talke and communyque emong alle beeſtes withoute ony harme or dommage / And they ſhalle doo to yow bothe pleaſyr and alle ſeruyſe to them poſſible / for thus it is concluded and accorded / and alſo confermed by the grete counceyll of all beſtes / And yet they haue made commaundement that none be ſo hardy to vexe ne lette in no wyſe ony other / be it neuer ſoo lytyll a beeſt / For the whiche good tydynges I praye the / that thow wylt come doune / to thende / that we may goo and ſynge / Te deum laudamus / for Joye / And the cok whiche knewe wel the fallaces or falſhede of the foxe anſuerd to hym in this manere / Certaynly my broder and my good Frend thow haſt brought to me ryght good tydynges / wherof more than C tymes I ſhalle thanke the / And ſayenge theſe wordes the Cock lyfte vp his neck / and his feet / and loked farre fro hym / And the foxe ſayd to hym / what godſep / where aboute lokeſt thow / And the Cok anſuerd to hym / Certaynly my broder I ſee two dogges ſtrongly and lyghtly rennynge hytherward with open mouthes / whiche as I ſuppoſe come for to brynge to vs the tydynges whiche thou haſt told to vs / And thenne the Foxe whiche ſhoke for fere of the two dogges ſayd to the Cock / god be with you my frend / It is tyme that I departe fro hens / or
