa his yfelan wife . hu he þæs win-eardes gyrnde . and him forwyrnde naboð .

Þa olæhte gezabel þam unrihtwisan and cwæð .

Arís and gereorda ^ðe mid rædfæstum mode . ic ðe forgife þone wineard ðe ðu gewilnodest .

Þa sende gezabel sona anne pistol . to naboðes neh-geburum mid þisum ge-banne .

Habbað eow gemot . and to middes settað naboð eowerne nehgebúr . biddað lease gewitan þæt hi hine forsecgan on eowere | gesamnunge ðus .

Naboð wyrigde on ure gewitnysse god and his cyne-hlaford . acwellað hine siððan .

Þa dydon þa heafod-menn swa swa þæt hetelice wíf him on gewrite bebead . and budon ^him to gemote .

Fundon ða lease gewitan þe forlugon naboð . þæt he sceolde wyrigan wælhreowlice god . and his cyne-hlaford . and acwealdan hine mid stanum .

Cyddon ða gezabele . þæt naboð cucu næs .

Hwæt ða gezabel eode mid blysse to þam unrihtwisan ^cyninge . and cwæð him ðus to .

Arís nu and hafa ðe naboðes win-eard . þeah ðe he þe ðæs ne uðe . hé is nú unlifes .

Þa arás se arleasa . and ferde to naboðes winearde wolde hine habban.

Þa com him gangende to se godes witega helias . asend fram gode and sæde him ðas word .

Ðus cwæð se ælmihtiga god .

Þu ofsloge and geagnodest .

Swa swa hundas lapodon naboðes blód . swa hi sceolon lapian and liccian þin blód . ic adilegie þinne hired and fordó þinne ofspring . forðan þe ðu me getyrgdest and min folc mis-tihtest . and gezabel sceolon etan ælegrædige hundas .

Hwæt ða æfter fyrste ferde acháb se cyning to-geanes syrian cynincge mid swyðlicre fyrdinge . wolde mid gewinne wanian his rice . þa hét syrian cyning sona his cepan . þæt he ana feolle of eallum his folce .

Þa gebende an scytta sona his bogan . and ascét ana flán swylce on ungewis . and atæsde ðone cyning betwux þære lungene . þæt he feallende sweolt on ðam gefeohte ærest .

Þa gewende his here aweg swyðe hraðe and leddon ðone cyning on his cræte swa deadne . and his blod ða fleow binnon ðam cræte . þæt liccodon hundas ðaða hí hám comon .

Ða feng his sunu sona to his rice . oozias gehaten swyðe yfel-dæda .

He ferdeswa swa his ^forcuða fæder and swa swa his fracode modor him yfele gebysnodon . and binnon twam gearum his lifes ðolode . and his lænan rices .

He feoll of anre stægere . and forðy gelæg .

Sende ða to hæðengilde het axian be him . and helias gemette þa menn ðe he asende . cwæð | him sona to . swa swa him sæde godes engel .

Hwæt la nis se ælmihtiga god on israhela ðeode . and ge farað to hæðengilde eowre hæle to axienne .

Nu cwæð se ælmihtiga forði . þæt se cynincg ne sceall arisan of ðam bedde þe he on lið . ac sceall beon dead.

Þa gewendon ða ærendracan eft to ðam cynincge . and cyddon hwæt se witega him be wege sæde .

Þa sende se cyning sona fiftig manna to ðam godes witegan . wolde hine gelangian .

Ða cwæð se yldosta to ðam arwurðan witegan .

Gang nu godes man of þære grædan dune . se cynincg gewilnað þæt þu cume him to .

Þa andwyrde helias anrædlice and cwæð .

Gif ic godes man eom . forbærne eow godes fýr .

Hwæt þa mid ðam worde wand fyr of heofonum and forbærnde þa fiftig manna mid ealre heora fare .

Þa asende se cynincg eft oðre fiftig up to ðære dune þær helias sæt . and him eallswa getimode swaswa ðam oðrum flocce . þæt hi wurdon forbærnde mid brastligendum lige . heofonlices fyres færlice ealle .

Þa asende se cynincg gyt ðriddan siðe him to fiftig his ðegna . ða feollan ealle on cneowum biddende þone witegan mid bifigendre heortan . þæt hé hí ne forbærnde ðeahðe hi heora ærende abudon . swa swa ða oþre ðe him ær tocomon .

Ða het godes engel þæt he gán sceolde forð mid ðam mannum . unforht to ðam cynincge .

Elias ða eode to þam adlian cyninge . and him sylfum sæde þæt he sweltan sceolde . forðan þe he asende to þam sceandlican hæðengilde . to befrinenne his hæle swylce god nære on israhel .

Ða gewat se cyning swa swa se witega cwæð . and his broðor ioram feng to his rice . and hit endlyfan gear yfele geheold . and his modor gezabél manfullice leofode on fulum forligere and on ælcere fracodnysse . oþþæt godes wracu hire wælhreownysse geendode .

Betwux ðysum wearð se witega helias up to heofonum ahafen hál butan deaðe . and lyfað git on licha|man mid langsumre strangunge .

Heliseus his gingra eode mid him on ǽr . ða cw̅ se lareow helias to his leorning-cnihte .

Bide me loca hwæs þu wille ærðan þe ic beo genumen of ðinre gesihðe . and of ðysum geswince .

Þa cwæð eliseus to ðam arwurðan witegan .

Ic bidde þe min fæder . þæt ic beo afylled mid þam witegendlicum gaste þe on ðe nu wunað .

Þa cwæð helias to his leorning-cnihte .

Myceles þu bæde . ac ðu bist swa ðeah tiða gif ðu most geseon hu ic siþige heonon . gif ðu hit ne gesihst soðlice hit ne bið .

Betwux heora spræce com an heofonlic cræt swylce eall fyren mid fleogendum horsum . and helias ferde on ðam fægeran cræte upp geond ða lyft . and let afeallan his basincg .

Þa geseah heliseus hu he siðode up . and clypode hlude æfter his lareowe þus .

Pater mi . pater mi . Currus israhel et auriga eius . ^{þæt is on englisc; [sic @ Skeat]} Fæder min . fæder min . israheles cræt . and his wissigend . þæt is cræt-wisa .

He ne geseah hine siððan ac genam sona his basincg ðe of þam cræte ætfeoll . and ferde ongean . and wæs godes witega swa wís swa se oðer . and fela wundra worhte . and witegode fela ðincg .

He arærde ænne deadne ^mann þurh drihtnes mihte . ænne on his life . and oðerne æfter ^his forðsiðe .

Æfter þæs witegan forð-siþe wearð an lic gebroht to ðæs halgan byrgene . and sceaðan þa afligdon færlice ða lic-menn . þæt hi forleton þone deadan uppan his byrgene . and urnon aweg swa hraðe swa hi besawon on ðone reþan floc .

Þa aras se deada mid ðam þe he hrepode þa byrgene . and eode ham gesund for heliseus geearnungum .

Heliseus gehælde eac ænne ealdor-man fram ðam atelicum hreoflan . se hatte náámán of syrian lande . and he gelyfde on god þurh þæt mycele wundor ðe god on him geworhte .

Fela oðre tacna gefremede god þurh hine on israhela ðeode . on þam yfelan timan .

Heliseus ða asende sumne oðerne wite|gan mid godes ærende to anum ealdor-menn hieu gehaten . het hine halgian to cynincge .

Ða ferde se geonga witega to þam foresædan ealdor-menn . begeat his heafod mid ele . swa swa se ælmihtiga hét . and abead him godes ærende an-rædlice and cwæð .

God ælmihtig cwæð be þe . ic ðe to cynincge gesmyrode . ofer israhela folc . þæt þu eall adilegie achabes ofsprincg ðæs arleasan cynincges . þæt ic beo gewrecen on þære awyrigendan (sic) gezabel .

Heo bið hundum to mete ná bebyrged on eorðan .

Hwæt ða hieu se ní-gehalgode cynincg . ferde mid fultume to gefremmenne þa þincg ðe him god bebead betwux his gebroðrum .

Þa com him togeanes Ioram se cyning . axode hwæðer he come mid sibbe swa caflice .

Ða andwyrde hieu and cwæð unforht him to .

Git ðinre modor manfullan forligr . and fela unlybban syndon forðgenge .

Þa gewende ioram awæg sona . and cwæð .

Ðis synd syrwunga . and hieu hine scét bæftan his bæce . þæt him to-bærst seo heorte .

Het hine ða wurpan of þam wege swa deadne .

Þa fleah iudea cyning þe com mid ðam oþrum . ac hieu hine offerde and him his feorh benam . wende þa to gezabel þe wæs on þære byrig . and stód uppon anre upflora ænlice geglencged . and gehiwode hire eagan and hire neb mid rude togeanes hieu . and beheold his to-cyme .

Þa beseah hieu to þære sceande up . and het hi asceofon (sic) sona under-bæc .

Heo wearð ða afylled ætforan ðam horsum . and þa hors hi oftrædan huxlice under fotum

Hieu þa eode to his gereorde sittan . and æfter his ðenunge cwæð to his þegnum .

Gað to þære hætse (vel sceande) þe ic hét niþer asceofan . and bebyriað hire lic for hire gebyrdum .

Hi eoden ardlice to ac heo wæs eall freten butan þam handum anum . and þam heafde ufweardum . and þam fot-wylmum þurh fule hundas .

Þa cyddon ða cnihtas þam cynincge þæt . and he cwæð to andsware . þæt hit wæs ǽr swa gewitegod .

Þa wæran of samarian | hund-seofontig aðelinga achabes suna þæs ealdan cynincges iorames gebroðra .

Þa het se bealda hieu ða ceastergewaran . þæt hi of ðam hund-seofontigum ænne æðeling gecuron him to cynincge . and fuhton him togeanes for heora hlafordum .

Þa sende seo burh-waru to ðam breman hieu . budon him manrædene to eallum his bebodum .

Þa het hieu him to gebringan þæra æðelinga heafdu ealle þæs on mergen . and he acwealde siððan ælc þincg ðæs cynnes .

Gewende ðá to samarian þære fore-sædan byrig . and het him to gelangian þa leasan deofolgildan . þe báál wurðodon wolde hine gespræcan .

Het ða gedreohlæcan þæs deofles templ . sæde þæt he wolde hine wurðian for god . swa swa acháb dyde and eac git swyðor .

Þa comon þa sacerdas to þam cynincge ealle . and he hét hí ingan to ðam gode báál . and him geoffrian þa estfullan onsægednyssa .

Hwæt ða hieu het hi ealle ofslean . and forbærnan þone báál and to-bræcan his templ .

Worhton þa anne gangtun . þær ðær se god báál ær wæs gewurðod wolice oðþæt .

Þa com godes word to ðam cynincge þus .

Forðan þe þu geworhtest minne willan geornlice on achabes ofsprincge . and hí ealle adilogodest . þine suna gesittað þæt cyne-setl on israhel oð ða feorþan mægðe . mid fæderlicre æfter-gengnysse .

Manega cynegas wæron myslice geworhte æfter þysum rixiende on israhela rice . and eac on iudea lande . oðþæt se geleaffulla cynincg ezechias gehaten mid ealre heortan gebeah to ðam ælmihtigan gode . and his biggengas arærde . and towearp þa deofolgild þe dwollice oþ þæt wæron gewurðode mid wolicum biggencgum .

He rixode on iudea lande an leas ðryttig geara . and wislice leofode forðan þe he lufode god . and god hine gescylde wið syrian cyning . sennacheríb gehaten þe mid hóle him on wan . and mid ormætre fyrdincge hine afyllan wolde . and asende his heretogan to . ðe huxlice spræc be gode and be ezechian mid | mycclum gebeote .

Hwæt ða ezechias anmodlice clypode to ðam ælmihtigan gode . þæt he hine ahredde .

Ða asende god his engel to þam syriscan here . and ofsloh on anre nihte an hund þusend manna . and hund-eahtatig ðusend and sumne eacan ðærto .

Þa geseah sennacheríb sona ðæs on mergen . þæt his here wæs ofslagen mid heofonlicum swurde .

Wende þa sona hám . and his twægen suna hine ofslogon mid swurdes ecge .

Swa ahredde se ælmihtiga god þone æþelan cynincg . and eac his leode for his geleafan .

Æfter ðysum wearð geuntrumod ezechias [oð] deað. and him com gangende to godes witega isaias . abead him godes ærende þus bealdlice and cwæð .

God cw̅ be ðe cynincg . þæt þu becweðe þine ðincg . forðan þe ðu sweltan scealt . and þu soðlice ne leofast .

Þa awende ezechias to wage his ansyne . and clypode to gode þus cweðende mid wope .

Ic bidde þe min drihten þæt þu beo gemyndig hu ic ætforan ðe ferde on fulfremedre heortan . and on soðfæstnysse þe symle gecwemde .

Isaias se witega wæs awæg farande . ac god hine gecyrde þus him eft secgende .

Gecyr to ezechian and sege him ðas word .

Drihten god gecwæð þe dauid on ge-lyfde . ic gehyrde þin gebed . and ic beheold þinne wóp . and efne ic ðe gehæle þæt þu hál gæst nu embe þry dagas to þines drihtnes temple . and ic fiftyne gear þe to fyrste læte ðinum dagum to eacan . and ic eac þas burh gescylde .

Þa het se witega isaias wyrcan ænne clyþan to þæs cynincges dolge . and him com ða hælu .

He leofode þa siððan oð þæt sixteoðe gear . and mid ealre godnysse ^gode gecwemde .

Mannases wæs gecyged ezechias sunu . and se feng to rice æfter his fæder geendunge . and mid manegum yfelum dædum þone ælmihtigan ^{god ge}gremode . þa asende him god to swyðlice steore . swa þæt him comon to ða chaldeiscan leoda | and hine gebundenne geleddon to babiloniscre byrig . and on cwearterne bescufon to sceame his kyne-scipe .

Þa behreowsode mannases mycclum his synna . and mid eallre heortan to þam ælmihtigan clypode . biddende miltsunge ealra his man-dæda . and behet geswicennysse and hit eac swa gelæste .

Hwæt ða se ælmihtiga god þas earman cynincges bene gehyrde . and gebrohte hine eft to his cyne-rice of ðam reðan cwearterne . and he ge-bette syððan þæt ðæt he ær tobræc .

He oncneow þa godes mihte and his mildheortnysse on him and awende his dæda to his drihtnes willan . and wel ge-endode þeah ðe he yfele ongunne .

His sunu amón swyðe ungesælig feng to his rice . and hit unrihtlice heold swa þæt hé forlét þone almihtigan god . and deofolgild beeode and dæd-bote ^ne geworhte .

Twa gear he rixode unrædfæstlice .

Ða gewearð his þegnum þæt hi hine acwealdon and Iosias his sunu sona feng to rice . on iunglicre ylde and ge-efenlæhte dauide on ealre godnysse . and godes wyllan gefremode .

He awearp yfelnysse and ða unrihtan biggengas ðæra leasra goda þe his fæder on gelyfde . and geedniwode godes ǽ . mid eallum biggencgum . and wiccan fordyde . and wigleras afligde . and drycræft towearp his drihtne to gecwemednysse .

Næs soðlice nan cynincg þe gecyrde swa geornlice mid ealre heortan to ðam ælmihtigan gode beforan iosian . ne eac siððan ne cō nan his gelica ðe swa gelyfde on god .

An and þryttig geara . he rixode þrymlice on hierusalem . and myldheortnysse weorc be moyses . ǽ . symle beeode . swa swa us secgað gewrytu .

Ne mage we awritan ða mænig-fealdan gerecednyssa ealra iudeiscra cyninga on ðisum lytlan cwyde . oððe israhela ðeode hu hi ealle leofodon . ac we cweðað to soðum se þe synnum gehyrsumað . and godes beboda forsyhð nu on þæs godspelles timan . þæt he bið þam cynincgum | gelic ðe gecuron deofolgild . and heora scyppend forsawon .

Se ðe soþlice is ana god ælmihtig . æfre rixigende .

Þam sy wulder on ealra worulda woruld. Amen.

Chapter 19

passio sci̅ albani martyris

Svm hæðen casere wæs ge-haten dioclitianvs se wæs to casere gecoren þeahðe he cwealm-bære wære . æfter cristes acennednysse twam hund gearum . and syx and hund-eahtatigum ofer ealne middan-eard . and he rixode twentig geara reðe cwellere . swa þæt he acwealde and acwellan hét ealle ða cristenan þe he of-axian mihte . and forbærnde cyrcan . and berypte ða unscæððigan . and þeos arleasa ehtnyss unablinnendlice eode ofer ealne middan-eard ealles tyngear. oðþæt heo to engla lande eac swylce becom . and þær fela acwealde ða þe on criste gelyfdon . an ðæra wæs albanus se æþela martyr . seðe on þære ehtnysse eac wearð acweald for cristes geleafan . swa swa we cyðaþ hér .

On þam dagum becom seo cwealmbære ehtnyss to engla lande fram ðam arleasan casere . and þa cwelleras cepton ðæra cristenra gehwǽr mid ormetre wodnysse . Þa ætwand him an preost.

Se arn digollice to albanus huse . and ðær ætlutode his laðum ehterum . and albanus hine under-feng þeahðe he gefullod nære .

Þa be-gan se preost swa swa he god lufode his gebedu singan and swyðe fæstan . and dæges and nihtes his drihten herian . and betwux ðam secgan ðone soðan geleafan þam arwurþan albane . oþþæt he gelyfde on ðone soðan god . and wiðsoc þam hæðen-scype . and wearð soþlice cristen . and swyðe geleaffull.

Þa wunode se preost mid ðam arwurðan were . oðþæt se ealdor-mann ðe ehte ða cristenan hine ðær geaxode . and hine ardlice het to him gefeccan mid fullum graman .

Þa comon ða ærendracan to albanes huse . ac albanus eode ut to þam ehterum mid ðæs preostes hakelan swylce he hit wære . and hine nolde ameldian ðam manfullum ehterum.

He wearð þa gebunden and ge-broht sona to ðam arleasan deman . þær he ða defollican lác his godum offrode mid his gegadum eallum.

Þa wearð se dema deofollice gram sona swa he beseah on þone soðfæstan martyr . forðan þe he under-feng ðone fleondan preost . and hine sylfne sealde to slege for hine . het hine þa lædan to ðam hæðen-gilde and cwæþ . þæt he sylf sceolde ða swaran wita onfón þe he þam preoste gemynte gif he mihte hine gefón . butan he hraðe gebuge to his bysmorfullum godum . ac albanus næs afyrht for his feondlicum þeow-racan . forðan þe he wæs ymb-gyrd mid godes wæpnum to þam gastlicum gecampe . and cw̅ þæt he nolde his hæsum gehyrsumian . ne to his hæðengilde bugan .

Þa axode se dema ardlice and cwæð .

Hwylcere mægðe eart þu . oððe hwylcere manna .

Ða andwyrde albanus þam arleasan þus .

Hwæt belympð to þe hwylcere mægðe ic sy . ac gif ðu soð wylt gehyran ic þe secge hraðe . þæt ic cristen eom and crist æfre wurðige .

Se dema him cwæð to . Cyð me þinne naman butan ælcere yldinge . nu ic axie ðus .

Se godes cempa cw̅ to þam cwellere þus .

Ic hatte albanus . and ic on þone hælend gelyfe . se ðe is soð god . and ealle gesceafta geworhte . to him ic me gebidde and hine æfre wurðige .

Se cwellere andwyrde þam arfæstan were .

Gif ðu þæs ecan lifes gesælþe habban wylt . þonne ne scealt ðu elcian þæt ðu offrige þam mærum godum . mid mycelre underðeodnysse .

Albanus him andwyrde . Eowre godas (sic) offrunga ne magon þe ge deoflum offriað eower gehelpan . ne eowerne willan gefremman . ac ge underfoð to medes ða ecan wita on ðære widgillan helle .

Hwæt ða se dema deofollice yrsode . and het beswingan þone halgan martyr . wende þæt he mihte his modes anrædnysse mid þam swingelum gebigan to his biggengum . ac se eadiga wer wearð þurh god gestrangod . and ða swingle forbær swyðe geþyldiglice . and mid glædum mode gode ðæs þancode .

Ða geseah se dema þæt he oferswyðan ne mihte þone halgan wer mid þam hetelicum witum ne fram criste gebigan . and het hine acwellan mid beheafdunge for ðæs hælendes naman .

Þa dydon þa hæðenan swa swa hi het se dema . and leddon ðone halgan to beheafdigenne . ac hi wurdon gelette lange æt anre brycge . and stodon oð æfnunge for ðam ormætan folce . wæra and wifa . þe wurdon onbryrde . and comon to ðam martyre and him mid eoden .

Hit gelamp ða . swa þæt se geleafleasa dema ungereordod sæt . on ðære ceastra oð æfen butan ælcere ðenunge unþances fæstende .

Hwæt ða albanus efstan wolde to slege . and eode to þære éá þaða he ofer þa brycge ne mihte . and beseah to heofonum þone hælend biddende . and seo ea þær-rihte adruwode him ætforan . and him weg rymde . swa swa he ge-wilnode æt gode .

Þa wearð se cwellere þe hine acwellan sceolde þurh þæt wundor abryrd . and awearp his swurd arn ða ardlice þaða hi ofer ða ea comon . and feoll to his fotum mid fullum geleafan . wolde mid him sweltan ærðan þe he hine sloge .

He wearð þa gean-læht mid anrædum geleafan to ðam halgan were þe he beheafdian sceolde . and þæt swurd læg þær scynende him ætforan . and heora nan nolde naht eaðe hine slean .

Ða wæs ðær gehende þam halgan wære án myrige dún mid wyrtum amet . mid eallre fægernysse and eac ful smeðe.

Þa eode albanus ardlice ðyder . and bæd sona æt gode þæt he him sealde wæter uppan ðære dune . and he dyde swá .

Þær arn þa wylspryncg æt albanes fotum þæt men mihton tocnawan his mihte wið god . þa ða se stream arn of ðære sticolan dune .

He wearð þa be-heafdod for ðæs hælendes naman uppan ðære dune . and to his drihtne ferde mid sigefæstum martyr-dome . and soðum geleafan ac his slaga ne moste gesundful lybban . forðam þe him burston út butu his eagan . and to eorðan feollon mid albanes heafde . þæt he mihte oncnawan hwæne he acwealde

Hi beheafdodon syððan þone soðfæstan cempan þe nolde beheafdian ðone halgan wer . and he læg mid albane gelyfed on god . mid his blode gefullod and ferde to heofonum .

Eft ða ða cwelleras comon to heora hlaforde . and hi sædon þa syllican tacna ðe albanus worhte . and hu se wearð ablend þe hine beheafdode . ða het he geswican þære ehtnysse and arwurðlice spræc be ðam halgum martyrum . þe he ne mihte gebigan fram godes geleafan þurh ða gramlican witu .

On ðære ylcan ehtnysse wurdon ofslagene . áárón . and Iulius . and oðre manega wera . and wifa . wide geond engla land . for cristes geleafan ge-cwylmede on witum . and hi ferdon sige-fæste to þam soðan life .

Seo ehtnys geswác ða . and eoden þa cristenan of wudum and of wæstenum þær hi wæron behydde . and comon to mannum and cristen-dom ge-edniwodon . and gebetton cyrcan þe to-brocene wæron . wunodon ða on sybbe mid soðum geleafan .

Hi worhton eac þa wurðlice cyrcan þam halgan albane ðær he bebyrged wæs . and þær wurdon gelome wundra gefremode . þam hælende to lofe ðe leofað á on ecnysse .

Þis wæs geworden ær ðæt gewinn come ðurh hengest . and horsan þe hyndon ða bryttas . and se cristen-dom wearð ge-unwurðod syððan . oðþæt agustinus hine eft astealde . be gregories lare þæs geleaffullan papan .

Sy wuldor and lof þam welwillendan scyppende seðe ure fæderas feondum æt-bræd . and to fulluhte gebigde þurh his bydelas. amen.

item alia. (acitofel et absalon.)

Is nv eac to witenne þæt man witnað foroft ða arleasan sceaðan and þa swicolan ðeofas . ac hí nabbað nan edlean æt þam ælmihtigan gode . ac swyðor þa ecean witu for heora wælhreownysse . forðan þe hí leofodon be reaflace swa swa reðe wulfas . and þam rihtwisum ætbrudon heora bigleofan foroft.

Wolde huru se earming hine sylfne beþencan . and his synna geandettan mid soðre behreowsunge . huru ðonne he on bendum bið . and gebroht to cwale swa swa se sceaða dyde . þe forscylgod hangode mid þam hælende criste . and cw̅ him to mid geleafan .

Drihten leof gemiltsa me . þonne ðu becymst on ðinum rice .

Se hælend him andwyrde .

Soð ic þe secge nu to-dæg þu bist mid me on neorxna-wange.

Þus ge-earnode se arleasa sceaða . on his deaðes þrowunge þæt éce líf mid criste . forþan ðe he gelyfde on criste . and his miltsunga bæd .

Yfele deð him sylfum þe mid swicdome his tilað . and he bið sceaðena gefera þe man sceandlice witnað .

Se swicola bedyddrað his dæda wið menn . ac hi beoð geopenode oft unþances huru on domes dæg . þær nan ðincg digle ne bið . and he hæfð þonne ece wite forðan þe his wærscype ne dohte .

Se sceaða bið nu ofslagen and to sceame getucod . and his earme sawl syððan syðað to helle to ðam ecum suslum on sweartum racenteagum .

We wenað swaðeah þæt se eallwealdenda hælend wille ge-miltsian þam manfullan sceaðan . gif he mid eallre heortan and incundre geomerunge clypað to ðam ælmihtigan gode and his arfæstnysse bit . ærðan þe þæt scearpe swurd swege to his hneccan . and gif he bemænð his synna swyðor þonne his líf . and mid wope gewilnað þæs eallwealdendes miltsunge .

Ac se swicola deofol þe beswac ðone þeof . and æfre forlærde oð his lifes ende . nele naht eaðe on his ende geðafian þæt he þonne gecyrre mid soðre behreowsunge . and mid incundum wope . to þam wel-willendan hælende . ac cunnað mid eallum cræfte hu he hine criste æt-brede .

Eac swylce hlaford-swican losiað on ende swa swa us bec secgað soðlice gehwær .

Sum woruld-wita wæs swyðe wis on rǽde acitofel gehaten . mid dauide þam cynincge þe gode wæs gecweme . on ðam timan þe absalón his agen sunu ongan winnan wið þone fæder . and wolde hine adræfan of his cyne-dome and acwellan gif he mihte .

Þa wæs se acitofel mid absalone on rǽde . and rædde him sona hu he beswican mihte his agenne fæder ðær he on fleame wæs . ac sum oðer þægn wið-cwæð his geðeahte wislice . and þæhte Absalone oðerne rǽd wyrsan to his willan . forðan þe hit god wolde swa þæt dauid wurde fram heora wodnysse ahræd .

Þa ge-bealh hine acitofel and mid bealwe wearð afylled . forðan þe his ræd ne moste þam reðan gelician . for ðæs oðres ræde and rád him hám sona . becwæð þa his ðincg . and acwealde hine sylfne on healicum grine þæt he hangigende sweolt .

Swa geendode se wita his wæl-hreowe geþeaht . seðe wolde berædan his rihtwisan hlaford .

Absalon ða ferde forð mid his unræde . and wolde his agenum fæder feores benæman . and habban his anweald . ac hit nolde god .

He rád ða on his mule mid mycelre fyrde þurh ænne heahne holt mid hetelicum geþance . þa ge-feng hine an treow be ðam fexe sona . forðan þe he wæs sidfæxede and he swa hangode . and se mul arn forð fram þam arleasan hlaforde . and dauides þegnas hine þurh-ðydon .

Swa geendode se fæder-swica mid his feore his unræd .

Eall swa eac iudas ðe wælhreowlice belæwde urne hælend crist . acwealde hine sylfne hangiende on grine . godes wiðer-saca ecelice for-demed swa swa drihtnes belæwa .

Ælc man bið eac fordemed þe hine sylfne adyt . and ælc agen-slaga á on ecnysse ðrowað . and hlaford-swican losiað on ende . mid þam getreowleasan deofle þe hi tihte to ðam swicdome .

Eall swa þa unriht-wisan deman þe heora domas awendað æfre be þam sceattum na be soðfæstnysse . and habbað æfre to cépe heora soðfæstnysse . and swa hí sylfe syllað wið sceattum . þonne habbað hí on ende for heora unrihtwisnysse mid þam swicolan deofle þa ecan susle .

Se rihtwisa dema sceall deman æfre riht . and fyrðrian þa rihtwisnysse for godes lufon symle . forðan þe ða sceattas ablendað swa swa us bec secgað þæra manna mod þe hi manfullice nimað . and ða domas awendað to wohnysse swá .

Ne sceall nan godes þegn for sceattum riht deman . ac healdan þone dóm gif he drihtnes man sy . buton lyðrum sceattum symle to rihte . þæt he on þam ecan life his edlean underfó .

Sume menn syllað eac cyrcan to hyre swáswá wáclice mylna . þæt mære godes hus þe wæs gode betæht to his biggencgum to ðam cristen-dome þe crist sylf astealde . ac hit ne gedafnað þæt man dó godes hús anre mylne gelic for lyðrum tolle . and seðe hit deð he sincað swyðe deope .

Gescylde us se scyppend þe gesceop us to mannum wið þæs deofles swic-dom þe syrwð embe us . and us mild-heort-lice gelæde to ðam ecan life . on ðam is ece wuldor on eallra worulda woruld. amen.

Chapter 20

uiiii. kl̅ iul̅. nat̄l̄ sce̅ æðeldryðe uirginis.

We wylla nv awritan þeah ðe hit wundorlic sy be ðære halgan sce̅ æðeldryðe þam engliscan mædene . þe wæs mid twam werum and swa-ðeah wunode mæden . swa swa þa wundra geswuteliað þe heo wyrcð gelome .

Anna hatta (sic) hyre fæder east engla cynincg . swyðe cristen man swa swa he cydde mid weorcum . and eall his team wearð gewurðod þurh god .

Æðeldryð wearð þa for-gifen anum ealdor-menn to wife. ac hit nolde se ælmihtiga god þæt hire mægð-had wurde mid hæmede adylegod . ac heold hi on clænnysse forðan þe he is ælmihtig god and mæg don eall þæt he wile . and on manegum wisum his mihte geswutelað .

Se ealdor-man gewat þa ða hit wolde god . and heo wearð forgifen ecfride cynincge . and twelf gear wunode unge-wemmed mæden on þæs cynincges synscype . swa swa swutele wundra hyre mærða cyðaþ . and hire mægð-had gelome .

Heo lufode þone hælend þe hi heold unwemme . and godes ðeowas wurðode . an þæra wæs wilfrid bisceop þe heo swyðost lufode . and he sæde bedan þæt se cyning ecfrid him oft behete mycel on lande and on feo . gif he læran mihte æðeldryðe his gebeddan . þæt heo bruce his synscipes .

Nu cwæð se halga beda þe þas boc gesette . þæt se ælmihtiga god mihte eaðe gedón nu on urum dagum þæt æðeldryð þurh-wunode unge-wemmed mæden . þeah ðe heo wer hæfde . swa swa on ealdum dagum hwilon ær getimode þurh þone ylcan god þe æfre þurh-wuna mid his gecorenum halgum . swá swá hé sylf behét .

Æðeldryð wolde ða ealle woruld-þincg forlætan . and bæd georne þone cynincg þæt heo criste moste þeowian . on mynsterlicre drohtnunge swa hire mod hire to-speon .

Þa lyfde hire se cynincg þeah þe hit embe lang wære þæs þe heo gewilnode . and wilfrid bisceop þa hi gehadode to mynecene . and heo syððan on mynstre wunode sume twelf monað swa . and heo syððan wearð gehadod eft to abudissan on elig mynstre . ofer manega mynecena . and heo hi modorlice heold mid godum gebysnungum to þam gastlican life .

Be hire is awrytan (sic) þæt heo wel drohtnode to anum mæle fæstende . butan hit freols-dæg wære . and heo syndrige gebedu swyðe lufode and wyllen weorode . and wolde seld-hwænne hire lic baðian butan to heahtidum . and ðonne heo wolde ærest ealle ða baðian þe on ðam mynstre wæron . and wolde him ðenian mid hire þinenum . and þonne hi sylfe baðian .

Þa on þam eahteoðan geare siððan heo abbudisse wæs . heo wearð geuntrumod swa swa heo ær witegode . swa þæt an geswel weox on hire swuran mycel under þam cynn-bane . and heo swiðe þancode gode þæt heo on þam swuran sum geswinc þolode .

Heo cwæð ic wat geare þæt ic wel wyrðe eom . þæt min swura beo geswenct mid swylcere untrum-nysse . forðan þe ic on iugoðe frætwode minne swuran mid mænig-fealdum swur-beagum . and me is nu geþuht þæt godes arfæstnyss þone gylt aclænsige . þonne me nu þis geswel scynð for golde . and þæs hata bryne for healicum gymstanum .

Þa wæs þær sum læce on ðam geleaffullum heape . cynefryð gehaten and hi cwædon þa sume þæt se læce sceolde asceotan þæt geswell . þa dyde he sona swa . and þær sah ut wyrms .

Wearð him þa geðuht swilce heo gewurpan mihte ac heo gewat of worulde mid wuldre to gode . on þam ðriddan dæge syððan se dolh wæs geopenod . and wearð bebyrged swa swa heo bæd sylf and hét . betwux hire geswustrum . on treowenre cyste .

Þa wearð hire swustor sexburh gehadod to abbudissan æfter hire geendunge . seo ðe ær wæs cwén on cantware-byrig .

Þa wolde seo sexburh æfter syxtyne gearum . don hire swustor ban of ðære byrgene up . and beran into þære cyrcan . and sende þa gebroðra to secenne sumne stan to swilcere neode . forðan þe on þam fenlande synd feawa weorc-stana .

Hi hreowan þa to grantan-ceastre . and god hi sona gehradode . swa þæt hi þær gemetton ane mære þruh wið þone weall standende . geworht of marm-stane eall hwites bleos bufan þære eorðan . and þæt hlyd ðær-to gelimplice gefeged . eac of hwitum marm-stane swa swa hit macode god .

Þa naman ða gebroðra blyðelice þa ðruh . and gebrohton to mynstre . mycclum ðancigende gode . and sexburh seo abbudisse het slean an geteld bufan ða byrgene . wolde þa bán gaderian .

Hi sungon ða ealle sealmas . and lic-sang . þa hwile þe man ða byrgene bufan geopenode . þa læg heo on ðære cyste . swilce heo læge on slæpe hal eallum limum . and se læce wæs ðær ðe þæt ge-swell geopenode . and hi sceawode georne .

Þa wæs seo wund gehæled . þe se læce worhte ǽr . eac swilce þa ge-wæda . þe heo bewunden wæs mid . wæron swa ansunde . swylce hi eall niwe wæron .

Sexburh þa hyre swuster swiðe þæs fægnode . and hi þwogon ða syððan þon̅ sawl-leasan lichaman . and mid niwum gewædum bewundon arwurðlice . and bæron Into ðære cyrcan . blyssigende mid sangum . and ledon hí on ðære þryh . þær ðær heo lið oð þis . on mycelre arwurðnysse . mannum to wundrunge .

Wæs eac wundorlic . þæt seo ðruh wæs geworht þurh godes foresceawunge hire swa gemæte . swylce heo hyre sylfre swa ge-sceapen wære . and æt hire hæfde wæs aheawen se stán . gemæte þam heafde þæs halgan mædenes .

Hit is swutol þæt heo wæs ungewemmed mæden . þonne hire lichama ne mihte formolsnian on eorðan . and godes miht is geswutelod soðlice þurh hi . þæt he mæg aræran ða for-molsnodon (sic) lichaman . seðe hire lic heold hál on ðære byrgene git oð þisne dæg . Sy him ðæs á wuldor .

Þær wæron ge-hælde þurh ða halgan femnan fela adlige menn . swa swa we gefyrn gehyrdon . and eac ða þe hrepodon þæs reafes ænigne dæl . þe heo mid bewunden wæs . wurdon sona hale . and manegum eac fremode seo cyst micclum . þe heo ærest on læg . swa swa se lareow beda on ðære bec sæde . þe he ge-sette be ðysum .

Oft woruld-menn eac heoldon swa swa us bec secgað heora clænnysse on synscipe for cristes lufe swa swa we mihton reccan gif ge rohton hit to gehyrenne .

We secgað swa-ðeah be sumum ðegne . se wæs þryttig geara mid his wife on clænnysse . þry suna he gestrynde . and hi siððan buta ðrittig geara wæron wunigende butan hæmede . and fela ælmyssan worhton . oð þæt se wer ferde to munuclicere drohtnunge . and drihtnes englas comon eft on his forð-siðe . and feredon his sawle mid sange to heofonum . swa swa us secgað bec .

Manega bysna synd on bocum be swylcum . hu oft weras and wíf wundorlice drohtnodon . and on clænnysse wunodon . to wuldre þam hælende . þe þa clænnysse astealde . crist ure hælend . þam is á wurðmynt . and wuldor on ecnysse . amen .

Chapter 21

ui. non̅ iul̅. nat̄l̄ sci̅ swyðuni epi̅

On eadgares dagum ðæs æðelan cynincges . Þaða se cristendom wæs wel ðeonde þurh god on angel-cynne under ðam ylcan cynincge . þa geswutelode god þone sanct swyðun mid manegum wundrum . þæt he mære is .

His dæda næron cuðe ærðan þe hi god sylf cydde . ne we ne fundon on bocum hu se bisceop leofode on þysre worulde . ærðan þe he gewende to criste .

Þæt wæs þæra [←þære] gymeleast þe on life hine cuþon . þæt hi noldon awritan his weorc and drohtnunge þam towerdum mannum ðe his mihte ne cuðon . ac god hæfð swa þeah his lif geswutelod . mid swutelum wundrum and syllicum tacnum .

Ðes swyðun wæs bisceop on winceastre . swa þeah ofer hamtun-scire gesælig godes þeowa . and eahta [←eahte] bisceopas wæron betwux him and ^sce̅ aðelwolde . nu næs us his lif cuð swa swá wé ǽr cwǽdon butan þæt he wæs bebyrged æt his bisceop-stole be westan þære cyrcan and ofer-worht | syððan . oþþæt his wundra geswutelodon his gesælða mid gode .

Þrym gearum ærðan þe ^se sanct into cyrcan wære gebroht of ðære stænenan þryh þe stent nu wið-innan þam niwan geweorce . com se arwurða swyðun to sumum gelyfedan smyðe . on swefne æteowiende wurðlice geglencged . and ðas word him cwæð to .

Canst þu ðone preost þe is gehaten eadzige . þe wæs of ealdan mynstre mid ðam oðrum preostum adræfed for heora unþeawum þurh aðelwold bisceop .

Se smið þa andwyrde þam arwurðan swyðune þus .

Gefyrn ic hine cuðe leof . ac he ferde heonon and ic nat to gewissan hwær he wunað nu .

Þa cwæð eft se halga wer to ðam ealdan smyðe .

Witodlice he wunað nu on wincel-cumbe ham-fæst . and ic ðe nu halsige on þæs hælendes naman þæt ðu him min ærende ardlice abeode . and sege him to soþan þæt swiðun se bisceop hét þæt he fare to aþelwolde bisceope . and secge þæt he ge-openige him sylf mine byrgene . and mine bán gebringe binnan ðære cyrcan . forðan þe him is getiþod . þæt ic on his timan beo mannum geswutelod . And se smið him cw̅ to .

La leof . eadzige nele gelyfan minum wordum .

Ða cw̅ se bisceop eft . Gange him to minre byrgene . and ateo ane hringan up of ðære þryh . and gif seo hringe him folgað æt þam forman tige . þonne wat he to soðan þæt ic þe sende to him .

Gif seo hringe nele up þurh his anes tige þonne ne sceall he nates hwon þinre sage gelyfan .

Sege him eac siððan . þæt he sylf geriht-læce his dæda and þeawas to his drihtnes willan . and efste anmodlice to þam ecan life .

Sege eac eallum mannum þæt sona swa hi geopeniað mine byrgene . þæt hi magon ðær findan swa deorwurðne hord [→goldhord] . þæt heora dyre gold ne bið nahte wurð | wið þa fore-sædan maðmas .

Se halga swyðun þa ferde fram þam smiðe up . and se smið ne dorste secgan þas gesihðe ænigum menn . nolde beon gesewen unsoðsagul boda .

Hwæt ða se halga wer hine eft gespræc and git þryddan siðe . and swyðe hine þreade . hwi he nolde gehyrsumian his hæsum mid weorce .

Se smið þa æt nextan eode swa ðeah to his byrgene . and genam ane hringan earhlice swa ðeah . and clypode to gode þus cwæðende mid wordum .

Eala ðu drihten god ealra gesceafta scyppend . getiða me synfullum þæt ic ateo þas hringan up of ðysum hlyde . gif se lið hér on innan seðe me spræc to on swæfne triwa .

He teah ða þæt isen up swa eaðelice [MS. has a redundant ‘up’ here] of ðam stane . swilce hit on sande stode . and he swyðe þæs wundrode .

He ða hit eft sette on þæt ylce þyrl . and þyde mid his fét . and hit swa fæste eft stod . þæt nan man ne mihte hit þanon ateon .

Þa eode se smið ge-esgod þanon . and gemette on cypincge þæs eadzies mann . and sæde him gewislice hwæt swyðun him bebead . and bæd hine georne þæt he hit abude him .

He cwæð þæt he hit wolde cyðan his hlaforde . and ne dorste swa ðeah hit secgan æt fruman . ærþan ðe he beþohte þæt him ðearflic nære þæt he ðæs halgan hæse forhule his hlaforde . sæde þa be ende-byrdnysse hwæt swyðun him bebead . þa onscunode se eadsige aðelwold þone bisceop and ealle ða munecas þe on ðam mynstre wæron . for þære ut-dræfe þe he gedyde wið hí . and nolde gehyran þæs halgan bebod . þeah ðe se sanct wære gesib him for worulde .

He gebeah swa þeah binnan twam gearum to þam ylcan mynstre and munuc wearð þurh god . and þær wunode oðþæt he gewát of life .

Geblætsod is se ealmihtiga ^god þe ge-eadmed þone modigan . | and ða eadmodan ahæfð to healicum geðincþum . and gerihtlæcð þa synfullan . and symle hylt ða godan þe on hine hihtað forðan þe he hælend is .

Eft wæs sum earm ceorl egeslicc [sic; egeslice?] gehoferod . and ðearle gebiged þurh ðone bradan hofor . þam wearð geswutelod on swefne gewislice . þæt he sceolde gefeccan æt swyðunes byrgene his lichaman hæle . and þære alefednysse .

He aras ða on mergen micclum fægnigende . and mid twam criccum creap him to wynceastre . and gesohte ðone sanct swa swa him gesæd wæs . biddende his hæle gebigdum cneowum .

He wearð þa gehæled þurh þone halgan bisceop . swa þæt næs gesyne syððan on his hricge . hwær se hofor stode þe hine gehefegode oðþæt .

Þa nyston þa munecas be ðam mæran halgan . and wendon þæt sum oðer halga gehælde þone mann . ac se ceorl sæde þæt swyðun hine gehælde . forðan þe he sylf wiste gewissost be ðam .

Sum wer wæs geuntrumod swiðe yfelum broce . swa þæt he earfoðlice þa eagan undyde . and uneaðe mihte ænig word gecweðan . ac læg swa ge-ancsumod orwene his lifes .

Ða woldon his freond ealle hine ferian to niwan mynstre to þam halgan iudoce . þæt he him hæle forgeafe . ac him sæde sum man þæt him selra wære þæt hi to ealdan mynstre þone adligan feredon to swyðunes byrgene . and hi dydon swa sona .

Hi wacodon ða þa niht wið þa byrgene mid him . biddende þone ælmihtigan god . þæt he ðam adligan menn his hæle forgeafe . þurh þone halgan swyðun .

Se untruma eac wacode oðþæt hit wolde dagian . þa wearð he on slæpe . and seo wurðfulle [← -a] byrgen þæs ðe him eallum þuhte eall bifigende wæs . and þam adlian þuhte swylce man his ænne scó of ðam fét him atuge | and he færlice awóc .

He wæs ða gehæled þurh ðone halgan swyðun . and man sohte þone scó swyðe geornlice . ac hine ne mihte nan man gemetan [←gemetan] þær æfre . and hi gewendan þa hám mid þam gehæledan menn .

Þær wurdon gehælede æt ðære halgan byrgene eahta untrume menn . ærðan þe he of ðære byrgene up genumen wære . wundorlice þurh god .

Eadgar cyning þa æfter ðysum tacnum wolde þæt se halga wer wurde up gedón . and spræc hit to aðelwolde þam arwurðan bisceope . þæt he hine up adyde mid arwurðnysse .

Þa se bisceop aðelwold mid abbodum and munecum . dyde up þone sanct mid sange wurðlice . and bæron into cyrcan sce̅ petres huse . þær he stend mid wurðmynte and wundra gefremað .

Þær wurdon gehælede þurh ðone halgan wer . feower wan-hale menn binnan ðrym dagum . and geond fif monþas feawa daga wæron þæt ðær næron gehælede . huru ðry untrume . hwilon fif . oððe syx . seofon oððe eahta . tyn oððe twelf . syxtyne . oððe eahtatyne . binnon tyn dagum þær wurdon twa hund manna gehælede . and swa fela binnan twelf monðum þæt man hi getellan ne mihte .

Se lictun læg afylled mid alefedum mannum . swa þæt man eaðe ne mihte þæt mynster gesecan . and þa ealle wurdon swa wundorlice gehælede binnan feawa dagum . þæt man þær findan ne mihte fif unhale menn of þam micclan heape .

On þam dagum wæron on wihtlande þreo wíf . þa twa wæron blinde geond nigon geara fec . and þæt þrydde ne geseah þære sunnan leoht næfre .

Hi begeaton þa earfoðlice ^him ænne latteow ænne dumbne cnapan and comon to þam halgan . and ane niht þær wacodon and wurdon gehælede . | ge ða blindan wíf ge se dumba latteow .

Þa sæde se cnapa þam cyrcwerde þæt . and cw̅ þæt he næfre ær naht cweðan ne mihte . and bæd þæt hi sungon þone gesettan lof-sang .

On þære ylcan tide wæs sum wyln gehæft to swinglum for swyðe lytlan gylte . and læg on hæftnedum þæt heo hetelice wære þæs on mergen beswungen . þa wacode heo ealle ða niht and mid wope clypode to ðam halgan swyðune þæt he hulpe hire earmre . and fram þam reðum swinglum ^hi ahredde þurh god .

Mid þam þe hit dagode and man drihtnes lofsang ongan . þa feollan ða fot-copsas færlice hire fram . and heo arn to cyrcan to þam arwurðan halgan gebundenum handum swa swa se halga wolde . and se hlaford com æfter and alysde hire handa . and gefreode hi sona for swyðunes wurðmynte .

Sum þegn læg alefed lange . on paralisyn . and ne mihte of his bedde for manegum gearum .

Þa cwæð he ^{þæt he} wolde to wynceastre syðian huru on his hors-bære . and biddan his hæle .

Mid þam þe he þis cwæð to his cnihtum and freondum . þa wearð he gehæled and gewende swa þeah to þam halgan sancte . siðigende on fotum fyrmest on þam flocce on ealre þære fare . and ðancode þam halgan his hæle geornlice .

Fif and twentig manna myslice ge-untrume comon to þam halgan heora hæle biddende . sume wæron blinde . sume wæron healte . sume eac deafe . and dumbe eac sume . and hi ealle wurdon anes dæges gehælede þurh þæs halgan ðingunge . and him ham gewendon .

Sum þegn wæs on engla lande on æhtum swyðe welig . se wearð færlice blind . þa ferde he to rome . wolde his hæle biddan . æt þam halgum apostolum .

He wunode þa on rome and ne wearð gehæled . feower gear fulli|ce . and befran þa be swyðune hwylce wundra he worhte syððan he gewende þanon . he efste þa swyðe and to his earde gewende . and com to þam halgan were and wearð gehæled þær . and ham gewende mid halre gesihðe .

Sum wer wæs eac blind wel seofon gear fulle . se hæfde ænne latteow þe hine lædde gehwider . ða sume dæg eode hé swa swa he oft dyde . and se latteow wearð gebolgen and þone blindan forlét . arn him aweg . and se oðer nyste hu he ham come . ac clypode to gode mid innewerdre heortan . and mid angsumnysse cwæð .

Eala þu mihtiga drihten manna and engla . geseoh mine yrmðe ic geseon ne mæg . and min lyðra latteow forlet me þus ænne .

Gemiltsa me drihten þurh ðone mæran swyðun . and forgif me gesihðe . for ðæs sanctes geearnungum .

Eft he clypode þus . and cw̅ to ðam halgan .

Eala þu milda bisceop þe manega wundra of cumað þurh þone lifigendan god . leof ic þe bidde þæt þu me geþingie to þam mihtigan hælende . ic gelyfe þæt he wille gewislice þe tiðian .

He wearð þa gehæled . and hæfde his gesihðe . and ham eode blyðe butan latteowe ana

Se ðe lytle ær þanon wæs gelæd þurh ðone oþerne . and his magas ðancodon mycclum ðæs gode .

Aþelwold þa se arwurða and se eadiga bisceop . þe on ðam dagum wæs on winceastre bisceop . bead his munecum eallum þe on ðam mynstre wunodon . þæt hi ealle eodon endemes to cyrcan . and mid sange heredon þæs sanctes mærða . and god mærsodon swa on þam mæran halgan . swa of swa ænig wan-hal mann wurde gehæled .

Þa dydon hi sona swa . and sungon þone lofsang . oðþæt heom [←him] laðode eallum þæt hi swa oft arisan . hwilon þrywa on niht . hwilon feower syðum to singenne þone lofsang þonne hi slapan sceoldon . | and forleton ealle endemes þone sang . forðam þe se bisceop wæs bysig mid þam cynincge . and nyste butan hi sungon þone lof-sang forð on .

Hwæt ða se halga swyðun sylf com on swefne wundorlice geglencged to sumum godan menn . and cwæð .

Gang nu to ealdan mynstre . and þam munecum sege þæt gode swyðe oflicað heora ceorung . and slæwð . þæt hi dæg-hwamlice geseoð drihtnes wundra mid him . and hi nellað herian þone hælend mid sange . swa swa se bisceop bebead þam gebroðrum to donne . and sege gif hi nellað þone sang gelæstan . þonne geswicað eac sona ða wundra . and gif hi þone lofsang willað æt þam wundrum singan . swa oft swa wanhale menn þær wurðað gerihte . þonne wurðaþ mid him wundra swa fela . þæt nan man ne mæg gemunan on life . þæt ænig man gesawe swylce wundra ahwær .

Þa awæcnode se wer of þam wynsuman slæpe . and swyðe be-sargode þæt he geseon ne moste ne nan læncg brucan þæs beorhtan leohtes . þe he mid swiðune hæfde ^ða gesewen .

He arás swaðeah and swiðe hraðe ferde to aþelwolde bisceope . and him eall þis sæde .

Aþelwold þa asende sona to þam munecum of cyninges hyrede . and cw̅ þæt hi sceoldon þone lof-sang singan . swa swa he ge-set hæfde . and se þe hit forsawe . sceolde hit mid fæstene seofon niht on án swarlice gebetan .

Hi hit heoldon þa syððan symle on ge-wunon . swa swa we gesawon sylfe for oft . and þone sang we sungon unseldon mid heom [←him] .

Sum wer wæs betogen þæt he wære on stale . wæs swaðeah unscyldig . and hine man sona gelæhte and æfter woruld-dome dydon him ut þa eagan . and his earan forcurfon . þa arn him þæt blod into þam heafde . þæt he gehyran ne mihte .

Þa wæs he seofon monðas wunigende swa | blind . and his hlyst næfde . oþþæt he mid geleafan ferde to þam halgan swyðune . and gesohte his ban biddende þone halgan þæt he his bene gehyrde . and him huru geearnode þæt he gehyran mihte forþan ðe he ne gelyfde þæt he onliht wurde . and cwæð þæt he wurde wolice swa getucod .

Þa wearð godes wundor geworht an þam menn þurh swyðunes þingunge þæt he geseah beorhte ansundum eagum . þeah ðe hí ær wæron ut adyde of þam eah-hringum . and se oðer æppel was ge-emtigod . and se oðer hangode gehal æt his hleore .

Him wæs eac forgifen þæt he wel mihte gehyran . se ðe ær næfde ne eagan . ne hlyst .

Is swa ðeah to witenne þæt we ne moton us gebiddan . swa to godes halgum swa swa to gode sylfum . forðan þe he is ana god ofer ealle þincg .

Ac we sceolon biddan soðlice þa halgan . þæt hí us þingion to þam þrym-wealdendum gode . seþe is heora hlaford . þæt he helpe us .

Hwilon wacodon menn swa swa hit gewunelic is ofer an dead lic . and ðær wæs sum dysig mann plegol ungemetlice . and to þam mannum cwæð swylce for plegan . þæt he swyðun wære .

Ge magon to soðum witan þæt ic swyðun eom se ðe wundra wyrcð . and ic wille þæt ge beran eower leoht to me . and licgað on cneowum and ic eow forgife þæt þæt ge gyrnende beoð .

He woffode ða swa lange mid wordum dyslice . oðþæt he feoll geswogen swylce he sawl-leas wære . and hine man bær ham to his bædde sona . and he læg swa lange his lifes orwene .

His magas ða æt nextan þone mann feredon to þam halgan swiþune . and he sylf andette his dyslican word þe he dyrstiglice spræc . and bæd him forgifnysse . and he wearð þa gehæled . swá þæt he hal eode ham mid his magum .

Is eac to witenne þæt menn unwislice doð þa ðe dwollice plegað æt deadra man|na lice . and ælce fulnysse þær forð-teoð mid plegan . þonne hi sceoldon swyðor be-sargian þone deadan . and ondrædan him sylfum þæs deaðes tocyme . and biddan for his sawle butan gewéde georne .

Sume menn eac drincað æt deadra manna lice ofer ealle þa niht swiðe unrihtlice . and gremiað god mid heora gegaf-spræce . þonne nan gebeorscype ne gebyrað æt líce. ac halige gebedu þær gebyriað swiþor .

Hwilon comon to ^ðam halgan hund-twelftig manna mislice geuntrumode mid manegum brocum . and þa wurdon ealle wundorlice gehælde . binnan þrym wucum . and hi wendon ham þancigende þam ælmihtigan ^gode and þam arwurðan swiþune .

Sumes þegnes cniht feoll færlice of ^his horse þæt him to-bærst se earm . and se oðer sceanca . and swiðe wearð gecwysed . þæt hi sona wendon þæt he þær-rihte sceolde sweltan heom [←him] ætforan .

He wæs his hlaforde swyþe leof ærþan . and se hlaford ^þa besargode swyðe þone cniht . and bæd þone ælmihtigan mid inwerdre heortan . þæt he þam menn geheolpe þurh ðone mæran swiþun .

He clypode eac to swiðune þus secgende mid geomerunge .

Eala ðu halga swiðun . bide þone hælend . þæt he lif forgife þysum licgendum cnihte . and ic beo þæs þe geleaffulra þam lifigendan gode . eallum minum dagum gif he deð þis þurh þe .

Se cniht ða aras hal gehæled þurh sce̅ swiþun . and se hlaford þæs fægnode . and mid geleafan god herede .

Sum eald þegn wæs eac on wihtlande untrum . swa þæt he læg bæddryda sume nigon gear . and of ðam bedde ne mihte buton hine man bære .

Him comon þa on swefne to twegen scinende halgan . and heton hine yrnan ardlice mid him .

| Þa cwæð se adliga hu mæg ic yrnan mid eow . þonne ic ne arás of þysum bedde ana . nu for nigon gearum butan oþres mannes fylste .

Þa cwædon þa halgan . þu cymst to ðære stowe gif ðu færst mid us nu . ðær þær ðu under-fehst þine hæle .

He wearð þa swyðe fægen . and wolde faran mid heom [←him] . ac þaþa he ne mihte heom [←him] mid syðian . þa flugon hi geond þa lyft and feredon þone adligan . oðþæt hi becomon to sumum ænlicum felda fægre geblowen . and þær wæs an cyrce of scinendum golde . and of gymstanum standende on þam felda [←felde] . and se halga swiðun on scinendum mæsse-reafe stód æt ðam weofode . swylce he wolde mæssian .

Swyðun cwæð þa sona to þam seocan menn . ic secge ðe broðor þu ne scealt heonon-forð nanon menn yfel don . ne nanne man wyrigan . ne nænne man tælan . ne teonful beon . ne ðu man-slagum ne geðwærlæce . ne manfullum reaferum . ne ðeofum þa ne olæce . ne yfeldædum ne ge-ðwærlæce . ac swiðor gehelp swa þu selost mæge wan-hafolum mannum mid þinum agenum spedum . and þu swa þurh godes mihte sylf bist gehæled .

Se adliga þa ðohte þæt he yfel nolde dón buton þam anum þe him ǽr yfel dyde . and ðam wolde dón wel þe him wel dyde ǽr .

Þa wiste se halga swiðun hu his heorte smeade . and cwæð bliðelice him to .

Broðor ic þe secge . ne do þu swa þu smeadest . þæt ðu derige ænigum þeah ðe he derige ðe . ac þinum drihtne ge-efenlæc . se ðe nolde wyrian þa ðe hine dydon to cwale . and het his folgeras þæt hí for heora fyondum ge-bædon .

Eac cwæð paulus se apostol to eallum cristenum mannum . gif ðinum fynd hingrige fed hine mid mettum . | oððe gif him þyrste ðu do him drincan .

Þa cw̅ se bedryda to ðam bisceope eft .

La leof . sege me hwæt þu sy manna . nu ðu manna heortan miht swa asmeagen .

Þa cwæð se halga swyðun . ic eom seþe nu niwan com . swylce he cwæde swa . ic wæs geswutelod nu niwan .

Þa cw̅ se bædryda to ðam bisceope eft. hu eart ðu gehaten . and se halga him cw̅ to .

Þonne ðu cymst to winceastre . þu wast minne naman .

Se man wearð þa gebroht to his bedde eft sona . and awóc of slæpe . and sæde his wife ealle ða ge-sihðe þe he gesewen hæfde .

Þa cwæð þæt wif him to . þæt hit wære swyðun se ðe hine lærde mid þære halgan lare . and þone ðe he geseah on ðære cyrcan swa fægerne .

Heo cw̅ ða to þam were . hit wære nu full góód . þæt ðe man bære to cyrcan . and þu bæde þone halgan þæt he ðe gehælde þurh his halgan ge-earnunga [←ge-earnunge].

Hine man bær ða sona of ðam bedde to cyrcan binnan withlande . and he wearð gehæled sona þurh þone ælmihtigan god . for swyðunes ge-earnungum . and eode him ða ham hal on his fotum . seðe ær wæs geboren on bære to cyrcan .

He ferde eac siððan to ^winceastre for-raðe . and cydde aðelwolde þam arwurþan bisceope . hu he wearð gehæled þurh þone halgan swiþun . and land-ferð se ofer-sǽwisca hit gesette on læden .

Nu is to witenne þæt [þæt @ Skeat] we ne sceolan cepan ealles to swyðe be swefnum . forðan þe hi ealle ne beoð of gode .

Sume swefna syndon soðlice of gode . swa swa we on bocum rædað . and sume beoð of deofle to sumum swicdome hu he ða sawle for-pære . ac his gedwimor ne mæg derian þam godum . gif hi hi bletsiaþ . and hi | gebiddað to gode .

Þa swefna beoð wynsume þe gewurðaþ of gode . and þa beoð egefulle ðe of þam deofle cumað . and god sylf forbead þæt we swefnum ne folgion . þe læs ðe se deofol us bedydrian mæge .

Sum man on winceastre wearð yrre his ðeowan men for sumere gymeleaste . and gesette hine on fetera .

He sæt ða swa lange on þam laðum bendum . oðþæt he bestæl ut mid his stafe hoppende . and gesohte ðone sanct swyðun mid geomerunge .

Se scyttel ða asceat sona of þære fetere . and se ðeowa aras ahred þurh ðone halgan .

Sum mann wæs gebunden on-butan þæt heafod for his hefigum gylte . se com to þam halgan . and his swara heafod-bend sona to-bærst . swa he hine gebæd

Ne mage we awritan ne mid wordum asecgan ealle þa wundra þe se halga wer swiðun . þurh god gefremode on ðæs folces gesihþe . ge on gehæftum mannum . ge on unhalum mannum . mannum to swutelunge . þæt hí sylfe magon godes rice geearnian mid godum weorcum . swa swa swiþun dyde . þe nu scinð þurh wundra .

Seo ealde cyrce wæs eall behangen mid criccum . and mid creopera sceamelum . fram ende oð oþerne on ægðrum wage . þe ðær wurdon gehælede . and man ne mihte swa ðeah macian hi healfe up .

Þyllice tacna cyþað þæt crist is ælmihtig god . þe his halgan geswutelode þurh swylce wel-dæda . þeah ðe ða Iudeiscan þurh deofol beswicene . nellon gelyfan on þone lyfigendan crist . ærðan þe antecrist ofslagen bið þurh god . þonne bugað þa earmingas on ende þysre worulde ðe þær to lafe beoð mid geleafan to criste . and ða ærran losiað þe ǽr | noldon gelyfan .

We habbað nu gesæd be swiðune þus sceortlice . and we secgað to soðan þæt se tima wæs gesælig and wynsum on angel-cynne . þaða eadgar cynincg þone cristen-dom ge-fyrðrode . and fela munuclifa arærde . and his cynerice wæs wunigende on sibbe . swa þæt man ne gehyrde gif ænig scyp-here wære buton agenre leode þe ðis land heoldon . and ealle ða cyningas þe on þysum iglande wæron . cumera . and scotta . comon to eadgare . hwilon anes dæges eahta cyningas . and hi ealle gebugon to eadgares wissunge .

Þær-to-eacan wæron swilce wundra gefremode þurh þone halgan swyðun . swa swa we sædon ær . and swa lange swa we leofodon þær wurdon gelome wundra .

On ðam timan wæron eac wurð-fulle bisceopas . dunstan se anræda æt ðam erce-stole . and aþelwold se arwurða . and oðre gehwylce . ac dunstan and aþelwold wæron drihtne gecorene . and hi swyðost manodon menn to godes willan . and ælc god arærdon gode to cwemednysse . þæt geswuteliað þa wundra þe god wyrcð þurh hi .

itē alia.

Mannum is eac to witenne þæt manega dry-men maciað menig-fealde dydrunga þurh deofles cræft . swa swa wischeras of doð . and bedydriað menn swylce hi soðlice swylc þincg don . ac hit is swa ðeah dydrung mid deofles cræfte . and gif hwa hit bletsað þonne ablynð seo dydrung .

Be ðam we magan secgan sume soðe bysne .

Macharius wæs ge-haten sum halig fæder on | wæstene wunigende . fela wundra wyrcende munuc-lifes man . ða wearð an mæden forbroden þurh dry-manna dydrunge . ge-dwimorlice swa ðeah .

Þæt mæden wæs swa forbroden swylce heo an myre wære . and eallum þam þuhte þe hire onlocodon swilce heo myre wære . na mennisces gecyndes .

Þa leddon hire magas hi to macharie . and he sona axode hwæt hi woldon mid þam .

Þa magas him cwædon to . þeos myre þe ðu gesihst wæs ure dohtor arwurðe mæden . ac awyrigde dry-menn awendon hí to myran . nu bidde we ðe leof . þæt ðu ge-bide for hí and hi eft awende to þam ðe heo ær wæs .

Macharius þa cw̅ to hire magum ðus .

Ic ge-seo þis mæden on menniscum gecynde . and heo nis na awend swa swa ge wenað þæt heo sy . and heo nan þincg on hire næfð horses gecyndes . ac on eowrum gesihþum hit is swa gehiwod þurh ðæs deofles dydrunge . and his drymenn leaslice .

Macharius ða gebæd for þæt mæden god . and mid ele gesmyrode . and mid ealle adræfde þas deofles gedwimor . þurh his drihtnes naman . swa þæt hi ealle gesawon . þæt heo ansund wæs .

Swylce synd þa dydrunga þære dry-manna;

Sy wuldor and lof þam wel-willendan scyppende þe his halgan mærsað mihtiglice mid wundrum . seðe á rixað on ecnysse . amen .

Chapter 22

x kl̅ augusti. nat̄l̄ sci̅ apollonaris martyris.

On ðæs caseres dagum ðe clavdius wæs gehaten . com se eadiga petrus fram antiochian byrig . in to rome byrig mid manegum gebroðrum . and bodode geleafan bealdlice þam folce romaniscum . and Iudeiscum . swa swa drihten him gewissode . swa þæt ða romaniscan and ða reðan iudeiscan manega gelyfdon on þone lyfigendan hælend þurh petres bodunge . and ge-bugon to fulluhte . be-hreowsigende heora synna mid soðre dædbote .

Hi under-fen|gon þa godes word mid gastlicre blysse . þæt god wolde asendan his sunu to man-cynne . and þurh hine ge-edniwigian ðisne ealdan middan-eard .

Þa wæs ðær mid petre sum arwurðe godes man apollonaris gehaten . þæs halgan apostoles folgere . to ðam cw̅ petrus æfter sumum fyrste .

Efne þu eart gelæred on eallum þingum be ðam hælende .

Arís nu and under-foh þone halgan gast . and haligne bisceop-had on þæs hælendes naman . and far to þære byrig þe is gehaten rauenna . þær wunað micel folc on fulum hæðenscype . boda heom [him → heom] be þam hælende . and ne beo ðu afyrht .

Swutollice ðu wast þæt se is soð godes sunu . seðe deadum for-geaf lif æfter deaðe . and wanhalum mannum mid his worde læce-dóm .

Æfter ðysum wordum se eadiga petrus gehadode Apollonarem and gehalgode to bisceope . and his handa sette ofer his heafod and cw̅ .

Asende ure hælend crist his halgan engel mid þe . se geforðige ðé . and þine fare gewissige . and þe ge-tiþige þæs ðe þu ge-wilnige . and hine swa sende <sp>to ðære byrig</sp> mid siblicum cosse .

Appollonaris ða ferde to ðære fore-sædan byrig . and Sumne blindne ^mann gehælde . ærþan þe he to ðære byrig become . and manega gelyfdon þurh ðæs mannes hælþe on ðone soðan god . and swa wurdon gefullode .

He com ða to rauenna ðære byrig and hraðe þær geswutelode þæs hælendes mihte on wann-halum mannum .

Þær wæs sum forð þegen on þære fore-sædan byrig . se hæfde gehyred be ðam halgan were . and axode gif he cuðe aht on læce-cræfte .

Apollonaris him cw̅ to .

Ne cann ic naht on lacnunge buton on þæs hælendes naman . and se þegen him cw̅ to .

| Efne min wif is for manegum wintrum untrum . þam wæs ælc læce-cræft wiðer-ræde oð þis .

Nu gif ænig miht is on ðe . ge-opena hí mid weorcum .

Apollonaris ða andwyrde and cw̅ . ge-openige god ælmihtig eowre heortena eagan . þæt ge on þone hælend gelyfan . þonne ge geseoð his wundra .

He genam ða ðæs wifes hand . þas word clypigende .

Arís nu on ðæs hælendes naman . and on hine gelyf . and ne sege þu heonon-forð þæt ænig sy his gelica .

Heo aras þa sona andsund of þam bedde . and cw̅ þæt nan god nære butan se hælend þe he embe bodade .

Þa wundrode se þegn his wifes hælðe . and hi ealle sædon þæt se is soð god þe swilce wundra macað . and se mæg on ge-feohte þam sige forgifan . þe hine soðlice lufiað .

He wearð þa gefullod mid his wife . and cildum . and eall his hyred on þæs hælendes naman . and fela þæra [þære → þæra] hæðenra fengon to geleafan .

Apollonaris þa ðær wunode mid him on rauenna byrig . and bodode geleafan . and manega gefullode ðæs folces meniu .

Manega eac befæstan syððan hi gefullode wæron . heora cild to lare þam soðfæstan bydele . and godes geleafa ðær weox . and wanode se hæðen-scype .

Hwæt se halga bisceop þa on ðære byrig wunode ða twelf gear fullice . and gefullode þa leode . and gelome heom [him → heom] mæssode . and mæsse-preostas gehadode . and diaconas . and clericas . and dæghwamlice mid him godes lof gefylde mid gastlicum sangum .

On ðære byrig wæs sum þegn bonifacius gehaten . se wearð færlice dumb . and his wif þa asende to þam halgan bisceope . and bæd his geneosunge .

Efne ða se bisceop eode to his huse . and an wif-man wæs ðær wod on his huse | and se deofol clypode and cwæð þurh þone wodan to ðam halgan bisceope . ic gedó þæt man gebint ðe . handum and fotum . and heonon ðe swa tihð of þysre byrig . and se bisceop andwyrde .

Adumba ðu deofol . and of hire gewít . and ne spræc þu næfre eft þurh ænigne mann .

Þa ge-wát se deofol of ðam wodan sona . and se bisceop eode þær bonifacius læg . dumb on his bedde . and gebæd for hine ðus .

Drihten hælend crist þu ðe be-clysedest þyses mannes muð . þæt he ne moste leng clypian to hæðen-gildum swylce him to fultume . ge-opena nu his muð þæt he mærsige þinne naman . and gelyfe þæt þu eart lifigende god on worulde .

Hi cwædon ða amen . and on ðære ylcan tide wearð his tunge unbunden . and he blyssigende cwæð .

Nis nan oþer god ón to gelyfenne . butan se ana þe ðes eadiga bodað .

On þam ylcan dæge gelyfdon of þære leode on god . ma ðonne fif hund manna micclum þancigende gode and þam halgan were . þurh þone þe hi wurdon onlihte .

Rufus wæs gehaten sum hæðen mund-bora þe ða burh bewiste . ða wearð his dohtor seoc .

Þa sende se fæder sona to ðam bisceope . and sona swa he þyder com swa sawlode þæt mæden .

Hi weopon ða ealle ðe þær-inne wæron . and se halga wer cw̅ . to hire fæder ðus .

Ongin nu wel rufe and behat me mid aðe . gif ðin dohtor nu hal bið . þæt þu hire geðafige þæt heo folgie criste . and ðu oncnæwst nu his mihte .

Rufus him andwyrde .

Efne heo is nu dead . ac gif ic ge-seo þæt heo eft gesund leofað . ic herige þonne godes mihte and heo hire hælende folgie .

Mid þam ðe hi ealle weopon þa eode he to ðam lice . and clypode mid | geleafan to criste . and cw̅ .

Min god drihten hælend . þe minum lareowe petre forgeafe his gewilnunga swa hwæt swa he gewylnode æt ðe . arǽr nu ðis mæden of ðysum reðum deaðe . forðan þe heo is þin gesceaft . and nis nan god buton ðu .

Heo arás þa sona . and mid hreame clypode .

Mære is se god þe ðes mann us bodað . and nis nan oðer god buton hé ana .

Þa blissodon þa cristenan on cristes herunge . and þæt mæden wearð gefullod and hire modor samod . and eall heora hired samod . sume þreo hund manna . and fela ðæra hæðenra fengon to ge-leafan .

Se fæder swa ðeah rufus . for þæs caseres reðnysse . ne dorste ge-openian þæt he on drihten gelyfde . ac he digellice lufode þone geleaffullan bisceop . and mid wistum him þenode . and his dohtor wearð gehadod to godes ðeow-dome . and þurh-wunode mæden .

Appollonaris þa wearð ge-wreged to þam casere and to witnunge gelæd . and on þam witum geandette þæs hælendes naman . and sum hæðen mann þe him swyðost onwann awedde ðær-rihte . and his lif ge-endode yfelum deaðe .

Þa woldon þa cristenan bewerian þone halgan . and ofslogon þæra hæðenra sume twa hund manna .

Se dema þa het lædan þone geleaffullan bisceop into blindum cwearterne . and on bendum healdan . and him ætes forwyrnan þæt he swa ateorode .

Ac godes engel com to þam godes men nihtes . and hine gereordode and mid his ræde gehyrte eallum onlocigendum . þe ðær on ymbhwyrfte wæron .

Hwæt ða on þone feorðan dæg het se fore-sæda dema gelædan ðone halgan on heardre racentage feorr on wræc-sið . ferigende | on scipe .

Þær wæs sum æðelboren man . atelice hreoflig . þa axode se bisceop . wylt ðu beon hál .

He cw̅ ic wylle . and him andwyrde ^se halga ^bisceop; [sic @ Skeat]

Gelyf on hælend crist . and se hæðena him andwyrde . gif he me gehælð he bið min hælend god .

Appollonaris ða hrepode þone untruman hreoflian on ðæs hælendes naman . and he wearð hal sona mid þam ðe he clypode cristes naman him to fultume .

Þa awearp se gehæleda his hæðen-scype him fram . and gelyfde on ðone hælend . and mid geleafan wearð ge-fullod .

Hit gelamp þa æfter fyrste . þæt þa unge-leaffullan hæðenan ge-bundon þone bisceop . and to ðære byrig rauenna geleddon on bendum . and beoton hine wodlice .

Ða ge-bæd hine se bisceop bealdlice to gode . and heora deofol-gild wearð to-wend . and heora templ to-worpen .

Þa gesawon ða hæðenan þæs halgan weres mihte . and clypodon mid gehlyde . be ðam geleaffullan were .

Beo se ealda [←ealde] arleasa ardlice ofslagen . þurh þone synd to-worpene ða wuldor-fullan godas .

Þa blissodon þa cristenan . and cwædon mid geleafan . þæt se ana is soð god þe swylce wundra wyrcð . þa betæhton þa hæðenan þone halgan wer to slege . sumum arleasum cwellere se wæs geciged taurus . and se taurus ge-samnode ða ceaster-gewaran him to . and axode þone halgan þurh hwæs mihte he ge-fremode þa wundorlican tacna . þæt swa micel werod him folgode .

Appollonaris him andwyrde .

Nis ðeos nan oðer miht butan hælendes cristes . and we habbað godes gife on urum heortum . and þa betwux oþrum spræcum cw̅ se ylca taurus to þam arwurðan were .

Ic hæbbe ænne sunu þe | ne ge-seah næfre dæges leoht . gedó þæt he geseo on þines drihtnes naman [namen → naman] . and we sona gelyfað þæt he is soðlice god . elles we ðe for-bærnað for ðinum deopum gyltum .

Ða cw̅ se bisceop him to .

Cume se blinda to me .

Þa com se blinda him to . and he cw̅ mid geleafan .

On þæs hælendes naman geopena þin eagan and geseoh þurh hine . and he sona wearð hal beorhte locigende . seðe blind wæs geboren .

Hi wundrodon þa ealle . and anmodlice cwædon þæt se wære soð god þe swylce wundra worhte . and manega þa gelyfdon þurh ða mihte on god .

Taurus þa brohte þone bisceop digellice . of ðæs folces gehlyde to sumum his landa [lande → landa] . and hine þær afedde feower gear mid wistum .

Syx mila fram rauenna . and hine sohton þa cristenan . and his lare hlyston mid geleafan georne .

And ealle ða untruman þe him oft to comon wurdon gehælede . and ham gesunde cyrdon .

Þa sendon ða hæðengildan mid hetelicum geðance ærende to þam casere . þæt he acwellan hete þone halgan bisceop . þæt heora biggencgas ne wurdon mid ealle adwæscte . þurh ðone drihtnes bydel .

Ða sende se casere sona him þis gewrit .

Gif ænig man gremige ure godas dyrstiglice gebete he wið hi . oððe he beo adræfed awæg of ðære byrig . forðan þe hit ne bið na rihtlic þæt we wrecon ure godas . ac hi wrecað hi sylfe gif hi beoð astyrode .

Beoð ge gesunde .

Þa hét se burh-ealdor [→ burhge (for burge) ealdor] þone bisceop him to gefeccan . and axode hine sona . hwylcere eawfæstnysse he wære . swylce he cwæde ^{hwæðer eart ðu} cristen oððe hæðen .

Se dema hatte demosten . and he wæs deofles biggencga .

Þa cw̅ se halga wer to þam hæðenan de|man .

Ic eom soðlice cristen . and scs̅ petrus me lærde . and he me hider asende to þissere ge-sæligan byrig . þæt ðurh þæs hælendes naman eow hæl becume .

Demosten þa andwyrde ðam arwurðan halgan .

Hwæt sceall hit swa lang-sum . efne nu is se tima . þæt ðu forlæte þine ydelnysse and lac ðam godum geoffrige .

Appollonaris him andwyrde .

Ic offrige me sylfne for minum gastlicum bearnum þe ic hér gode gestrynde . and swa hwá swa hine ne gebit to þam heofonlican gode . se bið ecelice for-demed on þam ecan fyre . and ða ðe on god gelyfað and mid geleafan beoð gefullode . þa habbað þa ecean reste . and unawendendlice welan .

Hwæt ða demosten deoflice wearð gehát-hyrt . and betæhte þone halgan sumum hundredes ealdre to healdenne on cwearterne . oðþæt he hine acwealde .

Se hundredes ealdor wæs ðam hæðenan bediglod . and wæs digellice cristen . and cw̅ to þam bisceope .

Min fæder ic ðe bidde . ne beo þu swa hræd to deaðe . forðan þe us is þin líf nyd-behefe git . ac far þe nu digellice þær ðu frið hæbbe . oþþæt ðises folces hatheortnyss hwæt-hwega beo gestylled .

He eode ða nihtes þæt he his life geburge . ac ða hæðenan wurdon wære his fare and hine gelæhton . and hine swa lange beoton oðþæt hi wendon þæt he wære dead .

He wearð swa-þeah gebroht þurh his gebroðra þenunge eft to ðam cristenum . and he anbidode on life seofon niht fullice . and hi fægre tihte to þam ecan life . and to geleafan georne .

He cw̅ ic secge eow þæt swára ehtnysse becumað ofer þa cristenan for cristes naman . ac æfter | þære ehtnysse bið eft sybb forgifen . and ða caseras bugað to cristes geleafan . and ælc deofolgild bið adilegod mid ealle . swa þæt man freolice mot mærsian þone ælmihtigan ^god geond ealne middan-eard . and him lác offrian . and se ðe on geleafan þurhwunað . se leofað á on ecnysse .

Æfter ðyssere tihtinge . and oðrum manegum spræcum . gewát se halga wer of worulde to gode . mid þam he á wunað on þære ecean eadignysse [ecan wuldre → ecean eadignysse] . and his leorning-cnihtes ledon his lic arwurðlice on ane stænene þruh . and seo stod wið þone weall .

Twam læs ðryttig geara he wæs heora bisceop on manegum ehtnyssum . þam ælmihtigan þeowigende . and his edlean bið nu ende-leas forðy . mid þam ælmihtigan gode . þe on ecnysse rixað . AMEN .

Chapter 23

{{subst::Ælfric's Lives of Saints/23vii}}

Chapter 24

iii. kl̅. a[u]gusti. nat̄l̄ sanctorum abdon. et sennes.

On decies dagvm ðæs deoflican caseres . wæron twegen kyningas on crist gelyfde . Abdon and Sennes . mid soðum geleafan .

Ða asprang heora word to ðam wælhreowan casere . þe ða ana geweold ealles middan-eardes . and ealle oðre cyningas to him cneowodon . and heora rice wunode swa swa he ana wolde .

Þa asende decius to þam foresædum cyningum . and het hí gebringan on bendum to him . wolde hi gebigan fram godes biggencgum . to his gedwyldum . and to his deofolgildum .

Hwæt þa cwelleras . þa þa cynincgas gebundon . and on isenum racenteagum to ðam arleasan gebrohton for cristes geleafan . to cwealm-bærum witum .

Decius þa het þa halgan cyningas his godum geoffrian . ac hi andwyrdon þus .

We offriað ure lac þam lyfigendan gode . hælendum criste . and we hopiað to him . geoffra ðu sylf þinum sceandlicum godum .

Þa cwæð decius se deofles biggenga .

Þysum is to gearcigenne þa reþestan wita .

Abdon and sennes him andwyrdon ðus .

Hwæs abitst þu casere cyð hwæt þu wylle . þæt þu wite soðlice . þæt we orsorge syndon on urum hælende criste . þe hæfð þa mihte . þæt he ðine geþohtas . and þe sylfne mæg mid ealle towurpon . and on ecnysse fordon .

Þa on þam oðrum dæge . het decius se casere lætan leon and beran to þam geleaffullum cynegum . þæt hi hi abiton . buton hi bugon to his godum . and be-tæhte þa wican ðam wælhreowan ualeriane .

Þa cw̅ ualerian᷒ to þam cynegum þus .

Beorgað eowrum gebyrdum . and bugað to urum godum . and geoffriað him lac . þæt ge lybban magon . gif ge | þis ne doð . eow sceolon deor abitan .

Abdon and sennes sædon þam arleasan .

We gebiddað us to drihtne gebigdum limum . and we næfre ne onbugað . þam bysmorfullum anlicnyssum . manna hand-geweorc . þe ge habbað for godas .

Þa het ualerianus . ða halgan unscrydan . and lædan swa nacode (sic) to ðære sunnan anlicnysse . forðan ðe hí wurþodon ða sunnan for god . and bebead his cempum . þæt hi ða cristenan cynegas to þære offrunga geneadodon . mid eges-licum witum .

Þa cwædon ða cynegas to þam cwellere ðus .

Do þæt þu don wylt . and se dema het beswingan þa halgan hetelice swyðe . mid leadenum swipum . and lædde hi syððan to ðam wæfer-huse . þær ða deor wunodon . beran . and leon . þe hi abitan sceoldon . and het lætan him to . twegen leon . and feower beran . binnan þam huse . þa urnon þa deor egeslice grymetende . to þære halgena fotum . swylce hi fryðes bædon . and noldon awæg gan . ac hi weredon hi swyðor . swa þæt nan man ne dorste for ðæra deora ware þam halgum genealecan . oððe into ðam huse gan . þa cw̅ ualerianus to ðam cempum ðus .

Heora dry-cræft is gesyne swutollice on ðysum . and he wearð swyðe gram for þære deora ware . and het ða æt nextan þa hæðenan cwelleras ingan mid swurdum . and ofslean þa halgan .

Þa ðe þis gedon wæs . þa het se dema teon þæra halgena lic to ðam hæþengilde . þæt ða cristenan sceoldon sceawian be him . and bysne niman . and bugan to þam godum . þe læs þe hi wurdon . swa wælhreowlice acwealde .

Ða æfter þrym dagum . com sum diacon þær to . quirinus gehaten . and he ða halgan lic nihtes gelæhte . and ledde to his | huse . and lede hi digellice on ane lædene ðruh . mid mycele a[r]wurðnysse . and hi mannum þær bediglode lagon . to langum fyrste . oð þæt constantinus . se cristene casere . eft to rice feng . and hi ða afundene wurdon . þurh cristes onwrigennysse .

Ge habbað nu gehyrod hu ða halgan cyningas heora cynedom for-sawon for cristes geleafan . and heora agen lif forleton for hine .

Nimað eow bysne be ðam . þæt ge ne bugon fram criste for ænigre earfoðnysse . þæt ge þæt ece lif habbon .

Item Alia. [in translation: The letter of Christ to Abgarus]

Nu we spræcon be cynegum we willað þysne cwyde gelencgan . and be sumum cynincge eow cyðan git . Abgarus wæs geciged . sum gesælig cynincg on syrian lande . and se læg beddryda on ðam timan þe se hælend on þysum life wæs .

He hæfde ge-axod be ðæs hælendes wundrum . and sende ða ardlice þis ærendgewrit him to .

Abgarus gret eadmodlice þone godan hælend . þe becom to mannum mid iudeiscum folce .

Ic hæbbe gehyred be ðe . hu ðu gehælst ða untruman . blinde . and healte . and bedrydan aræst (sic) . hreoflige þu geclænsast . and þa unclænan gastas afligst . of wodum mannum . and awrecst ða deadan .

Nu cwæð ic on minum mode . þæt ðu eart ælmihtig god . oððe godes sunu ðe sylf come to mannum . þæt ðu ðas wundra wyrce . and ic wolde ðe biddan þæt ðu ge-medemige þe sylfne . þæt þu siðige to me . and mine untrumnysse gehæle . for ðan þe ic eom yfele gehæfd .

Me is eac gesæd þæt ða iudeiscan syrwiað . and runiað him betwynan hu hi þe berædan magon . and ic hæbbe ane burh þe unc bam genihtsumað .

Þa awrát se hælend him sylf þis gewrit . and asende ðam | cynincge ðus cwæðende him to .

Beatus es qui credidisti in me . cum ipse me non uideris .

Scriptum est enim de me . quia hii qui me uident non credent In me . et qui non uident me . ipsi credent et uiuent .

De eo autem quod scripsisti mihi ut ueniam ad te . oportet me omnia propter quæ missus sum hic explere .

Et postea quam compleuero recipi me ad eum a quo missus sum .

Cum ergo fuero assumptus . mittam tibi aliquem ex discipulis meis ut curet ægritudinem tuam . et uitam tibi atque his qui tecum sunt prestet .

þæt is on engliscum gereorde . Eadig eart ðu abgar . þu þe gelyfdest on me . þonne ðu me ne gesawe .

Hit is awriten be me on witegung-bocum [←witegu-] . þæt ða þe me geseoð . hi ne gelyfað on me . and þa þe me ne geseoð . hi gelyfað and libbað .

Be þam þe ðu awrite to me . þæt ic come to þe . ic sceal ærest afyllan þa þincg þe ic fore asend eom . and ic sceal beon eft genumen to þam ylcan ðe me asende .

And ic asende to ðe . syððan ic genumen beo . ænne minra leorning-cnihta . þe gelacniað þine untrumnysse . and þe lif ge-gearcað . and þam þe gelyfað mid ðe . þis gewrit com þa to þam cyninge sona . and se hælend fore-sceawode syððan he to heofonum astah . þæt he sende þam cyninge swa swa he ær gecw̅ . ænne of ðam hund-seofontigum . þe he geceas to bodigenne . se wæs tatheus gehaten . þæt he gehælde ðone cynincg .

He com ða þurh godes sande . to þære fore-sædan byrig . and ge-healde þone untrumne on þæs hælendes mihte . swa þæt ða ceaster-gewaran swyðe þæs wundrodon . þa gemunde se cyning . hwæt crist him ær behét . and het him to gefeccan þone | foresædan tatheum . se wæs eac gehaten oþrum naman iudas . and mid ðam he ineode . þa aras se cyning . and feoll to his fotum ætforan his ðegnum . forðan þe he geseah sume scinende beorhtnysse . on þæs iudan andwlite þurh godes onwrigennysse . and cw̅ þæt he wære soðlice cristes discipulus him to hæle asend . swa swa he sylf behét .

Þa andwyrde se tatheus ðam arwurðan cyninge þus .

For-ðan ðe þu rihtlice gelyfdest on þone ðe me asende . forðam ic eom asend to þe . þæt ðu gesund beo . and gif ðu on his geleafan þurhwunast . he wile ðe getiðian þinre heortan gewilnunga to-eacan þinre hæle .

Abgarus him andwyrde anrædlice and cwæð .

To þam swyðe ic gelyfe on þone lyfigendan hælend . þæt ic wolde ofslean gif hit swa mihte beon þa ðe hine gefæstnodon on rode-hencgene .

Þa cw̅ tatheus him to .

Crist ure hælend wolde his fæder willan gefyllan . and eft faran to him .

Abgarus cwæð him eft to .

Ic wat eall be þam . and ic on hine gelyfe . and on his halgan fæder .

Tatheus cw̅ þa gyt to ðam wanhalan cyninge . forþi ic sette mine hand on ðæs hælendes naman ofer ðe untrumne . and he [eac] swa dyde . and se cyning wearð gehæled sona swa he hine hrepode . fram eallum his untrumnyssum . þe he ær on þrowode .

Abgarus þa wundrode . þæt he wearð gehæled . butan læce-wyrtum . þurh ðæs hælendes word . swa swa he him ær behet þurh his ærend-gewrit .

Tatheus eac siððan sumne mann gehælde fram þam micclan fot-adle . and fela oðre menn on þære byrig gehælde . and bodode him geleafan .

Ða cw̅ abgarus him to .

On cristes mihte þu wyrcst þas micclan wundra . and we ealle ðæs wundriað . sege | me ic þe bidde soð be ðam hælende . hu he to mannum come . and of middan-earde ferde .

Tatheus andwyrde abgare . and cwæð .

Ic eom asend to bodigenne hat þine burh-ware cuman ealle to-somne . on ærne mergen . þæt ic him eallum cyðe cristes tocyme . and be his wundrum þe he worhte on life . þa het se cynincg cuman his ceaster-gewaran . and tatheus him bodade bealdlice be criste . and him eallum sæde þone soðan geleafan . and mancynnes alysednysse þurh ðone mildan hælend . þæt he wolde hine sylfne syllan to deaðe . and to helle gecuman to gehelpene adames . and eac his gecorenra of adames cynne . and hu he syþþan astah to his soðfæstan fæder . and cymð eft to demenne ælcum be his dædum .

Æfter ðyssere bodunge . bead se cyning þam bydele . goldes . and seolfres gódne dæl to lace . ac he nolde niman nan ðingc to medes his wunderlicre mihte . oððe his mærlican bodunge . and sæde ðam cyninge .

We forsawon ure æhta . and forleton ure agen . hwi sceole we oþres mannes niman .

Þis wæs þus geworden . and þær wunode á syððan se soða geleafa . on þære landleode . þam hælende to lofe . þe leofað á on ecnysse. AMEN.

Chapter 25

kal. a[u]gustvs. passio sanctorvm machabeorum.

Æfter Ðam Ðe Alexander se egefulla cyning to-dælde his rice his dyrlingum ge-hwilcum on his forð-siðe . and hi fengon to rice gehwylc on his healfe . þa weoxon fela yfelu wide geond eorðan for ðæra cyninga gewinne .

An ðæra cyninga wæs heora eallra for-cuðost . arleas and upp-ahafen antiochus gehaten . se feaht on ægypta | lande and afligde ðone cyning . and ferde syððan to hierusalem mid mycelre fyrde . and be-reafode godes templ goldes and seolfres . and fela gold-hordas forð mid him gelæhte . and ða halgan maðm-fatu and þæt mære weofod . and ofsloh þæs folces fela on ðære byrig . and modelice spræc on his mihta truwigende .

Eft æfter sumum fyrste asende se cyning on ærend-gewritum . þæt ealle menn gebugon to his hæðen-scipe and to his gesetnyssum . and asende to hierusalē iudeiscre byrig on þære wæs ða gewurðod se eall-wealdende god æfter ðære ealdan . ǽ . þe hi ana þa heoldon . and het hi gebugan fram gode and fram his biggengum . and arærde þæt deofol-gild uppon [drihtnes] weofode . and het hi ealle offrian to ðære anlicnysse . and ælcne acwellan þe wið-cwæde his hæsum .

Wearð þa mycel angsumnyss on eallum þam folce þe on god gelyfdon for ðam gramlicum dædum . and manega gebugon to ðam manfullan hæðengilde . and eac fela wið-cwædon þæs cyninges hæsum . and woldon heora lif forlætan ærþan ðe heora ge-leafan . and noldon hi fýlan mid þam fulan hæðenscype . ne godes ǽ to-brecan þe hi on bocum ræddon .

Hwæt þa wearð gelæht sum geleafful bocere . har-wencge and eald . se hatte eleazarus . and hi betsungon him on muþ mid mycelre ðreatunge þone fulan mete þe moyses forbead godes folce to þicgenne . for þære gastlican getacnunge .

We moton nu secgan swutellicor be ðysum . hwylce mettas wæron mannum forbodene on ðære ealdan . ǽ . þe mann ett nu swa-ðeah .

Moyses for-bead for mycelre getacnunge on ðære eal|dan . ǽ . æfter godes dihte þa nytenu to etanne þam ealdan folce þe heora [cudu] ne ceowað and het ða unclæne . and þa þe synd gehofode on horses gelicnysse unto-clofenum clawum . wæron unclæne eac . þa clænan nytenu þe heora cudu ceowað . getacniað þa men þe on heora mode smeagað embe godes willan . syððan hi his word gehyrað of lareowa muðum swylce hi heora mete ceówan .

And ða synd unclæne þe heora cudu ne ceowað . for-ðan þe hi getacniað þa ðe tela nellað . ne nellað leornian hwæt gode leof sy . ne on heora mode wealcan þæs hælendes beboda . and syndon for-ðy unclæne swa swa ða forcuðan nytenu .

Þa nytenu synd clæne þe to-cleofað heora clawa and heora cudu ceowað . hi getacniað þa geleaffullan on godes gelaðunge . þe mid geleafan underfoð þa ealdan gecyðnysse and cristes gesetnysse . þæt is seo ealde . ǽ . and seo niwe gecyðnyss . and ceowað godes beboda symle mid smeagunge .

Þa nytenu wæron unclæne gecwedene on þære . ǽ . þe ne to-cleofað heora clawa þeah ðe hi cudu ceowan . oððe gif hi to-cleofað and ceowan nellað for ðære getacnunge þe ða towerd wæs . þæt we to-cléofan ure clawa on þam twam gecyðnyssum . on ðære ealdan . and on ðære niwan þæt is . ǽ . and godspel . and þæt we on mode smeagan þæs ælmihtigan hæse . and se ðe aþor forlæt . se leofað unclæne .

Swa swa ða iudeiscan þe urne drihten forseoð . and his godspel bodunge to bysmre habbað syndon unclæne . and criste andsæte þeah ðe hi moyses . ǽ . on heora muðe wealcon . and nellað under-standan butan þæt steaflice andgit .

Fela wæron forbodene godes folce on ðære . ǽ . | þe nu syndon clæne æfter cristes to-cyme . siððan paulus cw̅ to þam cristenum ðus .

Omnia munda mundis. ^{þæt is on englisc}

Ealle ðincg syndon clæne þam clænum mannum . þam ungeleaffullan and unclænum nis nan þincg clæne .

Hara wæs ða unclæne forðan ðe he [nis] clifer-fete . and swín wæs ða unclæne forðan þe hit ne ceow his cudu .

Sume wæron þa fule þe nu synd eac fule . ac hit biþ to langsum eall her to logigenne be ðam clænum nytenum . oððe be þam unclænum on ðære ealdan . ǽ . þe mann étt nu swa-ðeah .

Þa wolde eleazarus werlice sweltan ærðan þe he godes . ǽ . forgegan wolde . and nolde forswelgan ðas spices snæd þe hi him on muð bestungon . forðan þe moyses for-bead swýn to etenne swa swa we ær sædon .

Þa bædon ða cwelleras for heora eald cyððe . þæt hi moston him beran unforboden flæsc . and dyde swilce he æte of ðam offrung-spice . and swa mid ðære hiwunge him sylfum geburge .

Ða cw̅ eleazarus .

Ic eom eald to hiwigenne . and wenað þa geongan þæt ic wille for-gægan godes gesetnysse for ðisum sceortan life . and bið þonne min hiwung him to forwyrde . and ic sylf beo and-sæte þurh swylce gebysnunge .

Ðeah ðe ic beo ahred fram manna reðnysse . ic ne mæg þam almihtigan ahwar ætberstan . on life oþþe on deaðe . ac ic læte bysne þam iungum cnihtum gif ic cenlice swelte arwurðum deaðe for ðære halgan . ǽ .

Þa wurdon ða cwelleras þe him cuðlice to-spræcon . swyðe geyrsode for ðære andsware . and tugon hine to þam witum þæt he wurde acweald . and he ða mid geleafan his líf ge-endode .

Þær wurdon eac gelæhte . and | gelædde to ðam cynincge . seofon gebroðra swyðe ge-lyfede . and heora modor samod . and hi man mid swingle ðreade . þæt hi etan sceoldon ongean godes . ǽ . spicc .

Þa cw̅ se yldesta . hwæt axast ðu æt us . we synd gearwe to sweltenne swyðor þonne to forgægenne ures scyppendes . ǽ . þe he gesette þurh [moysen.] þa yrsode se cynincg . and het for-ceorfan his tungan . and hine behættian and his handa forceorfan . and eac befotian . and het feccan ænne hwer and hine þær-on seoðan . oð þæt he sawlode ætforan his gebroþrum þæt hi abúgan sceoldon .

Hwæt þa six gebroþra hi sylfe þa tihton . and seo modor samod secgende him betwynan . þæt hi sweltan woldon . for godes gesetnyssum; [sic @ Skeat] god sylf gefrefrað us swa swa moyses geswutelode on ðære fiftan béc . þæt ^{is þæt} god ge-frefrað his ðeowan . þa gebundon ða cwelleras þone oþerne broðor . and hine behættedon hetelice . and axodon hwæðer he etan wolde arðan þe he behamelod wurde .

He cw̅ þæt he nolde . and hé ðá gelice witu . swa swa his yldra broðor ardlice under-feng . and cw̅ to ðam cyninge þe hi acwellan het .

Ðu forscyldegodesta cynincg . ofslihst us and amyrst . ac se ælmihtiga cyning us eft arærð to þam ecan life . nu we for his . ǽ . sweltað .

Hi bundon ðone þryddan and mid bysmore [heton] his tungan forð-ræcan . and he hraðe swa dyde . and his handa him ræhte and mid anrædnysse cwæð .

Ðas lima ic hæfde þurh ðone heofonlican cynincg . ac ic hi nu forseo for his gesetnysse . forþan þe ic hopie to him . þæt ic hi eft under-fó æt him .

And se cynincg wundrode and þa þe mid him wæron ðæs cnihtes anrædnysse þæt he ða cwylmincge | forseah

Æfter ðyses forð-siðe . hi ge-fengon ðone feorðan . and eall-swa getintregedon . ac he anrædlice cw̅.

Selre us is to sweltenne and soðlice anbidian þæs ecan æristes . æt ðam ælmihtigan gode . ac ðe ne bið nan ærist to ðam ecan life .

Se ða ge-endode mid anrædum geleafan . and hi gefengon to dreccenne þone fiftan broðor .

He beseah ða to ðam cynincge . and cw̅. him þus to .

Nu ðu mihte hæfst betwux mannum sume hwile . þu dest swa swa ðu wylt . ac ne wen ðu swaðeah þæt se god us forlæte þe we on gelyfað . þu afindst his mihte ungefyrn on ðe sylfum . hu he þe tintregað teartlice on witum .

Se geendode ða . and hi ardlice gelæhton þone sixtan broðor . and he sweltende . cw̅.

Ne dwela ðu on idel . þeah ðe drihten ðe geþafige þæt we for urum synnum to swylcere wæfersyne synd . and ne wen ðu na be þé þæt þu unge-witnod beo . nu ðu winst ongean god . and se ge-wat þa swa sona .

Þa wundrode heora modor þæt hi swa wel ongunnon . and heo mid bliþum mode hyre bearn æfre tihte . ælcne on-sundron and sæde heom eallum .

Ne fegde ic eowre lima . ne ic eow lif ne forgeaf . ac middan-eardes scyppend eow sealde gast . and lif . and he eft eow for-gifð þæt ece lif mid him swa swa ge nu syllað eow sylfe for his . ǽ .

Hwæt ða antiochus se arleasa cynincg behet þam anum cnapan þe þær cucu wæs þa git mycele woruld-æhta gif he wolde him abugan and bæd eac ða modor þæt heo hire bearn tihte . þæt he huru ana abuge þeah þe his gebroðra noldon . and seo modor behet him þæt heo wolde hine læran .

Þa abeah seo modor | to hire bearne and cw̅ .

Gemiltsa me min sunu ic ðe to men gebær . beseoh nu to heofonum . and besceawa þas eorðan . and ealle ða ge-sceafta þæt him on synd nu . and under-stand be ðam hu se ælmihtiga god hi ealle gesceop butan antimbre of nahte . and ne forhta ðu ana for ðysum feondlican cwellere . ac under-foh þone deað swa swa ðine gebroðra dydon . þæt ic ðe eft under-fó on eadignysse mid heom .

Þa clypode se iungling to ðam cwellerum þus . and cw̅.

Hwæs andbidige ge . ne beo ic na gehyrsum þæs cyninges hæsum . ac godes bebodum þe he bebead þurh moysen . and þu manfulla cyning þinre modignysse scealt soðlice on godes dome susle ðrowian .

Ic sylle min agen lif . and minne lichaman samod for godes gesetnyssum . swa swa mine six gebroðra . and ic clypige to gode þæt he urum cynne gemiltsige . and þæt he dó mid witum þæt ðu wite þæt he is ana god . þa wearð se cynincg wælhreow þam cnihte ofer ealle þa oðre þa he ær acwealde for ðære forsewennysse . and sé gesæliga cniht on þam teartum witum gewát þa of life mid fullum geleafan . and seo geleaffulle modor wearð eac acweald æt-foran þam cyninge . æfter hire seofon sunum gesæliglice for gode .

Þyssera martyra gemynd is on hlaf-mæssan dæg . swa wide swa godes þeowas godes þenunge gymað .

Manega halgan wæron under moyses . ǽ . ac we nabbað heora gemynd mid nanum mæsse-dæge butan þyssera gebroðra þe swa bealdlice ðrowodon .

Item. [§II.]

We wyllað eac awritan hu þæt gewinn ge-endode . and hu se ælmihtiga god þa arleasan afligde mid my|celre sceame . swa swa us sægð seo racu .

Mathathias wæs gehaten sum heah godes þægn . se hæfde fif suna ful cene mid him . an hatte iohannes . oðer symon . ðridda Iudas . feorða eleazárus . fifta ionathas . binnan hierusalem; [sic @ Skeat] þas bemændan sarlice mid swyðlicre heofunge . þæt hi swylce yrmðe gesawon on heora life . and noldon abúgan to ðam bysmorfullan hæðen-scipe .

Þa asende se cynincg to ðam fore-sædan ðegene . and het hi ealle búgan to his blindum godum . and him lac offrian . and forlætan godes . ǽ . ac mathathias nolde þam manfullan gehyran . ne godes . ǽ . forgægan for his gramlican ðreate .

Efne þa eode on heora eallra gesihðe án Iudeisc mann to þam deofol-gilde . and ge-offrode his lac swa swa antiochus hét .

Hwæt ða mathathias on mode wearð ge-ang-sumod . and ræsde to ðam were þe ðær wolde offrian . and ofsloh hine sona . and siððan þone oþerne þæs cynincges ðegn . þe hine ðær-to neadode . and to-wearp þæt deofol-gild . and wearð him awege .

Clypode þa hlude . ælc þe geleafan hæbbe . and godes . ǽ . recce . gange him to me .

He fleah ða to westene . and fela manna mid him mid anrædum mode . and ða manfullan for-sawon.

Þa asende se cynincg him sona æfter mycele meniu to ðam wid-gillum muntum . þær hi floc-mælum ferdon mid heora hiwum .

Þa wearð þær ofslagen sum dæl þæs folces þe on fyrlene wæs fram mathathian forðan þe hi noldon [feohtan] on þam freols-dæge . ac leton hi ofslean on unscæððignysse . þæt werod weox ða swyðe þe wæs mid mathathian . and hi anrædlice fuhton . and afligdon ða hæðenan | mid mycelre strængðe . þe modegodon ongean god .

Mathathias þa ferde mid his maga fultume and ehte þæra hæþenra . and mid ealle adræfde . and godes . ǽ . arærde . and him eac god fylste .

He ealdode þa . and his ende genealæhte . and lærde his suna mid geleafan and cwæð .

Onginnað nu þegenlice . nu eow þearf mycel is . and syllað eower agen líf for ðære soðfæstan . ǽ . and for ura fædera cyðnysse . hit cymð eow to wuldre .

Beoð gemyndige nu mine bearn . hu se mæra abraham on mycelre costnunge gode wæs getrywe . and him com þæt to riht-wysnysse .

Eall-swa ioseph . and hiesus naue . dauid . and danihel . and ealle ða þe on god truwodon . wurdon æfre getrymde . for heora trywðe wið hine .

Beoð nu gehyrte . and gehihtað on god . and healdað mid ðegen-scipe ða halgan godes . ǽ . forðan þe ge beoð wuldor-fulle on hire .

Ne forhtige ge ic bidde for ðæs fyrn-fullan þreatum . forðan þe his wuldor is wyrms . and meox . nu todæg he modegað . and to-mergen he ne bið . he awent to eorðan . and his geðoht forwyrð .

Eower broðor symon is snotor . and rædfæst . he bið eow for fæder folgiað his rædum .

Iudas machabeus is mihtig . and strang . beo he eower ealdor on ælcum gefeohte . and gaderiað eow to þa þe godes . ǽ . lufiað . and wrecað eower folc . on ðam fulum hæðenum . and healdað godes . ǽ . on godum biggencgum .

He bletsode ða his suna . and swa ge-wát of life . and his lic wæs bebyriged on his agenre byrig . and israhel hine beweop on þa ealdan wisan .

[III.]

Hwæt ða iudas machabeus mihtiglice arás on his fæder stede . and wiðstod his feondum . and his feower gebroðra him | fylston anrædlice and ealle ða þe wæron wunigende mid his fæder . and fuhton ða mid blisse . and afligdon þa hæþenan .

Iudas ða hine gescrydde mid his scinendan byrnan . swa swa ormæte ent . and hine ealne gewæpnode . and his fyrde bewerode wið fynd mid his swurde .

He wearð þa leon gelic on his gewinnum . and dædum . and todræfde þa arleasan . and his eðel gerymde .

His fynd þa flugon afyrhte for him . and ealle ða yfel-wyrcendan wurdon gedræfde . and seo hæl wearð gesped on iudan handum ða . and he geblissode his cynn þe wæs gecweden iacob . and his hlisa þa asprang to þam ytemestan landum .

Ða gegaderode appollonius sum gramlic heretoga of samarian byrig swyðlice fyrde . and of manegum ðeodum menn to ge-feohte to-geanes israel and iudan mægðe . ac iudas him com to . and acwealde hine sona . and fela his folces . and ða oðre ætflugon .

Iudas ða gelæhte þæs appollonies swurd . þæt wæs mærlic wæpn . and he wann mid þam on ælcum gefeohte on eallum his life .

Eft ða wæs sum heretoga gehaten seron on syrian lande . se . cw̅ . to his leode .

Ic wille wyrcan me naman and ofer-winnan iudan . and þa ðe him mid synd þe forsawon ðone cyning .

He gesamnode þa his fyrde . and ferde mid prasse to iudea lande . and fela leoda mid him .

Iudas þa him com to . and his geferan cwædon .

Hu mage we þus feawa feohtan ongean ðas meniu . nu we synd gewæhte mid gewinne and mete-leaste .

Iudas him andwyrde anrædlice and cwæð .

Nis nan earfoðnyss ðam ælmihtigan gode on feawum mannum . oððe on micclum werode to helpen|ne on ge-feohte . and healdan þa ðe he wile . forðan þe se sige bið symle of heofonum .

Ðas cumað to us swylce hi cenran syndon and willað us fordon . and awestan ure land . we soðlice feohtað for us sylfe wið hi . and for godes . ǽ . and god hi eac fordeð ætforan ure gesihðe . ne forhtige ge nates hwón .

Æfter ðyssere spræce hi eodon to-gædere . and iudas ða afligde þone fore-sædan seron and his here samod mid swyðlicre bylde . and þær wurdon ofslagene eahta hund wera . and ða oðre ætflugon to philistea lande .

Iudan ege ða asprang wide geond land . and his gebroðra oga ofer ealle ða hæðenan . and ealle þeoda spræcon hu ðegenlice hi fuhton .

Iudea land wæs ða lange butan cyninge on eallum þysum gewinnum . ac hí werode iudas . and eft his gebroðra æfter his geendunge .

[IIII.]

Hwæt ða wearð gecydd þam cyninge Antioche embe iudan sige . and he geswearc ða on mode . and sende ða his here mid anum heah-þegne lísias gehaten on iudea lande . on ðære fyrde wæron feowertig þusenda . and seofon þusenda swyðe gewæpnode . and comon ða mid þrymme to iudeiscum cynne .

Iudas þa gehyrte his geferan mid wordum . and fæston ænne dæg fultumes biddende æt þam ælmihtigan gode . þæt he hi gemundian sceolde . and his halige templ healdan wið þa hæðenan .

Hi ferdon ða gehyrte to þam gefeohte werd . and iudas eft ða spræc to eallum his geferum . beoð ymb-gyrde stranglice to þysum stiðan gewinne . forðan þe us is selre þæt we [swelton] on gefeohte . þonne þas yrmðe geseon on urum | cynne ðus and on urum halig-dome . ac swa swa se heofonlica god wylle dón be ús . gewurðe hit swa .

Beoð gemyndige hu mihtiglice he ahredde ure fæderas íu . wið pharaó þone kyning on ðære readan sǽ on þære ðe he besanc to grunde;

Uton clypian to heofonum þæt god ure helpe . and to-brýte þisne here . þæt þa hæðenan to-cnawon þæt nis nan oðer god þe israhel alyse .

Machabeus þa genealæhte mid lytlum werode . þæt wæron ðreo þusend þe him ða gelæstan wolde .

Hi [bleowon] þa heora byman and bealdlice fuhton . oð þæt þa hæðenan flugon . to fyrlenum landum . and iudas hi to-ðræfde swa swa deor to wuda .

Þær wurdon ofslagene sume þreo þusend . and iudas þa funde þa ða he fram fyrde gecyrde gold . and seolfor . godeweb . and purpuran . and fela oðre here-reaf on þam fyrd-wicum . and hi þancodon ða gode eallre his godnysse .

Eft on ðam oþrum geare geanlæhte lisias fif and sixtig þusenda fyrdendra þegena . and wolde ofer-feohtan þæt iudeisce folc .

Iudas ða machabeus micclum on god truwode . and ferde him togeanes mid þam folce þe he hæfde . þæt wæron twelf þusend wigendra manna . and iudas hine gebæd þa and bletsode his scyppend . gebletsod eart ðu ælmihtig israhela hælend . þu ðe to-bryttest iu þone breman here on dauides handum . to-brýt nu ðas hæðenan on þines folces handum . and mid fyrhte ge-egsa . alege hi mid swurdum ðe lufigendra þæt ealle þe herian . þe gehyrað þinne naman .

Hi slogon þa togædere unslawe mid wæpnum . and þær feollon ða hæþenan fif ðusend ofslagene . and lisias fleah mid þære fyrd-lafe .

| Þa cw̅ iudas to his geferum þæt he ða fylðe wolde adón of þam godes temple . þe se gramlica antiochus þær aræran hét on hæðene wisan . and hi ferdon ða to . and þa fylðe adydon ut of ðam godes huse . and godes lof arærdon æfter moyses . ǽ . mid mycelre blysse . and offrodon gode lác mid geleafan and sange .

[V.]

Iudas ða hine bewende and wan wið ða hæðenan . forðan ðe hi woldon awestan þa iudeiscan . ac iudas hi ofer-feaht and aflymde hi æfre . and heora burga forbernde and hí to bysmore tawode .

Efne ða on sumum dæge . sende man to iudan ærend-gewritu fram israhela ðeode . and cyddon þæt þa hæþenan hæfdon hi besetene . and ofslagen hæfdon sum þusend manna .

Eac on oðre healfe him comon ærendracan to . of galileiscum lande heora lifes orwene . and cyddon þæt ða hæðenan him comon to gehwanon . and woldon hi fordón and adilegian heora eard .

Iudas ða be-fran his geferan rædes . and cw̅ to simone his ge-sceadwisan breþer .

Geceos ðe nu fultum . and far to galilea . and gehelp ðinum magum ðe ða manfullan besittað . ic and ionathas min gingra broðor . farað to galááð to afligenne þa hæðenan .

He gesette ða heafod-menn . to gehealdenne þæt folc . and bead þæt hi ne ferdon to nanum gefeohte ongean ða hæðenan oð þæt he ham come .

Simon ða genam þreo ðusend mid him . and iudas and ionathas eahta þusenda . and symon feaht gelome . and aflymde ða hæðenan . and his magas ahredde wið heora reðnysse . and to lande gebrohte mid mycelre blisse .

Iudas éác ferde | ofer iordanen ða éá geond þæt widgille wæsten . and gewylde ða hæðenan .

He com þa to anre byrig bosór gehaten . on ðære wæron ða hæðenan þe hyndon his magas . þa he ealle ofsloh mid swurdes ecge . and ontende ða burh and tencgde him forð syððan .

Efne ðæs on mergen him com swa mycel mennisc to þæt nan mann ne mihte ða meniu geríman . and begunnon to feohtenne fæstlice mid cræfte . and nyston þæt machabeus mid þam mannum wæs .

Þa ða iudas gehyrde þæra hæðenra gehlyd . and þæs feohtes hream . þa ferde he him hindan to mid ðrym scyld-truman . and sloh ða hæðenan oð þæt hi oncneowon þæt se cena iudas him wið-feohtende wæs . and wendon ða to horsum wiston þæt hí ne mihton machabeo wið-standan .

On þam gefeohte wurdon eahta ðusend wera ofslagene þæs hæðenan folces . and ða oþre æt-flugon .

Iudas ða ferde feohtende wið þa hæðenan . and heora burga forbærnde . and hi bysmorlice ofsloh . þa com timotheus sum cene heretoga mid ormætre fyrde . and gesæt æt anum forda .

Ac iudas him com to caflice mid wæpnum . and ofer-ferdon ðone ford . and fuhton wið þa hæðenan swa swa his gewuna wæs . oð þæt hi wendon him fram and heora wæpna awurpon . and gewendon to anre byrig . ac iudas hi for-bærnde and þa burh samod .

He genam ða his magas of ðam manfullan . mid wifum and mid cildrum . and gewendon him ham . þa wæs þær an mycel burh on heora wege middan . and næs nanes mannes fær on naþre healfe þære byrig buton ðurh þæt port . and hi bædon | ða georne þæt hi mid friðe moston faran þurh ða burh þe hi forbugan ne mihton . ac ða burhware noldon þæs færes him getyðian . ac betyndon þa gatu mid micclum weorc-stanum . and truwodon to þam wealle .

Þa ne mihte iudas mete-leas þær abidan . ac het abrecan þone weall þeah þe he brad wære .

Eodon ða ealle inn . and ofslogon ealle ða hæðenan . and [aweston] ða burh . and wendon him ham-werd oþ þæt hi comon ansunde to lande . and ge-offrodon heora lac þam lifigendan gode . þancigende his gescyldnysse þæt hi ealle gesunde comon eft to heora earde . of swa micelre frecednysse .

Ac heora geféran æt ham fuhton unwærlice wið þa hæðenan leoda ofer iudan leafe þa hwile ðe he ute wæs . and wurdon ða ofslagene wel fela manna . ða ða hi fuhton buton wis-dome .

Seo æftre bóc us sægð þæt hí on sumne sæl fuhton . þa wurdon hi sume beswicene mid gitsunge swa þæt hi feoh naman . and fracodlice [behyddon] on heora bosmum of ðam deofollicum biggencgum ongean godes . ǽ . and hi ealle ðær feollon þe þæt feoh behyddon on ðam gefeohte ofslagene . and heora geferan fundon þæt feoh on heora bosmum . and cwædon þæt god sylf ge-swutelode heor unriht . and heredon godes dom þe heora digle geopenode .

Iudas gegaderode ða godne dæl feos . þæt wæron twelf þusend scyllinga eall hwites seolfres . and sende to hierusalem for heora synnum to offrigenne heora sawle to alysednysse þe ðær ofslagene wæron æwfæstlice under-standende be ure ealra æriste . buton hé gélyfde þæt hi æfter langum fyrste of | deaðe arísan sceoldon þe ðær ofslagene wæron . elles he offrode on idel his lác . ac he soðlice besceawode . þæt ða ðe mid soðre arfæstnysse on deaþe ge-endiað . þæt hi mid drihtne habbað þa selestan gife on þam soðan life .

Hit is halig geðoht . and halwende to gebiddenne for ðam forð-farendum þæt hi fram synnum beon alysede .

[VI.]

Hit sægð on þære æftran béc machabeorum þus . þæt timotheus ðe ær fleah æt ðam forda fram iudan . þæt he eft gegaderode oþerne here him to . and wolde mid wæpnum gewyldan þa iudeiscan . and com ða mid fyrde to gefeohte gearu . and machabeus se cena clypode to gode . and his geferan eac swa fultumes biddende . eodon þa of ðære byrig ge-bylde þurh god . and hi fengon togadere fæstlice mid wæpnum .

Hwæt ða færlice comon fif englas of heofonum . ridende on horsum mid gyldenum gerædum . and twægen þæra engla on twa healfe iudan feohtende wæron . and hine eac bewerodon . and hi ealle fif fuhton mid iudan sceotiende heora flán and fyrene ligettas on ða hæðenan leoda . oð þæt hi licgende swulton twentig þusend manna and six hund ofslagene .

Timotheus þa fleah mid fyrhte for-numen into anre byrig . and him æfter ferde iudas mid fultume . and fuhton wið-utan oð þæt hi ofer-wunnon and gewyldon þa burh . and timotheum acwealdon þær ðær he becropen wæs . and his broðor samod mid swurdes ecge .

Æfter þysum dædum hi þancodon drihtne . mid lofsangum and andetnyssum eallra þæra mærða þe he ðam iudeiscum gedyde for-oft . and him sige forgeaf . and siðe|don ða hám .

Gif hwa nu wundrige hu hit gewurþan mihte þæt englas sceoldon ridan on gerædedum horsum . þonne wite he to soþan þæt us secgað gehwǽr ða halgan godes béc þe ne magon beon lease . þæt englas oft comon cuðlice to mannum swilce on horse ridende . swa swa we hér rehton .

Þa Iudeiscan wæron ða dyreste gode . on ðære ealdan . ǽ . forðan þe hi ana wurðodon þone ælmihtigan god mid biggencgum symle . oþ þæt crist godes sunu sylf wearð acenned . of menniscum gecynde of þam Iudeiscum cynne . of marian þam mædene butan menniscum fæder .

Þa noldon hi sume gelyfan þæt he soð god wære . ac syrwdon embe his lif . swa swa he sylf geðafode;

Wæron swa-þeah manega of þam [man]cynne . gode . ge on ðære ealdan . ǽ . ge eac on þære niwan . heah-fæderas . and witegan . and halige apostolas . and fela ðusenda þe folgiað criste . þeah þe hi sume wunian wiðer-werde oþ þis .

Hi sceolon swa-ðeah ealle on ende gelyfan . ac ðær losiað to fela on þam fyrste betwux . for heora heard-heortnysse wið þone heofonlican hælend .

[VII.]

Betwux þysum ferde se fore-sæda antiochus to persiscre þeode mid micclum þrymme . wolde þær ofer-winnan sume welige burh . ac he wearð þanon afliged and fracodlice ætbærst . and mid micelre angsumnysse of þam earde gewende to babilonian werd . and him wearð þa gecydd hu iudas ofer-feaht his fynd mid wæpnum . and hu he geclænsod hæfde þæt halige godes templ fram eallum þam fylðum þe he fyrnlice þær arærde . wearð þa geang|sumod and eac ge-untrumod forðam þe him god gram wæs . and he grimetode egeslice . secgende and seðende þæt him swa gelumpen wæs . forðan ðe he godes templ . tawode to bysmore . and ða geleaffullan wolde of heora lande adylegian .

Him weollon þa wurmas of ðam [gewitnodan] lichaman . and he stánc swa fúle þæt man hine ferian ne mihte . and he ða yfele and earmlice ge-endode on ælfremedom (sic) earde to þam ecan witum . and his sunu eupator æfter him rixode .

Se wearð eac ongebroht þæt he ofslean wolde þa geleaffullan iudei . þe gelyfdon ða on god .

Hi gelyfdon þa on þa ealdan wisan . on þone ælmihtigan god þeah ðe hi sume wið-socon siðþan þone hælend . and eac swa ofslogon swa swa he sylf wolde .

Hwæt ða eupatór antioches sunu gegaderode his fyrde fyrran and nean . and sende hund-teontig þusenda gangendra manna . and twentig þusenda gehorsedra manna . and þrittig ylpas ealle getemode . and to wige gewenode mid wundorlicum cræfte .

Fif hund gehorsedra manna ferdon mid ælcum ylpe . and on ælcum ylpe wæs an wig-hus getimbrod . and on ælcum wig-huse wæron þrittig manna feohtende [mid cræfte] . and mid ge-cneordnysse farende

Sumum menn wile þincan syllic þis to gehyrenne . forþan þe ylpas ne comon næfre on engla lande .

Ylp is ormæte nyten mare þonne sum hus . eall mid banum befangen binnan þam felle butan æt ðam nauelan . and he næfre ne lið .

Feower and twentig monða gæð seo modor mid folan . and þreo hund geara hi libbað gif hi alefede | ne beoð . and hi man mæg wenian wundorlice to ge-feohte .

Hwæl is ealra fixa mæst . and ylp is eallra nytena mæst . ac swa-þeah mannes gescead hi mæg gewyldan .

Þa hæðenan ða ferdon to ðam gefeohte swyðe . and mid mór-berium gebyldon þa ylpas . forðan þe mór-berian him is metta leofost .

Þær wæs swyðe egeslic here þæra hæðenra manna . ac swa-ðeah iudas heom eode to mid wige . and ofsloh þær sona six hund wera . and an his geferena eleazarus hatte arn to anum ylpe þe ðær [ænlicost] [MS. enlicost] wæs . wende þæt se cyning wære on ðam wig-huse ðe he bær . he arn mid atogenum swurde betwux þam eorode middan . and sloh æfre on twa healfa þæt hi sweltende feollon oð þæt he to þam ylpe com . and eode him on under . stang ða hine æt ðam nauelan þæt hi lagon ðær begen . heora egðer oðres slaga . and iudas siððan ge-wende into hierusalem mid ealre his fyrde . and weredon hi cenlice wið þone onwinnendan here . oð þæt se cynincg feng to friðe wið hi be his witena ræde . ac he hit hraðe tobræc .

He cyrde ða ham-werd mid his here-lafe . and hine ofsloh sona sum sigefæst þegen demetrius gehaten . and hæfde his rice on antiochian byrig . and þær abutan gehwær .

[VIII.]

Hwæt þa alchimus se arleasa sacerd wrehte mid leasungum his leode to þam cyninge . and se cyning demetrius þam manfullan gelyfde . and geswencte ða iudeiscan . oð þæt he sende him to nicánor his ealdor-man þæt he hi ealle fordyde .

Nicánor þa ferde mid fyrde to hierusalem . and sende to iudan mid swicdo|me and cw̅ .

Ne com ic for nanum gefeohte ac for freondscipe to eow . and cyste ða iudan . and his cempan wæron gearwe to genimenne iudan on bendum .

Iudas þa under-geat heora wælhreowan swicdom . and wende him fram sona . and nolde hine geseon .

Nicánor þa oncneow þæt his facn cuð wæs . began ða to feohtenne færlice wið iudan . oð þæt þær feollon of his fyrde fif ðusend manna . and þa oðre ætflugon afyrhte for iudan .

Nicanor þa sceawode salomones templ . and swor þurh his godas þæt he þæt godes hus wolde mid fyre forbærnan butan him man betæhte iudan gebundene to bismorlicum deaðe . wende him swa awæg wodlice geyrsod .

Hwæt ða sacerdas ða mid swyðlicre heofunge . bædon þone ælmihtigan god . þæt he his agen hus gescylde wið þone arleasan . and hine ardlice fordyde .

Nicanor þa eft genam oðre fyrde of sirian . wolde his gebeot mid weorcum gefremman . and iudas him com to . mid þrim ðusend cempum . and gebæd hine to gode gebigedum limum þus .

Drihten . þu þe asendest þinne scinende engel . þa ða syrian kynincg sende þurh his heretogan on ærend-gewritum þé tallice word . and se engel ofsloh þa on anre nihte of heom an hund þusend manna . and hund-eahtatig þusenda . to-brýt nu swa ic bidde þisne breman here ætforan urum gesihðum . þæt men magon geseon þine mihte on heom .

Hi fengon þa togædere fæstlice mid wæpnum . and nicánor æt fruman feoll þær ofslagen . and his here awearp heora wæpna and flugon . ac iu|das him folgode fæstlice mid wæpnum . and bicnode gehwanon mid blawunge him fultum . oð þæt hi man gynde ongean eft to iudan . and hi ealle ofslogon þæt ðær an ne belaf .

Namon þa heora wæpna and heora gewæda mid heom . and nicanóres heafod and his swyðran hand . and setton þa to tacne for his teon-rædene . and þancodon þa gode þearle mid wurðmynte .

Wunodon ða on sibbe sume hwile æfter ðam . and iudas þa sende mid sibbe to rome gecorene ærendracan wolde [cuðlæcan] wið hi . forðan þe romanisce witan wæron ða mihtige . and rædfæste on weorcum . and ofer-wunnan heora fynd .

[VIIII.]

Hit wearð gecydd syððan þam cynincge demetrio þæt nicanor feol and eall his folc mid him . þa wolde he git sendan and ofslean þa iudeiscan . and funde ða bachidem se wæs mid bealuwe afylled . and alchimum mid him þone arleasan sacerd . and sende hi mid ge-fylce to iudeiscum folce .

Hi comon ða færlice mid gefeohte to iudan and his ge-feran eargodon butan eahta hund mannum þe him mid fuhton wið þone feondlican here .

Þa cwædon his geferan þæt hi fleon woldon . forðan þe heora werod wæs gewanod mid þam fleame . and woldon heom beorgan wið þone breman here .

Þa andwyrde iudas . swa swa he eall cene wæs .

Ne ge-wurðe hit na on life . þæt we alecgan ure wuldor mid earh-licum fleame . ac uton feohtan wið hí . and gif god swa fore-sceawað . we sweltað on mihte for urum gebroðrum butan bysmorlicum fleame .

Hi comon þa to-gædere . and begunnon to feohtenne | on twam gefylcum forð eallne ðone dæg . and iudas þa beseah to þære swyðran healfe þæt þa wæron strængran . and stop ðyder sona mid ðam anrædystum mannum þe him mid fuhton and todrifon þone ende . ac him æfter eode þæt oðer gefylce . mid gefeohte hindan and feollon ða on twa healfe on þam gefeohte manega and iudas eac feoll . and þa oðre ætflugon .

Þa gelæhton his gebroðra his lic of ðam wæle . and bebyrigdon on modín to mathathian his fæder . and ealle folc hine beweop on ða ealdan wisan .

Ne synd swa-þeah awritene þæs ðe wyrd-writeras sæcgaþ . ealle iudan gefeoht for his freonda ware . and ealle ða mihte þe he mærlice gefremode his folce to gebeorge . swa swa us béc secgað .

Menig-fealde wæron his micclan gefeoht . and he is eall swa halig on ðære ealdan gecyðnysse . swa swa godes gecorenan on ðære godspel-bodunge . forðan þe he æfre wan for willan þæs ælmihtigan .

On þam dagum wæs alyfed to alecgenne his fynd . and swiþost ða hæðenan þe him hetole wæron . and se wæs godes ðegen þe ða swiðost feaht wið heora onwinnendan to ware heora [leoda] . ac crist on his tocyme us cydde oðre ðincg . and het us healdan sibbe . and soðfæstnysse æfre . and we sceolon winnan wið þa wælhreowan fynd . þæt synd ða ungesewenlican . and þa swicolan deofla þe willað ofslean ure sawla mid leahtrum . wið ða we sceolon winnan mid gastlicum wæpnum . and biddan us gescyldnysse simle æt criste . þæt we moton ofer-winnan þa wælhreowan leahtras . and þæs | deofles tihtinge . þæt he us derian ne mæge .

Þonne beoð we godes cempan on ðam gastlican gefeohte . gif we ðone deofol forseoþ þurh soðne geleafan . and þa heafod-leahtras þurh gehealtsumnysse . and gif we godes willan mid weorcum gefremmað .

 ealde godes folc sceolde feohtan þa mid wæpnum . and heora gewinn hæfde haligra manna getacnunge . þe to-dræfað þa leahtras and deofla heom fram on ðære niwan gecyðnysse þe crist sylf astealde .

Secgað swa-þeah lareowas þæt synd^on feower cynna gefeoht . iustum . þæt is rihtlic . iniustum . unrihtlic . ciuile . betwux ceaster-gewarum . Plusquam ciuile . betwux siblingum .

Iustum bellum . is rihtlic gefeoht wið ða reðan flot-menn . oþþe wið oðre þeoda þe eard willað fordón .

Unrihtlic gefeoht is þe of yrre cymð .

 þridde gefeoht þe of geflite cymð . betwux ceaster-gewarum is swyðe pleolic . and þæt feorðe gefeoht þe betwux freondum bið . is swiðe earmlic and endeleas sorh .

[X.]

Israhela folc þa anmodlice geceas ionatham his broþor biddende þæt he wære heora heafod . and here-toga wið þa hæþenan þeoda . and he feng ða to ealdor-dome . swa swa hi ealle bædon . and werode hi manega gear wið þone onwinnendan here . and wiþ bachidem feaht þe his broþor ofsloh . and þǽr síge gefór . and ofslóh þær an þusend;

Þa wolde alchimus se arleasa sacerd to-brecan godes templ mid teonfullum graman . ac hine sloh god sona mid swyðlicum paralisyn . swa þæt he dumb wæs . and to deaðe | gebroht . and mid mycclum tintregum his teonfullan gast of ðam lichaman forlét to langsumum witum .

Ionathas wunode on wurðmynte ða lange . and cynegas hine wurðodon mid wordum and gifum . and he sige geferde on manegum gefeohtum . and æfre wæs winnende embe godes willan . and eac his lif forlét for his leode ware .

Symon þa syððan snoterlice geheold þone iudeiscan eard æft̅ ionathan his breðer . and on eallum his dagum ne derode him nan man . ac wunodon æfre on sibbe on symones dæge . oð þæt he on ende eac wearð ofslagen swa swa his gebroðra for soðfæstum biggencgum . and for heora leoda ware . ac hi lybbað on ecnysse mid þam heah-fæderum for heora hylde wið god .

Iohannes wæs geciged þæs symones sunu se wæs æfter his fæder ðæs folces heretoga . and hi hlysfullice geheold wið þa hæðenan ðeoda on eallum his life . and þæt land bewerode .

[XI.]

We habbað forlætan for þysre langsuman race . an wundorlic ðincg . þe we willaþ secgan nu .

On ðam dagum þe hierusalem and eall iudea-land wunode on sibbe . þa wæs þær sum sacerd onias gehaten haliges lifes mann . and seleucus cynincg sende fela laca . on golde . and on seolfre . to þam godes temple of asian lande þæs easternan rices . and wide of middan-earde man wurðode þæt templ . and onías se arwurða wolde mid ðam lacum widewan and steop-bearn bewerian wið hunger .

Þa ferde sum leogore and belæwde þæt feoh . sæde þam ealdor-menn appollonius | geciged . þæt þæt feoh mihte becuman ðam cyninge to handa . and se ealdor-mann sona hit sæde þam cyninge .

Hwæt ða se cynincg sende sona ænne þegen heliodorus gehaten to ðam halgan temple . þæt he feccan sceolde þæt feoh mid reaf-lace .

He com þa mid werode . and wolde þæt feoh habban . and se sacerd onías . sæde þæt hit wære widewena big-leofa . and wanhafolra manna . of godra manna ælmyssan ðam ælmihtigan to lofe . and þa sacerdas feollon ætforan þam weofode biddende þone ælmihtigan god þæt he gehulpe his ðeowum .

Heliodorus ða gemynte þa maðmas to genimenne . ac þær wearð gesewen swutol godes wundor swa þæt his geferan feollon geunmihte . and mid fyrhte fornumene færlice þurh god . and ðær com ridende sum egeful ridda . and him mid siðedon twægen scinende englas mid wundorlicre wlite swa he sylf wæs geglenged . and þæt heofonlice hors þe se heah-engel on sæt wearp sona adune þone dyrstigan heliodorum . and þa twegen ænglas hine teartlice beoton on twa healfe him standende oð þæt he stille læg orwene his lifes .

Se ðe ær mid gebeote and mid micclum þrymme þrang into ðam temple .

He læg ða dumb swa oð deaþ beswungen . and his frynd bædon þa þone fore-sædan onian . þæt he his life geðingode æt þam lifigendan gode on þære frecednysse þe he on befeallen wæs .

Onias þa eode and offrode him lac fore þam ælmihtigan gode on þa ealdan wisan . and bæd þæt he miltsode þæs mannes nytennysse . and þa englas þa hwile heliodorum gespræcon . | sædon þæt he sceolde þam sacerde onian mycclum þancian þæt he moste lybban . and heton hine cyðan on his cyððe æt ham . godes wundor on him . and wendon þa him fram .

Heliodorus þa ge-edcucode and geoffrode his lac þam almihtigan gode mid incundre heortan þæt he cucu beon moste . and þancode onian . and þanon ferde swa mid ealre his fyrde . and þæs ælmihtigan mihte his hlaforde cydde . and his leodum eallum swa swa he sylf geseah . and hu he beswungen wæs .

Eft ða se cynincg axode heliodorum and cw̅ .

Hwæne mage we sendan to þam foresædan feo .

Þa cw̅ heliodorus .

Gif ðu hæfst ænigne feond send þone to þam feo . and he bið wel beswungen . oððe gewisslice dead . forðan ðe se ælmihtiga god mundað þa stowe . and þa slihð and gescynt þe þær sceaðian willað .

Oft is geswutelod hu god gescylde þæt folc wið heora wiþer-sacan gif hi wurðodon hine . and swa oft swa hi gebugon fram his biggengcum ahwar . þonne wurdon hi gescynde . and swyðe gewitnode .

Sy wuldor and lof þam wel-willendan gode . á on ecnysse we cweþað . Amen.

Item alia.

qui sunt oratores, laboratores, bellatores.

Is swa-ðeah to witenne þæt on þysre worulde synd þreo endebyrdnysse on annysse gesette . þæt synd laboratores . oratores . bellatores . laboratores synd þa þe urne bigleafan beswincað . oratores synd þa ðe us to gode geðingiað . bellatores synd þa ðe ure burga healdað . and urne eard be-weriað wið onwinnendne here .

Nu swincð se yrðlincg embe urne bigleofan . and se woruld-cempa sceall win|nan wið ure fynd and se godes þeowa sceall symle for us gebiddan . and feohtan gastlice . wið þa ungesewenlican fynd .

Is nu for-þy mare þæra muneca gewinn wið þa ungesewenlican deofla þe syrwiað embe us . þonne sy þæra woruld-manna þe winnað wiþ ða flæsclican . and wið þa gesewenlican [gesewenlice] feohtað .

Nu ne sceolon þa woruld-cempan to þam woruld-licum gefeohte þa godes þeowan neadian fram þam gastlican gewinne . forðan þe him fremað swiðor þæt þa ungesewenlican fynd beon ofer-swyðde þonne ða gesewenlican . and hit bið swyðe derigendlic þæt hi drihtnes þeowdom forlætan . and to woruld-gewinne bugan . þe him naht to ne gebyriað .

   Iulianus se wiðersaca and se wælhreowa casere wolde neadian preostas to woruldlicum gecampe . and eac þa halgan munecas . and het hi on cwearterne gebringan .

Þa wearð appollonius se egiptisc[a] abbod on þam cwearterne belocen . mid his geleaffullum gebroðrum . ac godes engel him com to to þam cwearterne nihtes . mid heofonlicum leohte . and un-lǽc þæt cweartern .

Eac se hundredes ealdor þe hi þær-inne beleac cóm on ærne mergen mid mycclum þrymme . and sæde þæt his hus feolle færlice mid eorð-styrunge swa þæt his leofestan menn . þær lagon ofhrorene . and he bæd þa halgan þa þæt hi þanon ferdon .

And hi ða mid lof-sangum siþedon eft to þam westene .

Godes þeowas sceolon unscæððignysse healdan . swa swa crist astealde þurh hine sylfne þa bysne . þa þa he het petrum behydan his swurd . and gehælde þurh his mihte | þæs mannes eare þe petrus of asloh . and geswutelode his godnysse .

Nu se munuc þe bihð to benedictes regole . and forlæt ealle woruld-ðingc . hwi wile he eft gecyrran to woruldlicum wæpnum . and awurpan his gewinn . wið þa ungesewenlican fynd his scyppende to teonan .

Se godes þeowa ne mæg mid woruld-mannum feohtan . gif he on þam gastlican gefeohte . forð-gang habban sceall .

Næs nan halig godes þeowa æfter þæs hælendes þrowunga . þe æfre on gefeohte his handa wolde afylan . ac hi for-bæron ehtnysse arleasra cwellera . and heora lif sealdon mid unscæþþignysse . for godes geleafan . and hi mid gode nu lybbað . forðan þe hí furþon noldon . ænne fugel acwellan .

Chapter 26

Non. Ag. nat̅l̅ sci̅ oswaldi regis et martyris.

Æfter ðan ðe augustinus to engla lande be-com . wæs sum æðele cyning Oswold gehaten on norðhymbra lande gelyfed swyþe on god . se ferde on his iugoðe fram freondum and magum to scot-lande on sǽ . and þær sona wearð gefullod and his geferan samod þe mid him siþedon .

Betwux þam wearð ofslægen eadwine his eam norðhymbra cynincg on crist ge-lyfed fram brytta cyninge ceadwala geciged . and twegen his æftergengan binnan twam gearum . and se ceadwalla sloh and to sceame tucode þa norðhymbran leode æfter heora hlafordes fylle . oð þæt oswold se eadiga his yfelnysse adwæscte .

Oswold him cō to . and him cenlice wiðfeaht mid lytlum werode . ac his geleafa hine getrymde . and crist him gefylste to his feonda slege .

Oswold þa arærde ane rode sona gode to wurðmynte ær þan þe he to ðam gewinne come . and clypode | to his geferum .

Uton feallan to ðære rode . and þone ælmihtigan biddan þæt he us ahredde wið þone modigan feond þe us afyllan wile . god sylf wat geare þæt we winnað rihtlice wið þysne reðan cyning . to ahredenne ure leode .

Hi feollon þa ealle mid oswolde on gebedum . and syþþan on oðerne mergen eodon to þam gefeohte . and gewunnon þær sige swa swa se wealdend heom uðe . for oswoldes geleafan . and alédon heora fynd þone modigan cedwallan . mid his micclan werode . þe wende þæt him ne mihte nan werod wiðstandan .

Seo ylce rod siððan þe oswold þær arærde on wurðmynte þær stod . and wurdon fela gehælde untrumra manna and eac swilce nytena þurh ða ylcan rode swa swa us rehte beda .

Sum man feoll on íse þæt his earm tobærst . and læg þa on bedde gebrocod forðearle oð þæt man him fette of ðære foresædan rode sumne dæl þæs meoses þe heo mid beweaxen wæs . and se adliga sona on slæpe wearð gehæled on ðære ylcan nihte þurh oswoldes geearnungum .

Seo stow is gehaten heofon-feld on englisc . wið þone langan weall þe þa romaniscan worhtan þær þær oswold oferwann þone wælhreowan cynincg . and þær wearð siþþan aræred swiðe mære cyrce gode to wurðmynte þe wunað á on ecnysse .

Hwæt ða oswold ongann . embe godes willan to smeagenne . sona swa he rices geweold . and wolde gebigan his leoda to geleafan . and to þam lifigendan gode . sende ða to scotlande . þær se geleafa wæs ða . and bæd ða heofodmenn þæt hi his benum getiþodon . and him sumne lareow sendon þe his leoda mihte to gode geweman . and wearð þæs getiþod .

Hi sendon þa | sona þam gesæligan cyninge sumne arwurðne bisceop aidan gehaten . se wæs mæres lifes man on munuclicre drohtnunge . and he ealle woruld-cara awearp fram his heortan nanes þinges wilnigende butan godes willan .

Swa hwæt swa him becom of þæs cyninges gifum . oððe ricra manna þæt he hraðe dælde . þearfum . and wædlum . mid wellwillendum mode .

Hwæt ða oswold cyning his cymes fægnode . and hine arwurðlice underfeng . his folce to ðearfe . þæt heora geleafa wurde awend eft to gode fram þam wiþersæce þe hi to gewende wæron .

Hit gelamp þa swa þæt se geleaffulla cyning gerehte his witan on heora agenum gereorde þæs bisceopes bodunge mid bliþum mode . and wæs his wealhstod for-þan þe he wel cuþe scyttysc . and se bisceop aidan ne mihte gebigan his spræce to norðhymbriscum gereorde swa hraþe þa git .

Se biscop þa ferde bodigende geond eall norðhymbra lande geleafan . and fulluht . and þa leode gebigde to godes geleafan . and him wel gebysnode mid weorcum symle . and sylf swa leofode swa swa he lærde oðre .

He lufode forhæfednysse . and halige rædinge . and Iunge men teah georne mid lare . swa þæt ealle his geferan þe him mid eodon sceoldon sealmas leornian . oððe sume rædinge . swa hwider swa hi ferdon . þam folce bodigende .

Seldon he wolde ridan . ac siðode on his fotum . and munuclice leofode betwux ðam læwedum folce . mid mycelre gesceadwisnysse . and soþum mægnum .

Þa wearð se cynincg oswold swiðe ælmes-georn . and eadmod on þeawum . and on eallum þingum cystig . and | man ahrærde cyrcan on his rice geond eall . and mynsterlice gesetnyssa mid micelre geornfulnysse .

Hit gelamp on sumne sǽl þæt hi sæton ætgædere . oswold . and aidan . on þam halgan easterdæge . þa bær man þam cyninge cynelice þenunga on anum sylfrenan disce and sona þa inn eode an þæs cyninges þegna þe his ælmyssan bewiste . and sæde þæt fela þearfan sætan geond þa strǽt . gehwanon cumene to þæs cyninges ælmyssan .

Þa sende se cyning sona þam þearfum þone sylfrenan disc mid sande mid ealle . and het toceorfan þone disc . and syllan þam þearfum heora ælcum his dæl . and man dyde ða swa .

Þa genam aidanus se æðela bisceop þæs cyninges swyþran hand mid swiðlicre blysse . and clypode mid geleafan þus cwæðende him to .

Ne forrotige on brosnunge þeos gebletsode swyðre hand and him eac swa geeode . swa swa aidanus him bæd . þæt his swiðre hand is gesundful oð þis .

Oswoldes cynerice wearð gerymed þa swyðe . swa þæt feower þeoda hine underfengon to hlaforde . peohtas . and bryttas . Scottas and angle . swa swa se ælmihtiga god hi geanlæhte to ðam . for oswoldes geearnungum þe hine æfre wurðode .

He fulworhte on eferwíc þæt ænlice mynster þe his mæg eadwine ær begunnon hæfde . and he swanc for heofonan rice mid singalum gebedum . swiþor þonne he hogode hu he geheolde on worulde þa hwilwendlican geþincðu . þe he hwonlice lufode .

He wolde æfter uhtsange oftost hine gebiddan . and on cyrcan standan on syndrigum gebedum of sunnan upgange mid swyðlicre onbryrdnysse . and swa | hwær swa he wæs he wurðode æfre god . up-awendum handbredum wiþ þæs heofones weard .

On þam ylcan timan com eac sum bisceop fram rome byrig birinus gehaten . to westsexena kyninge cynegyls gehaten . se wæs ða git hæðen and eall westsexena land .

Birinus witodlice gewende fram rome be ðæs papan ræde þe ða on rome wæs . and behet þæt he wolde godes willan gefremman . and bodian þam hæþenum þæs hælendes naman . and þone soðan geleafan on fyrlenum landum .

Þa becom he to westseaxan þe wæs ða gyt hæþen . and gebigde þone cynincg kynegyls to gode . and ealle his leode to geleafan mid him .

Hit gelamp þa swa þæt se geleaffulla oswold norðhymbra cyning wæs cumen to cynegylse . and hine to fulluhte nam . fægen his gecyrrednysse .

Þa geafon þa cynegas . cynegyls and oswold . þam halgan birine him to biscop-stole þa burh dorcanceaster . and he þær-binnan wunode godes lof arærende . and geriht-læcende þæt folc mid lare to geleafan to langum fyrste . oð þæt he gesælig siþode to criste . and his lic wearþ bebyrged on ðære ylcan byrig . oð þæt hædde bisceop eft his bán ferode to wintanceastre . and mid wurðmynte gelogode binnan ealdan mynstre . þær man hine wurðað gyt .

Hwæt þa oswold cyning his cynedom geheold hlisfullice for worulde and mid micclum geleafan . and on eallum dædum his drihten arwurðode . oð þæt he ofslagen wearð for his folces ware . on þam nigoðan geare þe he rices geweold . þa þa he sylf wæs on ylde eahta and þrittig geara .

Hit gewearð swa be þam þæt him wann on penda myrcena cyning . þe æt | his mæges slege ǽr eadwines cyninges ceadwallan fylste . and se penda ne cuðe be criste nan þincg . and eall myrcena folc wæs ungefullod þa git .

Hi comon þa to gefeohte to maserfelda begen . and fengon to-gædere oð þæt þær feollon þa cristenan . and þa hæðenan genealæhton to þam halgan oswolde .

Þa geseah he genealecan his lifes geendunge . and gebæd for his folc þe þær feallende sweolt . and betæhte heora sawla and hine sylfne gode . and þus clypode on his fylle .

God gemiltsa urum sawlum .

Þa het se hæþena cynincg his heafod of-aslean . and his swiðran earm . and settan hi to myrcelse .

Þa æfter oswoldes slege feng oswig his broðor to norðhymbra rice . and rád mid werode to þær his broðor heafod stod on stacan gefæstnod . and genam þæt heafod . and his swiðran hand . and mid arwurðnysse ferode to lindisfarnea cyrcan . þa wearð gefylled swa we her foresædon þæt his swiðre hand wunað hal mid þam flæsce . butan ælcere brosnunge swa se bisceop gecwæð .

Se earm wearþ geléd arwurðlice on scrine of seolfre asmiþod . on sce̅ petres mynstre binnan bebban-byrig . be þære sæ strande . and lið þær swa andsund swa he of-aslagen wæs .

His broðor dohtor eft siððan on myrcan wearð cwén . and geaxode his bán . and gebrohte hi to lindes-ige to bardan-ige mynstre . þe heo micclum lufode . ac þa mynstermenn noldon for menniscum gedwylde þone sanct underfon . ac man sloh an geteld ofer þa halgan bán binnan þære licreste .

Hwæt þa god geswutelode þæt he halig sanct wæs . swa þæt heofonlic leoht ofer þæt geteld astreht stód up to | heofonum swilce healic sunnbeam ofer ealle ða niht . and þa leoda beheoldon geond ealle þa scire swiðe wundrigende .

Þa wurdon þa mynster-men micclum afyrhte . and bædon þæs on mergen þæt hí moston þone sanct mid arwurðnysse underfón . þone þe hi ær forsocon . þa ðwoh man þa halgan bán and bær into þære cyrcan arwurðlice on scrine . and gelogodon hí upp . and þær wurdon gehælede þurh his halgan geearnunge fela mettrume menn fram mislicum coþum .

 wæter þe man þa bán mid aþwóh binnan þære cyrcan wearð agoten swa on anre hyrnan . and seo eorðe siþþan þe þæt wæter underfeng wearð manegum to bote .

Mid þam duste wurdon afligde deofla fram mannum . þa þe on wodnysse ær wæron gedrehte .

Eac swilce þær he feol on þam gefeohte ofslagen men namon ða eorðan to adligum mannum . and dydon on wæter wanhalum to þicgenne . and hi wurdon gehælede . þurh þone halgan wer .

Sum wegfarende man ferde wið þone feld . þa wearð his hors gesicclod . and sona þær feol . wealwigende geond ða eorðan wodum gelicost . mid þam þe hit swa wealweode geond þone widgillan feld . þa becom hit embe lang þær se cynincg oswold on þam gefeohte feoll swa swa we ær foresædan . and hit sona aras . swa hit hrepode . þa stowe . hal eallum limum . and se hlaford þæs fægnode .

Se ridda þa ferde forð on his weg þider hé gemynt hæfde . þa wæs þær . an mæden licgende on paralisyn lange gebrocod .

He began þa to reccenne hu him on rade getimode . and mann ferode þæt mæden to þære foresædan stowe .

Heo | wearð ða on slæpe and sona eft awóc ansund eallum limum fram þam egeslican broce . band þa hire heafod and bliðe ham ferde . gangænde on fotum swa heo gefyrn ær ne dyde .

Eft siððan ferde eac sum ærendfæst ridda be ðære ylcan stowe . and geband on anum claþe of þam halgan duste þære deorwurðan stowe . and lædde forð mid him þær he fundode to . þa gemette he gebeoras bliðe æt þam huse . he aheng þa þæt dust on ænne heahne post and sæt mid þam gebeorum blissigende samod .

Man worhte þa micel fyr to middes ðam gebeorum . and þa spearcan wundon wið þæs rofes swyðe . oð þæt þæt hus færlice eall on fyre wearð . and þa gebeoras flugon afyrhte aweg .

 hus wearþ ða forburnon buton þam anum poste þe þæt halige dust on ahangen wæs . se post ana ætstod ansund mid þam duste . and hi swyðe wundrodon þæs halgan weres geearnunga þæt þæt fyr ne mihte þa moldan forbærnan . and manega menn siððan gesohton þone stede heora hæle feccende . and heora freonda gehwilcum .

Þa asprang his hlisa geond þa land wide . and eac swilce to irlande and eac suþ to franclande swa swa sum mæssepreost be anum men sæde .

Se preost cwæð þæt an wer wære on irlande gelæred . se ne gymde his lare . and he lithwon hogode embe his sawle þearfe . oððe his scyppendes beboda . ac adreah his lif on dyslicum weorcum . oð ðæt he wearð geuntrumod and to ende gebroht .

Þa clypode he þone preost þe hit cydde eft þus . and cwæð him to sona mid sarlicre stemne .

Nu ic sceall geendian earmlicum deaþe . and to helle faran . for fracodum dædum .

Nu | wolde ic gebetan gif ic abidan moste . and to gode gecyrran and to godum þeawum . and min lif awendan eall to godes willan . and ic wat þæt ic ne eom wyrðe þæs fyrstes buton sum halga me þingie to þam hælende criste .

Nu is us gesæd þæt sum halig cyning is on eowrum earde oswold gehaten nu gif þu ænig þincg hæfst of þæs halgan reliquium . syle me ic þe bidde .

Ða sæde se preost him .

Ic hæbbe of þam stocce þe his heafod on stod . and gif þu gelyfan wylt þu wurþest hál sona .

Hwæt þa se mæsse-preost þæs mannes of-hreow . and scof on halig wæter of þam halgan treowe sealde þam adligan of to supenne . and he sona gewyrpte . and syððan leofode lange on wurulde . and gewende to gode mid eallre heortan and mid halgum weorcum . and swa hwider swa he com he cydde þas wundra .

For-þy ne sceall nan mann awægan þæt he sylf-wylles behæt þam ælmihtigan gode . þonne he adlig bið þe læs þe he sylf losige . gif he alihð gode þæt .

Nu cwæð se halga beda þe ðas boc gedihte . þæt hit nan wundor nys . þæt se halga cynincg untrumnysse gehæle nu he on heofonum leofað . for ðan þe he wolde gehelpan þa þa he her on life wæs . þearfum and wannhalum . and him bigwiste syllan .

Nu hæfð he þone wurðmynt on þære ecan worulde . mid þam ælmihtigan gode for his godnysse .

Eft se halga cuðberht þa þa he git cnapa wæs . geseah hu godes ænglas feredon aidanes sawle þæs halgan bisceopes . bliðe to heofonum to þam ecan wuldre þe he on worulde geearnode .

Þæs halgan oswoldes bán wurdon eft gebroht æfter manegum gearum to myrcena lande into gleawceastre . and god þær geswute|lode oft feala wundra þurh þone halgan wer .

Sy þæs wuldor þam ælmihtigan gode . ðe on ecnysse rixað a to worulde . amen.

Chapter 27

xuiii. kl̅. octobris. exaltatio sce̅ crucis.

We wurðiað mid lof-sangum for ures geleafan trymminge twegen dagas on geare drihtne to wurðmynte for þære halgan rode siððan heo afunden wæs .

Þa iudeiscan hi behyddon mid hetelicum geðance . noldon þæt se maðm wurde mannum to frofre . ac seo eadige helena . hi eft þær afunde þurh cristes onwrigennesse swa swa he mid wundrum geswutelode . and to-dælde þa rode swa swa drihten hire gewissode . and forlet þa ænne dæl on þære ylcan byrig . þe crist on þrowode . swa swa us cyþað gewritu . mid seolfre bewunden . and wende ham siððan mid þam oþrum dæle þæs deorwurþan treowes . to hire leofan sunu his geleafan to getrymmenne .

Nu freolsige we þone dæg þe heo on afunden wæs . þam hælende to wurðmynte þe wolde on hire þrowian . se bið ofer eastrum . on ymbryne þæs geares . and we healdað on hærfest mid halgum þenungum oþerne freols-dæg on þam þe heo geferod wæs eft to hierusalem swa swa we her æfter secgað .

Hit gewearð for yfelnysse swa swa for oft git bið . þæt þa hæðenan leoda þæt land gehergoden . and sum arleas cynincg cosdrue gehaten com mid micclum here to þære halgan rode . þær helena hi gesette on þære foresædan hierusalem . gehergode þa þæt land . and þa halgan rode genam ham to his earde . arleaslice dyrstig .

He wæs swa up-ahafen . and swa arleas brega . þæt he wolde beon god . and worhte þa of seolfre ænne heahne stypel . on stanweorces gelicnysse . and mid | scinendum gymmum besette eall þæt hus . and on þære upflora eall mid readum golde his cyne-stol geworhte . and wundorlice mid þeotum wæter ut-ateah wolde renas wyrcan . swylce he sylf god wære . ac he wæs ful dysig forþan þe se rén ne mihte manegum fremian .

He swanc þa git swiðor wolde geswutelian his mihte . and het delfan þa eorðan digellice mid cræfte . swa þæt hors urnon embe þæt hus gelome þurh þa digelan dica dynigende mid fotum wolde þunor wyrcan gewit-leas swa-ðeah .

He sæt þa on þam huse swa swa healic god . and gesette þa halgan rode to his heah-setle up swilce him to geferan on his fracodnysse .

He sæt ða þær swa forð . and his suna be-tæhte ealne his cynedom . ac crist hine fordyde .

Sum casere wæs on þam dagum cristen . and gelyfed . eraclius gehaten . unearh on gefeohtum . and he his geleafan geglengde mid godum weorcum . and godes þeowas wurþode mid wel-willendum mode .

Ða com þæs cosdruan sunu togeanes ðam casere . wolde mid gefeohte gewinnan his rice .

Ða gewearð him bam . þæt hi bealdlice twegen to anwige eodon on þære éá brycge . and se ðe sige gewunne weolde þæs rices butan þæra manna lyre þe him mid comon .

Hi þa ealle gecwædon þæt gif ænig man wolde heora oðrum fylstan . þæt man hine sona gefenge . and foredum sceancum into þære éá wurpe .

Hi eodon þa begen on þære bricge togædere . and se geleaffulla casere alede þone godes feond cosdrues sunu . and he siððan ge-weold ealles his rices . and rád him | to cosdrue . þa beah eall se here bliðelice to eraclio . and he hi under-feng . and to fulluhte gebigde . and nan man nolde cyþan cosdrue þæt gewinn . forðan þe he wæs andsæte eallum his leodum .

Eraclius þa astah to þære sticolan upflora . and cw̅ to þam arleasan ardlice þas word .

Lifes ic þe geann . gif þu anrædlice gelyfst nu on hælend crist . and cwyðst þæt þu wille to fulluhte gebugan . and ic þin freond beo . and ic þæ (sic) læte habban þis land to gewealde . gif þu þonne elles dest . þu scealt deaþe sweltan .

Þa nolde se cosdrue on crist gelyfan . and eraclyus sona his swurd ateah . and hine beheafdode . and het bebyrigan . and nam his gingran sunu siððan to fulluhte tyn wintra cnapa . and him cyne-dom for-geaf . betæhte ða his here þone heagan stypel . mid eallum þam seolfre . and he sylf genam þæt gold . and þa gymmas . into godes cyrcan .

Ferode ða þa rode mid þæs folces meniu ongean to hierusalem georne mid blisse .

Hi comon þa æt nextan caflice ridende to þære foresædan byrig . and sæt se casere on kynelicum horse swa him gecwemast wæs . ac þa þa he inn wolde . þa wearþ þæt geat belocen . swa þæt þa stanas feollon færlice togædere . and wearþ geworht to anum wealle swa .

Hi wurdon þa afyrhte . for þam færlican tacne . and beheoldon sarige sona to heofonum . and gesawon drihtnes rode deorwurð-lice þær scinan . and godes engel hi bær bufan þam geate and cw̅ .

Þa þa se heofonlica cyning crist sylf inferde þurh þis ylce get to his agenre þrowunge . næs he mid purpuran ge-scryd . ne mid cynehelme geglenged . | ne he on steda ne rád . þurh þis stænene geat . ac on assan hricge he rád eadmodlice mannum to bysne . þæt hi modignysse onscunion . and æfter ðysum wordum gewende se engel up .

Hwæt ða se casere caflice lihte þancigende gode þære wissunge . and dyde of his purpuran . and his pellenan gyrlan . eode þa mid nacodum fotum . and genam þa rode mid agotenum tearum god wurþigende .

Wearð þa godes wundor on þam weorc-stanum þa ða se casere com mid eadmodnysse to . þa to-eodon ða stanas . and geopenode þæt get .

Wæs eac oþer wundor swa þæt wynsum bræð . stemde [of] þære halgan rode þa þa heo hamwerd wæs . geond þæt land . and þa lyfte afylde . and þæt folc þæs fægnode . afylde mid þam bræðe .

Ne mihte nan wyrt-bræð swa wynsumlice steman . and se casere þa clypode mid blysse .

Eala þu wundorlice ród . on þære ðe crist wolde þrowian . and ure wita adwescan mid his deorwurþan blode .

Eala þu scinende ród swiþor þonne tungla mære on middan-earde micclum to lufigenne . halig treow . and wynsum . þe wurþe wære to berenne ealles middan-eardes wurþ . gemunde þisne heap . þe her gegaderod is gode to wurðmynte .

Þa ahof se casere þa halgan rode up on þære ylcan stowe . þe heo on stod æt fruman . ærþan þe se arleasa cynincg cosdrue hi gename .

On ðam dæge geswutelode se soðfæsta hælend wundorlice mihte . þurh his þa mæran rode . swa þæt an dead man aras on þam dæge sona . and feower bedrydan þær wurdon wundorlice gehælede . and tyn lic-þroweras . fram heora langsumum broce . and fela | wode menn heora gewit under-fengon . and manega untrume fram myslicum coþum þær wurdon gehælede . æt þære halgan rode . criste to wurðmynte . and se casere siððan fela goda gedyda þær . and godes cyrcan ge-godode . mid landum . and bigleofum . and godes lof ge-edniwode .

Ferde ða to his cyne-stole to constantinopolim mid micclum geleafan godes mærða smeagende .

Nu is se dæg gecwæden on cristenum bocum . Exaltatio sce̅ crucis . þæt is on engliscre spræce upahefednyss þære halgan rode . forþan þe heo wæs ahafen mid healicum wurðmynte on þam fore-sædan dæge . drihtne to lofe .

Is swa-þeah to witenne þæt heo is wide todæled . mid gelomlicum ofcyrfum to lande gehwilcum . ac seo gastlice getacnung is mid gode æfre á unbrosnigendlic . þeah þe se beam beo to-coruen . þæt heofonlice tacn þære halgan rode is ure gúðfana wiþ þone gram-lican deofol . þonne we us bletsiað gebylde þurh god mid þære rode tacne . and mid rihtum geleafan .

Þeah þe man wafige wundorlice mid handa ne bið hit þeah bletsung buta he wyrce tacn þære halgan rode . and se reða feond biþ sona afyrht for ðam sige-fæstan tacne .

Mid þrym fingrum man sceall senian . and bletsian . for þære halgan þrynnysse . þe is þrim-wealdend god .

Hwilon cweþað preostas . þæt cristes læwa iudas se arleasa eft ne wurðe fordemed on þam micclan dæge . to þam (sic) deopan helle . and cweþað þæt he mage wið crist hine betellan . swilce he neadunge gefremode þæt facn wið hine .

Ac we cweðað þær-to-geanes . þæt cristes word ne bið leas . he cwæð be þan iudan . þæt him wære betere þæt | he ge-boren nære þonne he his læwe wære .

Næron þa iudeiscan ne se dyrna læwe þurh god geneadode . to ðam gramlican geþeahte . ac þa þa crist geseah . se þe ge-sihð ealle þing heora yfelan willan . þa awende þe hit to gode . swa þæt heora yfelnyss us becom to hæle .

Ælc man þe yfel deþ mid yfelum willan . is scyldig wið god . þeah þe hit sumum fremige . and ælc man þe god deð mid godum willan hæfð his mede æt gode . þeah þe hit hearmige sumum . forþan þe se rihtwisa dema deð ælcum þa mede . be þam þe he sylf wolde . and his willa him dihte .

Nu synd þa iudeiscan . and se sceamlease læwa cristes deaðes scyldige . þe syrwdon be him . þeah þe hit us become to ecere alysednysse . and heora nan ne becymð to cristes rice næfre . butan þam þe hit gebettan . and ge-bugan to criste .

Swa milde is se hælend þæt he miltsian wolde his agenum slagum gif hi gecyrran woldon . and biddan his miltsunge . swa swa heora mænig dyde . swa swa se hundredes ealdor . þe hine hetelice stang on his halgan sidan . and siððan him beah to . se hundredes ealdor hatte longinus .

He geseah ða sona hu seo sunne aþystrode . fram mid-dæge oð non . and eall middan-eard bifode . and stanas toburston . þa beah he to criste sleande his breost . and secgende hlude .

Uere . filius dei est hic .

Soþlice þæs is godes sunu .

He forlet ða his folgoð . and ferde to þam apostolum . and wearð gelæred to geleafan þurh hi . and mid fulluhte aþwagen fram his fyrlenum dædum .

He dælde þa his eahta ealle on ælmyssan . and on clænnysse leofode . swa swa cristes | ðegen . on mycelre forhæfednysse . and þam hæþenum bodade þone soþan geleafan . and synne forgifennysse . and to-wearp deofolgild . and wundra gefremode on godes naman . oð þæt sum gramlic dema hine ge-martyrode mid micclum witum .

Ac he worhte fela wundra ætforan þam deman . betwux þam tintregum . and ablende þone deman þurh godes mihte . þæt menn mihton tocnawon (sic) hu mildheort se hælend is . þe hine mersode swa .

He wearð þa beheafdod for ðæs hælendes naman . þone þe he ær gewundode wælhreowlice on rode . and wunað on ecnysse on wuldre mid him .

Octauius hatte se hæþena dema þe hine acwealde . ac he com siððan þær he ofslagen wæs . and gesohte his lic biddende forgifennysse mid wope and heofunge.

Þa geseah he sona gesundfullum eagum . þurh þone ylcan onliht þe hine ǽr ablende . and se dema þa deorwurðlice bebyrigde longines lichaman . and gelyfde on crist æfre wuldrigende god . oð þæt he gewát of life .

Sy wuldor and lof þam wel-willendan gode . se ðe æfre rixað on ecnysse . AMEN.

Chapter 28

x. kal. octobris: passio sci̅ mauricii et sociorum eius.

maximianus hatte sum hæðen casere se ferde to franc-lande mid mycelre fyrdinge wolde gewyldan mid wige þa leoda þe wiþer-ræde wæron . and his rice forsawon .

Se casere wæs cene . and reðe . and deofol-gild be-eode . dwollice libbende . and acwealde godes men mid micelre reðnysse .

Þa wæron on þære fyrde . fela cristene menn . and an synder-lic eorod of easternum leodum . swiþe cristene menn þam casere folgiende . for-þan | þe hi sceoldon fyrdrian . swa swa eall folc dyde .

An eorod is ge-cweden on ðam ealdan getele* six ðusend manna . and six hund. and six . and syxtig . swa fela manna wæron on þam fore-sædan eorode . swiþe gelyfede on þone lyfigendan god . þeah þe heora hlaford wære wodlice hæden .

On þam flocce wæron þa fyrmestan menn . mauricius ærest . and exuperius . candidus . and uitalis . and fela oþre to him . and hi wæron geferlæhte on fæstum geleafan . swa þæt hi noldon bugan to þam bysmor-fullum hæþen-scipe . fram þam lifigendan gode þe hi on gelyfdon .

Hwæt þa maximianus mid micclum þrymme ferde . oð þæt hi comon to muntum . and se manfulla wolde siððan he þa muntas ofer-ferde . his hæþen-gild habban . and het him to clypian ealne þone here . þæt hi his hæse gefyldon . and mid him ge-offrodon ealle heora lác þam deoflicum godum . gode ælmihtigan to teonan .

Þa gewende seo eorod þe we ær embe spræcon . forð on heora weg . and for-flugon þæt deofol-gild . noldon hi sylfe fordón mid þam deoflicum lacum . ac ridon ofer twelf mila to rodan þæra (sic) éá . and þær gelihton sona . for ðam langsumum færelde . and se casere wicode mid þam oþrum werode . wiþ ane litle burh octódorum gehaten . offrigende his lác mid þam ungeleaffullum his arleasum godum wolde hí gegladian . ærþan þe he to þam gefeohte come . þæt hí him fylstan sceoldon .

Þa ongeat se casere þæt þa cristenan þær næron . and het ða mid | graman . his gegadan to faran . and beodon (sic) þam cristenum þæt hi comon him to .

Hwæt ða ærendracan ða ardlice ridon . and budon þam cristenum ðæs caseres geban . ac hi ealle cwædon mid anrædum geleafan . þæt hi on þone lyfigendan god gelyfdon oð þæt . and æfre on heora life on hine gelyfan woldon . and cwædon to ðam ærendracan þus oþrum wordum .

We synd gearwe to gefeohte forð mid ðam casere . ac [ae @ Skeat] we nellaþ gecyrran to his onsægednyssum .

Þa ridon þa ærendracan raðe eft ongean and cyddon þam casere þæt þa cristenan noldon his hæsum gehyrsumian to his hæþen-scipe .

Maximianus wearð þa mid micclum graman ontend . and het þa hæþenan faran and þa halgan ofslean . þæt men mihton geseon hu maximian gewræce his agenne teonan . and eac his goda . and hi þa caflice ferdon to gefyllenne his beboda .

Hwæt þa mauricius se mæra godes ðegn . and exuperius . mid eadmodnysse afyllede tihton heora geferan þæt hi unforhte wæron . and bædon þæt hi awurpan heora wæpna him fram . and for cristes geleafan heora cwellerum onbugon bliþe to slæge . swa swa he sylf gebysnode . þa þa he hét petrum behydan his swurd .

Be-twux þysum tihtingum tengdon þa hæþenan mid andþrecum (sic) wæpnum to þam æwfaestum heape . and slogon þa cristenan swa swa se casere het wodlice mid wæpnum . swa swa mann wudu hywð . and þa godes þægnas mid glædnysse efston . astræhton heora swuran . | to slæge for criste . and noldon mid wæpnum winnan him togeanes . ac efstan to geflites to þam anþræcum swurdum .

Eft ða se casere sende to þam cwellerum . and het þæt hi ne be-læfdon of þam geleaffullum werode nænne mann cucenne þe on crist gelyfde . and hi swa dydon swa him se deofles biggenga mid graman bebead . and þa godes menn acwealdon . swá þæt þær an ne be-láf of þam werode .

Þæra sawla under-fengon sona godes englas manega of heofonum mid micelre blisse . swa swa þa gelæredan godes þeowas on lof sangum singað .

Þa dældon þa cwelleras þæra cristes martyra wæpna . and gewæda . for-þan þe se wælhreowa hét þæt heora ge-hwilc hæfde of þam here-reafe þæs mannes gewæda þe he mid wæpnum acwealde .

Æfter ðam gedale þa dyrstigan cwelleras ge-sæton him æt-somne mid swiðlicre blisse . and fengon to gereorde mid fulum handum .

Þa com þær-to ridan sum cristen man sona har-wencge and eald se wæs gehaten uictor .

Þa ongunnon þa cwelleras clypian þone ealdan to heora gereorde . ac he hraðe axode for hwilcum intingum hi wæron swa wundorlice bliðe . oððe hu hi mihton ænigne mete þicgan betwux þam ofslagenum .

Þa sæde heora sum þæt hi cristene wæron . and se casere hete hí ealle ofslean oðrum to bysne .

Se ealde uictor þa incundlice geomerode . and hlude clypode .

Eala come ic ǽr þæt ic mihte geendian mine ylde mid swylcum . and mín ealde | blod mid þissere eorode ageotan . þæt ic heora wurðmyntes ne wurde bedæled .

Hwæt ða hæþenan þa hine bestodon . and heton hine secgan mid swyðlicum þreate hweþer he cristen wære þa he wilnode þyllices .

He beseah þa to heofonum . and sæde mid geomerunge .

Eall middan-eard is mid miste befangen deopre nytennysse buton us drihten crist oþþe his leoht forgife . oþþe us læde onweg . and ge-unne me nu crist æfter þysre cyþnysse þæt ge me færan ne lætan fram þysum ofslagenum halgum .

Æfter þysum wordum seo wedende meniu ofslogon þone uictor þæt he feallende sweolt . and he swa geearnode þa ecan myrhðe mid þam halgum werum . swa swa he wiscte him-sylfum .

Hwæt wille we furðor secgan hu se unsæliga casere his fyrdinge geendode . þonne he forferde on ende . ac uton þencan georne þonne we þyllic gehyrað . þæt we þe beteran beon . þurh þa boclican lare .

We sceolon swincan . and ofer-swyðan unþeawas mid godre drohtnunga godes rice ge-earnian . þæt we mid þam halgum þe we heriað nu blissian moton . þeah we martyras ne beon .

We sceolon geþencan hu ge-þyldige hi wæron þa þe for cristes naman ge-cwylmede wæron . hi man swang mid swipum . and on sǽ adrincte (sic) . oððe on fyre forbærnde . oþþe forðwyrftum limum to wæfersyne tucode . mid gehwilcum witum . and on ælcum wawan hi wæron geþyldige . and ælcne hosp hi for-bæron . for | þæs hælendes naman .

Nu synd we swa asolcene þæt we swincan nellað nan þincg . fornean ne urum lustum wiðcweþan wið þam þæt we moton þa micclan geþincða habban on heofonum mid þam halgum martyrum . ne we nellað forberan an bysmorlic word for ures drihtnes naman . swa swa we dón sceoldon . ac butan ge-þylde . and þeawfæstnysse we yrsiað swa swa leo . and lyt-hwon þencað hu we earmingas sceolon æt þam ælmihtigan gode ænige miltsunge begitan . nu we swa recelease syndon . and swa reþe us betwynan .

Geþyld is micel mægen . and mannum nyd-behefe . swa swa ure hælend cwæð to his halgum apostolum .

In patientia uestra possidebitis animas uestras .

On eowrum geðylde ge ge-ahniað eowre sawla .

Gif se geþyldiga man mid his þolmodnysse his sawle gehylt . swa swa us sæde crist . þonne forlyst se yrsigenda wer his agene sawle . þurh weamodnysse . and heo gewislice for-færð .

Gif we wislice libbað . swa swa us wissiað béc þonne mage we becuman to cristes halgum . æfter ure ge-endunge . and æfre mid him wunian . for-þan þe þes middan-eard flihð aweg swyðe . and ure dagas gewitað . swa swa weg-færende menn . and se forþ-gewitena dæg ne went næfre ongean . ac ælc tid us drifð forð to deaþe unþances .

Þa halgan þe we heriað . and heora gelican . forsawon þisne middan-eard . þeah þe he myrge wære þa ða hi on life wæron . forþan þe hi gewilnodon þæs ecan .

Þa wæs langsum lif . and liþe | ge-wederu . hælo on lichaman . on lang-sumere sibbe . wæstm-bærnys on eorþan . and geniht-sum-nyss on spedum . ac swa-þeah þa halgan eall þæt forhogodon . and þæs ecan lifes eallunga ge-wilnodon .

Efne nu þæs middan-eard is for micclum geswenct . and mid manegum earfoðnyssum yfele geþreatod . and þeah-hwæþere we lufiað his earfoðnysse git . and to þisum swicolum life we swincað and tiliaþ . and to þam towerdan life we tiliað hwonlice . on þan þe we æfre habbað swa hwæt swa we her geearniað .

Hwilon þæs middan-eard teah menn fram gode . mid his fægernyssum . and nu he fylst us to gode forþan þe he is afylled mid fela earfoþnyssum .

Uton forþy awendan . urne willan to gode . and to þam ecan life ure smeagunge nu . þæt we eft moton þær æfre wunian . swa swa crist sylf behét þam þe hine lufiað .

Þam is wuldor and wurðmynt á to worulde AMEN .

Chapter 29

[vii.] idus octobr. passio sci̅ dionisii et sociorum eius.

Paulus ðeoda lareow þa ða he geond land ferde bodigende geleafan swa swa him bebead se hælend þa becom he on sumum dæge to sumere mæran byrig athenas gehaten . healic and mære þære greciscra heafod-burh . on hæðen-scipe wunigende .

Þær wæs dionisius se deorwurða martyr þæra hæþena lareow on heora geleaf-leaste . oþ þæt paulus hine awende of woge to rihte .

Se dyonisius geseah mid sumum oþrum uðwitan on ęgypta lande þær hi æt lare wæron . hu seo sunne aþystrode | to sweartre nihte fram mid-dæge oð non þa ða ure drihten þrowode for mancynnes alysednysse . and hi micclum þæs wundrodon .

Þa cw̅ dyonisius . þeos deorce niht getacnaþ micel leoht towerd eallum middan-earde þæt god sylf geswutelað soðlice mann-cynne .

He wæs þa iung mann . þa ða þis gewearð . and him com þæt leoht to . þurh paules lare syððan swa swa we her secgað on þisre soðan rædincge .

Paulus eode þa gleaw-lice and heora godas sceawode ealle be endebyrdnysse . and eac þa weofoda . oþ þæt he funde an weofod þe þis gewrit on stód .

Deo ignoto . þæt is on englisc . Uncuðum gode is þis weofod halig .

Þa bewende hine paulus to dionisie þam drihtnes men and cw̅ .

Hwæt is se uncuða god þe ge arwurðiað þus? [sic @ Skeat]

Þa cw̅ dyonisius . he is digle git mannum . and is towerd on worulde . and gewylt ealle þing heofonas and eorþan . and his rice wunað á buton ende.

Ða andwyrde paulus . hwæt þincð eow be þam gode . biþ he gast oððe man? [sic @ Skeat]

Dyonisius andwyrde þam arwurðan paule þus .

He bið soðlice god . and soðlice man . and he sylf ge-edniwað . þisne ealdan middan-eard . ac he is git uncuð . forþan þe he cucu wunað mid gode on heofonum .

Þa cw̅ se halga paulus . þone god ic eow bodige þone ðe ge hatað uncuðne . he is acenned of marian þam mæran mædene . and he þrowode deað sylf-willes for mannum . and arás of deaðe þurh his drihten-lican mihte . he | astah eac to heofonum to his halgan fæder . and sitt on his swiðran hand . soð god . and soð man . þurh þone synd geworhte ealle þincg on worulde . and he cymð to demenne ælcum be his dædum . on ende þyssere worulde . mid wuldor-fullum englum .

Þa ða paulus þær lange dæges geleafan þær bodode . þa gelyfde dyonisius on þone lifigendan god . and on-cneow þæt his godas gramlice deofla wæron .

He bæd þa georne paulum . þæt he him gebæde fore . þone mildheortan drihten . þæt he his discipulus wurde .

Eft on þam oþrum dæge eode paulus be þære stræt . and gemette ænne blindne mann . se wæs geboren swa . se bæd ge-mahlice þone mæran paulum þæt he hine gehælde on þæs hælendes naman . and se eadiga apostol his eagan gemearcode mid þære halgan rode þone hælend biddende . þæt he him gesihðe forgeafe . and he geseah sona se ðe blind wæs geboren . and him bebead paulus ðus .

Gang to dyonisie nu þe god onlihte . and sæge þæt he onette swa swa he ær behét þæt he beo gefullod fram fyrnlicum synnum .

Þa eode se gehæleda gehyrsum þam apostole . and bead his hæsa bealdlice dyonisie .

Dyonisius þa axode þone ærendracan of-wundrod . eart þu la se blinda þe swa geboren wære? [sic @ Skeat]

He andwyrde sona þam arwurþan were .

Ic eom se ylca þe þu embe sprycst . þe blind wæs geboren . and seo beorhte sunne minum eagum ne scean . oþ þisne andwyrdan dæg . ac se eadiga paulus mine eagan | onlihte þurh his drihtnes mihte . þe he mannum embe bodað .

Dionisius þa arás . and hraðe efste to paule mid eallum his hiwum to ðam halgan fulluhte . and wearð gefullod . and folgode paule þreo gear tosomne swa hwider swa he siðode . and deoplice under-nam drihtnes lare æt him . oð þæt se halga apostol hine gehadode to bisceope . to þære atheniscan byrig þær he geboren wæs . and het hine bodian bealdlice geleafan . and þæt halige godspel þam hæðenum leodum .

Dionisius þa wunode deoplice gelæred on þære foresædan byrig æt his bisceop-stole . and bodode þam land-folce godes lare georne . þam þe he ær wæs lareow on heora geleaf-leaste .

He gebigde þa þa burhware to gode . and þone mæstan dæl þæs mancynnes to geleafan and fela béc gesette be ðam soðan geleafan . and be engla werodum mid wundorlicre smeagunge . and to oþrum bisceopum þa béc asende . þa ðe paulus gehadode . and se halga iohannes . sum þæra hatte titus . Sum timotheus . sum policarpus . and gehwilce oþre .

Eac to iohanne þam arwurðan godspellere he sende gewritu þa þa he on wræcsiðe wæs on pathmo þam iglande . þa þa se arlease casere domicianus . hine fordemde þyder .

Dionisius hine ge-frefrode mid fore-witegunge þa and sæde þæt he wiste þa gewislice þurh god þæt iohannes sceolde siþian of þam iglande eft to asian lande swa swa hit gelamp siððan . and þær god-spel awritan . swa swa hit gewearð eft .

Dionisius þa ferde | geond fela burga gehwider . and geond land bodigende bealdlice geleafan . and ge-bigde mancynn micclum to gode . and untrume gehælde on þæs hælendes naman . oð ðæt he geaxode þæt þa arwurþan apostolas . petrus . and paulus . on cwearterne wæron on romana byrig under þam reþan nero .

Þa wolde dionisius gif hit gewurðan mihte þrowian martyrdom mid þam apostolum . and ge-wende þa ham . mid wundorlicum ofste . betæhte his bisceop-stol oþrum bisceope sona . and ferde fram greclande mid geferum to rome . ofer langne wæg æfre geleafan bodigende .

Hit gelamp ða swa for his langsumum fære . þæt þa halgan apostolas swa swa se hælend wolde wæron gemartyrode æt þam manfullan nero. ær þam þe dionisius to rome become .

He com þa æt nextan siððan se casere nero . his lif geendode earmlicum deaðe . and wæs clemens papa on petres setle þa se under-feng mid arwurðnysse þone æþelan bisceop . and mid lufe geheold for his halgan drohtnunge .

Þa wunode se bisceop binnan rome byrig mid clemente papan cuðlice sume hwile . oð þæt clemens him cw̅ to swa swa crist him gewissode

Ge-sihst þu min leofa bruðor hu fela lande wuniað gyt on hæðen-scipe . and ures hælendes gerip mænig-feald is on mancynne . and feawa wyrhtan þær-to . and þu eart gelæred geleaffullice þurh god . and on halgum mægnum micclum geglencged . far nu on godes naman | to francena rice . swa swa cristes cempa . mid cenum geleafan . and beo þe forgifen to bindene (sic) and to alysenne . swa swa ic under-feng æt minum foregengan þam halgan petre swa swa se hælend him forgeaf .

Ic cweðe þæt þu under-fó eall francena rice to þinre bodunge . and beo crist sylf mid ðe . swa hwider swa þu gecyrst . swa swa he soðlice wæs mid þam eadigan petre . and paule on life .

Ne wanda þu nates-hwon for þan wælhreowan folce . swa man swiðor swincð . swa man selran mede under-fehð .

He funde him þa ge-feran . and he ferde gebyld þurh þone halgan gast . þam hæðenum bodigende cristen-dom . and fulluht . oð þæt he com to anre byrig parisius gehaten þam hæðenum to-middes on þære francena rice . and him fylste se hælend mid tacnum and wundrum . swa þæt he gewylde þa hæþenan . and to geleafan gebigde þa burh-ware forhraðe .

He gebohte þa land æt anum geleaffullan men . and þær cyrcan arærde hraðe mid cræfte and godes þeowas gehadode þe þam heofonlican gode þeowian mihton on mynsterlicre drohtnunge .

Hwæt þa dionisius dæghwamlice gebigde fela to geleafan mid his fægeran lare . and his drihtne geþeodde þam [þa @ in MS. U.] þe he þam deofle æt-brǽd . and menn sohton þa cyrcan swiðe mid geleafan .

Swa fela wundra worhte se ealwealdenda god þurh þone halgan wer . þæt þa wundra gebigdon þa wiðer-rædan hæðenan to þæs hælendes geleafan | eall-swa swiðe swa his bodung . swa us béc secgaþ .

He sende his geferan sume to ispaniam . and to oðrum landum godes lare to sawenne . and he sylf unforht mid þam francum wunode þe þa swiðost dweledon on deofles biggencgum .

Gelome þa hæðengildan þe þær heteloste wæron . gesamnodon heora gegadan . and ceaste astyrodon . and comon mid wige to þam arwurðan were .

Ac swa hraðe swa hi ge-sawon his scinendan neb-wlite mid þam heofonlican leohte . þonne ledon þa hæðenan heora wæpna adune . and mid wundrunge hi astræhton to þam halgan bisceope . biddende forgifennysse .

Oððe gif heora ænig nolde þonne git gelyfan . ðonne wearð se afyrht . and fleah him aweg .

Wundor-lic godes gifu þæt þam wæpenleasan menn ne mihton þa wælhreowan mid wæpnum wið-standan . ac him onbugon þa francan and þa fyrlenan norðmenn to þam wynsuman iuce wuldres cynincges .

Wurdon þa to-brocene wide geond þæt land þæra hæþenra goda hus and anlicnyssa þurh þæra manna handa . þe hi macodon . and guton . and godes gelaðung weox on geleafan swyðe .

Se ealde deofol þe is mid andan afylled . nam micelne graman . ongean þone godes man for þæs folces gecyrrednysse . fram his fulum biggengum . and smeade hu he mihte þone micclan cristen-dom on sume wisan adwescan mid his searo-cræftum .

Ða wurdon æt nextan þa wælhreowan hæ|þen-gildan mid teonan astyrode . swa swa hi tihte se deofol . and sendon to domiciane . þam deoflican casere se ðe æfter nero genyrwde ða cristenan . cyðende on gewritum be þam halgan were . hu þurh his lare þæt land-folc wæs gebiged . and eall seo burh-waru to cristes biggengum . and bædon hine inwerdlice . þæt he his arwurðum godum sumne ræd funde . þæt þe hraðor nære heora gemynd adylegod þurh dionisies lare .

Þis gewrit com ða to þam casere on rome . and he wearð sona wodlice astyrod . swa þæt he hét acwellan ealle þa cristenan þe he of-axian mihte . on eallum landum . wolde þæt nan man ne be-læfde cristen .

He sende eac sona sumne heah-gerefan sisinnius gehaten swiðe hetel deofol mid manegum geferum to þæra francena rice . þæt hi dionisius þæs drihtnes þægen sceoldon mid wæpnum acwellan . buton he wolde bugan to þam bysmorfullum godum .

Hwæt þa sisinnius mid swiðlicum prasse ferde . oð þæt he to þære byrig cō . þær se bisceop on wæs lærende . þæt læweda folc to geleafan georne .

Þa het se wælhreowa þone halgan wer gebindan . and ænne mæsse-preost þe he him mid funde . rusticus geciged . and sumne erce-diacon eleutherius gehaten mid heardum cnottum samod .

Þas halgan weras æfre wunodon mid þam bisceope . oð þæt hi togædere ealle to gode ferdon .

Þa axode sisinnius mid swiðlicum þreate þone halgan wer sona hwylcne god he wurðode .

Hi cwædon þa ealle þry | swilce mid anum muðe .

We andettað mid muðe . and on mode gelyfað on þa halgan ðrynnysse . þe is heofonlic god . þæt is fæder and sunu . and se frefrigende gast . and we bodiað mannum middan-eardes alysednysse þurh ðone halgan sunu þe se heofonlica fæder sylf-willes asende to slege for us .

Sisinnius ða cw̅ . secgaþ gif ge willað þam casere gehyrsumian . and on his godas gelyfan . gif ge þonne nellað . nelle ic leng mid wordum ac mid heardum swinglum his hæsa eow cyðan .

He het ða þone halgan bisceop unscrydan . and un-mæðlice swingan . and he sang his gebeda betwux þam witum . wurðigende his drihten . þe hine eaðe mihte wiþ þa manfullan ahreddan . ac se halga sceolde on þam sceortum witum his drihtne ge-efenlæcen . and deað þrowian for hine . swa swa crist sylf dyde . þe sealde hine sylfne for us .

Eft þa sisinnius het swingan þone mæssepreost . and eac þone diacon . dionisies geferan . and het hi siððan lædan tosōne on racenteagum to leohtleasum cwearterne for heora geleaffulnysse .

He het hi eft swingan . and siððan þone bisceop on isenum bedde astrehte . and byrnenda gleda dyde under his nacode líc . swa man laurentium dyde . ac se halga hine gebæd . on þam bedde to gode .

Þa het se wælhreowa hine wurpan deorum þe wæron ofhingrode þæt hi þone halgan wer abiton . ac þa reðan deor swa hraðe swa hi him to comon . lagon æt his fotum . swylce hi afyrhte wæron .

Þa hét | se dema awurpan þone drihtnes ðægen in-to byrnendum ofne . ac his ge-bedu adwescton ealne þone lig . and he belaf þær gesund .

Git þa se wælhreowa dema het wyrcan ane hencgene . and het hón þone bisceop to bismore þær-ón . and he swa hangigende þone hælend bodode eallum æt-standendum . swa swa andreas dyde .

Þa het se dema eft dón hine of þære hencgene . and lædan hi ealle þry to leoht-leasum cwearterne . and fela oðre cristene to þam cwealmbærum huse .

Hwæt ða se bisceop bliðelice tihte mid lare þa cristenan on þam cwearterne to gode . and him eallum mæssode . þa mid þam þe he to-bræc þæt halige husel þa com þær heofonlic leoht . ofer ealle þa meniu . swilc swa hi ær ne gesawon .

Þær com eac se hælend mid þam heofonlican leohte . and fela engla mid him . þær menn onlocodon . and nam þæt husel þe ðær gehalgod wæs . and cw̅ to þam bisceope . mid blyðre ansyne .

Min leofa underfoh þis . and ic mid minum fæder þe mid fulfremednysse gefylle þa gerynu . forðan þe mid me is mycel med þe sylfum . and þam ðe gehyrað hæl on minum rice .

Ongin nu stranglice . and þín gemynd stent on heorunge seo lufu . and welwillendnys þe wunað on þinum breoste . for swa hwæne swa heo bit heo bið tiða simle . and æft̅ þysum wordum he gewende to heofonum .

Sisinnius eft het sona þæs on mergen gefeccan þa halgan of þam fulum cwearterne . and het geoffrian heora lác | þam lifleasum godum gif hi heora lifes rohton . oþþe rædfæste wæron .

Þa halgan þa þurh-wunodon on ðæs hælendes ge-leafan . and se woda dema wolde þa git cunnian gif he mihte hí gebigan fram godes biggencgum . het hi þa ealle beswingan eft swyðe mid gyrdum . and siððan be-heafdian for þæs hælendes geleafan .

Þa læddon þa hæðenan þa halgan to slæge . and dionisius þancode his drihtne mid herunge ealra þæra wundra þe he worhte þurh hine . and hi wurdon beheafdode swa se wælhreowa het mid scearpum æxum . and þær ge-swutelode god swiðe micel wundor þurh þone mæran bisceop .

Þær cō þa micel leoht to þæra martyra lice . and þæs bisceopes lic mid þam leohte arás . and nam his agen heafod þe of-aheawen wæs uppan ðære dune . and eode him forð þanon ofer twa mila þam mannum onlocigendum his drihten herigende . mid halgum lof-sangum . and engla werod eac þær wynsumlice sungon . oð þæt þæt lic becō þær ðær he licgan wolde . mid heafde mid ealle . and þa halgan englas singallice sungon . swa swa us secgað béc .

Hwæt ða hæþenan þa þe ge-hyrdon þone sang . and þæt wundor gesawon awurpon heora gedwyld . and gelyfdon on crist . and eac þa cwelleras sume . and þær nan ne beláf þe gelyfan nolde . ac gewendon him aweg for þam wundrum afyrhte .

 wæs syllic wundor þæt se soðfæsta martyr heafod-leas mihte gán . god ælmihtigne heri|gende . and eac swylce yrnan mid engla heapum . ac god wolde geswutelian þurh þæt syllice tacn þæt his sawl leofode þeah þe se lichama wære ofslagen . and wolde mannum æt-eowian . hu micelne geleafan se halga wer hæfde to þam hælende on life .

Sisinnius swa-þeah se ungesæliga dema nolde on crist gelyfan . ac het acwellan ealle þe þurh dionisies lare gelyfdon on god mid mislicum witum swiþe wælhreowlice . and heora sawla ferdon to þam soðfæstan life .

Þæs halgan preostes lic and þæs geleaffullan diacones rusticus and eleutherius . lagon uppan þære dune þær hi beheafdode wæron mid þam halgan bisceope . þa ða his lic awæg eode swa swa we awriton ǽr .

Þa bæron þa hæðenan cwelleras þæra halgena líc sona to scipe woldon hi besencan on flode . ac se ælmihtiga scyppend wiðslóh þam unræde .

Sum æþelboren wíf wæs þe wiste heora unrǽd . and gelaðode þa cwelleras swilce for cyððe hire to . and fordrencte hi mid wine . and het dearnunga faran þa hwile to þam scipe and for-stelon (sic) þa líc . and heold hi arwurðlice . oþ þæt seo ehtnys geswác . and se cristendóm acucode . æft̅ þære cwealm-bærnysse .

Eft siðþan on fyrste feng þæt [þæt @ Skeat] cristene folc to . and worhton mære mynster ofer þæra martyra líc . þær hi ealle ðry licgað . on ænlicum wurðmynte .

Þær beoþ fela wundra geworhte gelome þurh þa halgan martyras mannum to frofre .

Þær under-foð þa blidnan | þurh heora bena gesihðe . and þa deafan heorcnunge . and þa healtan færeld . and þa wodan þær beoð gewittige þurh hi . and ungerime wundra þær wurðað for-oft . to lofe þæm ælmihtigan þe leofað á on ecnysse . AMEN.

Chapter 30

{{subst::Ælfric's Lives of Saints/30eus}}

Chapter 31

incipit vita sci̅ martini episcopi et confessoris . anglicae (sic).

svlpicivs hatte svm [snoter] writere . Ðe wolde awritan þa wundra and mihta þe martin᷒ se mære mihtiglice gefremode on þisre worulde . and he wrat þa be him þa ðing þe he of-axode . oððe æt him sylfum . oððe æt oþrum mannum . forðan þe manegum wæron his wundra cuþe . þe god worhte þurh hine . and we þæt englisc nimað of þære ylcan gesetnysse . ac we ne writað na mare . buton his agene wundra .

[I.]

{{block left|width=75%| <poem> Martinvs se mara bisceop wæs geboren on þam fæstene sabaria gehaten pannoniscre scire . and on ticinis he wæs afed italian landes .

He cō of hæðenum magum æþelborenum swaðeah of wurðfulre mægðe . æft̅ woruld-þingum . his fæder wæs ærest cempa . and eft cēpena ealdor . and martin᷒ wæs gewenod to wæpnum fram cild-hade . and camp-dome fyligde betwux laricum gefylcum . ærest under constantine þam æþelan casere . and eft under iuliane þam arleasan wiðer-sacan . na swaþeah sylf-willes . forþan þe he fram cild-hade wæs swyðor onbryrd þurh god to godcundlicum þeow-dome . þonne to woruldlicum campdome . swa swa he cydde syððan .

Þa ða he wæs tyn wyntra þa wearð he gecristnod his maga unþances . and on wundorlicum gemete sona to godes þeowdome he wæs eall gehwyrfed . and þa þe he wæs twelf wintra he ge-wilnode to westene . and he hit eac gefremode gif he þa ylde hæfde .

His mod wæs swa-þeah æfre embe mynstru smeagende . oþþe embe cyrcan . and godes gesetnyssum . he smeade þa on cild-hade . þæt he siððan gefremode .

Þa wæs þære casere (sic) bebod | þæt þæra cempena suna þe wæron forealdode wurdon genamode to þam ylcan camp-dome þe heora fæderas on wæron . and martin᷒ þa wearð ameldod fram his fæder . þe on his weorcum andode . and he wearð geracenteagod þa þa he fiftyne wintre wæs . betæht to þam gewinne mid anum his þeowan þe his gesiðe wæs . þam he sylf þenode . swiþor þonne he him . and samod hi gereordoden swa swa gelícan . þreo gear he ferde mid þam folclicum cempum . buton gewæpnunge ærþan þe he wære gefullod ungewemmed swa-þeah fram woruldlicre besmitennysse on þære þe mennisc cynn micclum on syngað .

Ēbe his efen-cempan he hæfde wel-willendnysse . and micele lufe . and gemetfæst geðyld . and soðe eadmodnysse . ofer mennisc gemett .

Swa micele forhæfednysse he hæfde on his bigleofan . swilce he munuc wære swiðor þonne cempa . and for his æðelum þeawum his efen-cempan ealle þa hine arwurðodon mid wundor-licre lufe .

He næs þa git gefullod . ac he gefylde swa-þeah þæs fulluhtes dæda mid fulfremedum weorcum . swa þæt he swincendum fylste . and fedde þearfende . and nacode scrydde . and nan þing him sylfum of his campdomes scipe on his seode ne heold . buton þæt he dæg-hwamlice to bigleofan hæfde . swa swa þæt god-spel sægð .

Ne þenc þu be mergene .

II.

{{block left|width=75%| <poem> On sumere tide he ferde forð þurh ane burh ambianis gehaten on hetelicum wintra . on swa swiðlicum cyle . þæt sume men swulton þurh þone .

Þa gemette he ðær ænne þearfan | nacodne biddende þa riddon (sic) þæt hi him sum reaf sealdon. ac hi ridon him forð . ne rohton his clypunge .

Martin᷒ þa ongeat þæt he moste his helpan . þa ða þa oþre noldon ac he nyste swa-þeah hwæt he sealde þam nacodan forþan þe he sylf næfde naht butan his gewædum . and his gewæpnunge . forðan þe he on swilce weorc aspende ær his ðing .

He gelæhte ða his sex . and forcearf his basing . and sealde healfne dæl þam gesæligan þearfan . and þone healfan dæl he dyde on his hricg .

Þa hlogon his geferan þæs forcorfenan basinges . sume eac besargodon þæt hi swilces naht ne dydon þonne hi butan næcednysse him bet mihton tiðian .

On þære ylcan nihte he geseah on swefne þone hælend gescrydne mid þam healfan basinge . þe he sealde þam þearfan . and hét þæt he biheolde to his drihtne werd and oncneowe þæt reaf* .

Þærrihte gehyrde se halga martin᷒ . þone hælend clypian to his halgum englum mid beorhte stēne . and to him ymb-standendum cw̅ .

Martinus þe git nis gefullod me mid þysum reafe gescrydde.

He gemunde þa his cwydes þe he cw̅ on his godspelle. þæt þæt ge doð on minum naman anum of þysum læstum . þæt ge doþ me sylfum . and forþi he geswutelode hine sylfne martine on swefne mid þam reafe þe se þearfa underfeng for his naman on ǽr .

Se halga wer swa-þeah næs ahafen þurh þa gesihþe . ac godes godnysse he oncneow on his weorce . and þa þa he wæs eahtatyne wintre . he wearð gefullod on gode . nolde þeah git forlætan . for his leofan ealdormenn . þone | folclican campdom . ac for his benum swa wunode twa gear fullice . siððan he gefullod wæs .

III.

{{block left|width=75%| <poem> Hwæt ða færlice wearð þæs fyrlenan leodscipes onræs into gallias . and Iulian᷒ se casere gegaderode his here . and began to gifenne . ælcum his cempum cynelice sylene . swa swa hit ge-wunelic wæs .

Þa wende martin᷒ þæt he þa wel mihte wilnian æt þam casere þæt he of þam campdome þa cuman moste . him ne ðuhte na frēfullic þæt he fenge to þære gife . and syððan ne campode mid þam casere forð .

He cw̅ þa to þam arleasan . oð þis ic campode þe . ge-þafa nu þæt ic gode campige heonon-forð . and under-fó þine gife . se ðe feohte mid ðe ic eō godes cempa ne mot ic na feohtan .

Ða gebealh hine se casere . and cw̅ þæt he for yrhðe þæs to-weardan gefeohtes . na for eawfæst-nysse hine sylfne æt-brude swa þam campdome .

Ac martin᷒ unforht to þam manfullan cw̅ .

Gif ðu to yrhðe þis telst . and na to ge-leafan . nu to mergen ic stande on mines drihtnes naman ætforan þam truman . and ic fare orsorh mid rode-tacne gescyld . na mid readum scylde . oððe mid helme þurh þæs heres werod

Þa het se arlease healdan þone halgan þæt he wurde wæpn-læs aworpen þam hæðenum .

On þam æftran dæg dydon þa hæðenan þæt hi budon sybbe . and hi sylfe þam casere . and ealle heora ðing to his anwealde .

Hwam twynað lá forði þæt þæs geleaffullan weres wære . se sige . þa þa him wæs getiþod þæt he wæpenleas nære aworpen þam here . þeah þe se arfæsta drihten eaþe mihte gehealdan and-sundne his cempan .

He æt-bræd þæt | gefeoht . þæt furðon næron ge-wemmede martines gesihþa on oðra manna deaðe .

Hwilcne oþerne sige sceolde ure drihten syllan for his cempan selran þonne þone . þæt nan man ne swulte . ac þæt hí to sibbe fengon .

IIII.

{{block left|width=75%| <poem> Ða forlet martin᷒ swa he gemynte gefyrn . þone woruldlican camp-dom . and to þam halgan were ferde . hilarium þam bisceope on þære burh-scyre þe is pictauis gehaten . forðan þe he wæs acunnod on godes geleafan . and on goddre lare . and he þa wunode mid þam were sume hwile .

Þa wolde se halga hadian hine to diacone ac he wið-cwæð gelome . cwæð þæt he wyrðe nære . þa under-get se bisceop þæt he mihte hine gibigan gif he him bude læssan hád . and bead him þæt he wære gehadod to exorcista . þæt we hatað halsigend þe ðe bebyt deoflum . þæt hi of gedrehtum mannum faran . and he þa ne forsóc þone eadmoddran hád . ac wearð swa ge-hadod æt þam halgan bisceope .

Þa æfter sumum fyrste he wearð on swefne gemynegod . þæt he sceolde his eþel . and his eard geneosian . and fæder . and modor . þe fúllice wæron hæþene . and he ferde ða be leafa þæs foresædan bisceopes . and he hine georne bæd þæt he ongean cuman sceolde .

Martin᷒ þa ferde to þam fyrlenan lande . and þa þa he com to muntum . þa ge-mette he sceaðan . and heora an sona his exe up abræd . wolde hine slean . ac him forwyrnde sum oþer . swa þæt he þæt hylfe ge-læhte . and wið-hæfde þæt slege .

He wearð swa-þeah ge-bunden bæftan to his bæce . and heora anum | betæht þæt he hine bereafode .

Þa ongan se hine befrinan hwæðer he forht wære . oððe hwæt he manna wære . oþþe he cristen wære .

Þa andwyrde martinus him anræd-lice . and cw̅ þæt he nære swa orsorh on eallum his life . for þam þe he wiste to-werde godes mild-heort-nysse swiþost on þam costnungum . and cw̅ þæt he besargode swiðor his gedwyldes þæt he unwyrðe wæs godes mild-heort-nysse .

Began ða to bodigenne þa godspellican lare swa lange þam sceaðan oþþæt he ge-lyfde on god . and martine fyligde micclum hine biddende þæt he him fore gebæde . and he forð þurh-wunode on æwfæstre drohtnunge . and eft us þis cydde .

Þa þa he com to mediolana . þa ge-mette hé ænne deofol on menniscum híwe . and he martinum befrán hwider he siðode .

Þa sæde him se halga þæt he þider ferde þe hine drihten clypode .

Ða cw̅ se scucca sona him to andsware .

Swa hwider swa þu færst . oððe swa hwæt swa þu beginst . þe bið wiþer-ræde seo deofol . and se halga wer him cw̅ to .

Drihten me is on fultume . ne ondræde ic hwæt man me dó . and se deofol þær-rihte fordwán on his ge-sihðe .

Martinus þa ferde forð swa he ge-mynte . and his modor ge-bigde to godes biggencgum . and to þam halgan fulluhte . þeah þe his fæder nolde bugan of þam gedwylde . and þeah þurh drihtnes fultum martin᷒ geriht-læhte manega of þam folce.

Þa asprang geond ealle woruld arrianes gedwyld . and martinus mid geleafan micclum wan ongean . oðþæt he wearð | ge-swenct mid swiðlicum witum . and openlice be-swungen . and of þære byrig adræfed .

He ferde þa ongean to italian lande . and on mediolana him mynster arærde . forðan-þe se foresæda hilarius was afaren to wræc-siðe . for þam ylcan ge-dwylde þe þa dwollice asprang . ac þa gedwol-men sona hine adrifon þanon . and hé ferde swá þanon to sumum ig-lande gallinaria ge-haten . mid anum halgum mæsse-preoste . se leofode on wæstene be wyrta morum lange .

Martin᷒ þa on þære tide on his mete þigde þa ættrian wyrt . þe elleborum hatte . and þæt attor sona hine swiðe þreade fornean to deaðe . ac he feng to his ge-bedum . and eall seo sarnys him sona fram ge-wát .

Þa æfter sumum fyrste þa ða he of-axod hæfde þæt se halga hilarius ham cyrran moste . of þam wrec-siðe . þa ge-wende he to him . and he mid arwurðnysse hine eft under-feng . and martinus ða siððan him mynster þær arærde . gehende þære byrig . þe is gehaten pictauis .

V.

{{block left|width=75%| <poem> Ða com an ge-cristnod man and ge-cuð-læhte to martine . and wunode mid him wolde his lare underfón ac æfter feawum dagum he wearð færlice seoc . swa þæt he forð-ferde unge-fullod sona . and se halga martinus næs æt ham þa hwile .

Ða gebroþra sarige þa sæton ofer þæt lic . and martin᷒ com þa micclum dreorig . and het hi gan út and be-hæpsode þa duru . and astrehte hine sylfne sona ofer þone deadan biddende his drihten þæt he þone deadan arærde .

Þa æft̅ | sumum fyrste he ge-fredde on his mode . þæt godes miht wæs towerd . and he astod þa up an-bidigende unforht his bena tiða .

Þa æft̅ twam tidum astyrode se deada eallum limum . and lociende wæs .

Þa clypode martin᷒ micclum þancigende gode . and þa þe þær-ute stodon instopon sona swiðe ablicgede . þæt hi gesawon þa libban þone þe hi ær for-leton deadne .

He wearð þa sona ge-fullod . and he siððan leofode manega gear . and mannum sæde þæt he to þæs hextan deman heh-setle wære gebroht . and [italics @ Skeat] þær him wæs ge-demed to dimre stowe . þær he unrot wunode . mid woruld-mannum . on witnungum þa hwile . and þa wearð gecyd þurh twegen englas þam ælmihtigan deman þæt he se man wære þe martin᷒ fore gebæd . and þa wearð eft geboden . þurh þa ylcan englas þæt he wurde gelæd to life ongean . and martine agifen . and hit wearð þa swa .

Þa asprang martines hlisa geond þæt land wide . þæt se þe halig wæs on weorcum . wære apostolic wer ge-lyfed .

VI.

{{block left|width=75%| <poem> Eft æfter sumum fyrste ferde se halga wer ofer sumes þegenes land lupicin᷒ gehaten .

Þa gehyrde he feorran færlice hream . wependre meniu . and he wearð þa ge-stedegod befrinende georne hwæt þæt fær-lices wære .

Him wearþ þa ge-sǽd þæt sum unge-sælig man hine sylfne ahenge . of þære hiw-rædene . and swa hangigende hine sylfne adydde .

Martinus þa inn-eode þær se man læg dead . and adræfde ut ealle þa meniu . and hine sylfne astreh|te ofer þone sawl-leasan lichaman . sume hwile on ge-bedum . and he sona ge-edcucode . and mid geornfulre elnunge up arisende wæs . and nam martinus swiþran hand [and] mid him astod and forð-stop mid him . on þæs folces gesihðe .

VII.

{{block left|width=75%| <poem> On þære ylcan tide þæt turonisce folc wilnigende wæs þæt martinus wære to bisceope ge-halgod to heora burh-scire . ac martin᷒ nolde ut of þam mynstre na hwider . oþ þæt sum his neh-gebura gesohte his fet sæde þæt his wif lage swiðe ge-brocod . and begeat þa un-eaþe þæt he ut ferde . and seo burh-waru cepte hwænne he ut come . and gelæhton hine sona . and gelæddon to þære byrig turonia gehaten þæt he wurde gehadod .

Þa clypode eall seo meniu and cwædon an-modlice þæt martinus wære wyrðe þæs hades . and ge-sælig sacerd to swilcum bisceop-dome .

Þær wæron bisceopas of gehwilcum burgum to þære ge-corennysse . þa wið-cwædon hí sume þæt martinus nære wyrðe swa miceles hades . for his wacum gyrlum . and þær wið-cwæð swiþost an þæra bisceopa defensor gehaten . ac he wearð gescynd þurh godes seþunge .

Þa sceolde man rædan sume rædinge him æt-foran . ac se rædere wæs utan belocen . þa ge-læhte sum preost ænne sealtere sona . and þæt ærest gemette rædde him æt-foran þæt wæs þis fers .

Of unsprecendra muþe . and sucendra þu ful-fremedest þin lof drihten for þinum feondum . þæt þu towurpe feond and defensor .

Sona swa his fers wæs æt-foran him geræd . þa wearð þæt folc astyrod | onswiðlicum hreame . þæt godes sylfes seðung þær geswutelod wære . and defensor mihte his mán þær to-cnawan . and þæt god wolde wyrcan his lof on þam un-scæððigan martine . and gescyndan defensor .

Þa under-feng se halga wer bisceop-hadunge þær . and þone hád swa ge-heold . swa hit is unsecgendlic . mid þære ylcan an-rednysse . þe he ær onwunode . mid þær ylcan eadmodnysse . and mid þam ærran reafe . and swa he wæs ge-fylled mid ge-þungen-nysse . and mid þæs hades . wurð-scype . þæt he mid weorcum gefylde ge þone bisceop-dóm . mid eallum wurð-scipe . ge þone munuc-hád betwux mannum ge-heold .

He wæs soðfæst on dome . and est-ful on bodunge . arwurð-ful on þeawum . and þurh-wacol on ge-bedum . singal on rædinge . ge-stæððig on his lece . arfæst on ge-wilnunge . and arwurðful on his þenungum .

Eala hwilc wel-willend-nys wæs on his spræcum . and hwilc ge-þungennys wæs on his þeawum . and hu micel glædnys on gastlicum dædum wunode on þam halgan mid healicre frēminge .

Eadig wæs se wer . on þam ne wunode nan facn . nænne hé ne for-demde . ne nanum hé ne for-geald yfel mid yfele . ac he eaðelice for-bær manna teonrædene mid micclum ge-þylde .

Ne geseah hine nan man nates-hwon yrre . ne on mode murcnigende . ne mislice ge-worhtne . ac on anre anrædnysse æfre wunigende ofer mannes gemet . mid mycelre glædnysse .

Sume hwile he hæfde hus wiþ þa cyrcan . þa æfter sumum fyrste | for þæs folces bysnunge . and for þære unstil-nysse . he ge-staðelode him mynster twa mila of þære byrig . and seo stow wæs swa digle þæt he ne ge-wilnode nanes oþres wæstenes .

On ane healfe þæs mynstres wæs an ormæte clif ascoren rihte adune . and seo deopa ea liger gehaten . læg on oðre sidan . swa þæt man ne mihte to þam mynst[r]e cuman butan þurh ænne pæð þæt he in-ganges bæde .

Hund-eahtatig muneca on þam mynstre wunodon under martines lareow-dome mærlice drohtnigende . and ealle heora þincg him wæron gemæne . and þær nan man næfde nan þing synderlices . ne hi cepes ne gymdon . ne naht syllan ne moston . buta þam anum þe heora big-leofan forð dydon . ne moste þær nan broðor begán nænne cræft . buton he hine ge-bæde . oððe béc write .

Þa wæron gebysgode þa yldran ge-broðra on singalum gebedum . and seo iuguð wrat . and wunodon on stilnysse . swa swa him gewissode martin᷒ .

At-somne hi æton on ge-settum timan . and hi wines ne gymdon buton wan-halum mannum . and manega þær hæfdon hæran to lice . and þær hnesce gewæda . wæron to læhtre getealde .

Æþel-borene weras þær wunodon on þam mynstre . þe wæron estlice afedde . ac hi gewyldon hi swa-þeah to þære ylcan stiðnysse þe þær stod on þam mynstre . and manega we ge-sawon siððan of þam bisceopas .

Lá hwilc burhscír wæs þe nolde bisceop geceosan of martines mynstre . for his mærum gebysnungum .

VIII.

{{block left|width=75%| <poem> Ðær wæs þa ge-hende þam halgan mynstre | swilce an halig stow swyðe gewurðod fram folces mannum . swilce ðær martyres lagon . and þa ærran bisceopas arwurðoden þa stowe . and þær weofod ge-halgodon wolice swa-ðeah .

Martinus ða ne ge-lyfde þam leasum ge-dwimore . ac axode smealice þa yldostan preostas þæs martyres naman . oþþe hwænne he ge-martyrod wære . ac heora nan nyste nan gewis be þam .

Þa nolde martin᷒ ge-neosian þa stowe . ne þam folce ne lyfde . ac fór sume dæg tó mid feawum ge-broþrum . and stód æt þære byrgene . biddende þone ælmihtigan god . þæt he be þam geswutelode hwæt he soþlice wære . oððe hwilcere geearnunge þe þær bebyrged wæs . and ge-wurðod oþ þæt .

Þa be-seah se halga wer to his wynstran healfe . and geseah þær standan ane atelice sceade . and sæde þæt he wære ofslagen for ðyfþe . and on wite wunode . na on wuldre mid martyrum . and wære gewurðod wolice fram þam folce .

Hit wæs wundorlic swa-þeah þæt hine swutollice ge-hyrdon ealle þe ðær wæron . ac hi ne ge-sawon hine butan martin᷒ ana þe hit him eallum sæde .

He het sona þa awæg dón þæt weofod of þære stowe . and þæt folc alysde fram þam leasum ge-dwylde .

VIIII.

{{block left|width=75%| <poem> Æft on sumne sæl siðode martin᷒ on his bisceop-rice . þa bær man þær an líc anes hæðenes mannes þæt hi hine be-byrigdon .

Ða be-heold martinus þa hæðenan feorran . and wende þæt hi bæron swa swa heora gewune wæs heora deofol-gild dwollice ofer heora land . and worhte þa rode-tacn wiþ þæs folces werd . and bead him | on godes naman þæt hi hit ne bæron na furðor . ac aledon þa byrðene . and þa bær-men sona stede-fæste stodon . swilce hi astifode wæron .

Þær mihte wundrian se ðe wære gehende hu þa earman bær-menn gebundene to earðan wendon hi abutan . woldon forð gán . ac ða þa hi ne mihton of þære moldan astyrian . þa asetton hí þæt lic . and beseah ælc to oþrum swiðe wundrigende . hwi him swa ge-lumpe .

Ac þa þa martin᷒ oncneow þæt hí mid lice ferdon na mid deofol-gilde . þa dyde he up his hand . and sealde him leafe to siþigenne forð . and þæt líc to berenne to byrgene . swa swa hí ge-mynton .

Ðus se halga bisceop geband hí mid worde . and eft þa ða he wolde let hí awæg gán .

X.

{{block left|width=75%| <poem> Se halga martinus to-wearp sum hæðen-gild on sumere tíde . on sumere stowe . þa wæs an pin-treow wið þæt templ ge-friðed swiðe halig ge-teald on þa hæþenan wisan . þa wolde he for-ceorfan eac swilce þæt treow . ac ða hæðen-gildan þam halgan wið-cwædon . sædon þæt hi ne mihton on heora mode findan . þæt he þæt treow for-curfe . þeah ðe he heora templ towurpe .

Ða cw̅ se halga bisceop þæt on þam beame nære nan synderlic halignyss . and sæde þam hæþenum þæt hi swiðor sceoldon þone soðan god wurðian . and aheawen þæt treow þe wæs ge-halgod deofle .

Þa cw̅ an ðæra hæþenra to þam halgan bisceope .

Gif þu ænigne truwan hæbbe on þinum gode . we for-ceorfað þæt treow . and þu hit feallende under-foh . and gif þin god is mid ðe . þu gæst aweg gesund .

| Martin᷒ ða unforht fæste on god gebyld be-het þæt he wolde mid weorcum þæt ge-fyllan .

Hi þa ealle glæd-mode begunnon to ceorfenne þone heagan pin-beam . and he wæs a-hyld on ane healfe þæt man eaðe mihte witan hwider he sigan wolde . and hi setton martinum þær-foran ongean . þæt he hine offeallan sceolde .

Þa wæron his munecas wundorlice afyrhte . and nan oðer ne wendon buton he wurde ðær of-hroren . and se beam þa feallende beah to martine .

Martinus þa unforht ongean þæt feallende treow worhte rode-tacn . and hit wende þa ongean . swilce hit sum færlic þoden þydde under-bæc . swa þæt [þæt @ Skeat] hit of-feol for-nean þæs folces micelne dæl . þe þær orsorge stodon .

Þa hrymdon þa hæþenan mid healicre wunðrunge . and þa munecas weopan for þære wundorlican blysse . and hi ealle cristes naman clypodon mid herunge . and eall se leod-scipe to geleafan þa beah .

To þam swiðe hi wurdon þurh þæt wundor gecyrrede . þæt hi geond eall þæt land mid ge-leafan a-rærdon cyrcan . and mynstra . and martin᷒ æfre swa hwær swa he þa deofol-gild to-wearp . swa worhte he cyrcan .

XI.

{{block left|width=75%| <poem> Hwilon eac se halga wer towearp an hæðen-gild . þa sette he sona fyr on þæt feondlice templ þæt hit bradum lige brastligende hreas .

Þa wende þæt fyr forð mid þam winde to anum þære huse . þe þær ge-hendost stód . ac martinus mid ofste uppon þæt hus astah . and sette hine sylfne ongean þone swegendan fyr .

Þær mihte wundor ða | geseon . se ðe wære gehende . hu se wínd . and se líg . wunnon him betwinan . se wind bleow ðone líg . ac he wand ongean for-beah þone halgan wer þe on þam huse wæs . and þæt án for-bærnde þe him be-boden wæs .

XII.

{{block left|width=75%| <poem> Eft on sumere wic ðe wæs librosum ge-haten . wolde se halga martinus to-wurpan an templ þæt wæs þearle welig hus ge-wurðod þam deoflum þa forwyrndon þa hæþenan þam halgan were þæs . and hine adræfdon ge-drefedne þanon .

Þa ferde martin᷒ na swyðe feor þanon and scrydde hine mid hæran and mid axan bestreowode fæstende þry dagas . and his drihten bæd . þæt he mid heofon-licre mihte þæt hæðene templ þa þa he mid his cræfte hit to-cwysan ne mihte .

Æfter ðam fæstene him comon færlice to twegen scinende englas . mid sperum and scyldum . swilce on gelicnysse heofonlices werodes . secgende þam halgan þæt se hælend hi sende þæt hí þæt cyrlisce folc afligan sceoldon . and martine fultumian þæt hi ne mihton wið-standan .

Martin᷒ þa ferde to þære fore-sædan deofol-gilde . and mid þæra engla fultume mannum onlocigendum þæt tempel eall to-wearp . and þa weofode to duste . ealle þa anlicnyssa heora arwurðra goda .

Þa ne mihton þa hæðenan martine wið-cweðan . ac þurh þa god-cundan mihte micclum wurdon afyrhte . and gelyfdon on god . mid ge-leafan clypigende . þæt se god wære to wurþigenne þe se halga wer bodode . and heora godas to forlætenne þe him fremion ne mihton .

XIII.

{{block left|width=75%| <poem> Hwilon on sumere tide swa swa us segð seo racu to-wearp se halga bisceop sum swiþlice hæþengild . þa sáh him ón sona | þæt cyrlisce folc swyðe wedende swa swa hi wæron hæþene . and heora án sona his swurd ateah .

Se bisceop him to-geanes bræd of his ceppan . and a-þenode his swuran þam sleandum hæþenum . and se hæþena ða . þa þa he hine slean wolde . þa feoll he under-bæc mid fyrhte for-numen . and bæd him forgifennysse æt þam halgan bisceope .

Þysum weorc wæs sum oþer gelíc þa þa he eac towearp sum oðer hæþen-gild . þa sloh sum hæþen man to þam halgan were . ac mid þam swenge hæpte þæt swurd him of handum . and ne mihte nan hit næfre syððan findan .

Witodlice for-oft þa þa him wið-cwædon þa hæþenan þæt he heora hæþen-gild swa hux-lice ne to-wende . þa bodode he him swa lange þone soðan ge-leafan . oð-þæt he ge-liþe-wæhte . to geleafan heora wurðfullan templ .

Swa micele mihte he hæfde menn to ge-hælenne . þæt nan adlig man naht eaðe him to ne com . þæt he ne wurde sona wundorlice gehæled .

XIII[I.]

{{block left|width=75%| <poem> On treueris wæs sum mæden swiðlice ge-untrumod licgende on paralisin . oððæt hire lima ealle wurdon adeadode . and heo unwene læg .

Þa wearþ ge-cydd þam fæder þæt martin᷒ come þa into þære byrig . and he arn to þam halgan . and ge-sohte his fét mid swyðlicum wope biddende þone bisceop þæt he hi bletsode . ic ge-lyfe he cw̅ . þæt heo libbe þurh þe .

Martinus þa cw̅ . þæt hit his mihta næron to swilcere dæde . ac se fæder ne ge-swác hine to biddenne mid wope oþþæt þa oþre bisceopas þe mid martine wæron gemacodon þæt he eode to þam licgendan | mædene . and ormæte meniu þær-ute and-bidode hwæt se bisceop don wolde .

Þa astrehte martin᷒ to moldan his lima . and gehalgode siððan sumne dǽl eles and dyde on þæs mædenes muð . and heo mihte þa spræcan . and ealle hire lima endemes cucodon . and heo ða hál arás þam folce onlocigendum

XV.

{{block left|width=75%| <poem> Ða wæs sum heah-þegen gehaten tetradius . and his þeowa manna an wæs þearle awed . þa bed he þone halgan þæt he his hand him onsette .

Martin᷒ þa hét þa þone man him to lædan . ac nan man ne dorste to þam deofol-seocan gán forþan-ðe he wundorlice wedde . mid þam muþe . and elcne wolde teran þe him in to-eode .

Tetradius þa sylf cō . and gesohte þone halgan biddende eadmod-lice þæt he to þam earman eode .

Þa cw̅ se halga wer þæt he to his huse gan nolde hæþenes mannes and manfulles lifes .

Se hæðena þegen þa behet þam halgan were þæt he wolde cristen beon . gif se cnapa wurde hal . and martinus sona siðode to þam wodan . and his hand him on asette . and gescynde þone deofol fram þam gewitleasum men . and he wearð sona hál .

Tetradius ða sona þa he þæt ge-seah . gelyfde on urne drihten . and let hine cristnian . and æft̅ lytlum fyrste he wearð gefullod . and martinum wurðode mid wu[n]dorlicre lufe . forþan-ðe he wæs ealdor witod-lice his hæle .

XVI.

{{block left|width=75%| <poem> On ðære ylcan tide on þam ylcan fæstene eode martin᷒ to anes mannes huse . þa æt-stod he færlice æt-foran þam þrex-wolde . cw̅ þæt he egeslicne feond on þam incofan gesawe .

Martinus þa het þone hetolan deofol . þæt he | þanon ge-wite . and he wearð þa yrre gelæhte ænne mannan and wearð him on-innan . of þæs þegenes hiwrædene . and he þearle þa wedde . and began to toterenne þa þe he to mihte .

Þa fleah seo hiw-ræden . and þæt folc eac swá . ac martin᷒ eode ðam wodan men togeanes het hine sona standan . and he stod þa gynigende . and þywde mid muþe þæt he martinum abite .

Þa dyde martin᷒ on muð þam wodan his agenne fingras . and het hine fretan gif he ænige mihte hæfde . ac he wið-bræd þa ceaflas fram þære halgan handa . swilce fram hatan isene .

Ða adræfde se halga wer þone hetolan deofol of þam ge-drehton menn . ac he ne moste faran þurh þone muð ut þe martin᷒ hrepode . ac fúllice ferde þurh his forð-gang ut .

XVII.

{{block left|width=75%| <poem> Betwux þam þe se bisceop on þære byrig wunode . þa cydde man geond þa burh þæt þær cuman wolde tó . onsigendan here . and hergian þa burh .

Þa wearð eall seo burh-waru wundor-lice afyrht for þæs heres ogan . þa het martin᷒ sona him læden to ænne wodne man . and he wearð him to ge-læd .

Se halga wer ða het þone wodan secgan gif hit soð wære be ðam onsigendan here .

Þa andette se deofol þurh þæs ge-drehtan muð þæt six-tyne deofle wæron þe worhton þisne hlisan . and to-seowon geond þæt folc . þæt hi afligdon martinum þurh ðone ogan swa of þære byrig . and hit eall wære leas be þam onsigendan here þa se fula gast þis sæde þa wæron hí orsorge .

XVIII.

{{block left|width=75%| <poem> Martin᷒ hwilon ferde mid micelre meniu to parisian byrig . and þa þa he binnan | þæt get com. þa wæs þær sum hreofla wundorlice to-hroren eallum mannum an-þræclic . ac martin᷒ hine cyste . and his blet-sunge hine sealde . and he sona wearð hal . and cō þæs on mergen to martine blyðe mid ge-halre hyde . his hæle ðancigende .

Oft wurdon eac ge-hælede fela untrume men þurh his reafes fnæda . þe fela men of-atugon . and bundon on þa seocan . and him wæs bet sona .

Eac swilce of his bedstrewe man band on anne wodne . þa ge-wat se deofol him of . and he his ge-wit under-feng .

XVIIII.

{{block left|width=75%| <poem> Arborius wæs gehaten sum heah-þegen on þam lande . swiðe geleafful man . and his dohtor læg on fefore þearle ge-brocod . þa brohte man sume dæg an ærend-gewrit to þam ylcan þegene fram þam bisceope martine . and he hit lede on hire breoste ða þa hire hatost wæs and heo wearð hal sona .

Þa wearð se fæder swa onbryrd . þæt he sona be-hét gode hire mægþ-hád and hi to martine brohte . þæt he his agene mihte on þam mædene oncneowe . ne he eac nolde þæt anig oðer man sceolde hire hád on sættan . butan se halga martinus .

Sum wer hatte paulin᷒ þe wel þeah on gode syððan . þa wurdon his eagan yfele ge-hefegode . mid toswollenum breawum . and swið-licum myste swa þæt his seon swyðe þeostrodon . þa hrepode martinus mid anre swingan . and eall seo sarnis him sona fram gewat . and se mist samod þurh martines hrepunge .

He wæs swiðe welig man . ac he wearð swa onbryrd þæt he ealle his æhta endemes beceapode . and dælde eall þearfum | for his drihtnes lufon .

Þa herode martin᷒ þæs mannes dæda swyðe . and oþrum to bysne sealde oft secgende be him . þæt he on þam timan gefylde fægere þone cwyde . þe ure drihten cw̅ to sumum rican men . far and syle ealle þine æhta . and dæl þæt wurð þearfum . þonne hæfst þu gold-hord on heofonan rice .

XX.

{{block left|width=75%| <poem> On sumere tide martinus stah to anre up-flora . þa wæron þære hlæddre stapas alefede on ǽr . and toburston færinga þæt he feol adune . and mid manegum wundum ge-wæht wearð swiðe . swa þæt he seoc læg on his synderlican inne .

On þære nihte him cō an engel to him sylfum onlocigendum . and his lima smyrode mid halwendre sealfe . and he sona þæs on mergen hal forð-eode . swilce he untrum nære .

XXI.

{{block left|width=75%| <poem> Maximus se casere þe wæs on martinus dæge . gelaðede for-oft þone arwurðan wer þa ða he him wið spræc þæt he wære his ge-metta . þa for-hæfde he hine æfre fram his ge-beorscipe . cw̅ þæt he ne mihte his gemetta beon þe anne casere ofsloh . and oþerne aflymde .

Þa andwyrde maximus martine and cw̅ . þæt he næfre sylf-willes þone anweald ne under-fenge . ac wære fram his cēpum gecoren unþances to ðam cyne-dome . and wið-cweðan ne mihte . and þæt he on-gean godes willan winnan ne mihte . and forþy mid wæpnum hine werian sceolde . cw̅ eac cw̅ nan man nære fram him ofslagen buton þam anum þe him onfeohtende wæron .

Þa wearð martin᷒ mid þæs caseres beladunge . and eac þurh his bene . gebiged to his ge-reordunge .

He nolde næfre lyffettan ne mid olecunge spræcan | ne furðon to þam casere swa swa his geferan dydon . swa swa he on þam ylcan gereorde geswutelode mid dæde .

He sæt to þam casere . and hi swyðe blyðe wæron for martines gereordunge . and man bær þam casere swa swa hit gewunelic wæs wín on anre blede .

Þa het he þone byrle beodon martine ærest . wolde æfter ðam bisceope his bletsunge drincan .

Martin᷒ þa dranc . and his mæsse-preoste sealde healfne dæl þæs wætan þe wæs on þære blede . for-þan-þe he wiste þæt he wurþost wæs . æft̅ him to drincenne . and hí ealle þæs wundrodon . and mærsodon his anræd-nysse geond ealne þone hired .

He sæde þa þam casere swa swa him becō siððan . þæt gif he ferde to ge-feohte swa he gemynte ongean ualentinianum þe he aflymde ær of his cyne-dome . þæt him come sige . ac æfter lytlum fyrste he sceolde feallan ofslagan . and hit gewearð swa swa him gewitegode martinus .

He ferde þa siþþan to feohtenne wið þone casere . and on þam forman onræse he afligde ualentinianum . ac eft embe geares fyrst he beferde maximum binnan anre byrig aquileiam ge-haten . and hine þær ofsloh . and siððan to his rice feng .

XXII.

{{block left|width=75%| <poem> Martin᷒ ferde hwilon to ualentiniane þam casere wolde for sumere neode wið hine spræcan . ac his micele mod . and his manfulla ge-bedda þe mid arrianiscum gedwylde dweligende lyfode . noldon geðafian þam halgan bisceope . þæt he infær hæfde his ærende to abeodenne . ac het se arleasa hine utan belucan . forþam-ðe he wiste þæt he wolde þæs biddan | þe he tiðian nolde . and tynde þone halgan .

Þa cō martin᷒ eft embe ða ylcan spræce . to þam modigan casere . ac man hine beclysde wiðutan . and he þa gewende to his ge-wunelican helpe . scrydde hine mid hæran . and mid axum be-streowode . and fæstende þurh-wunode on singallum gebedum oð-þæt an scinende engel on þam seofoþan dæge him cō to . and cw̅ þæt he to þam casere ferde . and him ælc get sceolde beon open to-geanes . and þæs modigan caseres mod beon geliðegod .

Se bisceop þa ferde swa swa him be-bead se engel . and him wearð ge-openod ælc gæt togeanes . oð-þæt he færlice stod æt-foran þam casere .

Þa yrsode se casere for his ingange . and nolde hine wylcumian . ac þær wearþ godes miht sẃa þæt heofonlic fyr hangode ofer his setl . and þæt setl ontende . and hine sylfne wolde gif he þe hraðor ne arise . aworpenre reðnysse . and þone bisceop cyste . ablicged þurh god . þone þe he ær geteohhode mid teonan to for-seonne .

He behet þa ge-swicennysse sona þam bisceope . and he him ælces þinges tiþode . ærþan-þe he hine bæde þæs þe he frymdig wæs . and him freondlice to-spræc . and him fela gifa bead . ac he heora onfon nolde .

XXIII.

{{block left|width=75%| <poem> Oft martin᷒ geseah englas him to cuman swa þæt hi hiw-cuð-lice to þam halgan spræcon . and on sumne sǽl sum engel him sæde hwæt þa oþre bisceopas on heora sinoþe spræcon and se halga ða wiste hwæt hi þær ræddon þurh þæs engles segene . þeah ðe he sylf þær ne cóme .

Þa halgan apostolas petrum and paulum he ge-seah ge-lome . swa swa he sæde him-sylf sulpicio | þam writere þe hine axian dorste ælces þinges þe he wolde .

Se ylca sulpicius and sum oðer broðor sæton sume dæg swiðe afyrhte ætforan martines Inne . and he hi þær-ute nyste . þa gehyrdon hí motian wið martine lange . and he wæs ana ǽr innan þam huse belocen .

Eft þa ða he ut-eode þa axode sulpicius . and hine eadmodlice bæd þæt he him ge-openian sceolde hwa him wið-spræce . þa wandode he lange him þæt to secgenne . ac he sæde swa-þeah . ic halsige eow nu . þæt ge hit nanum ne secgan .

Maria cristes modor cō to me hider . mid twam oþrum mædenum tecla and agne . and na on þisum anum dæge ac oft rædlice ær hi comon to me . and he sæde him eac hwilc heora wlitu wæs . and hu hi wæron ge-scrydde .

XXIIII.

{{block left|width=75%| <poem> Eac swilce þa deofla mid heora searo-cræftum him comon gelome to . and he on-cneow hi æfre . for-þan-þe him nan deofol ne mihte bediglian hine sylfne . ne on agenre edwiste ne on oþrum hiwe .

Mid þusend searo-cræftum wolde se swicola deofol þone halgan wer on sume wisan beswican . and hine ge-sewen-licne on manegum scin-hiwum þam halgan æteowde . on þæra hæþenra goda hiwe . hwilon on ioues hiwe . þe is ge-haten þór . hwilon on mercuries . þe men hatað oþon . hwilon on ueneris þære fulan gyden . þe men hatað fricg . and on manegum oþrum hiwum hine bræd se deofol on þæs bisceopes gesihþe .

Martinus þær togeanes mearcode hine sylfne symle mid rode-tacn . and sang his ge-bedu unforht þurh-wunigende . and æfre on god truwigende .

Þa þa se deofol | ge-seah þæt [þæt @ Skeat] he hine bedydrian ne mihte mid his searo-cræftum . þa sæde he him hosp-word . and mid manegum talum hine tynde for-oft . ac he næs gestirod for his leasum talum .

Sume munecas eac þe on þam mynstre wunodon sædan to soðan þæt hi swutollice ge-hyrdon . hu se deofol þreade mid dyrstigum stemnum ðone halgum martinum . for-þam-þe he hæfde mid him sume under-fangene . þe synfulle wæron . and æft̅ heora fulluhte fela to yfele dydon . and sæde open-lice hwæt heora ælces syn wære .

Martin᷒ þa andwyrde þam manfullum deofle . and cw̅ þæt þa ealdan synna mid heora ge-cyrrednysse . and beteran drohtnunge . mihton beon adylgode . and þurh godes mildheortnysse hi mihton beon alysde . fram heora synnum . þa ða hi ge-swicon yfeles .

Se deofol þa clypode and cw̅ him to-geanes . þæt þa leahter-fullan næron nanre miltsunge wurðe . and þa þe æne aslidan . þæt hi eft ne sceoldon æt drihtne habban ænigne miltsunge .

Þa cw̅ martinus to þam manfullan eft ðus . þeah ðu earming woldest on þisum end-nextan timan manna ehtnysse geswican . and þine dæda behreowsian . ic on god truwode . þæt ic þe mildsunge behete .

Eala hu halig dyrstig-nyss be drihtnes arfest-nysse hé ge-swutelode his swiðlican lufe þeah þe he þa fremminge forð-bringan ne mihte .

XXV.

{{block left|width=75%| <poem> On sumne sæl eft siþþan cō se swicola deofol into þam halgan were . þær he on his gebedum wæs . mid purpuran ge-scryd . and mid kynelicum gyrlum . mid gyldenum cyne-helme . and mid goldfellenum sceon . and mid blyþre ansyne . on micelre beorhtnysse .

Þa ne cw̅ . | heora naðor nan word to oþrum to langere hwile . and þa embe lang cw̅ se deofol ærest to þam drihtnes men .

Oncnaw nu martine þone ðe þu gesihst . ic eom crist . þe astah to þisre worulde and ic wolde geswutelian me sylfne ærest þe .

Martin᷒ þa suwode . and se swicola eft cw̅ .

Hwæt twynað þe martine . gelyf . ic eom crist .

Þa underget se halga wer þurh haligne gast . þæt hit se sylfa deofol wæs . na his drihten . and cwæð .

Ne sæde na ure drihten þæt he mid cyne-helme . oððe mid purpuran gescryd . cuman wolde to us . and ic ne gelyfe þæt [þæt @ Skeat] he to us cume buton on þam ylcan hiwe þe he on þrowode . and butan he æteowige þa ylcan dolhswaðe þære halgan rode þe he on ahangen wæs .

Se deofol þær-rihte for-dwán swa swa smic . of þæs halgan gesihðe . and þæt hus afylde mid ormætum stence . þæt man eaðe mihte witan þæt hit se deofol wæs . þe hine dwelian wolde . and þis sæde martinus Sulpicio þam writere .

XXVI.

{{block left|width=75%| <poem> On sumne sæl cō se deofol . mid swyðlicre grimetunge . into þam halgan were . and hæfde ænne oxan horn on hande . and cw̅ to martine .

Hwær is þin miht nu ða ænne man ic ofsloh of þinre hiwrædene nu . and wæs his swyðre hand swilce geblodegod .

Þa clypode martinus his munecas him to . and sæde hwæt se deofol him swutolode . and het georne secan hwa þær ofslagen wære .

Wæs ða an hyr-man to wuda afaren . se læg ge-wundod be þam wege samcucu . and he þa sæde þa þa he his oxan ræpte . þa scóc an his heafod . and mid þam horne hine þyde . on þæt ge|weald swiðe . and he þa sona ge-wat .

Fela þing wiste se halga wer on ǽr lange ær hi ge-lumpon . and þam geleaf-fullum munecum sæde þa þing þe him geswutelode wæron . and hit syþþan swa á eode swa he him ær sæde .

XXVII.

{{block left|width=75%| <poem> Anatoli᷒ hatte sum hiwigende munuc iunglicre ylde se wunode sume hwile wið martines mynster mid anum mæran ealdre clarus ge-haten . and behydde his yfelnysse .

He æt-eowde þa wið-utan ealle eadmodnysse . and unscæððig-nysse . and sæde ða æt nextan þæt him englas wið spræcon . and ge-wunelice for-oft .

Eft þa on fyrste þa he furðor dwelode . he sæde þæt he dæg-hwam-lice betwux driht-ne . and him ferdon heofonlice englas . and he sylf an witega unleas-lice wære . ac him gelyfde clarus .

He ge-het him þa godes yrre . and yfele þreala hwi he nolde ge-lyfan þæt he halig wære . and cw̅ ða æt nextan . þæt him cuman sceolde on þære ylcan nihte fram þam ælmihtigan gode heofonlic reaf . and he mid þam gescryd be-twux him wunigende godes mihte æteowde .

Hwæt þa on middre nihte wearð þæt mynster astyrod . and wearð micel gehlyd . hlihhendra deofla . and þæs muneces cyte mid leohte wearþ afylled . and he eode sylf ut mid þam scinendan reafe . and anum oþrum munece þa mærþa æteowde .

Þær comon þa má . and clarus æt nextan . and sceawodon mid leohte þone scinendan gyrlan . hit wæs swiðe hnesce . scinende swa swa purpura . ac hi ne mihton to-cnawan hwilces cynnes hit wære . ne hí ne mihton undergitan buton hit | wære reaf . ne mid heora grapunge . ne mid heora sceawunge .

Þa ge-wearð him on mergen þæt hí þone munuc læddon to þam halgan martine . ac se munuc nolde . cw̅ þæt he ne moste to martine cuman . forþan-ðe he wiste þæt he mid feond-licum cræfte ne mihte bedydrian martines gesihðe .

Hi þa hine tugon unþances þider-weard . and þæt reaf sona of heora gesihþe fordwán . and wæs ða geswutelod his scin-cræft . and hiwung .

Þas mihta we tellað to martines geearnungum . þæt se deofol ne mihte his gedwimor bediglian gif he become ætforan his gesihþe .

On þam ylcan timan wæron oþre gedwolan antecristes lima mid arleasra hiwunge . sum wæs on hispania þe for-speon þæt land-folc . and mid manegum gedwimorum hi bedydrode lange . and cw̅ þæt he wære helías se witega .

He cw̅ eft syþþan þæt he crist sylf wære . and þa sum bisceop for his bilewit-nysse . gelyfde þam hiwere . and hine to him gebæd . and he wearð for þam gedwylde adræfed of his an-wealde .

Sum oþer gedwola wæs eac on east-dæle . se cw̅ þæt he wære iohannes se fulluhtere . eac swilce lease witegan ær þisre worulde ge-endunge on gehwilce land cumað . and þone ge-leafan amyrrað . oþ-þæt antecrist sylf ende-next becymð .

XXVIII.

{{block left|width=75%| <poem> Martinus com hwilon to middes wintres timan to anum preost-life . and hi ge-logodon þa his bæd on þæs mynstres spræc-huse . and þær micel fyr wæs gebet .

Þa woldon ða preostas him wurðlice beddian . and bæron micel streaw to his beddinga . and þæs fyres ne gymdon þe on þære flora wæs .

Eft þa þa se halga wer cō | þa towearp he þæt streaw eall of þære beddincge . for-þan-þe he oftost læg uppon anre hæran on þære baran flora .

Ða on-scunede he þa softnysse . þære seltcuðan beddinge . and læg on þære flora . swa swa we her beforan sædon .

 inn wæs swyþe nearo . and þær lagon stoccas . and þa on middre nihte þa men fæstost slepon . þa wearð þæt fyr ontend swyðe færlicum bryne . and þæt litle hus mid þam lige afylde .

Martinus þa wearð a-wreht mid þam lige . and þær næs nan man mid him on þam huse . and he on þam færlican gelimpe gelæhte þa dura . and ne mihte þa scyttelsas unscyttan swa hraðe . and se lig him wand wælhreowlice on-butan swa þæt him for-burnon on þam bæce his reaf . and he for ðam bryne ut-bræcan ne mihte .

He beþohte þa hine sylfne . and geseah þæt [þæt @ Skeat] he ne mihte þurh nænne fleam . þam fyre ætwindan . ac þurh godes mihte he hit moste ofer-swyðan .

For-lét þa dura ða . and to-midden þam lige to þam ælmihtigan gode anmodlice clypode . and on þære frecednysse fæst-mod þurh-wunode . and þær wearð þa geworden micel wundor þurh god . swa þæt hine for-beah on ælce healfe þæt fyr . and he orsorh abád . on þam bryne middan . þurh drihtnes mihte swilce he on deawe wære .

Þa wurdon his munecas awrehte mid þam fyre . þær ðær hi lagon . þa þa hi þone lig gesawon and to-bræcon þa dura . and to-brudon þæt fyr . and martinum gelæhton of þam lige middan .

Hi wendon þæt he wære witodlice for-bærnd . on swa lang-sumum bryne þonne þæt brast-ligende fyr on slæpe hi awrehte . and he sæde syððan þæt he þæs | fyres bryne gefredde him onbutan swa lange swa he wan wið þære dura scyttelsas .

Sona swa he hine bletsode . and gebæd hine to gode . þa beah eall se líg abutan him aweg and him þuhte swilce he wære on wynsumum deawe .

He sæde eac for-oft mid incundre geomerunge . þæt se swicola deofol hine besẃac for-nean . þa þa he of þam slæpe asceacen wearð swa færlice . þæt he þone rǽd ne cuþe þæt he hine swa hraþe gebæde . ac to late began hine gebiddan . to gode þæt he hine alysde . of þæs liges frecednysse .

Be þam mæg under-gitan se þe þas bóc ræt . þæt martinus næs þurh þa micelan frecednysse to forwyrde gecostnod . ac wæs afandod swa swa se apostol paulus on his pistole sæde . þæt he sylf wunode on sǽ-grunde middan ofer dæg and ofer niht . ungederod þurh god .

XXUIIII.

{{block left|width=75%| <poem> Martinus eode mid his munecum sume dæg to-cyrcan-werd on wintres timan . þa cō þær sum þearfa healf nacod him togeanes biddende georne þæt he him sumne clað sealde .

Þa het martinus his erce-diacon sona þæt he butan yldinge þone þearfan scrydde . and eode æfter his wunon into þam spræc-huse . and þær wunode ana oþ þæt he wolde mæssian .

Þa nolde se erce-diacon þone þearfan scrydan . and se þearfa bestæl into martine . and to him be-mænde þæt him [wære] þearle cól .

Martinus þa sona hine sylfne unscrydde under his ceppan digellice . and dyde on þone þearfan his agen reaf . and het hine út-gán .

Þa æfter lytlum fyrste com se erce-diacon . and cw̅ þæt hit tima wære þæt he into cyrcan eode . þam folce to mæssigenne . and godes mærsunge dón .

Martinus him cw̅ to þæt he | ne mihte na gán æror to cyrcan . ær se þearfa wære gescryd . and se erce-diacon ne under-get . þæt he wið-innan his cæppan nacod þær sæt . and sæde þæt he nyste hwær se þearfa wære . and þa cw̅ martin᷒ . sy þæt reaf ge-broht hraðe hider to me . ne ateorað us na þearfa to scrydenne .

Se erce-diacon þa yrsigende eode . and brohte an reaf unge-rydelic him to wáclic and lytel . mid lytlan wurðe geboht . and mid fullum yrre æt his fotum lede and cw̅ .

Hér ís reaf . and her nis nan þearfa .

Þa næs se halga wer for his wordum astyrod . ac het hine an-bidian þær-ute sume hwile . wolde þæt he nyste þæt he nacod wære .

He scrydde hine ða mid þam ylcan reafe . and eode to cyrcan . and sona mæssode .

Æt þære ylcan mæssan þry munecas gesawon . and an þære preosta . and án of þam nunnum . bufan martinus heafde swilce an byrnende cliwen . swa þæt se líg abrǽd þone loc up feor . and ne moste na má manna þas mihte geseon .

XXX.

{{block left|width=75%| <poem> On þam ylcan timan an wær wæs geuntrumod euantius gehaten . swyðe yfele geþread . and wende him his deaðes swyðor þonne his lifes .

He wæs swyðe cristen . and sende þa to martine bæd his neosunge . and se bisceop ferde sona to þam seocan menn . ac he sona on-get martines mihte ær-þam-þe he to mid-wege come . and wearð sona gehæled þurh þæs halgan mihte . and eode him to-geanes . and hine arwurðlice under-feng .

XXXI.

{{block left|width=75%| <poem> Eft þæs on mergen þa martin᷒ fundode . þa wearð an cnapa of þæs þegenes hiwrædene . þurh næddran geslit nealice adyd . swa þæt þæt attor smeh geond ealne þone lichaman . and wæs eall | to-blawen . on anre bytte gelicnysse .

Se hlaford þa euantius gelæhte þone cnapan . and bær to martine micclum truwigende þæt him un-acumendlic nære þone cnapan to gehælenne .

Se halga wer þa sona sette his hand on þone cnapan . and hrepode eall his lima . and æfter þam sette his finger on þa wunda . þe se wurm toslát .

Hi ge-sawon ða ealle þæt þæt attor fleow ut of eallum his limum . þurh þa lytlan wunde . swylce of anre ædran mid his agenum blode . and se cnapa gesund up arás . and hi þa martinum micclum herodon .

XXXII.

{{block left|width=75%| <poem> Se halga wer ferde hwilon þæt folc to lærenne geond his bisceop-rice þa abidon his geferan for sumere neode bæftan . and he sylf rád forð . þa comon him to-geanes þæra cempena fær . on cynelicum cræte . and hi ne cuþon martinum .

Martinus rad him wið unge-rydelice gescryd mid sweartum claþum . þa scyddon þa mulas þe þæt cræt tugon ðurh his to-cyme afyrhte . and to-mengdon þa ge-togu . þæt hi teon ne mihton .

Þa wurdon ða cempan wodlice astyrode . and ge-læhton martinum . and hine lange swungon . mid swipum . and mid stafum . and he suwode æfre swilce he ne gefredde heora swingla nates-hwon . and hi þæs þe woddran wæron him to-geanes . and hetelicor beoton þone halgan wer .

Þa comon his geferan and fundon hine licgenne on blodigum limum . and to-beatenum lichaman . and hofon hine up on his assan sona . and aweg efston þa stowe on-scunigende .

Ða cempan þa woldon mid þam cræte forð . ac þa mulas ealle endemes astifodon to þære eorþan afæstnode . swylce hí ærene | wæron .

Hi beoton þa mid swipum . and mid saglum . þa mulas ealle endemes . ac hi æfre stodon on þam ylcan stede swilce anlicnyssa .

Þa cempan ða æt nextan oncneowan þurh ða nytena þæt hi mid god-cundre mihte gefæstnode wæron . and begunnon to axienne æt oþrum weg-farendum hwæt se man wære þe hi swa wælhreowlice beoton .

Him wearð þa gesǽd þæt wære martin᷒ . and hi sona urnon ealle him æfterwerd . mid duste bestreowode . and dreorig-lice wepende þæt hi þone halgan wer swa huxlice tawoden . and lagon æt his fotum mid feorhte astrehte . biddende his mildsunge . þæt hi moston faran . and cwædon þæt hi sylfe wæron swyðor þæs wyrþe . þæt hi stodon astifode on stana gelicnysse . oþþe þæt seo eorðe hi ealle forswulge .

Martinus þa mildsode þam mannum þær-rihte . and lét hi faran forð mid heora cræte . and heora mulas þa mihton gan sona þe ær stodon astifode on stana gelicnysse .

Se halga wer swa-þeah wiste þæt hi wæron ge-fæstnode . ær-þan þe hí him to comon . and þæt he cydde his geferum . forðan-þe he fela þing feorran oft wiste ærþan-þe hit gewurde þurh witigendlicne gast .

XXXIII.

{{block left|width=75%| <poem> Se halga wer ferde mid his fare hwilon . þa cō him færinga to micel folc manna . and þone feld afyldon þær martin᷒ ferde swilce for wundrunge þæs halgan weres . þa wæron ealle hæðena . and þone hælend ne cuþe nan man of þære wíc þe hí of wæron .

Martinus ða onget þæt he mihte sceolde wyrcan . and drihtnes word bodode þam dysegum hæþenum . and mid ge-lomum siccetungum sarlice mænde . þæt swa micel meniu þone ælmihtigan god ne cuþe .

| Wæs ða godes fore-sceawung . þæt an wif brohte ðyder hire deadan suna líc þe litle ær forð-ferde . and a-strehtum handum to þam halgan were cw̅ .

We witon leof þæt ðu eart unleaslice godes freond . ge-hæl me minne sunu forþan-ðe he is me ancenned . and þæt hæþene folc fylste eac þam wife .

Þa genam se halga wer on his handa þæt líc . and ge-bigedum cneowum gebæd hine to gode . and þa þa he up aras ge-endedum gebede he ageaf þone cnapan [cnaþan @ Skeat] cucenne his meder .

Þa hæþenan þa clypodon mid healicre stemne . and cwædon mid ge-leafan þæt crist wære soð god . and feollon heap-mælum ealle to þæs halgan weres cneowum . biddende hine georne þæt he dyde hí cristene .

He eac ne wandode on þam widgillan felda þa hæþenan to cristnigenne þa þa hí on crist gelyfdon . ac he hi ealle sona samtingas gecristnode .

XXXIIII.

{{block left|width=75%| <poem> Eft on sumne sæl þær martin᷒ siðode mid his geferum . þa cō þær færlice yrnan an þearle wod cu . and þa þe hyre fyligdon clypodon to þam halgan were þæt he hine warnian sceolde . for-þan-þe heo hnat yfele ælcne þe heo ge-mette .

Heo cō þa yrnende mid egeslicum eagum . ac se halga wer sona het hi ætstandan . and heo þær-rihte gehyrsumode his hæse and stod .

Þa geseah se halga wer þæt þær sæt an deofol on þære cu hrycge . and cw̅ to þam scuccan .

Gewít þu wæl-hreowa aweg of þam nytene and þis unscæððige hryþer geswíc to dreccenne .

Se manfulla gast þa martine gehyrsumode . and ferde of ðære cy . and heo oncneow sona þæt heo alysed wæs . and læg aþenod ætforan his fotum . on-fangenre stilnysse .

Þa het se halga wer þæt heo ge-|wende to þære heorde . and heo swa bilewite swa scep . beah to þære dræfe .

XXXU.

{{block left|width=75%| <poem> Martin᷒ eac hwilon gemette sumne huntan . þa drifan heora hundas swyðe ænne haran . geond þone bradan feld . and he bigde gelome þohte mid þam bigum æt-berstan þam deaðe .

Ða of-hreow þam halgan þæs haran frecednyss . and þam hundum be-bead þæt hi ablunnon þæs rynes . and þone haran for-leton mid fleame æt-berstan .

Þa hundas ða stodon æt þam forman worde swilce heora fét wæron gefæstnode to þære eorþan . and se hara ge-sund þam hundum æteode .

XXXUI.

{{block left|width=75%| <poem> Sum woruld-cempa wæs þe wolde munuc beon . and on godes ge-laðunge alede his wæpna . and to munuc-life æt-foran mannum gecyrde . and him cytan arærde . on sumere digelnysse . swylce he ancer-setla eaðe beon mihte . and martin᷒ hæfde ge-hadod his ge-beddan on mynecena life on sumum mynstre .

Þa besende se deofol swilc geþanc on þone munuc þæt he wolde habban his wif him to geferan . and he ferde to martine . and his mod him geopenode .

Þa cw̅ se halga wer þæt hit unþæs-lic wære . þæt þæt wif sceolde wunian eft mid him . siððan he munuc wæs . and forwyrnde him þæs .

He swa-þeah þurh-wunode on his anwilnysse . and cw̅ þæt hit ne sceolde his munuc-hade derian þeah þe he hire frofres and fultumes bruce . þæt he eft nolde ge-cyrran to his earrum leahtrum .

Þa þa he lange þurh-wunode on þære anwilnysse . þa cw̅ se halga wer to þam hohfullan munece .

Sege me ic þe axige gif þu æfre wære oððe on ge-feohte oþþe on ænigum truman? [sic @ Skeat]

He cw̅ þæt he wære | witodlice for-oft ægþer ge on truman ge eac on ge-feohte .

Martin᷒ þa cw̅ to þam munece eft .

Ge-sawe þu ænig wif þa ðu wære on gefeohte feohtan forð mid eow atogenum swurde? [sic @ Skeat]

Þa scamode þam munece . and he swiðe þancode þæt he mid ge-sceade ofer-swyðed wæs . and þæt he his ge-dwylde ne moste . for martyne folgian .

Se halga wer þa cw̅ . wíf ne sceal na faran to wera fyrd-wicum . ac wunian æt ham . for-sewenlic biþ þæt werod þæt wíf-menn feohtað . feohte se cempa on fyrdlicum truman . and wíf hi ge-healde binnan wealle trymmincge . and heo hæfð hire wuldor gif heo hylt hire clænnysse bæftan hire were . and þæt biþ hire miht . and ge-fylled sige þæt heo ge-sewen ne beo ute .

XXXUII.

{{block left|width=75%| <poem> Se halga bisceop wæs hwilon on carnótina byrig . mid twam oþrum bisceopum . þa brohte sum man his dohtor him to . seo wæs dumb geboren twelf wintre mæden . and martinum bæd þæt he þurh his ge-earnunge hire tungan unlysde .

Þa wandode se bisceop . ac hine bædon þa oþre . and fylston þam fæder þæt ge-fremode his bene .

Martin᷒ þa hét þa meniu utgán . buton þam bisceopum anum . and hire agenre fæder . astrehte hine sylfne þa . swa swa his ge-wune wæs . on syndrigum gebedum . and siððan aras . and bletsode ele . and on hire muð get . and mid his fingrum heold fore-werde hire tungan . and be-frán hi þa siððan hwæt hire fæder hatte .

 mæden sæde sona hire fæder naman . and hæfde hire spræce mid halre tungan .

XXXUIII.

{{block left|width=75%| <poem> Se halga wer bletsode anum wife hwilon ele on anum fæte þe we anpolan hataþ to seocra manna neode . swa swa heo sylf bæd . and æfter þære bletsun|ge man bær þone ele hire .

Þa wæs se ele wexende ofer ealne þone weg . swa þæt he ofer-fleow . and þeah ful to hire cō .

Oþerne ele he gebletsode on anre glæsenan anpollan . and gesette þone ele on anum egðyrle . and þa afylde sum cnapa þæt fæt unwærlice uppon þone marm-stán . ac hit ne mihte to-berstan . ne martines bletsung ne moste losian .

XXXIX.

{{block left|width=75%| <poem> Eac swylce oþre menn on martines naman wundra ge-fremodon swa swa se writere sæde þæt sum hund burce hetelice on anne man . þa het he on martines naman þone hund adumbian . and he sona suwode . swylce he dumb wære .

XL.

{{block left|width=75%| <poem> Sume scyp-men reowan on þære tyreniscan sæ . swa man færð to rome . and þa færlice com swa mycel unweder him to . þæt hi him ne wendon þæs lifes .

Þa wæs on þære fare sum egyptisc mangære ungefullod þa git . ac he mid fæstum truwan cw̅ .

Eala þu martines god geneara us nu . and seo sǽ sona swyðe smylte wearð . ablunnenre hreohnysse . and hi bliðe ferdon .

XLI.

{{block left|width=75%| <poem> Auitianus hatte sum hetol ealdor-man . wæl-hreow on his weorcum . se ge-wrað fela manna . and on racenteagum gebrohte to þære byrig turonia wolde hí þæs on mergen mislice acwellan ætforan þære burhware . þa wearð hit þam bisceope cuð .

Þa smeade se halga wer hu he heora gehelpan mihte . and eode to middre nihte ana to his gatum . and þa þa he inn ne mihte . he anbidode þærute .

Wearð þa se ealdor-man awreht færlice þurh godes engel . and he him gramlice to cw̅ .

List ðu and rest þe and godes þeowa lið æt þinum gatum . and he arás þa afyrht . and cw̅ to his mannum . þæt martinus wære | wið-utan his gatum . and het hí gán to . and undón þa gata . þæt se godes þeowa swylcne teonan leng ne þolode .

Hi eodon þa út to þam inran gæte . and sædon heora hlaforde þæt hi þær nænne ne ge-sawon . and cwædon þæt he sceolde on slæpe beon bepæht .

Auitian᷒ þa eode eft to his bedde . and wearð eft of slæpe egeslice awreht . and hrymde to his mannum cw̅ þæt martin᷒ stode æt-foran his gatum . and forðy ne moste nane reste habban ne modes ne lichaman .

Hi þa git elcodon . ac he eode sylf to þam yttran gete . and efne he gemette martinum þærute swa him geswutelod wæs .

He wearð þa ablicged . and to þam halgan were cw̅ .

Hwæt la leof hlaford . hwi dest þu swa?

Ne þearft þu nan word cwæþan . ne nanes þinges biddan . ic wat hwæs þu ge-wilnast . ac gewend þe nu ham . þe-læs-þe godes yrre for þinum teonan me fordó .

Se halga wer þa ham ge-wende sona . and se ealdor-man het on þære ylcan nihte lætan ealle aweg . þa þa he wolde acwellan . and he sylf ferde afyrht of þære byrig .

XLII.

{{block left|width=75%| <poem> His wæl-hreownysse he cydde on gehwilcum burgum . and symble he blissode on unge-sæligra manna slæge . ac æt-foran martine he wæs milde ge-þuht . and ne dorste on turonia don nane wælhreownysse .

Se halga martinus cō to him hwilon . and þa þa he eode into his spræc-huse . þa geseah he sittan ænne sweartne deofol ormætne on his hrycge . and he him on ableow .

Ða wende auitian᷒ þæt he him on ableowe . and cw̅ to þam halgan were . hwi behylst þu me swa halga .

Se bisceop him andwyrde .

Ne behealde ic na þe . ac þone sweartan deofol þe sit on þinum hneccan ic þe of ableow . and se deofol swa aweg gewat . | and his hiwcuðe setl sona ða forlét .

Auitian᷒ soðlice siðþan wæs mild-heortra of þam dæge æfre þe se deofol him fram wearð . oþþe for-þan-þe he wiste þæt he his willan ær worhte . oþþe for-þan-þe se unclæne gast him of-afliged wæs . þurh martines mihte . and him micclum sceamode þæs deofles man-rædenne þe he on wæs oþ þæt .

XLIII.

{{block left|width=75%| <poem> Twa mila hæfde martin᷒ fram his mynstre to turonian byrig þær se bisceop-stol wæs . and swa oft swa he þyder ferde swa forhtodon þa deofla on ge-wit-seocum mannum for-þan-ðe hi wiston his to-cyme . and þa deofol-seocan sona mid swiðlicre grymetunge forhtigende wæron . swa swa þa fordemdan þeofas . on þæs deman to-cyme ofdrædde forhtigað .

Þonne wæs ðam preostum cuð martin᷒ to-cyme þurh þære deofla grimetunge . þeah ðe hi hit ær nyston .

Swa oft swa he wolde adræfan deofla of þam wit-seocum . swa astrehte he hine sylfne on þære cyrcan flora . mid hæran ge-scryd . and mid axum bestreowod licgende on his gebedum belocenum durum . and þa deofla siþþan of þam geswenctum mannum mid wundor-licum gebærum wurdon him sona fram . þæt se cwyde mihte beon on martine ge-fylled . þæt halige menn sceolon englum deman .

XLIIII.

{{block left|width=75%| <poem> Sum tún wæs on þam timan on þære senonican scíre þe ælce geare oftost wæs awest þurh hagol . swa þæt heora æceras ær wæron aþroxene ær ænig ryftere þæt geríp gaderode .

Þa sende se tunræd sumne ge-trywne ærendracan to þam halgan martine . his helpes biddende .

Martinus þa ge-bæd þone mild-heortan drihten for þam ge-swenctum mannum . and syþþan of þam dege | geond twentig wintra fyrst þe he wunode on life ne cō on þam earde ænig hagol syððan .

Ac on þam forman geare þe he forð-faren wæs . cō eft se hagol and hi yfele geswencte . þæt þæs middan-eard ongete martines forðsið . and his deað beweope þe on his life blissode .

XLV.

{{block left|width=75%| <poem> Sum deofol-gild wæs swiðe-fæste getimbrod . and mid wundor-licum weorc-stanum ge-worht cræftlice . and þær manega ge-broðra bogodan syþþan on martines timan . þa bead he anum mæsse-preoste marcellus ge-haten þe þær wununge hæfde þæt he sceolde to-wurpan þæt wundorlice deofol-gild .

Eft þa se halga wer cō . and þæt weorc stod gehál . þa cidde he þam mæsse-preoste . and he him cw̅ to andsware þæt naht eaðe ne mihte ænig camplic meniu swilc weorc to-brecan mid swa wundor-licum hefe . þe ne sceoldon preostas þe wæron un-strange . oððe untrume munecas . swa mycel weorc to-brecan .

Þa ge-wende martinus to his gewunelicum fultume . and wacode ealle þa niht on his gebedum ana . and sona þæs on mergen . wearð swa micel storm . þæt eall þæt ormæte weorc wearð towend grund-lunga .

XLVI.

{{block left|width=75%| <poem> He wolde eac to-wurpan ænne wundorlicne swer ormætes hefes . þe þæt hæþengild onstod . ac he næfde þæs cræftes . þæt he hine to-cwysan mihte .

He gewende þa eft to his ge-wunelicum gebedum . and þær com gesewenlice eall swylc oþer swer ufan of heofonum . and þone oþerne to-sloh . þeah-þe he ormæte wære . þæt he eall wearð to duste .

Hit wære hwonlic geþuht þæt þam halgan were heofonlic mægen ungesewenlice þeowde . butan mennisce eagan mihton eac geseon . þæt ðam halgan martine heofon|lic miht þenode .

XLUII.

{{block left|width=75%| <poem> Sum wif wæs on blod-ryne þearle geswenct . þa hrepode heo his reaf swa man ræt on þam godspelle be sumum oþrum wife . and heo wearð sona hal .

XLUIII.

{{block left|width=75%| <poem> Se halga martinus mid his munecum stód hwilon on þære éá ofre . and efne þær swam an næddre wið heora .

Ða cw̅ se halga wer .

Ic ðe beode on godes naman þæt ðu buge ongean . and se yfela wurm sona be his worde gecyrde to þam oþrum staðe . and hi ealle þæs wundrodon . and martin᷒ þa cw̅ mid micelre geomerunge .

Nædran me gehyrað . and men me gehyran nellað .

XLIX.

{{block left|width=75%| <poem> On easter-dagum he wolde etan fisc gif he hæfde . þa on sumum easter-dæge axode he þone profost hwæðer he fisc hæfde to þam freols-dæge . and he to andsware cw̅ . þæt hi ealle ne mihton ne fisceras . ne he sylf gefón ænne sprot .

Ða cw̅ se halga wer . wurp ut nu þin net . and þe fixnoð becymð . and he cunnode þæs sona .

Wearp þa út his net . and þær wearð on-innan an ormæte leax . and he hine up-ateah bær ham to mynstre . and þam halgan gearcode .

L.

{{block left|width=75%| <poem> Licontius wæs gehaten sum ge-leafful þegen . þa gelamp his mannum . þæt hi lagon ealle on un-asecgendlicum broce . and he sende gewrit to martine sona sumes helpes biddende .

Þa onget se halga wer þæt hi wæron ge-þreade mid godcundre mihte . and þæt he mihte earfoþ-lice þære bene him ge-tiðian . ac he ne ablan na swa-þeah . mid seofon-nihte fæstene him fore to-þingiende . oð-þæt he beget þæs þe he biddende wæs .

Licontius þa cō and cydde þam halgan mid micelre þancunge . þæt his hiwræden wæs fram þam mænig-fealdum brocan þurh martinum alysed . and brohte þam halgan an hund punda | to lace .

Se halga wer þa nolde habban þone scæt . ne hine eac ne for-seah . ac sealde þæt feoh eall for gehergodum mannum . and þa ðe on hæft-nedum wæron . and hi ut alysde of þære yrmðe swa .

Þa bædon þa gebroþra þone bisceop georne . þæt he þæs feos sumne dæl dyde into mynstre . cwædon þæt him gneaðe wære heora wist . and scrud .

Þa cw̅ se halga wer him to andsware . fede us ure cyrce . and scryde us ure cyrce . and we of þysum sceatte naht us sylfum ne heoldon .

Hwæt wille we lencg writan be martines wundrum þonne sulpicius sæde . þæt hi synd ungerime . and nan spræc ne mæg his mihta areccan . for-þan-þe he maran mihte hæfde on his munuc-hade . þonne on bisceop-hade . be ðam þe he sylf sæde . ac we willað nu secgan be his forð-siðe .

LI.

{{block left|width=75%| <poem> Martinus se eadiga wiste his ge-endunga lange ær he forð-ferde of þysum life to criste . and he cydde his forð-sið sumum his gebroþrum .

Þa wæron on þam timan æt condatensē mynstre þa preostas unge-hwære . and he þider siðode wolde hi gesibbian ær his forþsiðe . and on sibbe for-lætan . godes ge-laþunge .

He ferde ða þiderwerd mid sumum gebroðrum . þa geseah he scealfran swimman on anum flode . and gelome doppetan adune to grunde ehtende þære fixa mid fræcra grædignysse .

Þa cw̅ se halga wer to his geferum þus .

Þas fugelas habbað feonda gelicnysse þe syrwiað æfre embe ða unwaran . and grædiglice foð . and gefangene fordoð . and of þam ge-fangenum ge-fyllede ne beoð .

Þa bebead martin᷒ þam mæð-leasum scealfrum . þæt hi ge-swicon þæs fixnoðes . and siþedon to westene . and þa fugelas gewiton aweg sona to holte . ealle | endemes . swa swa sé árwurða hét .

Mid þære ylcan hæse he afligde þa scealfran . mid þære þe he deofla a-dræfde of mannum .

LII.

{{block left|width=75%| <poem> Martin᷒ þa siððan to þam mynstre becom . and wunode þær sume hwile and gesibbode þa preostas .

Eft ða he ham wolde þa wearð he ge-untrumod . and sæde his gebroðrum þæt he sceolde forð-faren .

Þa wurdon hi ealle ge-unrotsode swiþe . and mid micelre heofunge hine befrinan .

Eala þu fæder hwi forlætst þu us . oððe hwam betæhst þu us forlætene . witodlice becumað to þinre eowde reafigende wulfas . and hwa be-werað hí .

Witodlice we witon þæt þu gewilnast to criste . ac þe synd gehealdene þine meda gewisse . gemiltsa la ure swiðor þe þu forlætst .

Þa wearð se halga wer mid þysum wordum astyrod . and clypode mid wope . and cw̅ to his drihtne .

Drihten min hælend . gif ic nyd-behefe eom git þinum folce . ne for-sace ic na gyt to swincene gewurðe þin willa .

Ne ic ne beladige mine ateorigendlican ylde . ic þine þenunga est-ful gefylde . under þinum tacnum ic campige swa lange swa þu sylf hætst .

He lag þa swa forþ ane feawa daga mid fefore gewæht . þurh-wunigende on ge-bedum . on stiþre hæran licgende . mid axum bestreowod .

Þa bædon þa gebroðra þæt hi his bæd moston mid waccre strewunge huru under-lecgan .

Þa cw̅ se halga wer to þam wependum gebroðrum .

Ne gedafnað cristenum menn . buton þæt he on duste swelte gif ic eow oþre bysne selle . þonne syngie ic .

He ne lét na of gebedum his un-oferswiðdan gast . ac he æfre openum eagum . and up-ahafenum handum . his gebeda ne geswác .

Þa woldon þa preostas þæt he lage on oþre sidan . and ge-lihte hine swa .

| Þa cw̅ se halga eft .

Geþafiað ic bidde þæt ic heofonan sceawige swiðor þonne eorðan . and min gast sy asend on his siðfæte to drihtne .

He geseah þa standan swiþe gehende þone deofol . and he hine or-sorhlice axian ongan .

Hwæt stendst þu her wæl-hreowa deor . ne gemetst þu on me þu manfulla ænig þincg .

Ic beo underfangen on abrahames wununge . and æft̅ þysum wordum gewát seo sawl . of þam geswenctan lichaman ge-sælig to heofonum .

On sunnan mergen he ge-wát þa þa he wæs on ylde . an and hund-eahtig wintre . and æfter cristes þrowunge . feower hund wintre . and twelf on getele . and fela manna þa ge-hyrdon on his forð-siðe singendra engla swiðe hlude stemna up-on hea-nysse geond þa heofonas swegende . swa hit on bocum sægð . þe be him synd awritene .

His lic wearð ge-sewen sona on wuldre beorhtre þonne glæs . hwittre þonne meolc . and his andwlita scean swiþor þonne leoht . þa iu ge-wuldrod to þam to-werdan æriste .

Eala hwilc heofung holdra geleaffulra hlude þa swegende . and swiðost þære muneca and mynecena wóp on martines deaðe .

LIII.

{{block left|width=75%| <poem> Sum bisceop seuerinus on þære byrig colonia haliges lifes man gehyrde on ærne mergen swiðe hludne sang on heofonum . and þa gelangode he him to his erce-diacon . and axode hine hwæþer he þa stemne gehyrde . þæs heofonlican dreames .

He andwyrde and cw̅ . þæt he his nan þincg ne gehyrde .

Þa het se bisceop þæt he heorcnode geornlicor . he stod þa and hlyste . on his stæfe hliniende . and ne mihte nan þing þære myrhþe gehyran .

Þa astrehton hi hi begen biddende þone ælmihtigan þæt he moste | ge-hyran þone heofonlican dream . he hlyste þa siððan . and sæde þæt he gehyrde singendra stemne . swegen on heofonum . and nyste swa þeah hwæt ða stemna wæron .

Seuerinus ða cw̅ . ic þe secge be þam . martin᷒ se eadiga of þysum middan-earde gewát . and nu englas singende his sawla feriað mid him to heofonum . and se hetela deofol mid his unriht-wisum gastum . hine wolde gelettan . ac he ge-wat gescynd awæg fram þam halgan . and nan þing his agenes on him ne gemette .

Hwæt bið be us synfullum . nu se swicola deofol swa mærne sacerd derian wolde .

Þa sende se erce-diacon sona to turonia . to martines bisceop-stole . and het axian be him . þa wearð him soðlice gesæd þæt he his sawle ageaf on þære ylcan tide þe hi þone sang gehyrdon .

LIIII.

{{block left|width=75%| <poem> On þam ylcan dæge ambrosius se bisceop on mediolana byrig . þa þa he æt mæssan stod þa wearð he on slæpe swa swa god wolde . and hine nan man ne dorste naht eaðe awreccan .

Swa-þeah æft̅ twam tidum hi hine awrehton and cwædon þæt se tima forþ-agán wære . and þæt folc wære ge-wergod þearle .

Se halga bisceop þa cw̅ . ne beo ge ge-drefede micclum me fremað þæt ic swa mihte slapon . forðan-þe me min drihten micel wundor æteowde .

Wite ge þæt min broþor martinus se halga of lichaman is afaren . and ic his lic behwearf mid gewunelicre þenunge . and þa þa ge me wrehton . þa næs his heafod-clað eallunga ful dón .

Hi wurdon of-wundrode his worda . and dæda . and geaxodon on fyrste þæt se arwurða martinus on þam dæge ge-wát . þe ambrosius sæde . þæt he æt þæs halgan weres lic-þenungum wære .

| Eala eadig is se wer þe on his forð-siðe halgena ge-tel . healice sang . and engla werod blissode . and ealle heofon-ware him to-geanes ferdon . and se fula deofol on his dyrstig-nysse þurh drihten wearð gescynd .

Seo halige gelaðung on mihte is gestrangod . and godes sacerdas synd gewuldrode mid þære onwrigennysse martines forð-siðes . þonne se halga michahel mid englum under-feng . and maria seo eadiga mid mædenlicum werodum . and neorxne-wang gehylt bliðne mid halgum .

LV.

{{block left|width=75%| <poem> Ða þa þæs halgan weres lic læg inne þa git . þa com þær micel meniu of manegum burgum . and þæt pictauisce folc swa swa þæt turonisce . and þær wearð ge-flit be-twux þam twam folcum .

Þa pictauiscan cwædon þe ðyder gecumene wæron .

He wæs ure munuc . and eac ure abbod . we willað hine habban for-þan-þe we hine alændon ær . gé brucon his spræce . and his lare notedon . ge wæron on his ge-reordum . and mid his gebletsungum ge-strangode . and mid mænig-fealdum wundrum wæron gegladode . sy eow eall þis ge-noh . lætað nu huru us his sawl-leasan lichaman ferian mid us .

Þa andswaredon þa . þa turoniscan þus .

Gif ge secgað þæt us synd genoh his wundra . þonne wite gé þæt he worhte ma wundra mid eow þonne he mid us dyde . and þeah we fela for-hebbon . eow he arærde witodlice twegen deade men . and us buton ænne . and swa swa he oft sæde . þæt he maran mihte on munuc-hade hæfde . þonne on bisceop-hade . and we habbað nu neode þæt he dead gefylle þæt he ne dyde on life .

Eow he wæs æt-broden . and us fram gode forgifan (sic) . and æft̅ þa ealdan gesetnysse he sceal habban | byrgene on þære ylcan byrig þær he bisceop wæs .

Gif ge for minstres þingon . and þæt he mid eow wæs hine habban willað . þonne wite ge þis þæt he on mediolana ærest mynster hæfde .

Betwux þisum gewinne wearð se dæg ge-endod . and butu ða burh-waru besæton þone halgan . and woldon ða pictauiscan mid gewinne on mergen niman þone halgan neadunga æt þam oþrum .

Þa on middre nihte swa swa martinus wolde . wurdon þa pictauiscan swa wundorlice on slæpe þæt of ealre þære meniu an man ne wacode .

Þa gesawon þa turoniscan hu þa oþre slepon . and ge-namon þæt lic þe þær læg on flora . and to scipe bæron mid swiðlicre blisse . and efston mid reowte on þære ea uigenna . and swa forð on liger swyðe hlude singende . oð þæt hi becomon to þære byrig turonia .

Þa wurdon þa oþre awrehte mid þam sange and naht heora gold-hordas (sic) þe hi healdan sceoldon hæbbende næron . ac hi ham ge-wendon mid mycelre sceame . þæt him swa gelumpen wæs .

Se halga lichama þa wearð geled on byrgene on þære ylcan byrig þær he bisceop wæs . mid micelre wurð-mynte . and þær wurdon siððan fela wundra gefremode for his ge-earnungum .

Syx and twentig wintra he wæs þær bisceop . and seo burh-waru wæs butan bisceope lange ær martinus wære gehalgod to bisceope . for þam hæþen-scipe þe þæt folc þa be-eode .

Sy wuldor and lof þam wel-willendan scyppende þe his halgan sacerd swa geglengde mid wundrum . se þe on ecnysse rixaþ ælmihtig wealdend . Amen.

| Olim haec trastuli . sicuti ualui . sed modo praecibus . constrictus plenius. O martine sanctae meritis praeclare . iuua me miserum . meritis modicum . Caream quo neuis . mihimet nocuus . castiusque uiuam . Nactus iam ueniam .

Chapter 32

xii. kl̅. dece̅br̅. passio sci̅ eadmvndi regis et martyris.

SVM SWYE GELÆRED MUNUC cō suþan ofer sǽ fram sce̅ benedictes stówe on æþelredes cynincges dæge to dunstane ærce-bisceope þrim gearum ær he forðferde . and se munuc hatte abbo . þa wurdon hi æt spræce oþþæt dunstan rehte be sce̅ eadmunde . swa swa eadmundes swurd-bora hit rehte æþelstane cynincge þa þa dunstan iung man wæs . and se swurd-bora wæs forealdod man .

Þa gesette se munuc ealle þa gereccednysse on anre béc . and eft ða þa seo bóc com to ús binnan feawum gearum þa awende we hit on englisc . swa swa hit her-æfter stent .

Se munuc þa abbo binnan twam gearum . gewende ham to his mynstre and wearð sona to abbode geset on þam ylcan mynstre .

Eadmund se eadiga eastengla cynincg wæs snotor and wurðfull . and wurðode symble mid æþelum þeawum þone ælmihtigan god .

He wæs ead-mod . and geþungen . and swá an-ræde þurh-wunode þæt he nolde abugan to bysmorfullum leahtrum . ne on naþre healfe he ne ahylde his þeawas . ac wæs symble gemyndig þære soþan lare . [gif] þu eart to heafod-men ge-set . ne ahefe þu ðe . ac beo betwux mannum swa swa an man of him .

He wæs cystig wædlum and wydewum swa swa fæder . and mid wel-willendnysse gewissode his folc symle to riht-wisnysse . and þam reþum styrde . and gesæliglice leofode on soþan geleafan .

Hit ge-lamp ða æt nextan þæt þa deniscan leode ferdon mid scip-here hergiende and sleande wide geond land swa swa heora gewuna is .

On þam flotan wæron þa fyrmestan heafod-men hinguar and hubba . geanlæhte þurh deofol . and hí on norð-hymbra-lande gelendon mid æscum . and aweston þæt land . and þa leoda ofslogon .

Þa ge-wende hinguar east mid his scipum . and hubba belaf on norð-hymbra-lande . gewunnenum sige . mid wælhreownysse .

Hinguar þa becō to east-englum rowende . on þam geare þe ælfred æðelincg . an and twentig geare wæs . se þe west-sexena cynincg siþþan wearð mære . and [And @ Skeat] se fore-sæda hinguar færlice swa swa wulf on lande bestalcode . and þa leode sloh weras and wíf . and þa ungewittigan cild . and to bysmore tucode þa bilewitan cristenan .

He sende ða sona syððan to þam cyninge beotlic ærende . þæt he abugan sceolde to his man-rædene gif he rohte his feores .

Se ærendraca com þa to eadmunde cynincge and hinguares ærende him ardlice abead .

Hinguar ure cyning cene and sigefæst . on sǽ and on lande . hæfð fela þeoda gewyld . and cō nu mid fyrde færlice her to lande þæt he her winter-setl mid his werode hæbbe .

Nu het he þe dælan þine digelan gold-hordas . and þinra yldrena gestreon ardlice wið hine . and þu beo his under-kyning . gif ðu cucu beon wylt . for-ðan-þe ðu næfst þa mihte þæt þu mage him wið-standan .

Hwæt þa eadmund clypode ænne bisceop . þe him þa gehendost wæs and wið hine smeade hu he þam reþan hinguare and-wyrdan sceolde .

Þa forhtode se bisceop for þam færlican gelimpe . and for þæs cynincges life . and cw̅ þæt him rǽd þuhte þæt he to þam gebuge þe him bead hinguar .

Þa suwode se cynincg and beseah to þære eorþan . and cw̅ þa æt nextan cynelice him to .

Eala þu bisceop to bysmore synd getawode þas earman land-leoda . and me nu leofre wære þæt ic on feohte feolle . wið þam þe min folc moste heora eardes brucan . and se bisceop cw̅ .

Eala þu leofa cyning þin folc lið ofslagen . and þu næfst þone fultum þæt þu feohtan mæge . and þas flot-men cumað . and þe cucenne gebindað butan þu mid fleame þinum feore gebeorge . oððe þu þe swa gebeorge þæt þu buge to him .

Þa cw̅ eadmund cyning swa swa he ful cene wæs .

Þæs ic gewilnige and gewisce mid mode . þæt ic ana ne belife æft̄ minum leofum þegnum þe on heora bedde wurdon mid bearnum . and wifum . færlice ofslægene fram þysum flot-mannum .

Næs me næfre gewunelic þæt [þæt @ Skeat] ic worhte fleames . ac ic wolde swiðor sweltan gif ic þorfte for minum agenum earde . and se ælmihtiga god wát þæt ic nelle abugan fram his biggengum æfre . ne fram his soþan lufe . swelte ic . lybbe ic .

Æfter þysum wordum he gewende to þam ærendracan þe hinguar him to sende . and sæde him unforht .

Witodlice þu wære wyrðe sleges nu . ac ic nelle afylan on þinum [þin/um/ @ Skeat] fulum blode mine clænan handa . forðan-þe ic criste folgie þe us swa ge-bysnode . and ic bliðelice wille beon ofslagen þurh eow gif hit swa god fore-sceawað .

Far nu swiþe hraðe . and sege þinum reþan hlaforde . ne abihð næfre eadmund hingware on life hæþenum here-togan . buton he to hælende criste ærest mid ge-leafan on þysum lande gebuge .

Þa ge-wende se ærend-raca ardlice aweg . and gemette be wæge þone wælhreowan hingwar mid eallre his fyrde fuse to eadmunde . and sæde þam arleasan hu him geandwyrd wæs .

Hingwar þa bebead mid bylde þam scip-here þæt hi þæs cynincges anes ealle cepan sceoldon . þe his hæse forseah . and hine sona bindan .

Hwæt þa eadmund cynincg mid þam þe hingwar com . stod innan his healle þæs hælendes gemyndig . and awearp his wæpna wolde geæfen-læcan cristes gebysnungum . þe for-bead petre mid wæpnum to winnenne wið þa wælhreowan iudeiscan .

Hwæt þa arleasan þa eadmund gebundon and gebysmrodon huxlice . and beoton mid saglum . and swa syððan læddon þone geleaf-fullan cyning to anum eorð-fæstum treowe . and tigdon hine þær-to . mid heardum bendum . and hine eft swuncgon langlice mid swipum . and he symble clypode betwux þam swinglum mid soðan geleafan to hælende criste . and þa hæþenan þa for his geleafan wurdon wodlice yrre for-þan-þe he clypode crist him to fultume .

Hi scuton þa mid gafelucum swilce him to gamenes to . (sic) oð þæt he eall wæs besæt mid heora scotungum swilce igles byrsta . swa swa sebastian wæs .

Þa geseah hingwar se arlease flot-man . þæt se æþela cyning nolde criste wið-sacan . ac mid anrædum geleafan hine æfre clypode . het hine þa beheafdian and þa hæðenan swa dydon .

Betwux þam þe he clypode to criste þagit þa tugon þa hæþenan þon̄ halgan to slæge . and mid anum swencge slogon him of þæt heafod . and his sawl siþode gesælig to criste .

Þær wæs sum man gehende gehealden þurh god . behyd þam hæþenum . þe þis gehyrde eall . and hit eft sæde swa swa we hit secgað her .

Hwæt ða se flot-here ferde eft to scipe . and behyddon þæt heafod þæs halgan eadmundes . on þam þiccum bremelum þæt [þæt @ Skeat] hit bebyrged ne wurde .

Þa æfter fyrste syððan hi afarene wæron cō þæt land-folc to þe þær to lafe wæs þa . þær heora hlafordes lic læg butan heafde . and wurdon swiðe sarige for his slege on mode . and huru þæt hi næfdon þæt heafod to þam bodige .

Þa sæde se sceawere þe hit ær geseah þæt þa flot-men hæfdon þæt heafod mid him . and wæs him geðuht swa swa hit wæs ful soð þæt hi behyddon þæt heafod on þam holte forhwega .

Hi eodon þa secende ealle endemes to þam wuda . secende gehwær geond þyfelas and bremelas gif hi a-hwær mihton gemeton (sic) þæt heafod .

Wæs eac micel wundor þæt an wulf wearð asend þurh godes wissunge to bewerigenne þæt heafod wið þa oþre deor . ofer dæg . and niht .

Hi eodon þa secende . and symle clypigende . swa swa hit gewunelic is þam ðe on wuda gað oft . hwær eart þu nu gefera . and him andwyrde þæt heafod .

Hér . hér . hér . and swa gelome clypode andswarigende him eallum . swa oft swa heora ænig clypode . oþþæt hi ealle becomen þurh ða clypunga him to .

Þa læg se græga wulf þe bewiste þæt heafod . and [And @ Skeat] mid his twam fotum hæfde þæt heafod beclypped . grædig . and hungrig . and for gode ne dorste þæs heafdes abyrian . and [[ac] @ Skeat] heold hit wið deor .

Þa wurdon hi ofwundrode þæs wulfes hyrd-rædenne . and þæt halige heafod ham feredon mid him . þancigende þam ælmihtigan ealra his wundra . ac se wulf folgode forð mid þam heafde . oþþæt hí to tune comon . swylce he tam wære . and gewende eft siþþan to wuda ongean .

Þa land-leoda þa siþþan ledon þæt heafod to þam halgan bodige . and bebyrigdon hine swa swa hí selost mihton on swylcere hrædinge and cyrcan arærdan sona him onuppon .

Eft þa on fyrste æfter fela gearum . þa seo hergung geswác and sibb wearð forgifen þam geswenctan folce . þa fengon hí togædere and worhton ane cyrcan wurðlice þam halgan . for-þan-ðe gelome wundra wurdon æt his byrgene æt þam gebæd-huse þær he bebyrgen wæs .

Hi woldon þa ferian mid folclicum wurðmynte þone halgan lichaman . and læcgan innan þære cyrcan . þa wæs micel wundor þæt he wæs eall swa gehal swylce he cucu wære mid clænum lichaman . and his swura wæs gehalod þe ær wæs forslagen . and wæs swylce an seolcen þræd embe his swuran rǽd mannum to sweotelunge hu he ofslagen wæs .

Eac swilce þa wunda þe þa wælhreowan hæþenan mid gelomum scotungum on his lice macodon . wæron gehælede þurh þone heofonlican god . and he liþ swa ansund oþ þisne and-werdan dæg . and-bidigende æristes . and þæs ecan wuldres .

His lichama us cyð þe lið un-formolsnod þæt he butan forligre her on worulde leofode . and mid clænum life to criste siþode .

Sum wudewe wunode oswyn gehaten æt þæs halgan byrgene on gebedum and fæstenum manega gear syððan . seo wolde efsian ælce geare þone sanct . and his næglas ceorfan syferlice . mid lufe . and on scryne healdan to halig-dome on weofode .

Þa wurðode þæt land-folc mid geleafan þone sanct . and þeodréd bisceop þearle mid gifum on golde and on seolfre . þam sce̅ to wurðmynte .

Þa comon on sumne sæl unge-sælige þeofas eahta on anre nihte to þam arwurðan halgan woldon stelan þa maðmas þe men þyder brohton . and cunnodon mid cræfte hu hi in cumon (sic) mihton .

Sum sloh mid slecge swiðe þa hæpsan . sum heora mid feolan feolode abutan . sum eac underdealf þa duru mid spade . sum heora mid hlæddre wolde unlucan þæt ægðyrl .

Ac hi swuncon on idel . and earmlice ferdon . swa þæt se halga wer hí wundorlice geband . ælcne swa he stod strutigende mid tole . þæt heora nan ne mihte þæt morð gefremman . ne hi þanon astyrian . ac stodon swa oð mergen .

Men þa þæs wundrodon hu þa weargas hangodon . sum on hlæddre . sum leat to gedelfe . and ælc on his weorce wæs fæste gebunden .

Hi wurdon þa ge-brohte to þam bisceope ealle . and he het hí hón on heagum gealgum ealle .

Ac he næs na gemyndig hu se mild-heorta god clypode þurh his witegan þas word þe hér standað .

Eos qui ducuntur ad mortem eruere ne cesses .

Þa þe man læt to deaðe alys hí ut symble . and eac þa halgan canones gehadodum forbeodað ge bisceopum ge preostum . to beonne embe þeofas . for-þan-þe hit ne gebyraþ þam þe beoð gecorene gode to þegnigenne þæt hi geþwærlæcan sceolon . on æniges mannes deaðe . gif hi beoð drihtnes þenas .

Eft þa ðeodred bisceop sceawode his bec syððan behreowsode mid geomerunge . þæt he swa reðne dóm sette þam ungesæligum þeofum . and hit besargode æfre oð his lifes ende . and þa leode bæd georne . þæt hi him mid fæstan fullice þry dagas . biddende þone ælmihtigan . þæt he him arian scolde .

On þam lande wæs sum man . leofstan gehaten . rice for worulde . and unwittig for gode . se rád to þam halgan mid riccetere swiðe . and het him æt-eowian orhlice swiðe . þone halgan sanct hwæþer he gesund wære . ac swa hraðe swa he geseah þæs sanctes lichaman . þa awedde he sona . and wæl-hreowlice grymetede . and earmlice geendode yfelum deaðe .

Þis is ðam gelic þe se geleaffulla papa gregorius sæde on his gesetnysse be ðam halgan laurentię ðe lið on rome-byrig . þæt menn woldon sceawian symle hu he lage . ge gode ge yfele . ac god hi ge-stilde . swa þæt þær swulton on þære sceawunge ane seofon menn ætgædere . þa geswicon þa oþre to sceawigenne þone martyr mid menniscum gedwylde .

Fela wundra we gehyrdon on folclicre spræce . be þam halgan eadmunde þe we hér nellaþ on gewrite settan . ác hi wát gehwá .

On þyssum halgan is swutel . and on swilcum oþrum . þæt god ælmihtig mæg þone man aræran eft on domes dæg andsundne of eorþan se þe hylt eadmunde halne his lichaman . oð þone micclan dæg þeah ðe he of moldan come .

Wyrðe is seo stow for þam wurðfullan halgan þæt hi man wurþige and wel gelogige mid clænum godes þeowum . to cristes þeow-dome . for-þan-þe se halga is mærra þonne men magon asmeagan .

Nis angel-cynn bedæled drihtnes halgena . þonn̄ on engla-landa licgaþ swilce halgan swylce þæs halga cyning is and cuþberht se eadiga . and sce̅ æþeldryð on elig . and eac hire swustor ansunde on lichaman geleafan to trymminge .

Synd eac fela oðre on angel-cynne halgan þe fela wundra wyrcað . swa swa hit wide is cuð þam ælmihtigan to lofe . þe hí on gelyfdon .

Crist geswutelaþ mannum þurh his mæran halgan þæt he is ælmihtig god þe macað swilce wundra þeah þe þa earman iudei hine eallunge wið-socen . for-þan-þe hí synd awyrgede swa swa hí wiscton him sylfum .

Ne beoð nane wundra geworhte æt heora byrgenum . for-ðan-þe hí ne gelyfað on þone lifigendan crist . ac crist geswutelað mannum hwær se soða geleafa is . þonne he swylce wundra wyrcð þurh his halgan wide geond þas eorðan .

Þæs him sy wuldor á mid his heofonlican fæder . and þam halgan gaste (a buton ende). Amen .

Chapter 33

{{subst::Ælfric's Lives of Saints/33eup}}

Chapter 34

x kl̅. decembr: passio sanctae cecilie virginis.

Iv on ealdvm dagvm wæs svm æðele mæden cecilia gehaten fram cild-hade cristen on romana rice þa þa seo reðe ehtnys stód on þæra casera dagum þe cristes ne gymdon .

Þeos halige fæmne hæfde on hire breoste swa micele lufe to þam ecan life . þæt heo dæges and nihtes embe drihtnes godspel . and embe godes lare mid geleafan smeade . and on singalum gebedum hi sylfe gebysgode .

Heo wearð swa-þeah beweddad swa swa hit woldon hire frynd . anum æþelan cnihte . se næs cristen þa git ualerian᷒ gehaten . sé is nú halig sanct .

Hwæt ða cecilia hi sylfe gescrydde mid hæran to líce . and gelome fæste biddende mid wope . þæt heo wurde gescyld wið ælce gewē|mednysse oððe weres gemanan .

Heo clypode to halgum and to heah-englum biddende heora fultumes to þam heofon-lican gode . þæt heo on clænnysse criste moste þeowian .

Hit gewearð swa-þeah þæt se wurðfulla cniht þa brydlác geforþode . and gefette þæt mæden mid woruldlicum wurðmynte swa swa heora gebyrde wæron .

Þa betwux þam sangum . and þam singalum dreamum sang cecilia symle þus gode .

Fiat cor meum et corpus meum immaculatum ut Non confundar .

Beo min heorte and min lichama þurh god ungewemmed þæt ic ne beo gescynd . and sang symle swa .

Hi wurdon þa gebrohte on bedde ætgædere . and Cecilia sona þæt snotere mæden gespræc hire brydguman . and þus to gode tihte .

Eala þu min leofa man ic þe mid lufe secge .

Ic hæbbe godes encgel þe gehylt me on [lufe] [MS. life] . and gif þu wylt me gewemman . he went sona to ðe . and mid gramum þe slihð þæt þu sona ne leofast .

Gif þu þonne me lufast . and butan laðe gehylst on clænum mægð-hade . crist þonne lufað þe . and his gife geswutelað þe sylfum swa swa me .

Se cniht wearð þa afyrht . and cw̅ to þam mædene .

Dó þæt ic geseo sylf þone engel . gif þu wylt þæt ic gelyfe þinum wordum be þam . and gif þe oþer cniht cuþre is þonne ic . hine ic ofslea . and þe samod mid him .

Cecilia þa cw̅ . gif þu on crist gelyfst . and þu gefullod bist . fram fyrnlicum synnum . þu miht sona geseon þone scinendan engel .

Ualerianus andwyrde þa eft þam mædene .

Hwa mihte me fullian þus færlice nu . þæt ic mihte geseon þone scinendan engel .

Seo fæmne þa lærde swa lange þone cniht . oð þæt he ge-lyfde on þone lifi|gendan god . and ferde to þam papan þe ðær ful gehende wæs urbanus gehaten . and him fulluhtes bæd .

Se papa þa blissode . þæt he ge-beah to gode . and bæd þone ælmihtigan god . þæt he for his arfæstnysse þam cnihte gewissode . þæt he wurde geleafful .

Efne þa færlice ætforan heora gesihþum cō godes engel mid anum gyldenum gewrite . and ualerianus feoll afyrht to eorðan . þa arærde hine se engel and het hine rædan þa gyldenan stafas þe him god tosende .

On þam gewrite wæron þas word gelogode .

Unus deus . una fides . unum baptisma .

An ælmihtig god is . and an geleafa . and an fulluht . and he feng to rædene .

Þa cw̅ se engel . gelyfst þu þises . oððe licað þe elles hwæt .

Ualerianus andwyrde . hwæt bið æfre soðlicre oððe to gelyfenne ænigum lifigendum menn . and se engel þa gewende mid þam worde him fram .

Se papa ða siððan hine sona ge-fullode . and his geleafan him tæhte . and let hine eft faran ham to cecilian þam halgan mædene .

Þa funde se cniht þa fæmnan standende on hire gebedum on hire bure ane and godes engel standende mid gyldenum fyþer-haman . mid twam cyne-helmum gehende þam mædene .

Þa cyne-helmas wæron wundorlice scinende on rosan readnysse . and on lilian hwitnysse . and he forgeaf þa ænne þam æþelan mædene . and oþerne þam cnihte . and cw̅ him þus to .

Healdað þas cynehelmas mid clænre heortan for-þam-þe ic hí genam on neorxne-wange . ne hí næfre ne for-seariað ne heora swetnysse ne forleosað . ne heora wlita ne awent to wyrsan hiwe . ne hí nan man ne gesihð butan se þe | clænnysse lufað . and þu ualeriane for-ðan-þe ðu lufast clænnysse . se hælend þe het biddan swa hwilce bene swa þu wille .

Þa cneowode se cniht and cw̅ to þam engle .

Næs me nan þing swa leof on þysum life wunigende swa me wæs min broþor . and bið me un-eaþe þæt ic beo alysed . and he losige on witum .

Þas bene ic bidde þæt min broþor tiburtius beo alysed þurh god and to geleafan gebiged . and he do unc begen him to biggengum .

Þa cw̅ se engel eft mid blisse him to .

Forþan-þe þu þæs bæde þe bet gode licað þin broðor tiburtius bið gestryned þurh þe to þam ecan life . swa swa þu gelyfdest on god þurh cecilian lare . and git sceolan begen (þu and þin broðor) beon gemartyrode samod . and se engel þa ge-wende up to heofonum .

Hi smeadon þa mid glædnysse . and embe godes willan spræcon . oþ-þæt his broþor com bliðe on mergen him to . and cyste hí butu . and cw̅ mid blisse .

Ic wundrige þearle hu nu on wintres dæge her lilian blostm oþþe rosan bræð . swa wynsumlice and swa werodlice stincað .

Ðeah þe ic hæfde me on handa þa blostman . ne mihton hi swa wynsumne wyrt-bræð macian . and ic secge to soþan þæt ic swa eom afylled mid þam swetan bræða . swylce ic sy geedniwod .

Þa cw̅ se broðor . þurh mine bene þe com þæs wynsuma bræð to þæt þu wite heonan-forð hwæs blod readaþ on rosan gelicnysse . and hwæs lichama hwitað on lilian fægernysse .

We habbað cyne-helmas halige mid us scinende swa swa rose . and snaw-hwite swa swa lilie . þa þu ne miht geseon þeah þe hí scinende beon .

Þa cwæð tiburtius .

Sege me | broðor min . gehyre ic þis on slæpe . oððe þu hit sægst on eornost .

Se oðer him cw̅ to .

Oð þis we leofodon swilce we on slæpe wæron . ac we synd nu gewende to soðfæstnysse . þa godas þe we wurþodon syndon gramlice deofla . þa cw̅ se oþer .

Hu wearð þe þæt cuþ? [sic @ Skeat]

Ualerianus andwyrde .

Godes engel me tæhte . and þone þu miht geseon gif ðu soðlice bist on fulluhte aþwogen fram þam fulum deofol-gilde .

Hi spræcon þa swa lange . oð-þæt hé to ge-leafan beah . and se broðor wolde þæt he wurde gefullod .

Þa befrán tiburtius hwa hine fullian sceolde .

Se oðer him cw̅ to .

Urban᷒ se papa .

Eft þa tiburtius him andwyrde and cw̅ .

Se is geutlagod and lið him on digelan for his cristen-dome . and gif we cumað him to . we beoð gewitnode . gif hit wyrð ameldod . and þa hwile þe we secað swa swa hit gesǽd is god-cundnysse on heofonum . we graman gemetað . and lif-leaste on eorðan gif we his lare folgiað .

Þa cw̅ cecilia sona mid ge-bylde . gif þis lif wære ana . and oþer nære selre . þonne mihte we ondrædan us deaðes rihtlice .

Þa axode tiburtius . is ænig oþer lif? [sic @ Skeat]

Cecilia him cw̅ to .

Cuð is gehwilcum menn þæt þis lif is geswinc-ful . and on swate wunað .

Þis líf bið alefed on lang-sumum sarum . and on hætum ofþefod . and on hungre gewæht . mid mettum ge-fylled . and modig on welum . mid hafen-leaste aworpen and ahafen þurh iugoðe . mid ylde gebiged . and to-bryt mid seocnysse . mid unrotnysse fornumen . and geangsumod þurh cara . þonne cymð him deað to . and deð of ge-mynde ealle þa blysse þe he breac on his life . and on þam ecan life þe æft̅ þysum cymð bið þam rihtwisum for|gifen rest . and gefea . and þam unrihtwisum þa ecan wita .

Þa cw̅ tiburtius . hwa cō þanon hider þe mihte us secgan gif hit swa wære? [sic @ Skeat]

Cecilia þa arás . and mid anrædnysse cw̅ .

Ealle ge-sceafta scyppend ænne sunu gestrynde . and forð-teah þurh hine sylfne þone frofer gast . þurh þone sunu he gesceop ealle gesceafta þe syndon . and hí ealle gelyffæste þurh þone lifigendan gast .

Þa andwyrde tiburtius .

Ænne god gebodiað . and hu-meta namast þu nam-cuðlice þry godas .

Cecilia him andwyrde .

An god is ælmihtig on his mægen-þrymnysse wunigende . Ðone arwurðiað we cristenan æfre on þrynnysse . and on soðre annysse . for-þan-þe fæder . and sunu . and se frofer gast an gecynd habbað . and ænne cyne-dom . swa swa on anum men synd soðlice þreo þing . andgit . and wylla . and gewittig gemynd . þe anum men gehyrsumiaþ æfre togædere .

Þa feoll tiburtius forht to hire cneowum . and clypode hlude . and cw̅ mid geleafan .

Ne þincð me þæt þu spræce mid menniscre spræce . ac swilce godes engel sylf spræce þurh þe . ac ic axie git be þam oþrum life hwa þæt gesawe . and siððan come hider .

Hwæt þa cecilia him snoterlice andwyrde . and sæde hu se hælend of heofonum cō to us . and hwylce wundra he worhte on þisre worulde fela . and hu he þa deadan arærde of deaðe to life . and hu he sylf of deaðe on þam þriddan dæge arás . and fela þincg him sæde swutellice be criste .

Þa weop tiburtius and gewilnode georne þæt he gefullod wurde æt þam fore-sædan papan . and se broþer siþode sona forð mid him . and cydde þam papan hwæt hí gecweden hæfdon .

Se papa ða urbanus blis|sode on gode . and gefullode sona þone gesæligan cniht . and sæde him geleafan geond seofon dagas on án . oþ þæt he fulfremod ferde eft ongean .

He beget þa æt gode þa gastlican gesælþa . swa þæt he dæg-hwamlice drihtnes englas geseh . and swa hwæs he ge-wilnode . him ne forwyrnde god . and worhte gelome wundra þurh hine . and þurh his broðor swa swa béc secgað .

Þa wæs on rome byrig sum reðe cwellere almachius gehaten . se wæs heah-gerefa . and he mid manegum witum gemartyrode þa cristenan . þa ða he of-axian mihte . and man ne moste hí bebyrigan .

Ualerianus þa and his fore-sæda broþor bebyrigdon þa martyras þe se man-fulla acwealde . and ælmyssan dælde dæghwamlice þearfum . oð þæt se arleasa ehtere of-axode heora dæda .

Hwæt þa almachius het þa men gelangian . and axode hi sona mid swiðlicre þreatunge hwi hí þa be-byrigdon þe his beboda for-sawon . and for heora scyldum ofslagene lagon . oþþe hwi hí dældon dearnunga heora æhta waclicum mannum unwislicum ræde .

Þa andwyrde tiburtius þam arleasan and cwæð .

Eala gif þa halgan þe þu hete ofslean and we bebyrigdon . woldon us habban huru him to þeowum to heora þenungum .

Hi þa swa lange motodon . oþ þæt se manfulla hét mid saglum beatan þone oþerne broþor . and sum ræd-bora þa to þam reðan þus cw̅ .

Hát hí leof acwellan . nu hí cristene synd . gif þu þonne elcast . heora æhta hí dælað þearfum . and wædlum . and þu witnast hí siððan . and næfst þa æhta for þinre ælcunge .

Almachius þa hét his manfullan | cwelleras lædan þa gebroðra on bendum togædere to þam hæþengilde . and het hí geoffrian oþþe hí man ofsloge . mid swurde þær-rihte .

Hi lædde þa maximus swa se manfulla hét mid oþrum cwellerum to þære cwealm-stowe .

Þe weop maximus for-þan-þe hí woldon sweltan and axode þa gebroðra hwi hí swa bliþelice eodon to heora agenum slege . swylce to gebeorscipe .

Þa cw̅ se yldra broþor .

Noldon we efstan to deaþe mid swa mycelre blisse . gif we to beteran life soðlice ne becomon siððan we ofslagene beoð to þam ecan life . swa swa we leornodon to soþan .

Betwux þære tihtinge þa þa hí tengdon forð . þa cw̅ se maximus to þam martyrum þus .

Ic wolde eac forseon þisre worulde swæsnysse . gif ic wiste to gewissan þæt eowre word wæron soþe . þa cw̅ se gingra broðor of þam bendum him to .

Ure drihten crist deð þæt þu ge-sihst þonne we ofslagene beoð hu ure sawla farað mid wuldre to him . gif þu wylt nu behatan þæt þu mid eallum mode . þin mán behreowsige .

Maximus þa cw̅ to þam martyrum þus .

Fyr me forbærne gif ic ne buge to criste . siþþan ic geseo hu eowre sawla farað to þam oþrum life þe ge embe sprecað .

Þa cwædon þa halgan gebroþra þe he on bendum lædde .

Bebeod þysum cwellerum þæt hí us cuce healdan on þinum agenum huse . nu þas ane niht . oðþæt þu sy gefullod fram fyrnlicum synnum . þæt þu mote geseon þa ge-sihðe þurh god .

Hi wurdon þa gebrohte on bendum to his huse . and cecilia seo eadige mid arwurðum sacerdum þider com sona . and hí sæton þa niht embe crist sprecende . oþþæt þa cwelleras gelyfdon and wurdon ge-fullode æt þam fore-sædum | preostum .

Hwæt þa on dægræd þæt deorwurðe mæden cecilia clypode . and cw̅ to him eallum .

Nu ge la godes cempan . awurpað caflice eow fram þæra þeostra weorc . and wurðað ymbscrydde mid leohtes wæpnum . to þysum gewinne nu .

Ge habbað gecampod swiðe godne campdom eowerne ryne ge gefyldon and geleafan geheoldon . gaþ to þam wuldor-beage þæs wynsuman lifes . þonne (sic) se riht-wisa dema deð eow to edleane .

Hi wurdon þa gelædde for heora geleafan to slege . and mid swurde beheafdode . þa beheold maximus and sæde mid aþe to þam ymbstandendum .

Ic ge-seah soðlice mid þam þe hi ofslagene wurdon . godes englas scinende on sunnan gelicnysse fleogende him to . and under-fengon heora sawla . and þa sawla ic ge-seah swiðe wlitig faran forð mid þam englum on heora fiðerum to heofonum .

Þa þa maxim᷒ sæde swa soðlice ðas word weopendum eagum . þe gewendon þa hæþenan manega to geleafan fram heora leasum godum .

Almachius þa ofaxode þæt se arwurða maxim᷒ mid eallum his hiwum on þone hælend gelyfde . and wæron gefullode . wearð þa him gram and het hine swingan mid leadenum swipum oþ þæt he gewát of worulde to criste .

Cecilia þa sona þone sanct bebyrigde on stænenre þryh on þam stede þe lagon þa twegen gebroþra bebyrigde on ǽr .

Heo dælde þa siððan digellice þearfum hire brydguman æhta . and his broþor þing . and almachius wolde witan ymbe þa æhtan (sic). swylce heo wydewe wære . and heo wearð þa geneadod þæt heo offrian sceolde þam arleasum godum .

Þa weopon þa hæðenan þæt swa wlitig fæmne . and swa æþel-boren wimman mid wisdome afylled . wolde | deað þrowian on witum swa Iung .

Þa cw̅ cecilia and sæde him eallum .

Ne bið se forloren þe lið for gode ofslagen he bið swa awend to wuldre of deaðe . swilce man lam sylle . and sylf nime gold . swilce he sylle wác hús . and wuldor-ful under-fó . sylle gewitendlic . and ungewitendlic under-fó . sylle wacne stán . and wurðfulne gym under-fó .

Heo tihte þa swa lange þa ungeleaffullan hæðenan oð þæt hí ealle cwædon mid anre stemne þus .

We gelyfað þæt crist godes sunu soðlice god is þe þe þyllice under-feng him to þinenne on worulde .

Þa wurdon gefullode . feower hund manna on cecilian huse þam hælende to lofe . and se papa mæssode þam mannum gelome . on þam ylcan huse . and se hæðenscipe wanode .

Almachius se arleasa hét þa ardlice gefeccan þa eadigan cecilian . and hí axode sona [of] [not in MS.] hwylcere mægðe heo wære . and hí motodon lange . oþþæt þam deman ofþuhte hyre drystig-nyss . and cw̅ orhlice eft to þam mædene .

Nast þu mine mihte . and þæt mæden him cw̅ to .

Ic secge gif þu hætst hwilce mihte þu hæfst .

Ælces mannes miht þe on modignysse færð . is soðlice þam gelíc swilce man siwige ane bytte . and blawe hí fulle windes . and wyrce siððan an þyrl þonne heo to-þunden bið on hire greatnysse þonne togæð seo miht .

Almachius hire cw̅ to þa þa hi campodon mid wordum

Hwæt þu ungesælige . nast þu þæt me is geseald anweald to ofsleanne and to edcucigenne . and þu spræcst swa modelice mine mihta tælende .

 mæden him cw̅ to .

Oþer is modignyss . oþer is anrædnyss . and ic anrædlice spræc . na modelice . forþan-þe wé modignysse eallunga onscuniað . and eft heo cw̅ him to . | þu cwæde þæt þu hæfdest to acwellene anweald . and to edcucigenne . ac ic cwæðe þæt þu miht þa cucan adydan . and þam deadan þu ne miht eft líf forgifan . ac þu lyhst openlice .

Almachius hire andwyrde .

Awurp þine dyrstignysse and geoffra þam godum arwurðlice onsægednysse .

Cecilia him cw̅ to . cunna mid grapunge hwæðer hí stanas synd . and stænene anlicnysse þa þe þu godas gecigst begotene mid leade . and þu miht swa witan gewislice mid grapunge gif ðu geseon ne miht þæt hi synd stanas .

Hi mihton wel to lime . gif man hí lede on ád . nu hí ne fremiað him sylfum . ne soðlice mannum . and hí mihton to lime gif hí man lede on fyr .

Þa wearð se arleasa dema deoflice (sic) gram . and hét hí lædan sona . and seoðan on wætere on hire agenum huse for þæs hælendes naman .

Þa dydon þa hæþenan swa swa hí hét almachius . and heo læg on þam bæðe bufan byrnendum fyre . ofer dæg . and niht . ungederodum lichaman . swa swa on cealdum wætere . þæt heo ne swætte furðon .

Hi cyddon þa almachie hu þæt mæden þurh-wunode on þam hatum baðe mid halum lichaman . and furþon butan swate . þa sende he ænne cwellere to . and hét hí beheafdian on þam hatan wætere .

Se cwellere hí sloh þa mid his swurde ænne eft . and þryddan siðe . ac hire swura næs forod . and he forlét hí sona swa samcuce licgan . forþam-þe witan cwædon þæt nan cwellere ne sceolde feower siðan slean to . þonne man sloge scyldigne .

Heo leofode þa þry dagas . and þa geleaffullan tihte . and hire mædena betæhte þam maran papan . and hire hus wearð gehalgod to haligre cyrcan .

Þær wurdon þurh god wundra ge|lome and urban᷒ se papa bebyrigde hí arwurðlice . to wuldre þam ælmihtigan þe on ecnysse rixað . amen.

Chapter 35

iii. kal. decembr: passio chrisanti et dariæ sponse eivs.

On ðam timan ðe nvmerianvs casere rixode þa ferde sum æðelboren man fram alexandrian byrig to rome byrig . polemius gehaten . se wæs hæþengilda . and he hæfde ænne sunu gehaten crisantus .

Se kasere hine underfeng ða mid fullum wurðmynte . and þa romaniscan witan hine wurðodon swyðe .

Þa befæste he his sunu sona to lare to woruld-wisdome þæt he uð-wita wurde . for-ðam-þe on þam dagum ne mihte nan man beon geþogen buton he hæþene béc hæfde geleornod . and þa cræftas cuþe þe kaseres þa lufodon .

Crisant᷒ þa leornode mid leohtum andgite . and mid gleawum mode grammatican cræft . and þa hæðenan béc . oþ-þæt þa halgan godspel him becómon to hande . þa cw̅ he to him sylfum .

Swa lange ic leornode þa ungeleaffullan béc mid þeostrum afyllede . oþ-þæt ic færlice becō to soðfæstnysse leohte . and ic snoter ne beo gif ic cyrre to þeostrum fram þam soðan leohte .

Uton healdan fæste þone fægeran gold-hord nelle ic hine for-leosan . nu ic swa lange swanc . un-nyt ic leofode gif ic hine nu forlæte.

He began þa to secenne swyðe ða cristenan . oðþæt he ofaxode ænne arwurðne mæsse-preost . on fyrlenum wunigende . and he fægnode þæs .

He wearð þa gefullod æt þam fore-sædan preoste . and leornode his geleafan mid þam halgan lareowe . swa þæt he þone cristen-dom cuðe be fullan . and began to bodigenne bealdlice þone hælend .

Þa ge-stodon | his frynd his fæder and cwædon .

To plihte þinre æhta and þines agenes heafdes bodað þes þin cnapa swa bealdlice be criste . wurðe hit þam casere cuþ ne canst þu þe nænne ræd .

Þa gebealh hine se fæder . and gebrohte þone sunu on leohtleasum cwearterne . and beleac hine þær . and on æfen symle sende him bigleofan lytelne and wacne . and he wunode þær swa .

Þa sædon þa magas eft sona þam fæder .

Gif þu wille þinne sunu geweman fram criste . þonne most þu him olæcan . and eft-mettas beodan . and dó þæt he wifige þonne wile he forgitan siððan he wer bið þæt he wæs cristen .

Þas geswencednyssa . and þas sweartan þeostra þe þu him dest to wite . awendaþ þa cristenan him sylfum to wuldra . na to witnunge .

Se fæder þa het feccan of þam fulum cwearterne þone geswenctan cniht . and hine sona scrydde . mid deorwurðum reafum . and het dæftan his búr . mid pallum . and mid wah-ryftum . wurðlice þam cnihte .

He funde eac sona fif mædena him to . wlitige and rance . to wunigenne mid him . and hét þæt hi awendon mid heora wodlican plegan his geþanc fram criste . and cw̅ þæt hi sceoldon sylfe hit gebicgan . gif hi ne bigdon his mód .

He sende him eac gelome sanda . and estas . ac se cniht forseah þa sanda . and drencas . and þa mædena onscunode . swa swa man deþ næddran .

He læg on gebedum . and forbeah heora cossas . and bæd þone hælend þæt he ge-heolde his clænnyse . swa swa he heold Iosepes on ægipta lande .

He andette eac gode mid eallum mode and cw̅ .

Ic bidde þe drihten þæt þu dó þæs næddran þæt hí ealle slapon on minre gesihðe nu . þæt hí awræccan ne magon mid heora wodlican ple|gan ænige galnysse on me for-ðan-þe ic truwige on þe .

Mid-þam-þe crisantus clypode þas word to gode . þa slepon þa mædene swa swarum slape . þæt man hi awreccan ne mihte butan man hi awurpe ut of þæs cnihtes bure þe ða clænnysse lufode .

Wið-utan þam bure hí æton and wacodon . and swa hraðe swa hí in-eodon hí wurdon on slæpe .

Þis wearð þa gesǽd sona þam fæder . and he beweop þone sunu swilce he dead wære .

Þa cw̅ sum rædbora þæt [þæt @ Skeat] chrisantus leornode dry-cræft æt þam cristenum and ofer-com mid þam þa bilewitan mædene on þam bure swa eaþelice . and tihte þone fæder þæt he funde sum mæden on cræftum getogen . þe cuþe him andwyrde .

Þa wæs sum mæden wundorlice cræftig on þære ylcan byrig æþelborenre mægðe daria gehaten on hæðenscipe wunigende . wlitig on wæstme . and on uðwitegunge snoter .

Polemius þa sona sende his frynd to þam mædene darian and micclum wæs biddende . þæt heo chrisantum gewemde fram criste mid spræce . and þæt heo hæfde hine hire to were syððan .

Him gewearð þa æt nextan þæt heo wolde swá don . and com þa geglenged mid golde to þam cnihte . and scinendum gymstanum swilce sun-beam færlice . and hine frefrode mid hire fægerum wordum .

Þa cw̅ crisantus hire to mid clænum mode þus . swyðe þu geglengdest mid golde þe sylfe þæt þu mid þinre wlite mine willan aidlige . ac þu mihtest habban þone hælend to brydguman gif þu hine lufodest . and heolde þe clænlice . on ungewemmedum mægðhade . and þu wurde swa wlitig wiþ-innan on mode . swa swa þu wið-utan eart .

Daria him andwyrde . ne | dyde ic for galnysse þæt ic þus gefretewod ferde in to þe . ac þines fæder wóp ic wolde ge-stillan þæt þu him ne losige ne huru þam godum .

Crisant᷒ þa axode betwux oþrum spræcum .

Hwilce godnysse hæfde eower god saturn᷒ þe abát his suna þonne hí ge-borene wæron . swa swa his biggengan on heora bocum awriton .

Oþþe hwilce godnysse hæfde se gramlica Iouis se þe on fulum foligre leofode on worulde . and his agen swustor him geceas to wife . and manega manslihtas and morð-dæda gefremode . and dry-cræft arærde to bedydrigenne þa unwaran? [sic @ Skeat]

Oððe hwylc halignyss wæs on þam hetelan ercule þam ormætan ente . þe ealle acwealde his nehgeburas . and forbærnde hine sylfne swa cucenne on fyre . siððan he acweald hæfde men . and þa leon . and þa micclan næddran? [sic @ Skeat]

Hwilc beoð þa lytlan godas on to gelyfenne nu þa fyrmestan godas swa fúllice leofodon? [sic @ Skeat]

Crisantus þa swa lange to geleafan tihte darian mid wordum . oþ-þæt heo ge-wende to gode forlætenum gedwylde deoflicra biggenga .

Hi wurdon þa anræde . and wunodon ætgædere gehiwodum synscipe . and gehealdenre clænnysse . oþþæt daria under-feng fulluht on gode . and godes béc leornode æt þam gelæredum cnihte . and hire mod gestrangode on mægðhade wunigende .

Wurdon þa on fyrste fela men gebigde þurh heora drohtnunge fram deofles biggengum to cristes geleafan and tó clænum life .

Cnihtas gecyrdon þurh crisantes lare . and mædenu þurh darian manega to drihtne forlætenum synscipe . and geswæsum lustum . oþþæt sume men astyrodon sace be þysum . and hí wurdon gewrehte to þam wæl-hreowan deman . þe | on þone timan geweld þære widgillan rome byrig .

Hwæt þa se hæðena dema het ge-hæftan crisantum and darian samod for drihtnes geleafan . and mid mislicum witum hét hí gewitnian oð deað . gif hí noldon ge-offrian þam arwurðum godum .

Crisant᷒ wearð betæht hundseofontigum cempum . and hi hine bundon hetelice swiðe . ac þa bendas toburston sona swa he gebunden wæs .

Hi gebundon hine eft . oft and gelome ac þa bendas toslupon swa swyðlice him fram . þæt man ne mihte to-cnawan hwæðer hí gecnytte wæron .

Þa yrsodon þa cempan ongean þone cristenen cniht . and gesettan hine þa on ænne heardne stocc . and his sceancan gefæstnodon on þam fot-copsum bysmrigende mid wordum þone halgan wer . ac se fot-cops awende wundorlice to þrexe . and eall to duste þurh drihtnes mihte .

Þa wendon þa cempan þæt he cuðe dry-cræft . and beguton hine ealne mid ealdum miggan . wendon þæt se migga mihte aidlian ealne his scincræft . ac hí swuncon on idel forðan-þe se migga þurh godes mihte wearð to swetum stence sona awend .

Hi behyldon þa ardlice ænne oxan mid graman . and besywodon crisantum swa mid þære hyde to his nacodum lice . and ledon hine ongean þa sunnan .

He læg swa ealne dæg on þære ormætan hætan . ac seo hyd ne mihte aheardian . him abutan . ne þam halgan derian on þære hatan sunnan .

Hi tigdon þa his swuran swiðe mid racen-teagum . and his handa samod mid heardum isene . and þa fét togædere mid gramlicum anginne . and wurpon hine swa gebundene into anum blindum cwearterne .

Þa toslupon þa bendas on his swuran and handum and þær scean mi|cel leoht swa swa of manigum leohtfatum .

Þa cempan þa cyddon þæt claudio heora ealdre . and he sylf cō þær-to . and geseah þæt leoht . and het hine utgán . and began hine to axienne .

Hwæt is seo micele miht þinre morð-cræfte þæt þu þyllic gefremast þurh feondlicne dry-cræft .

Ic ge-wylde for-oft þa anrædan dry-men and ælcne wicce-cræft ic eaðelice ofer-swiðde . and þa chaldeiscan wigleras . and þa wurm-galeras ic mihte gewyldan to minum willan æfre . and ic næfre ne afunde swa fæstne dry-cræft .

Ic wille nu swa-þeah þæt þu awende þe sylfne fram þinum cristendome and gecweme urum godum . mid arwurðum offrungum .

Him andwyrde þa crisantus .

Þu mihtest to-cnawan gif þu cuþest ænig god þæt ic mid dry-cræfte ne dyde þas þing . ac me fylste god sylf mid god-cundre mihte .

Þine godas ne geseoþ ne soðlice ne ge-hyrað ac syndon andgitlease mid leade gefæstnode .

Claudius þa hét hine hetelice swingan mid greatum gyrdum for his goda teonan .

Þa wurdon þa gyrda wundorlice gehnexode færlice on heora handum swilce hit fæðera wæron .

Þa þa hí man heold hi wæron hearde . and hostige . þonne man sloh . sona hi hnexodon .

Claudius þa hét þone halgan forlæton . and hine siððan scrydan and he sylf clypode .

Nis þeos miht of mannum . ac is godes mærð þe ealle þas wita gewylde swa eaðelice . hwæt wille we leng dón buton licgan ealle æt his arwurðum cneowum . and eadmod-lice biddan þæt he us geþingie to þyllicum gode þe his biggengan macaþ swa mihtige on gewinne .

Hi feollon þa ealle mid fyrhte to his cneowum . and claudius him cw̅ to .

Ic on-cneow to soþan þæt þin god is soð god . and ic | sylf nu bidde þæt þu me ge-þingie hu ic wurðe his biggenga .

Crisant᷒ him andwyrde .

Ne þearft þu yrnan on fotum ac mid geleafan gán þæt þu god on-cnawe .

Swa micclum he bið andwerd anum gehwilcum men . swa micclum swa he hine secð mid soþum geleafan .

Crisantus hí lærde þa oþ-þæt hí gelyfdon on god . claud[i]us and his wíf hilaria gehaten . and heora twegen suna . nasón and maurus . and heora maga fela to fulluhte hí gebugon . and þa hund-seofontig cempan þe claudius bewiste . wurdon gefullode mid heora freondum þæs dæges .

Hi ealle þa wunodon wuldrigende heora drihten and geornlice leornodon heora geleafan æt crisante . and wiscton þæt hí moston wite þrowian for criste .

Hit bið lang-sum to awritene þa wundra þe hí gefremodon ealle be ende-byrdnysse for-þan-þe we efstað swyðe eow mannum to secgenne hu hí gemartyrode wæron .

Numerianus se casere þære cristenra ehtere þa þa him wearð cuð þæt claudius gelyfde . and ealle þa cempan cristene wæron . þa hét he niman claudium and lædan to sǽ . and wurpan hine ut mid anum weorc-stane .

He het beheafdian siððan þa hund-seofontig cempan butan heora hwilc wolde awegan his geleafan . ac hí ealle efston anrædlice to slæge . and claudies twegen suna cwædon þæt hí wæron on criste gefullode . and under-fón woldon deað . mid þam cempum . for cristes geleafan .

Hi wurdon þa ofslagene samod for criste . and hilaria se eadiga eac wearð gelæht to þam martyr-dome . fram þam manfullan .

Þa bæd heo þa cwelleras . þe hi to cwale læddon þæt heo moste ærest hí ardlice gebiddan . and heo swa dyde . and drihtnes | lichaman underfeng . and on þam gebedum gewát of worulde to criste .

Efter þysum wearð se halga wer crisantus on cwearterne gebroht . swa swa se casere hét . þæt he mid darian for drihtnes ge-leafan on mislicum witum gemartyrod wurde .

 cweartern wearð afylled mid fulum adelan . and butan ælcum leohte atelice stincende .

Daria se eadiga fram þam arwurþan wæs on-sundran gehæft . and hí man sende þa to myltestrena huse þam manfullan to gamene . ac god hí gescylde wið þa sceandlican hæðenan .

 an-þræce cweartern þe crisantus on wæs . wearð onliht sona wundorlice þurh god . and þær wynsum bræð werodlice stemde . and an leo utbærst ut of þære leona pearruce . and arn to darian þurh drihtnes sande . þær heo læg on gebédum . and alǽt to eorðan astræhtum limum wið þæt geleaffulle mæden .

Þa woldon ða hæðenan habban hi to bysmore . and nyston þæt se[o] leo læg inne mid hire . eode þa heora an into þam mædene . ac seo leo hine gelæhte . and alede hine adune and beseah to darian swylce heo axian wolde . hu he[o] wolde be him þa he ge-wyld læg .

Daria þa cw̅ . to þam deore þus .

Ic þe halsige þurh crist þæt þu þam cnihte ne derige . ác læt hine butan ege hlystan minre spræce .

Þa forlét seo leo þone ungeleaffullan cniht . and forstód him þa duru þæt he darian gespræce . and þæt nan oþer man ne mihte in to him .

Daria þa cw̅ to þam ofdræddan men .

Efne þeos reþe leo arwurðað nu god . and þu gesceadwisa man þe sylfne for-dest . and þu fægnast earmincg on þinre fulan galnysse . þurh þa ðu scealt weopan and wite þrowian .

Þa gesohte hé hí | and sæde mid fyrhte .

Let me gan gesund út and ic syððan bodige mannum þone hælend þe þu mærsast and wurðast .

Þa het daria þæt deor him ryman út . and he arn út arwurðigende god . and þæt halige mæden hire mihte cyðende .

Þa woldon þa hæþenan hetan þære leo ac heo gelæhte æfre . ænne . and ænne . and brohte hí to darian þurh drihtnes mihte .

 mæden þa cw̅ to þam mannum þus .

Gif ge wyllað gelyfan on þone lifigendan crist . þonne mage gé gán un-amyrrede heonan . gif ge þonne nellað þone geleafan habban . nát ic gif eowre godas eow gehelpan magon .

Hi ealle þa clypodon swilce mid anre stemne . se ðe on crist ne gelyfe . ne cume he cucu heonon . and hí eodon þa ut ealle clypigende .

Eala ge romaniscan leoda gelyfað to soþan þæt nan oþer god nys butan criste anum .

Þa wearð se heah-ge-refa hearde gegremod . and hét ontendan fyr ætforan þære dura þær daria inne wæs mid þam deore samod wolde hi for-bærnan butu ætgædere .

Þa forhtode seo leo for þam fyre þearle ac daria cw̅ to þam deore þus .

Ne beo þu afyrht þis fyr þe ne derað ne þu ne bíst ofslagen ær-þan-þe þu sylf acwele . gang þe nu orsorh aweg . and god ahret . þone þe ðu wurðodest mid þinum weorcum to-dæg .

Þa eode seo leo alotenum heafde to-middes þæs folces freolice aweg . and þa þe heo ær gefeng wurdon gefullode siððan hí on-cneowan crist þurh ða leon .

Þis wearð þa gecyd þam casere sona . and he het mid graman his heah-ge-refan geniman crisantum and darian . and acwellan hí mid witum . gif hi noldon offrian þam arleasum godum .

Se heah-gerefa þa het on hengene astreccan þone halgan crisantum . and mid candelum bærnan buta | his sidan . þa to-bærst seo hengen mid eallum ðam cræfte . and þa candela acwuncon .

Ealswa þa oþre men þe yfelian woldon þa halgan darian . drihten hí gelette swa þæt heora sina sona forscruncon . swa hwá swa hi hrepode . þæt hí hrymdon for ece .

Hwæt ða celerinus se forscyldegoda gerefa mid fyrhte wearð for-numen . and ferde to þam casere . and sæde him be endebyrdnysse þa syllican tacne .

Numerian᷒ þa se manfulla casere tealde þæt to dry-cræfte . na to drihtnes tacnum . and het lædan buta þa halgan togædere to anum sand-pytte . and setton hí þær-ón and be-wurpan mid eorþan . and mid weorc-stanum .

Hí wurdon þa buta bebyrigde swa cuce . swa swa se casere hét . and hí mid clænnysse ferdon of worulde to wuldre to wunigenne mid criste .

Þær wurdon gefremode fela wundra þurh god . and þæt folc gewurðode þa wuldorfullan halgan . and gelome sohton mid geleafan þider .

Hit gelamp þa on fyrste þa þa þæt folc þider sohte to þam micclan screfe . þær þa martyras lagon . þæt se casere hét ahebban ænne wah to þæs scræfes ingange . þæt hí út ne mihton . and hét afyllan þæt clyf færlice him on-uppan . þæt hi ealle to-gædere heora gastas ageafon . mid eorðan of-hrorene . and hí rixiað mid gode on þam ecan life for heora geleafan acwealde .

We wurþiað godes halgan . ac wite ge swa-þeah þæt þam halgum nis nan neod ure herunge on þam life . ac us sylfum fremað þæt þæt we secgað be him . ærest to gebysnunge . þæt we þe beteran beon . and eft to þing-rædene þonne us þearf bið .

Mycel ehtnys wæs þa ða hí wæron gemartyrode . ac git cymð earfoþre ehtnys on anticristes tocyme . forþan-þe þa martyras | worhton manega wundra þurh god . and on anticristes timan ateoriað þa wundra . and se deofol wyrcð þonne wundra þurh his scin-cræft . mid leasum gedwimorum to dweligenne þa geleaffullan .

Mycel angsumnys bið þam arwurðum halgum . þæt se feondlica ehtere fela tacna wyrce . and hi sylfe ne moton swa þa martyras dydon . wundra æteowigende on þam wyrstan timan .

Hi beoð swa-þeah ge-healdenne þurh þæs hælendes mihte gif hí heora geleafan gehealdað oð ende on þam earfoðum ehtnyssum þæs arleasan deofles .

Swa swa se hælend cw̅ on his halgan godspelle . se þe þone antecrist eaðelice fordeð .

Þam sy wuldor and lof á to worulde . Amen .

Chapter 36

xii. kl̅ ianuarias: passio sci̅ thome apostoli. Dvbitabam div transferre anglice passionem sci̅ thome apostoli ex quibusdam causis et maxime eo quod augustinus magnus abnegat de illo pincerno (sic) cuius manum niger canis in conuiuium portare deberet . cui narrationi ipse augustinus his uerbis contra-dicens scripsit . cui scripture licet nobis non credere non enim est in cathólico canone . Illi tamen eam et legunt et tanquam incorruptissimam uerissimamque honorant qui aduersus corporales uindictas quę sunt in ueteri testamento nescio qua cecitate acerrime seuiunt . Quo animo et qua distributione temporum facte sint omnino nescientes . Et ideo uolo hoc pretermittere et cetera interpretari quę in eius passione habentur sicut æþelwerd᷒ uenerabilis dux obnixe nos praecatus est .

{{block left| <poem> | Æfter þæs hælendes þrowunge . and æriste of deaðe and up-stige to heofonum þa þa his apostolas to-ferdon geond þisne middan-eard . þa becō thomas to cesarian byrig . and se hælend sylf of heofonum cō him to þus cweðende .

Þæra indiscra kyning þe is gehaten gundoforus asende his gerefan to sirian lande to secenne sumne wyrhtan þe wel cunne on cræfte . cum nu ic þe asende sona forð mid him.

Þa andwyrde thomas .

Eala þu min drihten . send me þyder þe þu wille buton to þam indiscum .

Se hælend him cw̅ to .

Far nu and ic beo mid þe . and þe ne forlæte . and æfter þan þe þu me gestrynst þa indiscan . þu cymst to me mid wuldor-beage martyr-domes .

Thomas him andwyrde . þu eart min drihten . and ic eom þin þeowa gewurðe þin willa .

Efne þa se ge-refa reow him to lande abbanes gehaten fram þam indiscan kyninge . and eode geond þa [scira] [MS. has scipa] his ærende secende .

Crist him þa eode to . and cw̅ openlice .

Hwæt bigst þu Iunglincg? [sic @ Skeat]

He andwyrde and cw̅ .

Min hlaford þæra indiscra cyning asende me to þysum earde to axienne wyrhtan . þæt ic hí gehyrige . ham to his weorce . oþþe ic hí bicge . gif hi beoð þeowe . þa þe on stane cunnon . and gecwemlice on treowe þæt hi on romanisce wisan ærære (sic) his cynebotl .

Þa cwæð se hælend to þam cnihte sona .

Ic hæbbe ænne wyrhtan wurðfulne and getreowne . þone ic oft asende to ænlipigum burgum . and swa hwæt swa he begit his swinces to medes . he hit bringð to me butan swicdome .

Þisne ic wille sendan gif þu swa wylt mid þe þæt þu mid wurðmynte æfter þam weorce eft hine asende gesundne to me . þa blissode abbanes . and beah to his cneowum . | and se hælend betæhte þone halgan thoman him ham to hæbbenne . and hí swa to-eodon .

Þa axode abbanes þone arwurðan apostol .

Sege me to soþan gif þu sy his þeowa .

Thomas him andwyrde .

Gif ic his æht nære ic wolde forseon sona his hæsa . ac ic eom his þeowa . and þa þing ne dó þe ic sylf geceose . ac þæt me sægð min hlaford .

Ic eom án his þeowena of þam ungerimum . and we ealle cunnon cræftas on weorcum . and farað geond scira and butan swic-dome bringað eft urum hlaforde þæt þæt we ge-earniað .

Hi eodon þa to scipe and heora segel arærdon . and mid winde ferdon swa swa him gewissode god .

Abbanes þa cw̅ eft to þam apostole .

Gif þu canst on cræftum swa swa þu cwæde nu ǽr . hwi wolde þin hlaford þe alætan to me .

Thomas him cw̅ to be cristes getimbrunge .

Ic lecge þa grund-weallas þe gelæstað æfre . and ic sette þone wáh þe ne asihð næfre . and þa egðyrle macige þe ælteowe beoð þæt þam huse ne bið wana þæs healican leohtes .

Ic arære þa ge-timbrunge . þæt hire hróf ofer-stihð ealle gebytlu . and bið utan fæger . and swa-þeah wlitigre þæt weorc wiðinnan .

Swa hwæt swa bið on marmstane . oþþe on mærlicre getimbrunge . ic soþlice wyrce . and gif þu wilt me befæstan cnapan to lærenne ic him cuðlice tæce .

Abbanes þa cw̅ .

Ænlic is se wer þe swilce wyrhtan hæfð he is selra þonne sum kynincg .

Thomas him andwyrde .

Ænlice þu spræce kyninges sunu he is ancenned his fæder . and hylt his fæder rice on healicum muntum . þær nan feond ne cymð þe his frið awyrde . ne þær wædla ne bið . ne wanhal gemet .

Hi seglodon þa forð seofon niht on án . and on land eodon . ac hit bið lang-sum to secganne ealle þa wundra þe he | worhte on þam lande . forðan þe we onettað to his arwurðan þrowunge .

Hi comon þa æt nextan to þǣ cyninge on india . and abbanes gebrohte ardlice thoman to þæs cyninges spræce . and hé cw̅ him to .

Miht þu me aræran on romanisce wisan cynelice gebytlu? [sic @ Skeat]

He cw̅ þæt he mihte .

Þa sceawodon hí þone stede þær hit standan sceolde . and thomas eode metende mid anre mete-gyrde þone stede . and cw̅ þæt he wolde wyrcan þa healle ærest on east-dæle and þa oþre gebytlu bæftan þære healle . bæðhus . and kycenan . and wint̅-hus and sumor-hus . and wynsume buras . twelf hus togædere mid godum bigelsum . ac swylc weorc nis gewunelic to wyrcenne on englalande . and for-þy we ne secgað swutellice heora naman .

Þa beheold se cyning and cwæþ to þam apostole .

Þu eart æþela (sic) cræfta and kynegum þu sceoldest wyrcan .

Se cyning þa betæhte þam cristes wyrhtan unge-rim feos to forðigenne þæt weorc . and rád geond his hamas swa swa his rice læg .

Thomas þa ferde freolice bodigende godes geleafan . geond þæt land gehwǽr . and fullode þa ge-leaffullan . and þæt feoh dælde rumlice þearfum and arærde cyrcan .

Hit gelamp þa swa þæt he to geleafan gebigde ungerim folces and fyrðrode cyrcan . and preostas gehadode to þæs hælendes biggengum binnan twam gearum . ǽr se brema kyning gundoforus gecyrde to ðære scire ongean .

Hit wearð þa gecydd þam cyninge þus . and he het gebindan begen mid racenteagum . abbanes . and thoman . and on þeostrum cwearterne gramlice scufan . oþ þæt hí man ofsloge .

Þa læg þæs cyninges broðor his lifes orwene se wæs gad gehaten gundofore swiðe leof . and he elcode forðy hu he | embe hí dyde .

Mid þam þe he wolde hí to wæfersyne tuc[i]an þa gewát se gád of worulde to helle .

Man heold þa þæt lic on þa hæðenan wisan . and se broðor wolde wurðlice hine bestandan . and kynelice macian mid mærðum his byrgene .

Þa on þone feorðan dæg færlice on mergen aras se ylce gád aræred þurh god . and þa lic-men wurdon wundorlice afyrhte for þam niwan wundre þæt he wearð geedcucod .

Þa clypode se ge-edcucode and cw̅ to his breðer .

Gehyr nu min broðor be þam halgan men þone ðe þu woldost to wæfer-syne tucian . se is godes freond . and godes englas him þeniað .

Min sawl wæs gelæd soþlice to heofonum þurh godes englas . and ic þær geseah þa mæran gebytlu þe thomas þe worhte on þære gelicnysse þe he hit gelogode hér . mid gymstanum gefrætewod . fægere geond eall .

Mid þam þe ic sceawode þa scinendan gebytlu . þa sædon me þa englas .

Þis synd þa gebytla þe thomas getimbrode þinum breðer on eorðan .

Ic wiscte þa þæt ic moste on þam mæran huse huru dure-werd beon .

Drihtnes englas þa cwædon .

Þin broðor nis wyrðe þises weorces fægernysse . gif þu hit habban wylt we biddað þone hælend þæt he þe arære of þam reðan deaðe . and þu bigst hit siððan þæt þin broþor underfó his feoh þe he wenð þæt him for-worpen sy .

Æft̅ þysum wordum he efste to þam cwearterne . and ge-sohte þone apostol secgende mid wope .

Min broþor nyste leof þæt þu þæs lifigendan godes apostol wære . and he hæfð healice agylt .

He un-band hine sona . and bæd þæt he under-fenge deorwurðe gyrlan .

Þa cw̅ drihtnes þegen .

Git þu nast þæt ne weriað wuldorfulle gyrlan ne flæsclice frætewunga þa þe folgiað criste . | and gewilniað to hæbbenne þa heofonlican mihta .

Þes pallium þe ic werige wyle me gelæstan . and min syric ne tosihð . ne mine sceos ne to-bærstað . ær þan þe min sawl siðað of þam lichaman .

Efne þa þa hí ut-eodon of þam ealdan cwearterne . þa gesohte gundoforus þone godes apostol biddende miltsunge his mis-dæda georne .

Þa cw̅ thomas him to .

Crist min drihten hæfð micel getiþod þurh his mildheortnysse eow . þæt he wolde geswutelian swa his digelnysse eow .

Nu syndon eowre scira . and eowre ceastra . afyllede mid halgum cyrcum . and þæs hælendes geleafan . beoð eow sylfe nu gearwe to ge-wendenne to criste . þæt ge beon gefullode fram fyrnlicum synnum . and beon gehalgode on þam halwendum fante .

Þa cw̅ sona gád to þam godes apostole .

Þa gebytlu ic sceawode þe þu minum breþer getimbrodest . and englas me geærndodon to þam ælmihtigan hælende . þæt ic hí gebicgan moste .

Þa cw̅ bliþelice thomas . hit stent on þinum breþer gif þu hit (sic) gebicgan most .

Se cyning þa gundoforus cw̅ to his breþer .

Nu hit me ge-worht is . ic wene þæt hit min beo . wyrce se apostol þe oþer weroc þyllic . gif he þonne ne mage macian þe oþer . unc bam mæg helpan to hæbbenne ðis án .

Þa cw̅ se halga apostol .

Se hælend hæfð getimbrod ungerime wununge . and widgylla gebytlu fram middan-eardes frymðe mærlice on heofonum . and þa beoð geceapode mid soþum geleafan .

Gif ge willað nu beon embe þa gebytlu swiðor . and embe þa heofonlican speda sprecan on eornost . þonne magon eowre æhta yrnan eow ætforan . and hí ne magon folgian on forðsiðe eow .

Lætað nu eowre æhta wydewum fremian . | wædlum . and wan-halum and witað to soþan þæt hi be hundfealdum eow gehealdene beoð þær þær nan geendung eow on ecnysse ne becymð .

Þa asprang his hlisa geond þæt land wíde þæt to indian come cristes apostol se þe mihte gehælan mid his handa hrepunge deafe . and blinde . and þa deadan aræran .

Þa wende þæt land-folc þæt he wære god sylf . and brohton him kynehelmas . and budon him gyrlan kynelice geworhte . and woldon him offrian . hryþera . and rammas . swa swa ricum gode .

Thomas þa gecw̅ þæt [þæt @ Skeat] hí comon ealle to anum gemote þæt he mihte him secgan hwæt him to donne wære . and hí dydon þa swá .

Hi comon þa feorran to anum felde eft . and manega þider feredon mislice untrume . þæt se halga thomas hí gehælan sceolde .

Þa hét se halga apostol ahebban þa seocan on anre stowe ealle . and stod him to-middes . up-astrehtum handum to heofonum and cw̅ .

Eala þu halga god ungesewenlice wealdend and un-awendend-lic þurh-wunigende æfre . þu þe asendest us þinne sunu ælmihtigne . se forgeaf us þa mihte þæt we mihton gehælan . adlige and un-trume ealle on his naman . and behét us to-eacan . þæt swa hwæs swa we bædon on his halgan naman æt his heofonlican fæder þæt he us getiþode swa swa ælmihtig god .

Nu bidde we on his naman þæt þu gehæle þas untruman þæt þis folc tocnawe mid fullum geleafan þæt þu eart ana god mid þinum ancennedan suna . and mid þam halgan gaste heofona wealdend .

Æfter þysre clypunge þa hi cwædon . amen .

Þa com þær swilc leoht . swilce þær liget brude þæt hí ealle wendon þæt hí forwurðan sceoldon . and lagon astræhte lange mid þam apostole .

Þa arás thomas up and hét hí arisan and cw̅ .

Min drihten sylf cō hider swa swa scinende liget . and hæfð eow gehæled ahebbað eowre heafda .

Þa arison þa wanhalan wundorlice gehælede [wuldrigende] þone ælmihtigan . and his arwurþan apostol .

Hwæt þa thomas astah to anum stane and stód þæt hí ealle mihton hine ænne geseon . and clypode hlude . and cw̅ to þam folce .

Gehyrað nu ealle .

Se hælend me asende to þysum earde hider and ic his þeowa eom [mann] swa swa ge syndon . and he asende me to þy þæt ic eow tæcan sceolde . hú ge þa sceandlican godas mid ealle forlætan . and mid geleafan bugan to eowrum scyppende . se þe soð god is ana . and wile gehealdan þa þe on hine gelyfað .

He tæhte þa langlice geleafan þam folce . and hu hi leahtres for-bugon . and bysmorlice dæda . and hú hí on godum weorcum þurh-wunian sceoldon .

He cw̅ eft to þære meniu þe on þam gemote wæron .

Ne eom ic na god . ac eom godes þeowa nimað eowre sceattas þe ge me syllan woldon . and dælað hí þearfum for drihtnes lufan . and bið gearwe to fulluhte mid fullum geleafan .

Hi dydon sona swa . and on þone sunnan-dæg wurdon feowertyne þusenda gefullode on criste . butan wifum and cildum . þe ne wurdon ge-tealde .

Þa wearð se halga thomas gewissod eft þurh god þæt he sceolde faran to þære fyrran indian . and gewende þyder . and wundra ge-fremode .

He gehælde þær þurh god . healte and blinde and ealle untrumnyssa . and þa egeslican hreoflian (sic) and deofla adræfdon (sic) and þa deadan arærde .

 land-folc þa ne mihte his lare wiðcweþan . þonne he swilce wundra geworhte him ætforan .

Sum wíf hatte sintice . seo wæs six gear blind . and wearð þa gehæled æt þam halgan apostole . and cō to hire magan migdonia gehaten beorhte locigende . þe blind hire | fram eode .

Þa cw̅ migdonia . þes man is god sylf oððe godes engel þe þine eagan onlihte swa butan læcecræfte . and hí swa lange spræcon oð-þæt hí eodon butu þær se apostol bodode .

Migdonia þa gelyfde on þone lifigendan god . þurh þæs apostoles lare . and leng nolde cuman to hire weres bedde . æfter þære bodunge .

Seo migdonia wæs þæs kyninges wifes swuster . and hire wer þa gemacode wið migdeum þone kyning þæt man sette on cweartern sona þone apostol .

Migdonia þa cō to þam cwearterne dreorig . and feoll to his fotum mid fyrhte cweðende .

Ic bidde þe leof þæs lifigendan godes apostol þæt þu for me ne under-fó . swa fullicne teonan . and godes yrre becume for þam intingan ofer me .

Se godes man hire cw̅ to .

Gang þe ham ongean . and ic cume ham to þe þæt þu oncnawe þurh þæt . þæt ic sylf-willes þrowige . for mines scippendes naman . and hu micel se geleafa mæg þurh god gedón .

Heo dyde þa swa . and hire dura beleac licgende on gebedum on hire bure astreht .

Efne þa se apostol on þære ylcan nihte cō to migdonian and cw̅ .

Swa swa þu becymst þurh me to þam ecan life swa ic eac becume þurh þe to criste . mid kynehelme martyrdome[s] beo nu swiþe anræde .

Heo andwyrde mid fyrhte .

La leof ic þe bidde þæt þu onlihte mine sawla . þæt ic geseon mage þone soðfæstan weg þæt ic ne befealle on þone fulan sæð .

Thomas hire cw̅ to . cép þæt þu fæste seofon dagas georne . and ic syððan cume eft to þe . and þe gefullige fram fyrnlicum synnum . and ælcne þe gelyfð on þone lifigendan god .

Æfter þysum cō hire wer to þam kyninge migdeum and bæd georne þone kyning þæt seo cwén moste gespræcan hire swuster cunnian | gif heo mihte hire mod gebigan þæt heo his gebedda wære .

Ne mæg ic hí geolæcan . ne mid ege gedón þæt heo ete mid me oþþe on me beseo .

Þa geþafode se cynincg þæt seo cwén þider eode . and heo cw̅ sona to hire swuster ðus .

Eala þu migdonia min leofe swustor . hwí forsihst þu þinne wer . and geunwurðast þe sylfe .

Se kyning sylf hit bemænð . and his men ealle þæt þu swa færlice forlure þin gewitt .

Migdonia hire andwyrde .

Eala þu min swuster . wistest þu þæt ic wát . þas word þu ne cwæde .

Se apostol wyrcð fela wundra on mannum . and sægð us to soþan þæt sy oþer líf undeadlic and ece . ælces yfeles bedæled .

Nu to niht eode se ealdorman him to . forþan-þe his suna wæs færlice dead . and lædde þone apostol to þam lífleasan cnapan . and he sona arærde his suna of deaðe . nu he sitt . and lærð þær geleafan on þam huse . and gehælð þa untruman ealle þe him to cumað .

Triptia seo cwén cw̅ hire to andsware .

Gif hit swa is . swa þu sægst . ic wille geseon þone man . dyslic bið to forseonne soðlice þæt ece líf . and heard-mod bið se man þe ne mage þysum gelyfan .

Hi eodon þa butu his bodunge to gehyrenne . hi gemetton þa þone apostol micclum gebysgod ofer þe untruman men þe he ealne dæg gehælde . þurh his handa hrepunge on þæs hælendes naman .

Þa ða seo cwén geseah swilce wundra æt him . þa cw̅ heo ofwundrod .

Awyrgede synd þa men þe nellað gelyfan þyllicum weorcum .

Þa stód þær an hreofla tohrorenum lichaman atelic on hiwe . and hine gehælde thomas . and hine gefullode ætforan þære cwene .

Heo feol þa to his fotum fulluhtes biddende . and þæs ecan lifes mid geleafan gewilnode . and cw̅ þæt heo gelyfde | on þone lifigendan god .

Thomas þa bletsode bliþelice þa cwéne . and lærde hí georne to geleafan and cw̅ .

Min drihten me clypode þæt ic cume to him . and min tima is nu þæt ic of middan-earde fare . underfoh nu forðy fulluht æt me hraðe .

He gefullode hí þa . and fela oþre mid hire wera and wifa . and þa unwittigan cild . and lærde hí georne þæt hí lufodon heora cyrcan . and sacerdas arwurðodon . and hí siþodon þa ham .

Þa cō seo cwén on æfnunge to þam cyninge ham . and he cw̅ hire sona to .

Swyðe lange þu wære .

Heo cw̅ eft him to .

Ge cwædon þæt min swuster . and ic sylf eac wende þæt heo gewitleas wære . ac heo soþlice becom to soþum wisdome on þam heo me dyde dæl-nimend þæs ecan lifes .

Soðlice ic ge-seah þone sylfan apostol se þe halwende rǽd æghwylcum men forgifð .

Nu þu kyning miht macian þe undeadlicne gif þu wilt gehyran þone halgan apostol . ne swyltst þu on eccnesse . gif þu soðlice gelyfst .

Þa forhtode se cyning . and hét feccan him to þone foresædan þegen þe hire swustor hæfde . and clypode mid gehlyde . and þæt him sona to .

Mid þam þe ic hogode helpan þinum wife . mid þam ic forleas min . and heo is mycele wyrse me . þonne migdonia þe . and hí motodon lange .

Þa hét se kyning gebringan on bendum him thoman . and axode mid graman .

Hwæt is se eower god þe awent þurh þe swa ure wíf us fram? [sic @ Skeat]

Thomas him cw̅ to .

Þu kyning wilt habban clænlice þenunga and gecwema þenas . wenst þu þæt god nelle se ðe gewylt ealle þing . habban clæna þenas and clænlice þenunga .

Þa cw̅ migdeus se kyning .

Gemaca mid wordum eft . þæt þa wíf gecyrran sylf-willes to us .

Thomas him andwyrde .

| Ic worhte ænne stypel . and þu cwyðst þæt ic sceolde . sylf hine to-wurpan . ac ic secge him swyðor soðlice godes word . þæt se þe lufað on eorþan his eorðlican fæder . modor . oððe bearn . oþþe wíf ofer god . ne bið he gode wurð . and he cw̅ eft him to .

Þu kyning ne miht ofslean þa sawle mid wæpnum . þeah ðe þu þone lichaman alecge on deaðe .

God se soðfæsta kyning mæg asendan ægðer ge sawle ge lichaman to þam ecan fyre .

 wif moste þa swa hire wer forlætan for-þan-þe he hæþen wæs . and hetol ehtere . ac canones swa-þeah cweðaþ . and beodað þæt nan wíf ne sceole hire wer forlætan swilce for eawfæstnysse . buton him bam swa gelicige .

Þa het se kyning lecgan hate isena sona under his nacodum fotum . þæt he lange swa þrowode . ac þæs arn wæter up wundorlice sona and celde þa isena . þa cw̅ thomas him to .

Ne dyde god þis for me . ac for þe swiþor

 þu swa huru gelyfde on þone lifigendan god

Witodlice he mæg þa mihte me syllan þæt ic butan wætere þin wite me ne ondræde .

Þa hét migdeus se kyning þone godes man gedón on weallende wæter . þa wearð hit acolod . and nan brand nolde byrnan under þam wætere .

He wearð þa gelæd to þam lifleasum godum þæt he his lác sceolde lecgan . him on offrunga . and his cneowa gebigan þam bysmorfullum anlicnyssum .

Þa gebæd hine thomas bealdlice to his drihtne . and het þone scuccan þe on þam scincræfte wunode þæt he ut eode of þære anlicnysse him to . and hét hine on godes naman þæt he towende þa anlicnyssa . and þæt deofles templ . swa þæt hit ne derode nanum .

Þa eode se deofol of þære anlicnysse ut . and towende hí sona swa swa wex | formylt . swa þæt ne beláf hire an lim ge-sund .

Þa clypodon þa hæþen-gildan . and hetelice grimetodon . and heora an sona ofsloh þone apostol mid atogenum swurde . sæde þæt he wolde his godes teonan wrecan . and se cyning gewende þanon . for-þan-þe þæt folc wolde wrecan þone apostol .

Hi feredon þa his lic mid geleafan to cyrcan . and wurðlice bebyrigdon . to wuldre þam ælmihtigan . þær wurdon gelome wundra gefremode . wode men þær wæron on gewitte gebrohte . and gehwilce untrumnyssa hwil-tidum þær wurdon gehælede þurh god . and se godes apostol wearð syððan geferod to syrian lande mid micelre arwurðnysse . þam ælmihtigan to lofe se þe on ecnysse rixað riclice mihtig . Amen .

Chapter XX

{{subst::Ælfric's Lives of Saints/XXsig}}

Chapter XX

{{subst::Ælfric's Lives of Saints/XXfal}}

Chapter XX

{{subst::Ælfric's Lives of Saints/XXxii}}

Chapter EX

xi. kal. febr. passio sancti vincentí martyris.

| On ispánian lánde þære spéoniscan léode . wæs se halga martir þe hatte uincentius to menn geboren . and mid his mágum (fægere) afedd . on mycclum (þeawum) cristen* cristen-dóme . and he (eac) on cristes láre wel þéonde wæs . oððæt he wearð ge-hádod to halgum (ercan) diácone . þam helende þeowiende mid þam mǽran bisceope ualérium . se wæs þa mære láreow on ispánian lánde . swá swá seo gerecednysse us segð on lédenum geréorde . þa árás seo ehtnys þæra arleasra cwelleræ wíde geond þas world wódlice swiðe on-géan cristes geléafan . and on-géan þa cristenan menn (ðe god lufedon) forþan þe se deofol wolde adwæscan þone geleáfan mid þam mycelam (sic) ehtnessum . and þam ormétum wítum . ac swa man má of-slóh þara martira þá . swá þær má ge-lyfdon þyrh þa mycclan wundra þe þa halgan geworhtan . þurh þæs hélendes mihte . forþam þe soða geléafa þæs soðfestan godes ne byð næfre adwæsced . þurh þa deofollican ehtnysse . ac byð swiðor ge-éacnod swa swa us segað (ure) béc .

On þam dagum wæs þa sum héretoga wælhreow datianus ge-hátan swiðe hetol éhtere on anre heafod-byrig on þam fore-sædan lánde . þe begeat | æt þam cásere þæt hé acwellan moste þa halgan cristenan menn mid mislícum witum .

Him geúþe þa se cásere swa swa us cyþað bec . þæt se wælhreowa ehtere þone anweald hæfde . þæt he moste acwellan þa cristenan (men) mid wítum . for-þam-þe hí begen wǽron mid bealowe afyllede . (and) criste(s) wiðer-winnan mid wódlicre reðnysse .

Hwæt þa datianus se deofollica cwellere on þam anwealde þe he under-fangen hæfde . ge-cydde his wódnysse ofer þa cristenan menn . and began to dreccenne mid dyrstigum anginne þa halgum bisceopas . and þa ge-hádodan preostas (and þa diacones) .

Wolde ǽrest þa heafod-men þæs halgan geleafan mid wítum ofer-swíðan . þæt he syððan mihte þa læssan ofer-cuman and fram heora geléafan gebígan .

Þa éfste se bisceop and se eadiga uincentius to þam æðelan martir-dóme .

Þóhtan þæt [þæt @ Skeat] hí wúrdon wítodlice gesælige . gif hí mid est-fulnesse éardlice under-féngon þone wuldor-fullan cyne-helm . heora martyr-dómes þurh þa ándætnysse þæs hælendes ge-leáfan .

Datianus þa se deofollica éhtere hét gebringan þa halgan gebúndene mid rácenteagum into ánre burig . and hí begen (het) be-lucan on leoht-léasum cweárterne .

(and) Lét hí liggan swa on mete-leaste (swiðe) micclum ge-héfegode mid þam héardan ísene . hópode þæt hi scéolde þurh þa wíta abúgan fram godes ge-leafan .

Æft̅ langsumum fyrste he hét hí gebringan him to . wende þæt hí wǽron mid þam wítum for-numene . and mid þære mete-leaste | miht-lease gedóne . wolde hi gewítnian mid márum [→máran] wítum . þæt hí swa eaðelice ge-éndian ne scéoldan .

Hi cómon þa begen mid bliðum (mode and mid fægerum) andwlitum and ansundum lichamum . to þam geleafleasan déman . and he wearð of-wundrod þæt hí wǽron ansunde and fægeres híwæs on fulre mihte . and axode þa weard-men hu-meta hí dorston hí swa wel fédan mid wistum and dréncum . _{hí cwǽdon þæt hí hym on naþor ne dydon}

He ne mihte na to-cnáwæn þæt crist sylf hí afedde . and be-fran þa mid graman þone fore-sǽdan bisceop . (þus axian)

Eala þu ualerius ic þe be-frine nu . hwæt dest þu mid þam þæt þu durre winne ongéan þone cásere (oððe ongein us) swilce þurh éawfæstrnysse . ac [→Ac] þe bisceop ne [→nolde] ge-andwearde þam wælhreowum swa hraðe forþan þe god wólde þæt he wúrde ofer-swiðed þurh þone diacon (vincenti᷒) on þam martir-dóme þe þa gearo wæs to þam wuldorfullan sige . and þæt se man-fulla mihte eac to-cnawan þæt se bisceop mihte mid gebyldum (and godum) geléafan his wíta for-seon .

Þa ða he wearð ofer-swíðed þurh þone diacon mid his (leofan) drihtnes ge-leafan [→mihte].

Þa cwæð uincentius to þam árwyrðam (sic) bisceope (þus) . (la leof ealdor ge)andweard þam árleasan mid anrædum geléafan . þæt his wódnys swa wurðe to-brut . mid ealdor-dome ures drihtnes (soðlice) mihte .

Seo ylce nǽdre spécð nu þurh þises arleasan muð . þe þa frum-sceapenan men (Adam and éuan) gefúrn for-lǽrde . and mid niðfullum ándan him be-nǽmde þæs wuldres þe him god forgeaf (on neorxna wange) gif hi him gehýrsumodon .

He ne ge-earnode nánes wuldres . ne he ne wunode on soðfæstnesse . ac þone deað þe he sencte þam frum-sceapenum mannum . þone he dránc ǽrest him sylfum to bealowe .

Winne he wiþ me on þisum ge-winne nú . and he wið me feohte on his feondlicum trúwan . and he ge-syhð soðlice þæt | ic swyþor mǽg . þone ic beo ge-wítnod þonne he þe wít-naþ .

Forþan þe he sylf sceal swærran wítu þrowian . and he byð ofer-swiðed on minre geswéncednysse .

Þa geangsumode (bealh hine) [over geangsumode] sona se árleasa datianus . and cwæð to his gingrum and to his witnerum þus .

For-læteð þysne bisceop and ge-bringaþ on wítum uincentium þone wiðer-coran þe us mid wórdum swa tynð . ahóð hine (ic háte) on þære héngene . and hételice astreccað ealle his lima . þæt þa líþa him to-gaan .

Þa ge-fæstnodon þa cwelleras þone cristes þegn on þære héardan héngene . and hine hetelice tihton swa swa man web tiht . and se wæl-hreowa him cw̅ to .

Hwæt segst þu nu uincentius . hwæt þing þe be þe sylfuum and be þinum earman lichaman on þysum laþum wítum .

Se halga wér þa cwæþ to þam wælhreowan þus .

Þises ic ge-wilnode and gewiscte ǽfre . nis me nan þing leofre þæt me on mínum life getimode . and þu swiðost ge-þwærlæcst mínes sylfes gewilnunge . nelle ic þæt þu ge-swíce . Forþan þe ic sylf gearo eom wítu to ðrowienne . for þam wuldor-fullan drihtne . nelle ic þæt ðu wanige mín wuldor for gode (and míne gesælða) . and þonne þú me wítnast . þu bist sylf ge-wítnod .

Datianus þa deofollice yrsode (and wæs gram on his mode) and be-gan to sleanne swiðe mid gyrdum his agene witneras þe þone halgan witnodon þæt hi swiðor sceolde hine ge-swǽncan .

Se halga wer þa cwæþ .

Nu þu ge-wrecst on him ða wítu þe ic þrowige for þinre wælhreownysse . swilce þu sylf wille ge-wrecen me on him .

He hrymde þa swiðor and mid reðnysse grymetode (swa leo) . and gyt swiðor wedde sleande his cwelleras mid saglum and mid gyrdum . het hi swiðor witnian | þone halgan wer on þære hengene . þohte þæt he mihte his mod ahnexian þurh þa ormætan wíta . ac he wann on idel . forþan þe hi ateorodon on þære tintregunge . þæt hi leng ne mihton þone martir gewitnian . and he anræde þurh-wunode on þam witum swa þeah .

Datianus þa axode mid ǽblæcum andwlitan his reðan ( ) cwelleras . þus cweðende him to .

Hwær is nú eower miht and eower (and eower) mǽgen becumen . ne on-cnáwe ic eowere hánda þe ǽfre hétole wæran . swa oft swa ge ge-witnodon þa ðe wǽron for-scyldegode . oþþe þurh man-slihte^(s) oððe þurh morþ-dǽda . oððe þurh dry-cræft . oððe dyrne forliger . æfre ge ge-wyldon mid wítum hi ealle . and hi heore díglan dǽda éow bedýrnan ne mihton .

Ac ge nu ne magon þusne mann ofer-swiðan þæt he húru súwige on þys᷒ scearpum witum .

Þa smércode se halga wer and to þam hetolan (datian᷒ þus) cwæð . þis is þæt awriten is witodlice on godes ǽ . þæt ða ge-sceondan ne geseoþ ne þa gehýrendan ne ge-hýrað .

Drihten crist ic andette þæs ælmihtigan fæder sunu mid þam halgan gáste anne soðne god .

Ac wítna me gyt swiðor for þissere soðan andetnysse þæt ðu on eallum þingum þe ofer-swiðedne on-cnáwe .

Datianus þa cwæþ . to þam drihtnes cyþere ge-milsa þe sylfum and ne a-myr þine geoguþe and þin lif ne ge-scyrt . on þisum suslum þus . þæt þu húre æt-berste þisum heardum witum huru nu æt ende þeah þu ær noldest .

Uincenti᷒ him cwæþ to mid cénum ge-leafum þus . ne ondræde ic (me) þine wítu ne þine wælhreowan tintrego . ac ic swiðor ondræde þæt þu ge-swican wylle þinre reðnusse and swa me gemiltsian .

Dacian᷒ þa hét hine gedon of þære héngene . and hine | eft ahón on heardum gealgan sona and hine man þa swáng and mid saglum béot . and mid blysum ontende his bare líc eall astrehtum limum . ac his geleafa swa-þeah (ne atéorode) on his drihtenes andetnysse æfre þurh-wunede .

Man ledde to his breostum (feower) brade ísene clútas swiðe glowende þæt hit sang ongean . and hi þa téartan wíta mid wítum ge-éacnodon . and his ærran wúnda mid wúndum of-settan . and into his innoðum hine gewúndodon . swa þæt on his lichaman nan dǽl ne be-láf þe nǽre ge-wundod on ðære wítnunge (soðlice) .

Him fleów þa þæt blod (út) ofer ealne þone lichaman . and him (eac) se innoþ eac geopenode ongean . and his liþa (eall) to-slupon on þam laðum tintregum .

Ac he eall þis for-bǽr mid bliþum andwlitan and mid (godes) strangum gaste on godes andetnysse to þam hélende clypiende þe he on gelyfde .

Wala wá cwæþ datian᷒ we synd ofer-swiðede .

Ac secaþ nu ic bidde an blind cweartærn þær nan leoht ne mage inn . and on þam myclum þeostrum strewiað geond eall tobrocene tigelan scéarpe ge-écgode . and þær-on astreccaþ þysne wiðer-coran . þæt he hine bewendan fram wite to wíte and symble gearewe habbe .

Belúcað hine þonne fæste þæt he licge þær ána leohtes bedæled on þam laðum bedde . secgað me swa sona swa ge on-cnawaþ þæt he cucu ne byð .

and Þa cwelleras swa dydon . ge-brohton þone halgan wer on þam blindan cwearterne . and be-sǽton hine syððan . wakigende .

Mid þam ðe þa weard-men wurdon on slǽpe .

Þa com þær heofonlic leoht in-to þam halgan wére on þam blindan cweartearne swilce (an) beorht sunbéam . and him wearð gebed|dod mid hnescre beddinge (swiðe ǽnlice) . and he sylf þa sang his sealmes bliðe his drihten heriende mid incundre heortan .

(þa ða weardmen awocan) Þa wundrode þa weard-men þæs wynsuman leohtes swiðe afyrhte for þam færlican tácne. þa cwæþ se halga wer of þam heofonlican leohte . ne beo ge afyrhte . ic heō nu gefréfrod mid engellicre þenunge . gað in and sceawiað (hu me is) ge gebrohten me on þrystum . and ic blissige nu on leohte . mine bendas sund to-lýsede . and ic blissige mid sange .

Ic eom nu gestrangod and hnesce under-streowod . wundriað þises þæt se þe wurðaþ god mid soþre andetnesse . þæt he sige-fæst byþ æfre .

Cyþaþ nu ardlice eowerum arleasan hlaforde hwilces leohtes ic brúce . and hwilcere beddinge . þæt he gyt mage asmeagan sum (þing) syllic wíte to mínum wuldre (ic bidde) ne wanige he nán þing þæs þe (he) mínum martirdóme mage to wuldre becuman . his mildheortednesse ane ic me ondrǽde swiðost þæt he beo awend swilce he wille (me ge) mildscian .

Hi cyddon þa þis þam hétolan cwellere . and he wearð geangsumod (on his mode) [se árleasa datianus] and ǽblæce on nebbe cwæþ him to andsware .

Hwæt mage we him mare dón nu we synd ofer-swiðede [→ofer-cumene] .

Berað hine nu ic bidde (ut) of þam blindan cwærterne to suman softan bedde þæt he (mage) swa hine (ge)reste . nelle ic hine wýrcan wuldor-fulran gyt . gif he on þam wítum gewitnod ateorað .

Hí hine (namon and) þa bæran bliþelice on æarmun (sic) þe hine ær witnodon on þam wælhreowum tintregum . and hí his fét cystun . and his flówende blód geornlice gaderoden him sylfum to hǽle . and geleddon hine | swá on þam softan bedde swa swa se arlesa hét and for-léetan (sic) hine swa .

Hit gelámp þa sona æft̅ litlum fyrstum . þæt se halga (diacon) gewát of worlde to gode mid sige-fæstum martirdóme ofer-swiðdum deofle to þam ecan wuldre mid þam wel-willendan drihtene . þæt þæt he þam be-het eallum þe hine lufiað and þam þe his ge-leafan healdaþ oð ende .

Datian᷒ þa cwæþ se deofollica cwelleræ of-sceamod swa-þeah . gif ic ofer-swiðan [→ofer-cumen] ne mihte hine ǽr cucene . ic hine witnige (þus) deadne .

Awyrpað nu his líc on anum widgillum felda . fugelum to ǽse . and fúlum hundum to mete . and þam wild(e d)eorum . and his wælhreowan þegnas swa dydon . sona ge-feredan þæt lic to þam feldan middan . and hit þar awurpon wildeorum (and fugelum) to mete .

Hit gelamp þa sona þur[h] godes fore-sceawunge þæt an sweart hrém þær fleah sona to . and be-werode þæt lic wið þa wildan fugelas and hi ealle afligde mid his fiðerum aweg . and eac þa reðan deor mid his on-rǽsum .

Se ælmihtiga god þe þe Eliam his witegan þurh þone sweartan hrǽm asende hwilon mete . (on þam westene ðe he onwunode) and hine þa afedde (ðær) þur þæs fugelas þenunge swa swa on cyninga bocum fulcuð is be þam . þe ylca (god) ge-heold nú þæs halgan weres lic þurh þæs hrēmes weardunge wið þa oðre fugelas .

Þis wearð eft gecydd þam arleasan datiane . and he þa ge-angsumod þus cwæþ . ne mæg ic hine ofer-swiðan forðon swa deadne . swa ic his swiðor ehte mid swiðlicre ehtnysse . swa ic hine swiðor wyrce wuldor-fulran symle .

Ac gif þeorðe (sic) ne mæg þone mann forniman . be hé besenced on | sælicum yðum . þæt ús swa oft ne sceamige for his anes sige on manna gesihþum . þe hit eall geseoð . (and witon) beo he huru be-diglod on þære deopen sǽ .

Be he be-siwod on anum sæcce mid hefegum [→hefiegum] stanum . and awurpað hine on þære widgillan sǽ . þam fixum to mete þeah þe þa fugelas noldon .

Ða reþan cwelleras þa raþe swa dydon awurpan þæs halgan lic on þære widgillan sǽ . mid þam hefegum [→hefiegum? →hefiegum?] stanum . swa swa hi hét þe déma þæt he huru ne sceolde [e not printed] þære sǽ æt-berstan . þeah þe hé þære eorðan æror æt-burste . (ða hig swa gedon hæfdon. swa ðe déma hi hét) and reowan him hamweard mid healicre blisse .

Ac (soðlice) þæs halgan weres lic þurh þes hælendes mihte . to þam strande be-cō ærþam þe hi stopon on land . and on þam ceosole ge-læg . oð þæt sum geleafful wudewa swutele gebicnunge be þam under-feng hwær se halga lichama læg on þam strande be-worpen mid þam (sand) ceosole þurh þa sǽlican yþa . swilce he be-byrged wære þurh godes wissunge .

His lic wearð þa geferod to geleaffulre cyrcan mid mycelre arwyrðnesse . and þar on innan bebyriged . and his halgan ban wúrdon wíde to-dælede . and mid mycelre lufe hi man wyrðaþ ge-hwær swa swa us secgað béc for his soðan geleafan þam hælende to lofe þe leofað á on ęcnesse . amen.